Jisõs Ej Anij Laplap Ke?
Jisõs Ej Anij Laplap Ke?
Uak ko ekkã an armij kwaloki:
▪ “Aet, Jisõs ej Anij Laplap.”
▪ “Jisõs ej juõn Anij ak ear itok ñõn lõl ilo nememen armij.”
Ta eo Jisõs ear ba?
▪ “Elañe kom ar yokwe Iõ, kom naj kar lõñliñ, bwe Ij ilok ñõn Jema: bwe Jema elap jen Ña.” (Jon 14:28) Jisõs ear kwalok bwe e im Jemen rejjab juõn wõt.
▪ “Ij wõnliñlok ñõn Jema, im Jememi, im ñõn Aõ Anij, im ami Anij.” (Jon 20:17) Jisõs ear jab ba bwe e Anij ak ear ba bwe Anij ejenolok jen e.
▪ “I ar jab mõke konono jen Iõ; a Jema eo e ar jilkintok Iõ, E ar letok ñõn Iõ kien, men eo In ba im men eo In konono kake.” (Jon 12:49) Katak ko an Jisõs rar jab itok jen e mõke, rar itok jen Jemen.
JISÕS ear ba bwe ej Nejin Anij, jab Anij Laplap. Elañe Jisõs ej Anij, wõn eo ear jar ñõn e ke ear ber ion lõl? (Matu 14:23; 26:26-29) Alikar bwe Jisõs ear jab riõp kõmõn einwõt ñe ear konono iben juõn armij!
Ke ruo ian dri jilik ro an Jisõs rar kajitõk iben ñõn jijõt iturin ilo Ailiñ eo, ear uak: “Amiro jijõt i anbijmaroñiõ, im i anmiñiõ, e jab Aõ bwe In lewoj, a Jema e naj lelok ñõn ro E ar kapojõk ñõn ir.” (Matu 20:23) Jisõs ear ke riõp ñõn ir ke ear ba bwe ear ejelok an maroñ ñõn kõtõbrak kajitõk eo airro? Jaab! Jen an eindrein, ear ba bwe Anij wõt eor an maroñ ñõn kõmõn bebe rot in. Bareinwõt Jisõs ear kemelele bwe eor jet men ko e im enjel ro rejjab jela kaki ak Jemen wõt.—Mark 13:32.
Jisõs ear ke ettãlok jen Anij ilo ien eo wõt ear ber ion lõl einwõt juõn armij? Jaab. Baibel eo ej bareinwõt kwalok bwe meñe ilo ien eo Jisõs ear mij im jerkakbiji ñõn lõñ ear juõn eo ettãlok jen Anij. Dri jilik Paul ej kakememej kij bwe “Anij ej utiej jen Christ.” (1 Dri Korint 11:3, UBS) Baibel eo ej ba bwe ilo ran ko rej itok “ñe emwij kõtãik men otemjej ñõn E, ien eo Nejin e naj bareinwõt mõke kõtãik e ñõn Eo e ar kõtãik men otemjej ñõn E, bwe Anij en otemjej ilo otemjej.”—1 Dri Korint 15:28, UBS.
Alikar, Jisõs ejjab Anij Laplap. Eñin unin ear konono kin Jemen einwõt “Aõ Anij.”—Reveles̃õn 3:2, 12; 2 Dri Korint 1:3, 4. *
[Kamelele ko itulal]
^ Ñõn bõk melele ko relaplok kin katak in, lale japter 4 pãrokõrããp 14-16 ilo buk eo Kwo Maroñ Mour Indrio ilo Paradise ion Lõl, jeje in Dri Kennan ro an Jeova.
[Naan ko ilo peij 7]
Jisõs ear ba bwe eor jet men ko e im enjel ro rejjab jela kaki ak Jemen wõt