Anij Ej ke Buñburuen kin Jabrewõt Wãwen Jej Kabuñ ñõn E?

Uak ko ekkã an armij kwaloki:

▪ “Aolep kabuñ ko rej tel kij ñõn Anij.”

▪ “Ejjab aurõk men ko kwoj tõmak kaki elañe emol buruõm.”

Ta eo Jisõs ear ba?

▪ “Komin dreloñ iloan kejem erãniñ; bwe erbõkbõk kejem, im edrilep ial eo ej tellok ñõn mij, im elõñ ro rej dreloñ ie; Bwe erãniñ kejem, im eairik ial eo ej tellok ñõn mour, im eiet ro rej loe.” (Matu 7:​13, 14) Jisõs ear jab tõmak bwe aolep kabuñ ko rej tellok ñõn Anij.

▪ “Elõñ re naj ba ñõn Iõ ilo ran eo, Iroij, Iroij, kim ar jab drikanij kin Etõm ke? im kajutõklok dimon ro kin Etõm ke? im kõmõnmõn elõñ men in bwilõñ kin Etõm ke? Inem I naj ba ñõn ir, I ar jaje kom: komin ilok jen Iõ, kom rej kõmõn nana.” (Matu 7:​22, 23) Jisõs ejjab mõnõnõ iben aolep armij ro rej ba bwe rej lor e.

ELÕÑ armij rej ba bwe rej kabuñ ñõn Anij ak rej kaurõk tõmak im mõnit ko air. Ak ta elañe katak kein rejjab errã iben Nan in Anij, Baibel eo? Jisõs ear kwalok kauwatata eo ñõn lore mõnit ko an armij ke ear ba ñõn dri tel in kabuñ ro ilo ran ko an: “Wãwen drein ami kejekdron nan ko an Anij im lor katak ko ami make.” Ear wõnmanlok im eliji nan kein an Anij: “Armij rein rej kautiej iõ kin nan ko air, ak burueir ekanuij ettolok jen iõ. Ejjelok tokjen air kabuñ ñõn iõ, kinke rej katakin ro jet kien ko kõmmõn in armij einwõt ñe kar kien Anij!”​—Matu 15:​1-9, UBS; Aiseia 29:13.

Mwil ej bareinwõt aurõk, jab baj tõmak wõt. Baibel eo ej ba kin jet me rej ba rej kabuñ ñõn Anij: “Rej kwalok bwe re jela Anij, a ilo jerbal ko air rej karmijete.” (Taitõs 1:​16) Ilo mol, Baibel eo ej ba kin ro rej mour ilo ran kein ar: “Renaj yokwe mõnõnõ wan elablok jen Anij; renaj lor wõt mantin kabuñ eo ad, ak rej kejekdron kajur eo an. Kwon ellok jen armij rein.”​—2 Timote 3:​4, 5, UBS.

Juõn buru emol ej menin aikwij, bõtab ejjab bwe. Etke? Kinke juõn armij emaroñ bwir meñe emol buruen. Eñin unin elap an aurõk jelalokjen eo ejime kin Anij. (Dri Rom 10:​2, 3) Ar bõk jelalokjen in im jerbali men ko Baibel eo ej ba enaj kamaroñ kij ñõn kabuñburuen Anij. (Matu 7:​21) Inem emol men in bwe kabuñ eo ejime ej kitibuj un ko rejime, tõmak eo ejime, im jerbal ko rejime. Im jerbal ko rejime rej melelen kõmõnmõn ankil an Anij kajuju ran!​—1 Jon 2:​17.

Elañe kwokõnan kalaplok am melele kin men ko Baibel ej jiroñ kij kin Anij, joij im jejelok ñõn Dri Kennan ro an Jeova ñõn lowõj yuk im katak Baibel ibam ilo ejelok wõnan.

[Naan ko ilo peij 9]

Kabuñ eo ejime ej kitibuj un ko rejime, tõmak eo ejime, im jerbal ko rejime