1 Korint 9:1-27
9 Ta ijjab anemkwõj ke? Ejjab ña rijjilõk ke? Iar jab lo Jesus ad Irooj ke? Ejjab kom̦ leen jerbal ko aõ ñan Irooj ke?
2 Meñe ijjab juon rijjilõk ñan ro jet, bõtab ña ij lukkuun rijjilõk ñan kom̦! Kom̦ij ãinwõt juon kein kõkal̦l̦e ñan kam̦ool bwe ña rijjilõk an Irooj.
3 Eñin uwaak ko aõ ñan ro rej ekajete eõ:
4 Ta ejjel̦o̦k am jim̦we im maroñ ñan m̦õñã im idaak ke?
5 Ta ejjel̦o̦k am jim̦we im maroñ ñan bõk kõrã ro pãleem im rej rũttõmak ñan itoitak ippem, ãinwõt rijjilõk ro jet im l̦õm̦aro jatin Irooj im Sipas* ke?
6 Ta kõm̦ro wõt Barnebas ejjel̦o̦k am̦ro jim̦we im maroñ ñan bõjrak jãn am̦ro make kabwe aikuj ko am̦ro ke?
7 Ewõr ke rũttarin̦ae ej make kõl̦l̦ã on̦ããn an pãd ilo tarin̦ae? Ewõr ke en̦ ewõr an jikin kallib kũreep im ejjab m̦õñã jãn leen? Im ewõr ke jabõt en̦ ejjab maroñ ebbõk limen milik jãn bwijjin menninmour ko an?
8 Ta men kein ij ba rej itok jãn l̦õmn̦ak ko an armej ke? Kien eo ejjab bar kwal̦o̦k kõn men kein ke?
9 Em̦õj je ilo Kien Moses im ba: “Kwõn jab lukwõj lo̦ñiin juon kau kom̦aan el̦aññe ej jujuuri wiit ko.” Ta Anij ej inepata kake kau kom̦aan ko ke?
10 Unin an kar ba men in ejjab kõn kõj ke? Kar je men in kõn wõt kõj, kõnke eo ej kapidodo bwidej im eo ej kõjenolo̦k wiit jãn kilier erro ej jerbal im reim̦aanl̦o̦k ñan aer naaj bõk leen.
11 El̦aññe kõmar jeor men ko jãn Anij ibwiljimi, ebõd ke ñan ammim bõk jipañ jãn kom̦ kõn men ko kõmij aikuji ilo kanniõk?
12 El̦aññe ewõr an armej ro jet maroñ ñan bõk jipañ jãn kom̦, innem ejjab l̦apl̦o̦k ammim maroñ bõk jipañ jãn kom̦ ke? Ijoke kõmar jab kõjerbal jim̦we im maroñ in, bõtab kõmar kijenmej ilo men otemjej bwe kõmin jab kapañ ennaan eo em̦m̦an kõn Christ.
13 Kom̦ij jab jel̦ã ke bwe ro rej kõm̦m̦ani jerbal ko rekkwõjarjar rej m̦õñã jãn men ko ilo tampel̦ eo? Bareinwõt, kom̦ij jab jel̦ã ke bwe ro rej jerbal ilo lokatok eo aolep iien, rej bõk aer kõj jãn lokatok eo?
14 Ilo ejja wãween in wõt, Irooj ear jiroñ ro rej kwal̦o̦k kõn ennaan eo em̦m̦an bwe ren bõk aer mour ikijjeen ennaan eo em̦m̦an.
15 Bõtab iar jab kortokjãn jabdewõt iaan menin jipañ kein. Ikar jab je men kein bwe en eñin men eo kom̦win kõm̦m̦ane ñan ña, kõnke enaaj kar em̦m̦anl̦o̦k ñe ij mej jãn aõ kõtl̦o̦k bwe jabdewõt en jol̦o̦k jim̦we im maroñ eo aõ ñan kõmjãje!
16 El̦aññe ij kwal̦o̦k kõn ennaan eo em̦m̦an, innem ejjel̦o̦k unin aõ kõmjãje kõnke ej menin aikuj bwe in kõm̦m̦ane jerbal in. Ilo m̦ool, el̦ap aõ jerata el̦aññe ijjab kwal̦o̦k kõn ennaan eo em̦m̦an!
17 El̦aññe ij kõm̦m̦ane jerbal in ilo m̦õn̦õn̦õ, innem ewõr aõ jinõkjeej, ak el̦aññe ij kõm̦m̦ane meñe ejjab itok jãn kõn̦aan e aõ, jekdo̦o̦n ak inaaj kõm̦m̦ane wõt kõnke kar letoke eddo in ñan ña.
18 Innem ta jinõkjeej eo aõ? Eñin ej bwe ñe ij kwal̦o̦k kõn ennaan eo em̦m̦an, in kwal̦o̦ke ilo ejjel̦o̦k on̦ããn. Ilo wãween in, ijjab kõjerbale jim̦we im maroñ e aõ ñan kwal̦o̦k kõn ennaan eo em̦m̦an ilo juon wãween ebõd.
19 Meñe ijjab juon ri-kõm̦akoko ñan jabdewõt, bõtab em̦õj aõ kõm̦m̦an bwe in ri-kõm̦akoko ñan aolep, bwe in kate eõ ñan jipañ elõñ armej.
20 Ñan ri-Ju ro, iar erom juon ri-Ju bwe in jipañ er. Ñan ro rej pãd ium̦win kien, iar erom juon eo ej pãd ium̦win kien bwe in jipañ er meñe ijjab pãd ium̦win kien.
21 Ñan ro rejjab pãd ium̦win kien, iar erom juon eo ejjab pãd ium̦win kien bwe in jipañ er, meñe ilo m̦ool ij l̦oor kien ko an Anij im ij pãd ium̦win kien Christ.
22 Ñan ro rem̦õjn̦o̦, iar erom juon eo em̦õjn̦o̦ bwe in maroñ jipañ er. Iar erom men otemjej ñan jabdewõt armej bwe in kate eõ joñan wõt aõ maroñ ñan lo̦mo̦o̦ren er.
23 Ij kõm̦m̦an men otemjej kõn wõt ennaan eo em̦m̦an bwe in maroñ in kwal̦o̦ke ñan ro jet.
24 Kom̦ij jab jel̦ã ke bwe aolep rũttõr ro ilo juon iãekwõj rej ettõr, bõtab juon wõt ej bõk tũb eo? Kõn men in, kom̦win ettõr ilo wãween eo enaaj kõm̦m̦an bwe kom̦win maroñ bõk tũb eo.
25 Aolep ro rej jiãe ilo juon iien jiãe* rej kaarmejjeteik er make ilo men otemjej. Rej kõm̦m̦ane men in bwe ren bõk juon kũrawũn eo emaroñ jorrããnl̦o̦k im jako. Ak kõj, jej bõk juon kũrawũn eo ejjãmin jako.
26 Kõn men in, wãween aõ ettõr ejjab ãinwõt juon eo ejaje ia eo ej jibadeke. Wãween aõ ire ejjab ãinwõt juon eo ej baiti kõto.
27 Bõtab ij lukkuun deñl̦o̦ke* ãnbwinnũ im kõm̦m̦an ñane ãinwõt juon ri-kõm̦akoko, bwe el̦aññe ijjab kõm̦m̦ane men in, Anij emaroñ jab buñbũruon ippa* jekdo̦o̦n ñe ña ij juon eo ej kwal̦o̦k naan ñan ro jet.
Footnotes
^ Ãt eo juon etan Piter.
^ Ak “Aolep rukkure.”
^ Ak “kaje; lukkuun katakini.”
^ Ak “emaroñ jol̦o̦k eõ.”
