Anij Ej ke Baj Juõn Kajur Wõt?

Uak ko ekkã an armij kwaloki:

◼ “Ej ber ijoko otemjej, im ilo men ko otemjej. Ej einwõt kõto.”

◼ “Ej juõn kajur im elap an meletlet.”

Ta eo Jisõs ear ba?

◼ “Ilo imõn Jema elõñ jikin.” (Jon 14:2) Jisõs ear konono kin Anij einwõt juõn eo eor juõn imõn ilo kõkkar, ak juõn jikin an jokwe.

◼ “I ar itok jen Jema, im itok ñõn lõl: bar juõn, Ij likit lõl, im ilok ñõn Jema.” (Jon 16:28) Jisõs ear jela bwe Anij ejjab juõn kajur me ej ber ijoko otemjej ak ear jela bwe eor juõn jikin ej jokwe ie.

JISÕS ear jab jitõñlok ñõn Anij einwõt juõn kajur. Jen an eindrein, ear konono iben Anij im jar ñõn e. Ekkã an kir Jeova einwõt Jemen, men in ej kalikar joñõn an ebak kõtan eo an iben Anij.​—Jon 8:​19, 38, 54.

Emol bwe “ejelok armij e ar lo Anij jabrewõt ien” im bwe “Anij e Jitõb.” (Jon 1:​18; 4:​24) Bõtab ejjab melelen men in bwe ejelok enbwinin ak jekjekin. Baibel eo ej jiroñ kij: “Emwij jeor e enbwinin armij; ej jerkakbiji enbwin e jitõb. Elañe eor enbwinin armij, bareinwõt eor e jitõb.” (1 Korint 15:44) Inem eor ke enbwinin Jeova?

Aet, enbwinin ej jitõb. Ke Jisõs ear jerkakbiji ear “dreloñ . . . iloan lõñ eo bwe En walok iman mejen Anij kin kij.” (Dri Hibru 9:​24) Men in ej katakin kij kin ruo men ko reaurõk kin Anij. Kein kajuõn, eor juõn jikin an jokwe. Kein karuo, ej juõn eo emol an ber, im ejjab baj juõn kajur ej ber ijoko otemjej.

Inem ewi wãwen an maroñ or an Anij kajur ñõn kõmõni men ko otemjelok? Anij emaroñ jilkinlok jitõb kwojarjar eo an, ak kajur eo an, ñõn jabrewõt jikin ijoko otemjej ilõñ im ion lõl. Einwõt juõn imõn jarom kar kaleke ilo juõn jikin ak emaroñ lelok jarom ñõn aolepen bukwon eo. Eindrein, jen ijo ej ber ie, Anij emaroñ kajerbal jitõb kwojarjar eo an ñõn kajejit karõk eo an.​—Sam 104:30; 139:7.

Eor karkar ko karkarin Anij, eor men ko ej buñburuen kaki im jab buñburuen kaki, bareinwõt eor an iñjake. Baibel eo ej jiroñ kij bwe Anij ej yokwe armij ro an, ej lõñliñ kin jerbal ko an, ej drike kabuñ ñõn ekjõp, im ej buromõj kin kõmõn ko renana. (Jenesis 6:6; Duteronomi 16:22; 1 Kiñ Ro 10:9; Sam 104:31) Ilo 1 Timote 1:11 ej kwalok bwe ej juõn “Anij e mõnõnõ.” Eñin unin Jisõs ear ba bwe jemaroñ katak ñõn yokwe Anij kin aolepen buruer!​—Mark 12:30. *

[Kamelele ko itulal]