Anij, Wõn E?

EWI wãwen kwonaj kar uake kajitõk in? Enañin aolep armij rej tõmak bwe Anij ej ber im rej tiljek ñõn e im mijõk e. Bõtab jidrik wõt air jela kin e. Elañe kwoj tõmak ilo Anij, ewi wãwen kwonaj kar uaki kajitõk kein itulõl?

1. Anij ej ke baj juõn kajur wõt?

2. Eor ke etan Anij?

3. Jisõs ej Anij Laplap ke?

4. Anij ej ke kea kin iõ?

5. Anij ej ke buñburuen kin jabrewõt wãwen jej kabuñ ñõn e?

Elañe kwoj kajitõk iben ro jet ñõn uaki kajitõk kein, kwonaj bõk uak ko reoktõk jen dron. Inem ejelok berre etke bwebwenato ko rejjab mol im lemnok ko rebwir kin Anij rar ejaak.

 Unin Eaurõk Uak Ko

Ke ear konono iben juõn kõra eor an tõmak ilo Anij iturin juõn aibij lõl, Jisõs Kraist ear kalikar aikwij eo ñõn jela mol eo kin Anij. Kõra in ej juõn dri Sameria im ear kile bwe Jisõs ear juõn dri kanan. Ak eor juõn men ear abnõnõ kake. Kabuñ eo an Jisõs ear oktõk jen kabuñ eo an. Ke ear kwalok an abnõnõ, Jisõs ear kalikar ñõn e ilo an ba: “Komij kabuñ ñõn men eo kom jaje kake.” (Jon 4:​19-​22) Alikar, Jisõs ear katakin bwe ejjab aolep ro rej tõmak ilo Anij rej lukkun jela kajen.

Nan ko an Jisõs rej melelen ke bwe ejelok juõn emaroñ jela kajen Anij? Jaab. Jisõs ear wõnmanlok im ba ñõn kõra in: “Ro emol air kabuñ renaj kabuñ ñõn Jema ilo jitõb im ilo mol. Jema ekõnan bwe ro eirwõt ren kabuñ ñõne.” (Jon 4:23, UBS) Kwoj ke ber ibwiljin ro rej kabuñ ñõn Anij “ilo jitõb im ilo mol”?

Ekanuij aurõk bwe kwon jela uak eo ñõn kajitõk in. Etke? Jisõs ear kalikar aikwij eo kin jelalokjen eo ejime ke ear jar: “Im men in mour in drio, bwe ren jela Kwe juõn wõt Anij emol, im Jisõs Kraist, eo Kw’ar jilkintok.” (Jon 17:3) Aet, kejatdrikdrik eo am kin ilju im jeklaj ej wawa ion am jela mol eo kin Anij!

Kwomaroñ ke lukkun jela mol eo kin Anij? Aet, Kwomaroñ! Inem, ewi wãwen kwomaroñ jela kin e? Jisõs ear ba men in kin e mõke: “Ña ial, im mol, im mour: ejelok armij ej itok ñõn Jema, elañe jab kin Iõ.” (Jon 14:6) Ear bareinwõt ba: “Ejelok juõn e jela wõn eo Nejin, a Jema wõt; im wõn eo Jema, a Nejin wõt, im eo Nejin e kõnan kwalok E ñõn e.”​—Luk 10:22.

Kin men in, wãwen ko ñõn jela kajen Anij rej ber ilo katak ko an Jisõs Kraist, eo ej Nejin Anij. Ilo mol, Jisõs ej kalimuri kij: “Elañe komij berwõt ilo Aõ in nan inem kom dri kalora remol, Im kom naj jela mol, im mol e naj kõmõnmõn anemkwojami.”​—Jon 8:​31, 32.

Inem, ewi wãwen Jisõs enaj kar uaki kajitõk ko lailim kar bõkmantak moktalok?

[Pija eo ilo peij 4]

Kwoj kabuñ ke ñõn juõn Anij kwojjab lukkun jela kajen?