ЧЫНЫМ мо нерген? Кудышт ожнысекак айдеме-влакым тургыжландарат. Ала теат нине йодыш-влаклан вашмутым кычалында, мутлан:

• Юмо мемнам йӧрата мо?

• Кунам-гынат орланымашлан да сар-влаклан мучаш толеш мо?

• Колмеке, умбакыже мо лиеш?

• Колышо-влак угыч илаш тӱҥалын кертыт мо?

• Юмо мемнам колжо манын, кузе кумалаш кӱлеш?

• Илышыште пиалым кузе муаш?

Тендан шонымаште, тиде йодыш-влаклан вашмутым кушто кычалаш кӱлеш? Библиотекыште да книга кевытлаште те шӱдӧ дене книгам верештын кертыда, кудыштын авторышт, нине йодыш-влаклан вашмутым палат, манын тендам ӱшандарат. Но чӱчкыдынжак ик книгасе каҥаш вес книгасе дене келшен огеш тол. Таче южо книгаже тенийсе жаплан пеш келшен толшын койыт гынат, ятырак огыл жап эртымек нунат тоштемыт. Тушкат вашталтышым пуртат, але угыч возен луктыт.

Туге гынат, тыгай книга, кудылан тӱрыснек ӱшанаш лиеш, уло. Тиде чынлык книга. Иисус Христос Юмылан кумалмыже годым каласен: «Тыйын шомакет — чын» (Иоаннын 17:17). Таче тиде Шомак Библий семын палыме. Моло страницымат лудын лекса, тунам те кӱшнӧ ончыктымо йодыш-влаклан библий гоч пуымо чын да раш вашмутым пален налыда.

МОЛАН ТЫГАЙ ЙОДЫШ ЛЕКТЕШ. Ме торжа да чын укелык дене темалтше тӱняште илена. Юмын шонен пыштымыже почеш айдеме-влак орланат манын шуко религий туныкта.

ЮМЫН ШОМАКШЕ МОМ ОЙЛА. Юмо осалым нигунамат огеш ыште. «Ош Кугу Юмо шотдымым, да Чылакертше чынлык ваштареш огеш керт ыштен!» — Иовын 34:10, (УТ) ойлалтеш. Калык-влак шотышто Юмын сылне шонен пыштымашыже уло. Вот молан Иисус мемнам тыге кумалаш туныктен: «Пылпомышто улшо мемнан Ачана!.. Тыйын Кугыжанышет толжо, Тыйын шонымашет мланде ӱмбалнат пылпомышсо гаяк шукталтше» (Матфейын 6:9, 10). Юмо мемнам пеш чот йӧрата. Эсогыл, шке шонен пыштымашыжым шукташлан кӧра шергакан надырым пуаш ямде лийын (Иоаннын 3:16).

Ончыза тыгак Моисейын 1-ше книгаже 1:26—28; Иаковын 1:13 да 1 Петрын 5:6, 7.

МОЛАН ТЫГАЙ ЙОДЫШ ЛЕКТЕШ. Сар-влак шотлаш лийдымын шуко калыкын илышыштым лугыч ыштат. Еҥ-влакын йӧсланымашышт мемнан шӱмнамат тарватыде огыт кодо.

ЮМЫН ШОМАКШЕ МОМ ОЙЛА. Жап шумеке Юмо чыла мланде ӱмбалне тыныслыкым ышташ сӧра. Тудын Кугыжаныжше — кавасе правительствын вуйлатымыже годым калык «кредалаш тунемаш» огыт тӱҥал. Нуно «шке кердыштым шогашке таптат» (Исайын 2:4, УТ). Юмо чыла орланымаш да чын укелыклан мучашым пышта. Библий ӱшандара: «[Юмо] нунын чыла шинчавӱдыштым ӱштылеш. Ынде колымаш ок лий, ойгат, мӱгырен шортмашат, черат ок лий, вет ончычсо [тыгак чын укелык да орланымаш] эртен» (Почмаш 21:3, 4).

Ончыза тыгак Псаломым 37:10, 11; 46:9 да Михейын 4:1—4.

МОЛАН ТЫГАЙ ЙОДЫШ ЛЕКТЕШ. Айдеме кола гынат, тудын чонжо кодын вестӱкын илышым шуя, манын почти чыла религий-влак туныктат. Южышт ӱшанат: колышо-влак илыше-влаклан эҥгекым конден кертыт, а сулыкан-влакым Юмо тамыкыште курымеш йӧсландара.

ЮМЫН ШОМАКШЕ МОМ ОЙЛА. Кунам айдеме кола, тудын илышыже пыта. «Колышо-влак нимомат огыт шинче»,— ойлалтеш Экклезиастын 9:5. Нуно нимомат огыт пале, огыт умыло, огыт шиже, сандене илыше-влаклан ни эҥгекым конден, ни полшен огыт керт (Псалом 146:3, 4).

Ончыза тыгак Моисейын 1-ше книгажым 3:19 да Экклезиастын 9:6, 10.

МОЛАН ТЫГАЙ ЙОДЫШ ЛЕКТЕШ. Ме чыланат кӧм йӧратена, нунын дене пырля илышлан куанен илнена. Сандене, шке лишыл-влакнам, кӧм колымаш мемнан дечын ойырен, угыч ужмына шуэш.

ЮМЫН ШОМАКШЕ МОМ ОЙЛА. Колышо кокла гыч шукышт ылыжтарыме лийыт. Иисус сӧрен: «шӱгарыште улшо-влак... лектыт» (Иоаннын 5:28, 29, ХБКИ). Юмын ончылгочак шонен пыштымыже почеш ылыжше-влаклан рай гай мланде ӱмбалне илаш йӧн пуалтеш (Лука 23:43). Тыгак Юмым колышт шогышо калыкын чыла могырымат пеҥгыде тазалыкышт лиеш да нуно курымеш илаш тӱҥалыт. Библийыште ойлалтеш: «Чын-влаклан мланде пуалтеш и илаш тӱҥалыт тушто курымеш» (Псалом 37:29).

Ончыза тыгак Иовын 14:14, 15, Лукан 7:11—17 да Апост. пашат 24:15.

МОЛАН ТЫГАЙ ЙОДЫШ ЛЕКТЕШ. Чыла религийыштат ӱшанен шогышо-влак шке юмыштлан кумалыт. Но шукыштын юмылтымашышт вашмут деч посна кодеш.

ЮМЫН ШОМАКШЕ МОМ ОЙЛА. Юмылан кумалме годым юмылтымаш шомакым угыч да угыч пелешташ Иисус кӱштен огыл. «А кумалмыда годым иктымак угыч-угыч ида ойло» (Матфейын 6:7, УТ). Мемнам Юмо колжо манын, тудын кӱштымыже семынак юмылтыман. Садлан мыланна тудын йодын шогымашыжым пален налаш кӱлеш. 1 Иоаннын 5:14 возымо: «Тудын [Юмын] кумылжо почеш кунам ме иктаж-мом йодына, Юмо мемнам колеш».

Ончыза тыгак Псаломым 65:2, Иоаннын 14:6, 14 да 1 Иоаннын 3:22.

МОЛАН ТЫГАЙ ЙОДЫШ ЛЕКТЕШ. Окса, чап але моторлык пиалым пуат манын шуко еҥже ӱшанат. Сандене уло кертмын чыла тидын верч тыршен илат гынат, пиалым садак огыт му.

ЮМЫН ШОМАКШЕ МОМ ОЙЛА. Иисус ончыктен, мо дене чын пиал кылдалтеш. Тудо каласен: «Пиалан улыт, кӧ духовностьын кӱлешлыкшым умыла» (Матфейын 5:3, УТ). Кунам ме Юмо нерген чыным да мемнан ончыкылык шотышто тудын шонен пыштымашыжым пален налына, тунам ме чынже денак пиалан лийын кертына. Тиде чынлыкым Библийыште возымо. Чынлыкым шинчымаш мыланна мо илышыште эн кӱлешан, а мо уке, умылаш полшен кертеш. Ме шке илышыштына библийысе каҥаш-влакым кучылтына гын, утларак пиалан лийын кертына (Лука 11:28).

Ончыза тыгак Туштен ойлымашым 3:5, 6, 13—18 да 1 Тимофейлан 6:9, 10.

 Ме кӱчыкын гына куд йодышлан Библий гыч вашмут-влакым ончен лекна. Эше шукырак пален налмыда шуэш мо? Ала теат Юмо нерген чыным палаш тыршыше кокла гыч улыда? Тугеже тыландат пален налаш оҥай лиеш, молан йӧратыше Юмо осалым да орланымашым огеш кораҥде? Кузе еш илышыште пиалым муаш? Тиде да моло йодышланат Библийыште тичмаш да ӱшандарыше вашмут-влак пуалтыт.

Туге гынат, шукынжо таче Библийым почынат огыт ончал. Нунылан тиде книга пеш кӱжгӱн да умылаш неле гай чучеш. Шке йодышланда вашмутым Библий гыч пален налаш тыланда полыш кӱлеш мо? Тиде шотышто Иегован Свидетельже-влак тыланда полшен кертыт.

Йӧн-влак кокла гыч иктыже — тиде мӧҥгыштӧ оксам тӱлыде Библийым шымлымаш. Тендан деч тора огыл илыше Иегован Свидетельже-влак кажне арнян мӧҥгышкыда але тыланда йӧнанрак лийше вес верыш толын, Библийым пырля изин-изин шымлен налаш полшен кертыт. Тыгай шымлымаш уло тӱнямбалне миллион дене калыклан уже полышым пуэн. Нунын кокла гыч шукынжо ынде ӱшанлын каласен кертыт: «Мый чынлыкым муынам!».

Библийыште улшо чынлык — тиде шергакан поянлык. Тудо мемнам тӱрлӧ оккӱллан ӱшанымаш деч, чон ойгырымаш деч да лӱдыкшӧ деч утара. Тудо ӱшанлыкым, куаным пуа да илышыште чын корным муаш полша. Иисус каласен: «Те чыным пален налыда, и чын тендам эрыканым ышта» (Иоаннын 8:32).