Kolosse 2:1-23
2 Ikõn̦aan bwe kom̦win jel̦ã kõn joñan aõ kate eõ kõn kom̦ im ro ilo Leodisia ekoba aolep ro rejjañin lo eõ.*
2 Ij kõm̦m̦ane men in bwe bũruon aolep en aenõm̦m̦an, im bwe aolep ren bõrokuk ilo juon wõt yokwe, im bwe aolep ren lukkuun m̦weiie jãn aer lukkuun tõmak bwe ejejjet mel̦el̦e eo aer kõn m̦ool eo. Ilo wãween in, aolep ren maroñ bõk jel̦ãl̦o̦kjen̦ eo ejim̦we kõn men eo ettino im eokkwõjarjar an Anij, men in ej Christ.
3 Em̦õj n̦ooj aolep mãlõtlõt im jel̦ãl̦o̦kjen̦ ko raorõk ilo e.
4 Ij ba men in kõnke en ejjel̦o̦k ej m̦on̦e kom̦ kõn naanin karreelel ko retao.
5 Meñe ijako jãn kom̦ ak bũruõ* epãd ippemi, im ij lañlõñ in naaj lo jerbal ko ami relaajrak im lo an pen tõmak eo ami ilo Christ.
6 Innem, ãinwõt ami kar likũt ami tõmak ilo Christ Jesus ad Irooj, ãindein kom̦win wõnm̦aanl̦o̦k wõt im etetal ilo ami juon wõt ippãn.
7 Kom̦win kapen okrami im kalõk kom̦ ilo e im pen wõt ilo tõmak, ãinwõt kar katakin kom̦, im kom̦win obrak kõn kam̦m̦oolol.
8 Kanooj kõjparok bwe en ejjel̦o̦k ej bõk kom̦ bwe en an ri-kõm̦akoko* ikijjeen katak ko an armej im mel̦el̦e ko reriab ekkar ñan m̦anit ko an armej im l̦õmn̦ak ko an lal̦ in, im rejjab ekkar ñan katak ko an Christ;
9 kõnke e eobrak kõn kadkad ko kadkadin Anij.
10 Kõn men in, ejjel̦o̦k men en̦ kom̦ij likjab kake kõn wõt e. E eo ej bõran aolep kien ko im maroñ ko.
11 Kõn kõtaan eo ami ippãn, kom̦ar bareinwõt m̦wijm̦wij* kõn juon m̦wijm̦wij ejjab kõm̦m̦anin pein armej, ilo ami kar utũk ãnbwinnin kanniõk, im men in ej m̦wijm̦wij eo jãn Christ.
12 Bwe kar kalibwin kom̦ n̦a ippãn ilo peptaij eo an, im ikijjeen kõtaan eo ami ippãn, kar bar kõmour kom̦ ippãn kõn wõt ami tõmak ilo jerbal ko rel̦l̦ap an Anij, eo ear kõjerkakpejeik e jãn mej.
13 Bareinwõt, meñe kom̦ar mej kõn bõd ko ami im kõn ami kar jab m̦wijm̦wij ilo kanniõk, ak Anij ear kõm̦m̦an bwe kom̦win mour ippãn Christ. Ear m̦õn̦õn̦õ in jol̦o̦k aolep bõd ko ad,
14 im ear jeoril̦o̦k* kien ko kar jei im rar n̦ae kõj. Ear julo̦ki men kein ilo an kar dilaiki n̦a ioon al̦al̦ in eñtaan* eo.
15 Ikijjeen men in,* ear anjo̦ ioon kien ko im maroñ ko,* im ear kaalwõjwõj kake er ilo juon m̦aaj in anjo̦ ilo̦bwilej ãinwõt ri-kalbuuj ro.
16 Kõn men in, jab kõtl̦o̦k bwe jabdewõt en ekajete kom̦ kõn ta ko kom̦ij m̦õñã im idaak, ak kõn raanin kwõjkwõj ko ak kwõjkwõjin allõñ ekããl,* ak kõn raanin Jabõt.*
17 Men kein rej annañel̦o̦k men ko renaaj itok, bõtab men eo em̦ool ej Christ.
18 Jab kõtl̦o̦k bwe jabdewõt en bõbrae ami bõk jinõkjeej eo ami, jabdewõt eo em̦m̦an ippãn riab kõttãik bũruon im ej kabuñ ñan enjel̦ ro* im el̦ap an akwel̦ap im jutak wõt kõn men ko ej loi. Eutiej bũruon kõn men ko ejjel̦o̦k tokjãer kõnke l̦õmn̦ak ko an rej ekkar ñan kanniõk,
19 im ejjab l̦oore bõran ãnbwin eo, eo im aolepen ãnbwin eo ej bõk an kajoor jãne im aolep m̦õttan ko ie rej bõrokuk ippãn doon ikijjeen mo̦kwõj im kõjjem̦ ko ie, im ej kõm̦m̦an bwe en eddek ilo wãween eo Anij ej kaddekl̦o̦ke.
20 El̦aññe kom̦ar mej ilo Christ ikijjeen ami kar el̦l̦o̦k jãn l̦õmn̦ak ko an lal̦ in, innem etke kom̦ij mour im ãinwõt ñe kom̦ l̦akkar m̦õttan lal̦ in ilo ami l̦oor wõt kien kein?
21 Eñin kien ko: “Kom̦win jab jibwi, ak edjoñi, ak uñũri,”
22 men kein rej ekkar ñan kien ko im katak ko an armej im renaaj jako ñe em̦õj kõjerbali.
23 Meñe kien kein remaroñ ãinwõt menin mãlõtlõt ak ejjel̦o̦k tokjãer kõnke reban jipañ armej ñan jum̦ae m̦õm̦ ko an kanniõk. Rej l̦oori kien kein bwe ren make peek wãween aer kabuñ, im rej kaeñtaan ãnbwinnier ñan riab kõttãik bũrueer make.
Footnotes
^ Kajin Grik, “lo meja ilo kanniõk.”
^ Naan eo ilo kajin Grik ej pneuʹma. Lale “Pneu′ma” ilo Kõmel̦el̦e Ko.
^ Ak “en ejjel̦o̦k ej aujiidi kom̦.”
^ Lale “M̦wijm̦wij” ilo Kõmel̦el̦e Ko.
^ Ak “julo̦k.”
^ Lale “Al̦al̦ in eñtaan” ilo Kõmel̦el̦e Ko.
^ Ak emaroñ, “ikijjeen e.”
^ Kajin Grik, “ear kõkeelwaane kien ko im maroñ ko.”
^ Ak “iien eo ej jino wal̦o̦k allõñ.”
^ Lale “Jabõt” ilo Kõmel̦el̦e Ko.
^ Ak “ej l̦oor wãween an enjel̦ ro kabuñ.”
