1. Исайя пророк израильтян-влаклан мом каласынеже ыле?

 ИСАЙЯ пророк Иеговам «чынлыкын Юмо» манын. «Чынлык» кусарыме мут (буквально «аминь») «тыге лийже» манмым ончыкта (Ис. 65:16, сноско). Кунам Библийыште «аминь» мут вашлиялтеш, тудо теве мом ончыкта: Иегова ден Иисус шке мутыштым чынжымак шуктат. Исайя израильтян-влаклан мом каласынеже ыле? Иеговалан тӱрыснек ӱшанаш лиеш. Тудо шке сӧрымыжым эре шукта.

2. Молан ме Иегован сӧрымыжлан ӱшанен кертына, да могай йодыш-влакым лончылен налына?

² Иегован сӧрымыжлан ӱшанен кертына мо? Исайян тиде шомакым возымыж деч вара 800 ий наре эртымеке, апостол Павел умылтарен, молан Юмын чыла сӧрымыжлан тӱрыснек ӱшанаш лиеш. Юмо шойыштын огеш керт манын, тудо каласен (Евр. 6:18). Кузе памаш гыч иканаште йӱшаш вӱд да шинчалан вӱд йоген огеш керт, тыгак Иеговат, чынлыкын Юмо, шояклен огеш керт. Тыгела, чыла ойлымо мутшылан ӱшанаш лиеш. Тиде статьяште ме тыгай йодыш-влакым лончылен налына: могай ончыкылыкым Иегова мыланна сӧра? Тудын сӧрымыжӧ шукталтеш манын, могай гарантий уло?

3. а) Юмын кажне служитлышыже могай ончылгоч каласымашым чот йӧрата? (Почмаш 21:3, 4). б) Тиде сӧрымашым колын, южышт мом ойлат?

³ Ме лончылен налына ончылгоч каласымашым, кудыжым Юмын кажне служитлышыже чот йӧрата. (Почмаш  21:3, 4 лудын лекса.) Иегова мыланна тыгай жапым сӧра, кунам «колымаш ок лий, ойгат, мӱгырен шортмашат, черат ок лий». Райыште могай илыш лиеш еҥ-влаклан ончыкташлан ме чӱчкыдын тиде шомакым кучылтына. Тиде сӧрымашым колын, южо еҥ-влак маныт: «Тиде йомак».

4. а) Мом Иегова ончылгочак пален? б) Иегован сӧрымыжлан ӱшанашлан мемнан мо уло?

⁴ Мутат уке, Иегова пален: ме служымаш годым еҥ-влаклан Почмаш книга гыч ончылгоч каласымашым ончыкташ тӱҥалына да шукыштлан тиде шомаклан ӱшанаш неле лиеш (Ис. 42:9; 60:2; 2 Кор. 4:3, 4). Почмаш 21:3, 4 почеламут-влак гыч ончыкылык нерген мут чынжымак шукталтеш манын, шкенам да весе-влакым кузе ӱшандарен кертына? Иегова сӧрымаш-влакым гына огыл, тыгак тидлан ӱшанаш амал-влакымат пуэн. Могай тиде амал-влак?

5. Иегован сӧрымыжлан ӱшанаш амал-влакым ме могай почеламут-влакыште муына?

⁵ Рай нерген Иегован сӧрымыжлан ӱшанашлан амал-влакым ме Почмаш 21:5, 6 почеламут-влакыште муына. Тушто возымо: «Престолышто Шинчыше каласен: „Теве, Мый чылажымат уым ыштем“. Вара ойлен: „Возен нал, вет нине шомак чын да ӱшанле улыт“. Адак мылам ойлен: „Шукталтын. Мый Альфа да Омега, Тӱҥалтыш да Мучаш улам“».

6. Кузе Почмаш 21:5, 6 гыч шомак Юмын сӧрымыжлан ӱшанымашнам пеҥгыдемда?

⁶ Нине библийысе почеламут-влак Юмын сӧрымыжлан ӱшанымашнам пеҥгыдемдат. Теве мом нунын нерген «Апогей Откровения» книгаште ойлалтеш: «Иегова пуйто документыш кидпалыжым шында, кудыжо ӱшанле еҥ-влакым ӱшандара: тудо шке сӧрымыжым чынжымак шукта» b. Почмаш 21:3, 4 — тиде Иегован сӧрымыжӧ, а вес кок почеламут — тиде, каласаш лиеш, тудын кидпалыже. Тиде кидпале Юмын мутшылан ӱшанаш лиеш манын ӱшандара. Айста 5-ше да 6-шо почеламут-влакым лончылен налына да южо кӱлешан детальже-влакым ончалына.

7. 5-ше почеламутын тӱҥалтыштыже мом возымо, да тиде мемнам мо шотышто ӱшандара?

⁷ 5-ше почеламут тыге тӱҥалеш: «Престолышто Шинчыше каласен» (Почм. 21:5а). Почмаш книгаште кум случайым веле возымо, кунам Иегова ала-кӧ гоч огыл, а шкеже ойла. А тиде нунын гыч иктыже. Лектеш, тиде ӱшандарыше мутым суксо огыл, ылыжше Иисусат огыл, а Иегова шкеже ойла. Сандене умбакыже возымо мутлан ӱшанен кертына. Молан? Молан манаш гын, Иегова «мутшым ок вашталте» (Тит. 1:2). Тыгела, 5-ше почеламутын тӱҥалтышыже мемнам ӱшандара: Почмаш 21:5, 6 почеламут-влакыште возымылан тӱрыснек ӱшанаш лиеш.

8. Иегова, шке сӧрымыжым шукта манын, кузе пеҥгыдемда? (Исайя 46:10).

⁸ Ындыжым айста шонкален налына тыгай шомак нерген: «Мый чылажымат уым ыштем» (Почм. 21:5). Оригинал йылме дене тиде шомак тыгай мут дене тӱҥалеш, кудыжо «ончо» але «колышт» манын кусаралтеш. Тиде мут Почмаш книгаште  шуко гана вашлиялтеш. Ик справочник дене келшышын, тудын цельже — лудшо еҥым умбакыже мом возымым пален налаш тараташ. А умбакыже мом возымо? Ончалза, «Мый ышташ тӱҥалам» огыл, а «Мый... ыштем» манын, Иегова каласен. Юмо ончыкылык вашталтыш-влак нерген тыге ойла, пуйто нуно уже кызыт шукталтыт. Лектеш, тудын сӧрымыжӧ шукталтеш манын, тудо шкежат пеҥгыдын ӱшана. (Исайя 46:10 лудын лекса.)

9. а) Кузе Иегова чылажымат уым ышта? б) Кызытсе «кава» да «мланде» дене мо лиеш?

⁹ Айста «Мый чылажымат уым ыштем» шомакыште эше ик детальым ончалына. Кузе Иегова чылажымат уым ышта? Южо ыштымыжым алмашта, а южыжым тӧрлата. А мом Иегова алмашта? Почмаш 21:1 почеламутышто ме лудына: «Ончычсо кава ден ончычсо мланде пытеныт». «Ончычсо кава» Сатана ден демон-влакын виктарыме правительстве-влакым ончыкта (Матф. 4:8, 9; 1 Иоан. 5:19). Библийыште «мланде» мут мландыште илыше еҥ-влакым ончыктен кертеш (1 Лет. 16:31; Пс. 95:1). Лектеш, «ончычсо мланде» — тиде мемнан кечылаште илыше пужлышо еҥ-влак. Иегова тиде кава ден мландым тӧрлаташ ок тӱҥал. Тудо нуным тӱрыснек пытара. Тудо нуным «у кава ден у мланде» дене алмашта. Вес семынже, у правительстве чын ыштыше еҥ-влакым вуйлаташ тӱҥалеш.

10. Иегова мом тӧрлата?

¹⁰ Но Иегова чылажымат огеш алмаште. Южо ыштымыжым тудо тӧрлата але у гайым ышта (Почм. 21:5). Иегова мланде ден еҥ-влакым паремда. Исайян ончылгоч каласымыже почеш мландына чапле паркыш савырна, чыла вере Эдем лиеш. Мемнан гыч кажныже ужеш, кузе тудо уэмеш да кузе тудын дек вий пӧртылеш. Окшак, сокыр ден соҥгыра-влак таза лийыт. Колышо-влакат ылыжыт! (Ис. 25:8; 35:1—7).

11. Мом Иегова Иоаннлан ышташ кӱштен да молан?

¹¹ Еҥ-влак Иегован мутшылан ӱшанышт манын, мом тудо эше каласен? Тудо Иоаннлан каласен: «Возен нал, вет нине шомак чын да ӱшанле улыт» (Почм. 21:5). Но тыгак Юмо каласен, молан возен налаш кӱлеш: «Вет нине шомак чын да ӱшанле улыт». Иоанн Юмын кӱштымашыжым шуктен. Ме тидлан чот куанена. Тидлан кӧра ме мландым райыш савыраш Иегован сӧрымыжӧ нерген палена да сылне ончыкылык нерген шонкален кертына.

12. Молан Иегова каласен: «Шукталтын»?

¹² Мом Юмо умбакыже каласен? «Шукталтын» (Почм. 21:6). Иегова ончыкылык рай нерген тыге ойла, пуйто тудо уже мландыште уло. Тыге ойлаш Иегован тичмаш праваже уло. Вет нигӧ да нимо тудлан шонымыжым шукташ мешаен огеш керт. Молан тудлан ӱшанаш лиеш, Иегова эше ик доказательствым конда.

13. Молан Иегова каласен: «Мый Альфа да Омега... улам»?

¹³ Кузе ме уже ойленна, Почмаш книгаште Иегован мутшым, кудыжым тудо шкеже ойлен, кум гана возымо (Почм. 1:8; 21:5, 6; 22:13). Нине случай-влак гыч  кажныштыже Иегова ойла: «Мый Альфа да Омега... улам». «Альфа» тиде грек алфавитын икымше букваже, а «Омега» — пытартышыже. «Альфа да Омега» ойлен, Иегова ончыкта: тудо иктаж-могай пашам ышташ тӱҥалеш гын, тиде пашам мучаш марте шукта.

14. а) Умылтарыза, кунам Иегова пуйто «Альфа» манын каласен да кунам «Омега» каласа. б) Тӱҥалтыш 2:1—3 почеламутлаште возымо шомак мо шотышто ӱшандара?

¹⁴ Кунам Иегова Адам ден Евам ыштен, тудо еҥ-влак ден мланде шотышто шке шонымыжо нерген каласен. Библийыште ме лудына: «Юмо нуным суапландарен да нунылан каласен: „Тӱлаҥза да шукемза, мландым темыза да озаланыза“» (Тӱҥ. 1:28). Тугодым Иегова пуйто «Альфа» манын каласен. Тудо шке шонымыжым раш умылтарен: Адам ден Еван сулыкдымо да мут колыштшо тукымжо мландым тема да райыш савыра. Кунам тиде шукталтеш, Иегова пуйто «Омега» манын каласа. Лач тыге лиеш манын гарантийым Юмо кава ден мландым ыштыме деч вара вигак пуэн. Тидын нерген Тӱҥалтыш 2:1—3 палдара (лудын лекса). Тушто каласыме дене келшышын, Иегова шымше кечым священный кечылан ойырен. Тыге Юмо гарантийым пуэн: тиде кечын мучашыже марте тудо чыла шонен пыштымыжым шукта.

15. Молан чучын кертын, пуйто Сатана верч Юмо шке шонымыжым шуктен огеш керт?

¹⁵ Юмо ваштареш шогалмеке, Адам ден Ева языкан лийыныт. Тидлан кӧра язык ден колымаш нунын тукымыштлан куснен (Рим. 5:12). Ончыктен мо тиде, пуйто Юмын шонен пыштымыже нигунамат  огеш шукталт да мланде языкдыме да мут колыштшо еҥ-влак дене нигунамат огеш тем? Сатанан ыштымыже верч Юмо ындыжым «Омега» манын каласен огеш керт мо? Очыни, Сатана шонен, пуйто Иегова ынде сӧрымыжым шуктен огеш керт. Чылажым тӧрлаташ Юмын вариантше шагал лийын манын, тудо шотлен. Нунын гыч иктыже — Адам ден Евам пытараш да нунын олмеш языкдыме вес еш мужырым ышташ. Но Иегова тыге ышта ыле гын, Юмо шояче улеш манын, Диавол каласен кертын. Молан? Молан манаш гын, Тӱҥалтыш 1:28 почеламут дене келшышын, Иегова Адам ден Евалан лач нунын тукымышт мландым тема манын каласен.

16. Молан Сатана шонен кертын, пуйто Иегова тӱҥалме пашажым мучаш марте шуктен огеш керт?

¹⁶ Очыни, Сатана теве мо нерген шонен кертын: Иегова Адам ден Евалан йочам шочыкташ йӧным пуа гынат, йочашт-влак нигунамат языкдыме огыт лий (Эккл. 7:20; Рим. 3:23). Тунам Диавол Иеговам титаклен кертын, пуйто тудо шке пашажым мучаш марте шуктен огеш керт. Молан? Молан манаш гын, тунам райысе мланде языкдыме да мут колыштшо еҥ-влак дене ок тем ыле.

17. Кузе Иегова Сатанан планжым пудыртен, да чылажат мо дене пыта? (Тыгак сӱретым ончыза.)

¹⁷ Иегова Сатанан чыла планжым пудыртен (Пс. 91:6). Тудо Адам ден Евалан йочам шочыкташ йӧным пуэн. Сандене Сатана Юмым шояклымаште титаклен кертын огыл. Тыгак Иегова тӱҥалме пашажым мучаш марте шуктен огеш керт манын, Сатана тудым титаклен кертын огыл. Вет Юмо шке шонымыжым шукташлан «тукымлан» шочаш йӧным пуэн. Тиде тукым Адам ден Ева деч шочшо мут колыштшо еҥ-влак верч илышыжым пуэн. Тыге тудо нуным тӱлен да утарен налшаш ыле (Тӱҥ. 3:15; 22:18). Иегова тыгай ошкылым ышта манын, Сатана шоненат огыл. Молан? Молан манаш гын, Иеговам кугу йӧратымаш тидым ышташ таратен (Матф. 20:28; Иоан. 3:16). А Сатана огеш пале, мо тыгай весе-влакым йӧратымаш, вет тудо шке нерген гына шона. Могай пайдам тӱлен налмаш конда? Христосын 1000 ий вуйлатымыжын мучаштыже райысе мландыште Адам ден  Еван языкдыме да мут колыштшо тукымжо илаш тӱҥалеш. Чылажат лач тыге лиеш, кузе Иегова эн ончычак шонен пыштен. Тунам Иегова пуйто «Омега» манын каласа.

18. Мланде райыш савырна манын ӱшанашлан могай мемнан амал-влак улыт? (Тыгак « Иегован сӧрымыжлан ӱшанаш кум амал» рамкым ончыза.)

¹⁸ Тиде статьяште ме ончен лекна, мланде райыш савырна манын ӱшанашлан могай амал-влак улыт. Тиде чынжымак лиеш манын, мом ме еҥ-влаклан каласен кертына? Икымше, Иегова тидым шкеже сӧра. Почмаш книгаште возымо: «Престолышто Шинчыше каласен: „Теве, Мый чылажымат уым ыштем“». Тиде сӧрымашым шукташлан Юмын уш-акылже, вийже да кумылжо уло. Кокымшо, Иегова пала: тудын каласымыже тӱрыснек шукталтеш. Теве молан тудо каласен: «Нине шомак чын да ӱшанле улыт» да «Шукталтын». Кумшо, Иегова иктаж-могай пашам ышташ тӱҥалеш гын, тиде пашажым мучаш марте шукта, вет тудо шкенжым «Альфа да Омега» манеш. Ончыкыжым Иегова ончыкта: Сатана шояче да тудо Юмын шонымыжым шукташ чарен огеш керт.

19. Айдемылан мландым райыш савыраш Юмын сӧрымашыжлан ӱшанаш неле гын, мом ыштен кертыда ыле?

¹⁹ Шарныза: кажне гана, кунам те служитлымаште Юмын сӧрымашыже-влак нерген каласкаледа, те Иеговалан ӱшанымашдам пеҥгыдемдеда. А кунам те Почмаш 21:4 почеламутым айдемылан лудын пуэда, а тудо тиде йомак манеш, мом ыштыман? Тунам 5-ше да 6-шо почеламут-влакым лудын пуаш да умылтараш лиеш. Ончыктыза: Иегова шке сӧрымыжым шукта манын гарантийым пуа, вет тудо тидым пеҥгыдемдашлан пуйто кидпалым шынден (Ис. 65:16).