Мый 1948 ийыште Нигерийын кечывалвел-касвел могырыштыжо изи ялыште шочынам. Ту жапыште ачамын Мустафа́ шольыжо да Ваха́би лӱман эн кугу изам Иегован Таныкше лийыныт. Индеш ияш лиймем годым ачам колен. Тиде мыланем кугу ойго лийын. Но кунам ачана ылыжеш, ме тудым угыч ужына манын, Вахаби изам мылам каласен. Тидым пален налмеке, Библийым шымлаш кумылем лектын. Мый 1963 ийыште тынеш пуренам. А варажым эше кок иза ден шольым тынеш пуреныт.

1965 ийыште мый Ла́госыште илыше Уи́лсон изам дек илаш кусненам. Тушто «Игбо́би» погынымаште мый эрелык пионер-влак дене йолташ лийынам. Нунын куанышт да служитлымаште чот тыршымышт мыйым нунын гай служитлаш кумылаҥденыт. Сандене 1968 ийын январьыште мыят пионер семын служитлаш тӱҥалынам.

Икана Вефильыште служышо А́льберт Олубе́йби самырык-влаклан специальный вашлиймашым ыштен. Тудо каласен: «Нигерийын йӱдвел могырыштыжо специальный пионер-влак чот кӱлыт. Мый алят шарнем, кузе тудо мемнам тыгай шомак дене кумылаҥден: «Те самырык улыда. Жап ден вийдам Иеговалан пуыза. Тендам шуко паша вуча!» Мый Исайя гаяк ямде лийынам каяш  тушко, кушко Юмо мыйым колта (Ис. 6:8). Сандене специальный пионер семын служитлашлан мый заявленийым возенам.

1968 ийын майыште мыйым Нигерийын йӱдвел могырышто верланыше Ка́но олашке специальный пионер семын служитлаш колтеныт. Тугодым Биафрский сар каен (1967—1970). Нигерийын йӱдвелыштыже сар шуко ойгым конден, а вара тиде сар эрвел могырыш куснен. Шарнем, кузе погынымаш гыч ик иза мыйым тушко кайыме деч чараш тыршен. Мый тудлан каласенам: «Мыйын верч тургыжланыметлан тау. Но Иегова мыйым тушко служитлаш колтынеже гын, мый пеҥгыдын ӱшанем: тудо мыйым огеш кодо».

Кано олаште чот уда ситуаций лийын. Граждан сарлан кӧра тиде кугу ола пустаҥын да уремлаште южо вере колышо-влак киеныт. Тидым ме южгунам служымаш годым ужынна. Кано олаште икмыняр погынымаш лийын гынат, иза-влак гыч шукыштлан куржаш логалын. Олаште 15 уверзе деч шагалрак кодын. Нуным чылаштымат лӱдмаш авалтен да нуно мом ышташат пален огытыл. Кунам ме, куд пионер, толынна, нине иза-ака-влак чот куаненыт. Ме нунылан угыч вашлиймаш-влакым эртараш да угыч служитлымым тӱҥалаш полшенна. Нуно кумылаҥыныт да угыч служымаш нерген отчётым филиалыш колташ да литературлан заказым ышташ тӱҥалыныт.

Ме ха́уса йылмым тунемаш тӱҥалынна. Кунам еҥ-влак нунын йылмышт дене мутланымынам колыныт, нуно Кугыжаныш нерген уверым сайрак колыштыныт. Но ту оласе тӱҥ религий гыч еҥ-влаклан таныклымына келшен огыл. Сандене служитлымаште ме тӱткӧ лийынна. Икана, кунам мый напарникем дене служитленам, ик пӧръеҥ почешна кӱзӧ дене куржын. Но ме писынрак куржынна, сандене тудо мемнам поктен шуын огыл. Тыгай лӱдыкшӧ ситуаций-влакым ончыде, Иеговалан кӧра ме чон тынысым шижынна (Пс. 4:9). Танык-влак эркын-эркын шукемыныт. Таче Кано олаште 11 погынымаш, кушто 500 утла уверзе служитла.

Кано олаште мый икмыняр тылзе веле служитленам. 1968 ийын август тылзыште мыйым  да эше вес кок спецпионерым Ни́гер Республикын Ниаме́й рӱдӧ олаш служитлаш колтеныт. Нигер — тиде планетыште эн шокшо вер-влак гыч иктыже. Тидым ме вашке шке ӱмбалне шижынна. Но мыланна кече пелтымым гына огыл чыташ логалын. Мемнан эше вес нелылыкат лийын — мыланна тиде элын тӱҥ йылмыжым, француз йылмым, тунемаш кӱлын. Куштылго лийын огыл гынат, ме Иеговалан нелылыкнам ӱшанен пуэнна да Ниамейыште икмыняр верысе уверзе дене таныклаш тӱҥалынна. Кӱчык жап гыч Ниамейыште, каласаш лиеш, кажне илышын, кӧ лудын моштен, «Истина, ведущая к вечной жизни» книгаже лийын. Еҥ-влак книгам налашлан эсогыл мемнам кычал коштыныт.

Властьым кучышо-влаклан Иегован Таныкше-влак огыт келше манын, ме умылен налынна. 1969 ийын июль тылзыште ме элыште эртаралтше эн икымше районный конгрессыште погыненна. Чылаже тушто 20 еҥ наре лийын. Ме кок у уверзын тынеш пурымыжым вученна. Но икымше кечын полиций толын да программым чарен. Специальный пионер-влакым да районым эскерыше изам участкыш наҥгаеныт. Мемнам чыланнам йодыштыныт да вес кечын угыч толаш кӱштеныт. Ме умыленна: властьым кучышо-влак мыланна, очыни, конгрессым эртараш огыт пу. Сандене ме тынеш пурымаш нерген ойлымашым частный пӧртыштӧ организоватленна да вара эҥерыште у уверзе-влакым шолып тынеш пуртенна.

Икмыняр арня эртымеке, йот эл паша министерстве мыланем да вич спецпионерлан эл гыч каяш кӱштен. Мыланна 48 шагат коклаште эл гыч каяш кӱлын. Тидым мыланна шке окса ден ышташ кӱлеш ыле. Власть-влакын кӱштымыштым ме шуктенна да Нигерийыш филиалыш каенна. Тушто мыланна у назначенийым пуэныт.

Мыйым нигерийысе Орисунба́ре ялыш колтеныт. Тусо изи группо дене служымаш куаным гына конден. Но куд тылзе эртымеке, филиал мыйым Нигерыш пӧртылаш йодын. Мый ӧрынам да чот тургыжланаш тӱҥалынам, но Нигерыште илыше иза-влакым чот ужмем шуын.

Мый Ниамейыш пӧртылынам. Вес кечынжынак Нигерий гыч ик бизнесмен, мыйын Танык улмемым пален налмеке, Библий нерген йодыш-влакым пуэдаш тӱҥалын. Тыге шымлымаш тӱҥалын. Жап эртымеке, тудо тамакым шупшмым кудалтен, аракам йӱмым чарнен да тынеш пурен. Нигерыште илымем годым мый тӱрлӧ кундемыштыже служитленам. Мый ужынам, кузе эркын-эркын еҥ-влак чыныш толыныт. Тиде кугу куаным конден. Икымше гана толмем годым уло элыште 31 Танык лийын, а кунам каенам — 69.

1977 ийын декабрьыште мый кум арняш специальный курсым эрташлан Нигерийыш пӧртылынам. Тунем пытарыме деч вара Ма́лком Ва́йго, филиалын комитетын координаторжо, Сье́рра-Лео́нышто филиал гыч серышым мыланем лудаш  пуэн. Гвинейыште районым эскерымаш пашам шукташлан иза кӱлын. Иза-влаклан англичанла да французла ойлен моштышо да сай тазалыкан мужыраҥдыме пионер кӱлын. Малком изан каласымыже почеш мыйым лач тиде пашалан туныктеныт. Тиде заданий проста огыл манын, тудо каласен. Тудо ешарен: «Решенийым лукмо деч ончыч сайын шоналте». Но мый вигак тудлан вашештенам: «Тиде вет Иегова мыйым колта, сандене каяш келшем».

Мый Сьерра-Леоныш толынам да филиалын комитетше гыч иза-влак дене вашлиялтынам. Ик иза мылам каласен: «Кузе Гвинейыште таныклымаш паша кая, мемнан нимогай информаций уке». Сьерра-Леонысо филиал пошкудо Гвинейыште таныклымаш пашалан вуйын шоген гынат, ту элыште неле политический ситуацийлан кӧра тудын тусо погынымаш-влак дене кылже лийын огыл. Филиал тушко уже икмыняр гана иза-влакым колташ тӧчен, но тиде нимомат пуэн огыл. Сандене мыйым Гвинейын Конакри́ рӱдӧ олашкыже каяш да тушто илашлан разрешенийым налын ончалаш йодыныт.

Конакриш толмеке, мый нигерийысе посольствыш каенам да посол дене вашлиялтынам. Мый тудлан Гвинейыште таныклаш кумылем нерген каласенам. Тушто тыйым арестоватлен кертыт але эше иктаж-мо лийын кертеш манын, тудо каласен. Тыгак каҥашым пуэн: «Нигерийыш пӧртыл да тушто таныкле». Тидлан мый вашештенам: «Мый кодаш шонем». Тунам тудо Гвинейын эл кӧргӧ паша министрлан серышым возен — мыланем полшаш йодын — да весыже мыланем полшаш келшен.

Тидын деч вара мый Сьерра-Леонысо филиалыш пӧртылынам да иза-влаклан каласкален пуэнам, кузе Иегова мыйым суапландарен. Гвинейыште илаш разрешенийым налмем нерген пален налмеке, иза-влак чот йывыртеныт.

1978 гыч 1989 ий марте мый Гвинейыште да Сьерра-Леонышто районым эскерыше иза семын да Либе́рийыште районым эскерыше изан заместительже семын служитленам. Ондакшым мый чӱчкыдын черланенам. Южгунам тиде тора верыште лийын. Но иза-влак мыйым больницыш наҥгаяшлан чылажымат ыштеныт.

Икана мый неле форман малярий дене черланенам, а эше сӧсан дене (глист-влак дене) орланенам. Кунам паремынам, пален налынам: иза-влак уже мыйым кушто тояшат шоненыт улмаш. Чыла нелылыкым ончыде, тысе служымашым кодаш шонымашемат лийын огыл. Мый тӱрыснек ӱшаненам: Иегова дене пырля лиям гын, мылам нимо деч лӱдман огыл. Вет тудын эсогыл колышо-влакым ылыжташ вийже уло.

1988 ийыште мый До́ркас лӱман пионер семын служышо ӱҥышӧ да Иеговам чот йӧратыше акам вашлийынам. Ме мужыраҥынна да районный служитлымаште ынде пырля тыршаш тӱҥалынна. Доркас Иегова верч шкем чаманыде служитлен. Южгунам погынымашыш миен шуашлан мыланна, шке арверым нумалын, 25 километрым йолын каяш логалын. Чот тора погынымашыш миен шуашлан ме кеч-могай транспорт дене каяш  ямде лийынна, кудыжо лавыра да лакылан корным эртен кертын.

Доркас лӱддымӧ лийын. Мутлан, южгунам мыланна крокодил дене темше эҥер-влакым эрташ логалын. Икана вич кечаш корнышто мыланна каноэ дене эҥерым вончаш кӱлын, вет пу кӱвар-влак локтылмо лийыныт. Каноэ гыч лекташлан шогалмеке, Доркас вӱдышкӧ пурен каен. Ни мый, ни тудо ийын моштен огынал, а ту эҥерыште чот шуко крокодил лийын. Мемнан пиалешна, икмыняр рвезе вӱдыш тӧрштылын да нуно тудым серыш луктыныт. Тидын деч вара ик жап мемнам шучко омо индырен, но ме служитлымым чарнен огынал.

1992 ийын тӱҥалтыштыже мемнам пӧлек вучен. Ме пален налынна: вашке ача-ава лийына. Мыланна решенийым лукташ кӱлын: специальный пионер семын служитлымым умбакыжат шуяш але уке. Ме тыге шонкаленна: «Иегова мыланна пӧлекым ыштен!» Сандене ӱдырналан Джа́гифт лӱмым пуэнна («Йах деч пӧлек» манын кусаралтеш). А ныл ий гыч Эрик эргына шочын. Иегова деч нине пӧлек-влак мемнам эре куандарат. Джагифт ик жап Конакриште торасе кусарымаш офисыште служитлен, а Эрик погынымаште служебный полышкалыше семын служитла.

Вараракшым Доркаслан специальный пионер семын служитлымым кодаш логалын. Но тудо йочам ончен куштымо жап мучко эрелык пионерлан служитлен. А мый спецпионерак кодынам. Кунам йочана-влак кушкын шуыныт, Доркас угыч специальный пионер семын служитлаш тӱҥалын. Кызыт ме Конакриште миссионер улына.

Мый эре каенам тушко, кушко Иегова мыйым колтен. Ме ватем дене пырля шуко гана тудын полшымыжым да аралымыжым шижынна. Материальныйлан огыл, а Иеговалан ӱшанен, ме шуко нелылык ден тургыжланымаш деч утлен кертынна. Ме Доркас дене шке шинча дене ужынна: чын аралтышым Иегова, Утарышына, пуа (1 Лет. 16:35). Мый палем: кӧ тудлан ӱшана, кажныжын «илышыжым Иегова Юмо сайын арала» (1 Сам. 25:29).