1, 2. Молан мыланна чучын кертеш, пуйто Иегова кумалмыланна вашмутым огеш пу?

 «ТЕК Иегова тыланет кугу куан лиеш, да тудо шӱметын йодмыжым шукта» (Пс. 36:4). Могай сылне сӧрымаш! Но ончыкта мо тиде, пуйто Иегова йодмынам вигак шукта? Молан тыгай йодыш лектын кертеш? Ончалына икмыняр ситуацийым. Марлан лекдыме ака Кугыжанышын увертарышыж-влаклан школышто тунемнеже. Тудо Иеговалан тидын нерген кумалеш. Но ий-влак эртат, а тудым алят огыт ӱж. Самырык иза неле чер дене орлана да погынымаште шукырак ышташлан тудым тиде чер деч утараш Иеговам йодеш. Но тазалыкше ок саем. Ача-ава икшывышт чыныште кодшо манын кумалыт. Но тудо Иеговалан служитлаш чарна.

² Очыни, теат Иеговам иктаж-мо нерген йодында, но кумылда почеш тидым налын огыдал. Сандене те шонаш тӱҥалын кертыда, пуйто Иегова чылаштын кумалмыштым колыштеш, а тенданым огеш колышт. Але те иктаж-могай йоҥылышым ыштенда манын шонен кертыда. Тидымак Джа́нис b ака шижын. Тудо марийже дене пырля Вефильыште служитлынеже ыле, да тидын нерген нуно кумалыныт. Тудо ойла: «Мый пеҥгыдын ӱшаненам: анкетым возымо деч вара шуко жап огеш эрте да мемнам Вефильыш ӱжыт». Но шуко ий эртымекат, нуным ӱжын огытыл. Джанис манеш: «Тиде кумылемым волтен. Мый  умылен омыл, молан Иегова кумалмылан вашмутым огеш пу. Мыланем чучын, пуйто мый Иеговам ала-мо дене шӱлыкаҥденам. Мый вет лач Вефильыште служитлыме нерген кумалынам. Молан вара тудо кумалмемлан вашмутым огеш пу?»

3. Тиде статьяште мом лончылен налына?

³ Южгунам ме шонен кертына, пуйто Иегова кумалмынам огеш колышт. Ожно илыше Юмын служитлыше-влакат тыге шоненыт (Иов 30:20; Пс. 21:3; Авв. 1:2). Но те пеҥгыдын ӱшанен кертыда: Иегова кумалмыланда вашмутым пуа (Пс. 64:3). Тидлан чотрак ӱшанашлан кум йодышым ончен лектына: 1) Мом ме Иегова деч вучен кертына? 2) Мом Иегова мемнан деч вуча? 3) Молан мыланна южгунам иктаж-мо весе нерген кумалаш кӱлеш?

4. Иеремия 29:12 дене келшышын, Иегова мыланна мом сӧра?

⁴ Иегова кумалмынам колышташ сӧра. (Иеремия 29:12 лудын лекса.) Юмо ӱшанле служитлышыже-влакым йӧрата. Сандене тудо эре кумалмыштым колыштеш (Пс. 9:38; 36:28). Но тиде огеш ончыкто, пуйто тудо чылажымат йодмына почеш эре ышташ тӱҥалеш. Очыни, иктаж-мо шотышто вашмутым ме у тӱняште веле налына.

5. Кумалмынам колыштын, Иегова мом шотыш налеш? Умылтарыза.

⁵ Иегова онча, кузе йодмына тудын шонен пыштымыж дене кылдалтеш (Ис. 55:8, 9). Юмын кумылжо почеш мланде Юмым куанен колыштшо пӧръеҥ ден ӱдырамаш-влак дене темшаш ыле. Но Сатана ойла, пуйто еҥ-влак Юмо деч посна пиаланрак лийыт (Тӱҥ. 3:1—5). Диавол шояче улеш манын доказатлашлан Иегова еҥ-влаклан вуйлаташ правам пуэн. Тидлан кӧра ме ужына: еҥ-влакын вуйлатымышт тӱнялан шуко нелылыкым конден (Эккл. 8:9). Ме умылена: Иегова чыла тиде нелылыкым кызытак огеш кораҥде. Тудо тыге ышта ыле гын, иктаж-кӧ шоналтен кертеш ыле, пуйто еҥ-влакын вуйлатымышт сай да Юмын полшымыжо еҥ-влаклан огеш кӱл.

6. Иегова мемнам йӧрата да эре справедливый улеш манын, молан мыланна ӱшаныман?

⁶ Икгай нерген йодмылан Иегова тӱрлӧ семын вашмутым пуэн кертеш. Мутлан, кунам Езекия кугыжа чот черланен, тудо Иеговам тудым паремдаш сӧрвален. Юмо йодмыжым шуктен (2 Цар. 20:1—6). Но кунам апостол Павел Иеговам капше гыч «умдым» кораҥдаш йодын (очыни, тиде ала-могай чер лийын), Иегова проблемыжым кораҥден огыл (2 Кор. 12:7—9). Тыгак Иаков ден Петр апостол-влакын случайыштым ончалына. Ирод когыньыштымат пушташ шонен. Ме палена: погынымаш Петр верч шокшын кумалын. Очыни, иза-ака-влак Иаков верчат тыгак кумалыныт. Но Петрым суксо утарен, а теве Иаковым казнитленыт (Ап. паш. 12:1—11). Ме аптыранен кертына: «Молан Иегова Петрым утарен, а Иаковым уке?» Библий тидым огеш умылтаре c. Но теве мом ме палена: Иегова «чын огылым ыштен огеш керт» (Втор. 32:4). Тыгак ме палена: Юмо кок апостолымат йӧратен да нуно тудлан йӧрышӧ лийыныт (Почм. 21:14). Южгунам Иегова йодмына почешак ок вашеште. Но ме ӱшанена: тудо мемнам йӧрата да эре справедливый. Сандене ме вучымо вашмутым налын огынал гын, ӧпкелен она кошт (Иов 33:13).

7. Мом ме она ыште да молан?

 ⁷ Ме шкенан ситуацийнам весе-влакын ситуацийышт дене таҥастарыме деч шекланаш тыршена. Мутлан, ме Иеговам иктаж-мо нерген йодына, а йодмына вашмут деч посна кодеш. Вара ме теве мом пален налына: ала-кӧ тидын нергенак кумалын, да чучеш, пуйто Иегова тудлан вашмутым пуэн. Лач тыге Анна лӱман ака дене лийын. Мэ́тью марийже рак дене черланен. Тудо паремже манын, Анна кумалын. Ту жапыштак погынымашышт гыч кок илалше ака тыгаяк чер дене кучедалын. Анна марийже верчат, тиде кок ака верчат кумалын. Ака-влак паремыныт, а Мэтью, чаманаш логалеш, колен. Ондакшым Анна шонен: «Нине ака-влаклан паремаш Иегова полшен мо? Тыге гын, молан тудо мариемым паремден огыл, вет мый тудын верчат кумалынам?» Мутат уке, ме она пале, молан саде ака-влак паремыныт. Но ме пеҥгыдын палена: Иегова чыла орланымашлан мучашым пышта. Тудо чот вуча ту жапым, кунам йолташыж-влаклан илышым пӧртылта (Иов 14:15).

8. а) Исайя 43:2 дене келшышын, Иегова мыланна кузе полша? б) Неле годым кумалмаш мыланна кузе полшен кертеш? («Нелылык годым кумалтыш мут полша» видеороликым ончалза.)

⁸ Иегова мыланна эре полша. Йӧратыше Ачаналан орланымынам ужаш йӧсӧ (Ис. 63:9). Туге гынат тудо эҥер але тул гай улшо чыла нелылыкым илыш корнына гыч огеш кораҥде. (Исайя 43:2 лудын лекса.) Но тудо воктенна лияш да нунын гоч эрташ полшаш мыланна сӧра. Юмо нигӧлан да нимолан мемнам тудын дечын ойыраш огеш пу. Чылажымат чытен лекташлан Иегова мыланна тыгак куатле святой шӱлышыжым пуа (Лук. 11:13; Флп. 4:13, УТ). Тугеже, нелылыкым чытен лекташ да Юмылан ӱшанле кодашлан мемнан эре чыла кӱлешан лиеш d.

9. Иегова мыланна полша манын, молан ӱшанаш кӱлеш? (Иаковын 1:6, 7).

⁹ Иегова мемнан деч тудлан ӱшанымынам вуча (Евр. 11:6). Южгунам нелылык чытен кертдымыла чучын кертеш. Ме шонена: «Тыште Иеговат полшен огеш керт». Но кузе Библий мемнам ӱшандара, Юмын полшымыж дене ме чылажымат сеҥена (Пс. 17:30). Сандене кокыте шонымо олмеш Иеговалан кумалза да ӱшаныза: тудо тыланда вашмутым пуа. (Иаковын 1:6, 7 лудын лекса.)

10. Кумалме дене келшышын ыштымаш мом ончыкта? Примерым кондыза.

¹⁰ Иегова кумалмына дене келшышын ыштымынам вуча. Мутлан, иза регионысо конгрессыш каяшлан паша гыч йодын кайынеже да Иеговам тудлан полшаш йодеш. Кузе Иегова кумалмыжлан вашмутым пуа? Юмо тудлан начальникше дене мутланашлан лӱддымылыкым пуэн кертеш. Но изалан начальник деке каяш да тудын дене мутланаш кӱлеш. Очыни, тудым вигак огыт колто да тудлан икмыняр гана мутланаш логалеш. Можыч, тудлан смене дене алмашталташ, коллеге дене кутырен келшаш але тӱлыдымӧ отпускым налаш верештеш.

11. Ме Иеговам иктаж-мо нерген йодына гын, молан мыланна тидын нерген чӱчкыдын кумалаш кӱлеш?

¹¹ Ме Иегова деч иктаж-мом йодына гын, тудын вучымыж дене келшышын, тидын нерген чӱчкыдын кумалшаш улына (1 Фес. 5:17). Кузе Иисус каласен, южгунам ме кумалмыналан вашмутым вигак она нал  (Лук. 11:9). Сандене вуйдам ида саке! Кумалмыдам ида чарне (Лук. 18:1—7). Тыге ме Иеговалан ончыктена: йодмына мыланна чынжымак кӱлешан. Тыгак Юмо мыланна полшен кертеш манын, ӱшанымынам ончыктена.

12. а) Могай йодышым ме шкаланна пуэн кертына да молан? б) Кумалмаште Иеговам пагалымына коеш манын, кузе умылаш? (« Кумалмем Иеговам пагалымым ончыкта мо?» рамкым ончыза.)

¹² Йодмыналан вашмутым она нал гын, шкаланна кум йодышым пуаш лиеш. Икымшыже: «Мо нерген мый кумалам, тиде чынжымак Иегован эрыкше дене келшышын мо?» Южгунам ме шонена, пуйто палена, мо мыланна сайрак. Но Иегован вашмутшо мемнан йодмына деч чот ойыртемалтын кертеш, вет тудо пала, могай решений мыланна эн сай лиеш. А южгунам мемнан йодмына Юмын эрыкше дене келшышын огыл (1 Иоан. 5:14). Икымше абзацыште палемдыме ача-ава нерген шарналтена. Икшывышт чыныште кодшо манын, нуно Иеговам йодыт. Тиде сай йодмаш гай чучеш. Но Иегова тудлан служитлаш иктымат огеш темде. Тудын кумылжо почеш ме чыланат, йоча-влакат, шке решенийна почеш служитлышаш улына (Втор. 10:12, 13; 30:19, 20). Сандене ача-ава икшывыштын шӱмыштым тарваташ полшаш Иеговам йодын кертыт. Тыге нуно эргыштлан але ӱдырыштлан Иеговам йӧратен налаш да тудын йолташыже лияш полшен кертыт (Прит. 22:6; Еф. 6:4).

13. Еврей-влаклан 4:16 дене келшышын, Иегова мыланна кунам полша? Умылтарыза.

¹³ Кокымшо йодыш тыгай: «Иеговалан йодмемым шукташлан кызыт келшен  толшо жап мо?» Очыни, те Иегован вашмутшым вигак ужнеда. Но тудо пала, могай жапыште мыланна полшаш сайрак. (Еврей-влаклан 4:16 лудын лекса.) Йодмынан шукталтмыжым вигак она уж гын, шоналтен кертына, пуйто Иегова мыланна «уке» манеш. Но, очыни, Иегова «кызыт огыл» манын ойла. Мутлан, шарналтыза самырык изам, кудыжын пареммыже шуэш. Иегова тудым чер деч ӧрыктарышын утара ыле гын, Сатана тиде шотышто Иеговам титаклен кертеш ыле, пуйто иза тудым паремдымыжлан кӧра гына Юмылан служитла (Иов 1:9—11; 2:4). Тыгак Иегова ту жапым палемден, кунам чыла черым кораҥда (Ис. 33:24; Почм. 21:3, 4). А ту жап толмешке, чудо-влакым вучаш огеш кӱл. Сандене иза Иегова деч тудлан вийым да шӱм-чон тынысым пуаш йодын кертеш. Тиде тудлан чер дене кучедалаш да умбакыжат Юмылан ӱшанлын служитлаш полша (Пс. 28:11).

14. Джанисын историйже гыч мо́лан тунемыда?

¹⁴ Шарнеда Джанис акам, кудыжо вефильысе служитлымаш нерген кумалын? Тудо вич ий гыч веле умылен налын, кузе Иегова кумалмыжлан вашмутым пуэн. Тудо ойла: «Чыла ту жапыште Иегова мыйым туныктен да тӧрлатен шоген. Мыланем тудлан чотрак ӱшанаш тунемаш кӱлын. Эше мый умылен налынам: шкевуя шымлымашым сайрак эртараш кӱлеш. А эше мыланем кеч-могай верыште куанен служитлаш тунемаш кӱлын». Вара Джанисым марийже дене пырля районный служымаште тыршаш ӱжыныт. Эртыше жапым шарналтен, тудо манеш: «Иегова кумалмемлан вашмутым пуэн, кеч тыге, кузе мый вученат омыл. Сылне вашмутшым мый вигак аклен налын омыл. Но кызыт мый йӧратымашыжлан  да порылыкшылан кугу таум ойлем».

15. Молан южгунам кумалме годым Иеговалан ямде вариантым темлаш огеш кӱл? (Тыгак сӱрет-влакым ончыза.)

¹⁵ А кумшо йодыш тыгай лийын кертеш: «Можыч мыланем иктаж-мо весе нерген кумалаш кӱлеш?» Мутат уке, кумалме годым раш ойлаш сай, но южгунам лучо Иеговалан ямде вариантым темлаш огыл. Тидлан кӧра, мом Иегова мыланна ямдылен, ужаш куштылгырак лиеш. Кугыжанышын увертарышыж-влаклан школышто тунемаш шонышо ака нерген мутланен налына. Тудо тиде Школышто чот тунемнеже да тидын нерген кумалеш. Тудо уверзе кӱлмӧ верыште служитлынеже. Сандене акалан Школ нерген умбакыжат кумалаш да тыгак Иеговам тудлан ончыкташ йодаш лиеш, кушто да кузе тудо уже кызыт шукырак служитлен кертеш (Ап. паш. 16:9, 10). Вара тудлан кумалмыж дене келшышын ыштыман. Мутлан, тудо районым эскерыше изам йодын кертеш, улыт мо воктене тыгай погынымаш-влак, кушто пионер-влак огыт сите. Але кушто Кугыжанышын увертарышыже-влак кӱлыт пален налашлан филиалыш возен кертеш e.

16. Тиде статья гыч ме мом пален налынна?

¹⁶ Кузе ме ужынна, кумалмылан Иегован вашмутыштыжо эре йӧратымаш ден справедливость койыт (Пс. 4:4; Ис. 30:18). Южгунам Юмо вучымына семын вашмутым огеш пу. Но тудо мемнан ик кумалмашымат вниманийже деч посна огеш кодо. Иегова мемнам чот йӧрата да мемнам нигунамат огеш кодо (Пс. 9:11). Сандене тудлан эре ӱшаныза да шӱмыштыда мо улмым, чылажымат каласкалыза (Пс. 61:9).