Baibõl̦ ej kwal̦o̦k kõn ta eo Jeova im Nejin, Jijej Kũraij, renaaj kõm̦m̦ane ñan aolep men ko renana me Setan Tepil̦ eo ej kõm̦m̦ani. Baibõl̦ ej ba: “Unin an Nejin Anij [Jijej] kar wal̦o̦k, bwe en ko̦kkure jerbal ko an Tepil̦.” (1 Jon 3:8, UBS) Nejin Anij enaaj jol̦o̦k aolep men ko renana me rej wal̦o̦k ilo jukjukun pãd in enana. Enaaj jako an armej ro arõk jããn, kõm̦m̦ani men ko renana, im dike doon. Ak ta kõn Setan Tepil̦, eo me ej “irooj in lal̦ in”? Jijej ear kallim̦ur bwe ‘enaaj jol̦o̦ke’ jãn lal̦ in. (Jon 12:31, UBS) Ñe Setan enaaj jako jãn lal̦ in, enaaj juon jikin eaenõm̦m̦an im ro wõt rewãnõk renaaj mour ie.​—2 Piter 3:13, UBS.

Ak ta kõn ro me rej wõnm̦aanl̦o̦k wõt ilo aer kõm̦m̦ani men ko renana im rejjab ukel̦o̦k? Eokwe, kõl̦mãnl̦o̦kjen̦ m̦õk kõn kallim̦ur in: “Ro rejim̦we renaaj jokwe ilo lal̦, im ro reweeppãn renaaj pãdwõt ie. A ro renana, renaaj jako jãn ãneo, im renaaj tũm̦wi jãne ro rej m̦on̦e armej.” (Jabõn Kõnnaan 2:21, 22) Ro renana renaaj jako. Aolepen lal̦ in enaaj aenõm̦m̦an im jidik kõn jidik armej ro me rej pokake Anij renaaj oktak im weeppãn im jako aer jerawiwi.​—Rom 6:17, 18, UBS; 8:21, UBS.

Ilo naaj jukjukun pãd eo ekããl, ta eo Anij enaaj kõm̦m̦ane bwe men ko renana ren jab bar wal̦o̦k? Enaaj ke kõm̦m̦an bwe armej ro ren ãinwõt robaat ko me ejjel̦o̦k aer anemkwõj in kããlõt? Jaab. Anij enaaj katakin armej ro rem̦m̦an kõn men ko ekõn̦aan bwe ren kõm̦m̦ani. Men in enaaj jipañ er ñan jol̦o̦k l̦õmn̦ak im kõm̦m̦an ko renana.

Ta eo Anij enaaj kõm̦m̦ane kõn jorrããn ko me rej wal̦o̦k ilo idiñ im rej jelõt kõj? Em̦õj an Anij kallim̦ur bwe ejjabto jãn kiiõ, lal̦ in enaaj pãd ium̦win maroñ eo an Aelõñ ak kien eo an. Jijej Kũraij ej Kiiñ eo me Anij ear jitõñe bwe en tõl Aelõñ in An. Im ewõr an Jijej maroñ ñan kõmour ro renañinmej. (Matu 14:14) Ebar wõr an Jijej maroñ ñan kalur l̦añ ko im men ko ãierl̦o̦kwõt. (Mark 4:35-41, UBS) Kõn men in, jeban bar eñtaan kõn l̦aanwõtwõt ak jorrããn ko me rej wal̦o̦k ilo jidimkij. (Ekklisiastis 9:11) Ñe aolep armej ro ilo lal̦ in renaaj pãd ium̦win tõl eo an Kũraij, ejjel̦o̦k juon iaaer enaaj jorrããn.​—Jabõn Kõnnaan 1:33, UBS.

Ak ta eo enaaj wal̦o̦k ñan aolep armej ro me ejjel̦o̦k rueer im rar eñtaan im mej? Eokwe, m̦okta jãn an kar Jijej kõmour Lazerõs, ear ba: “Ña jerkakpeje eo im mour eo.” (Jon 11:25) Naan kein an Jijej rej kaalikkar bwe ewõr an maroñ ñan kõjerkak ak kõmour ro remej!

Kokõn̦aan ke jokwe ilo lal̦ in ñe men ko renana reban wal̦o̦k ñan armej ro rem̦m̦an? El̦aññe kokõn̦aan pãd ie, em̦m̦an kwõn katak Baibõl̦ im kal̦apl̦o̦k am̦ jel̦ã kõn Anij im ankilaan. Ri Kõnnaan ro an Jeova renaaj m̦õn̦õn̦õ in iwõj im katak Baibõl̦ ippam̦. Kwõmaroñ kajju kajjitõk ippãer ñe kwõj iioon er. Ak kwõmaroñ je juon am̦ lõta im kwal̦o̦k bwe kokõn̦aan katak, innem jilkinl̦o̦k ñan juon iaan atõrej ko ilo bok in.