Kolosse 1:1-29
1 Jãn Paul, rijjilõk an Christ Jesus ikijjeen ankilaan Anij, im eo jeid im jatid Timote,
2 ñan ro jeim im jatim ilo Kolosse, ro rekkwõjarjar im retiljek me rej juon wõt ippãn Christ:
Jouj eo el̦ap im aenõm̦m̦an eo jãn Anij, eo ej Jemãdwõj, en pãd ippemi.
3 Iien otemjej kõmij kam̦m̦oolol Anij, eo Jemãn ad Irooj Jesus Christ, ñe kõmij jar kõn kom̦,
4 kõnke kõmij roñ kõn tõmak eo ami ilo Christ Jesus im yokwe eo ami ñan aolep ro rekkwõjarjar
5 kõn wõt kõjatdikdik eo em̦õj kõpooje ñan kom̦ ilañ. Kom̦ar roñ kõn kõjatdikdik in m̦oktal̦o̦k ikijjeen mel̦el̦e eo em̦ool kõn ennaan eo em̦m̦an
6 ke ear tõparwaj kom̦. Ãinwõt an ennaan eo em̦m̦an jebar leen im eddekl̦o̦k ipel̦aakin lal̦ in, ãindein bareinwõt an jebar leen im eddekl̦o̦k ibwiljimi jãn raan eo kom̦ar roñ kake im lukkuun jel̦ã kõn m̦ool eo kõn jouj eo el̦ap an Anij.
7 Kom̦ar jel̦ã men in jãn Epapras, ri-karejar eo m̦õttam ejitõnbõro, im ej juon ri-jerbal etiljek an Christ ilo etam.
8 Ear bareinwõt kõnnaanek kõm kõn ami kwal̦o̦k yokwe eo jãn Anij.*
9 Eñin unin, jãn raan eo kõmar roñ men kein, ejjab bõjrak am jar kõn kom̦ im kajjitõk bwe kom̦win obrak kõn jel̦ãl̦o̦kjen̦ eo ejim̦we kõn ankilaan Anij ekoba mãlõtlõt otemjej, im bwe kom̦win mel̦el̦e ikijjeen jetõb kwõjarjar,*
10 bwe kom̦win mour ekkar ñan wãween eo Jeova* ej m̦õn̦õn̦õ kake,* kõnke kom̦win maroñ lukkuun kabuñbũruon ilo ami wõnm̦aanl̦o̦k im jebar leen jerbal ko rem̦m̦an otemjej, im bwe en l̦apl̦o̦k jel̦ãl̦o̦kjen̦ eo ami ejim̦we kõn Anij.
11 Bareinwõt, kõmij jar bwe kom̦win maroñ kajoorl̦o̦k ñan joñan eo kom̦ij aikuji ikijjeen maroñ in aiboojoj eo an el̦ap, bwe kom̦win maroñ jutak pen ilo men otemjej ilo ami kijenmej im lañlõñ,
12 ilo ami kam̦m̦oolol Jemãdwõj, eo ear kõmaroñ kom̦ bwe en wõr ami ãjinkõj ilo menin jolõt eo an ro rekkwõjarjar im rej pãd ilo meram.
13 Ear lo̦mo̦o̦ren kõj jãn ad pãd ium̦win marok im bõk kõj ñan aelõñ eo an eo Nejin ejitõnbõro,
14 eo im ikijjeen e ear kõl̦l̦ã on̦ããn ad rõl̦o̦k, mel̦el̦ein bwe em̦õj jol̦o̦k jerawiwi ko ad.
15 Ej nemãmeen wõt Anij, eo jejjab maroñ in loe, im ej menin kõm̦anm̦an eo m̦oktata* iaan aolep menin kõm̦anm̦an ko otemjej.
16 Bwe ikijjeen e, kar kõm̦anm̦an men otemjej ilo lañ im ilo lal̦ in, men ko jemaroñ loi im ko jejjab maroñ loi, meñe ro rej pãd ilo tũroon ko ak ri-tõl ro ak kien ko ak ro ewõr aer maroñ. Em̦õj kõm̦anm̦an men otemjej kõn e im ñan e.
17 Bareinwõt, ear pãd m̦okta jãn men otemjej, im kõn e, men otemjej rar maroñ wal̦o̦k,
18 im e eo ej bõran ãnbwin eo, mel̦el̦ein eklejia eo. E eo ej jinointata im e eo m̦oktata ear jerkakpeje jãn mej, bwe en maroñ m̦oktata ilo men otemjej;
19 kõnke Anij ear kõn̦aan bwe en iio ilo men otemjej,
20 im ikijjeen e, Anij en kõm̦m̦an bwe aolep men ko jet ilo lal̦ ak ilo lañ ren bar aenõm̦m̦an ippãn ikijjeen bõtõktõkin Nejin ke ear to̦o̦rl̦o̦k ilo al̦al̦ in eñtaan* eo.
21 Aet, m̦okta kom̦ar ettol̦o̦k im ri-kõjdat kõnke kom̦ar l̦õmn̦ak kõn jerbal ko renana,
22 ak kiiõ em̦õj an kõm̦m̦an bwe kom̦win bar epaake e ikijjeen mej eo an eo me ear katok kõn ãnbwinnin, bwe kom̦win maroñ kwõjarjar im ejjel̦o̦k lippijinjin ippemi im n̦otaami im̦aan mejãn—
23 bõtab kom̦ij aikuj wõnm̦aanl̦o̦k wõt ilo tõmak, im pen im tõt wõt ioon pedped eo, im jab el̦l̦o̦k jãn kõjatdikdik eo kom̦ar roñ kake ikijjeen ennaan eo em̦m̦an, eo kar kwal̦o̦k kake ñan aolep menin kõm̦anm̦an ko ium̦win lañ. Ña Paul, iar erom ri-jerbal ñan kwal̦o̦k kõn ennaan in em̦m̦an.
24 Kiiõ ij lañlõñ ilo men ko ij eñtaan kaki ñan em̦m̦an eo ami, im ij eñtaan ãinwõt Christ bõtab ij aikuj wõnm̦aanl̦o̦k im kadedeikl̦o̦k aõ eñtaan kõn ãnbwin eo ãnbwinnin, eo ej mel̦el̦ein eklejia eo.
25 Iar erom ri-jerbal ñan eklejia in, ãinwõt ke Anij ear letok ñan ña eddo in bwe in kõm̦m̦ane kõn kom̦ im lukkuun kwal̦o̦k kõn naanin Anij,
26 eo ej kõn men eo ettino im eokkwõjarjar me ear n̦ojak jãn jukjukun pãd* ko m̦oktal̦o̦k im jãn epepen ko m̦oktal̦o̦k. Ak kiiõ, em̦õj kwal̦o̦ke men in ñan armej ro an rekkwõjarjar,
27 aet, ñan ro rej itok jãn ibwiljin ri-aelõñ ko. Anij ear m̦õn̦õn̦õ in kwal̦o̦k ñan er men in ettino im eokkwõjarjar, eo ej juon men eaorõk im eaiboojoj. Men in ej kõn an Christ juon wõt ippemi, aet, kõjatdikdik eo ñan ami bõk aiboojoj ippãn.
28 E eo jej kwal̦o̦k kake ilo ad rõjañ im katakin aolep armej kõn mãlõtlõt eo em̦ool kõn e, kõnke jen maroñ kwal̦o̦k im̦aan Anij aolep armej ro rerũtto ilo tõmak ilo aer juon wõt ippãn Christ.
29 Ñan jem̦l̦o̦kin, ij lukkuun jerbal im kanooj kate eõ ikijjeen jipañ eo jãn kajoor eo an me el̦ap an jerbal ilo ña.
Footnotes
^ Ak “yokwe eo ej jãn jetõb kwõjarjar.”
^ Ak “kajoor eo an Anij.” Lale “Jetõb kwõjarjar” ilo Kõmel̦el̦e Ko.
^ Lale “Jeova” ilo Kõmel̦el̦e Ko.
^ Kajin Grik, “etetal ilo wãween eo ekkar ñan Jeova.”
^ Kajin Grik, “eo ear l̦otak m̦oktata.”
^ Lale “Al̦al̦ in eñtaan” ilo Kõmel̦el̦e Ko.
^ Lale “Jukjukun pãd” ilo Kõmel̦el̦e Ko.
