Tanka kasak ba nu takan mai daukisa ki?

Dia tanka dukyara aisisa? Pat aihwa wina upla kupia ra uba turbi makabi wali ba tanka dukyara aisisa. Ban kra man sin naku uba lukisma:

Rait pali Gâd ba yawan ra lukisa ki?

War, panis ba sin, yu kum apu kabia ki?

Yawan pruya taim dia wan takisa?

Pruan nani ba, bila kaikanka kum brisa ki?

Gâd ai walbia dukyara, nahki puri sunaia sna ki?

Nahki muni rayaki ba lilia kabia ki?

Ani wina nahamuna tanka ba sakma ki? Upla sat sat ra walma kaka, tanka sat sat sin mai wibia. Pasin, bara serts ta bri uplika nani ra walisma kaka sin, pana pana ai mapara aisisa. Bara tanka mai wi ba sin, naiwa sat kum sa, kuna yauhka mahka sat wala ra lakan sa.

Ban sakuna, tanka kasak wi bukka kum lika bara sa. Kunin luha bukka kum sa. Jisas Kraist bui, Gâd ra ai pura suni win: “Man smalkankam bila ba sika, diara kasak pali ba” (Jan 17:17). Baha Bila ba sika, Baibil sin makisa. Bara wahya aula nani ra prahni marikisa, Baibil ra tanka wi ba lika, param, bara kasak pali sa.

 Rait pali Gâd ba Yawan ra Lukisa ki?

DIAKAN BAHAMUNA WALISA:

Tasba ra, rau munan laka wihki upla pâtkas panis wauhwi laka ni sin uba bangkisa. Bara rilidian ailal bila, yawan pât wauhwi ba sut Gâd kupia laka sa wisa.

BAIBIL DIA SMALKI BA:

Gâd bui saurka kumi sin takbia daukras. Job 34:10 bila: “Lukaia apia sa Gâd karnika sut bri ba, saura daukbia, kasak apia ba sin daukbia”. Tasba uplika ba dukyara Gâd blisin man lukisa. Baha mita, nahki wan pura sunaia lan wan dauki Jisas naku win: “ Yawan Aisa kasbrika purara sma ba, [...] man King aimakaia ba yarka balbia. Man kupiam laka tasba ra daukan kabia, kasbrika purara dauki ba baku” (Matyu 6:​9, 10). Gâd yawan ra uba luki ba mita, pramis munan ba sut aimakbia du­kyara, sakripais ailal sin pat daukan sa (Jan 3:​16).

Blasi sturka 1:​26-​28; Jems 1:13; bara 1 Pita 5:​6, 7 ba sin aisi kais.

War, Panis ba sin, Yu kum Apu Kabia ki?

DIAKAN BAHAMUNA WALISA:

War nani taka, ban upla ailal prui tiwisa. Yawan sut panis satka kum wauhwisa.

BAIBIL DIA SMALKI BA:

Gâd bila, naika pyua ra, witin bui kupia kumi laka tasba ra mangkaisa wisa. Ai Kingka laka —heven gabamintka ba​— karnika munuhtara, upla ba “ war aiklabaia laka nani [...] kli smalkbia apia”. Kau ni, “aiklabaia sordka ba tasba tukbaika daukbia” (Aiseya 2:4). Warban laka ba, panis laka ba sin, Gâd bui apu daukbia. Baibil ba pramis munisa: “ [Gâd] witin nani nakra laya ba sut dikbia, bara prura kau apu kabia, inanka, pura mata inaia laka, latwanka sin, kan diara almuk nani ba sut [nawas upla pâtkas panis wauhwi ba sut sin] lui wan sa” (Param marikan [Reveleshan] 21:​3, 4).

Lawana 37:10, 11; 46:9; bara Maika 4:​1-4 ba sin aisi kais.

Yawan Pruya taim Dia Wan Takisa?

DIAKAN BAHAMUNA WALISA:

Rilidian aihkika ba smalkisa upla pruya taim ai insaitka ra diara kum ban raya takaskisa wisa. Kum kum bila, pruan nani ba saura wan munaia sip sa wisa. Bara Gâd mita saura nani ra klala yabaia wisi hel pauta kum ra lulkisa wisa.

BAIBIL DIA SMALKI BA:

Pruya taim, upla ba dan apu takisa. Smasmalkra 9:5 bila: “Pruan nani ba diara tanka sin briras”. Bahamna, pruan nani ba, diara tanka sip kaikras, ai dara kumi sin sip walras wisa. Raya nani ra help munaia, apia kaka saura munaia sin, sip apia pali sa (Lawana 146:​3, 4, Miskitu Salmo Lawana nani, 1960).

Blasi sturka 3:​19 bara Smasmalkra 9:​6, 10 ba sin aisi kais.

Pruan nani ba, Bila Kaikanka kum Brisa ki?

DIAKAN BAHAMUNA WALISA:

Yawan want sa, wan uplika latwankira wal asla, liliakira, ban raya kaia. Baha mita, wan uplika pruan uba kli kaikan wan daukisa.

BAIBIL DIA SMALKI BA:

Upla aihkika pruan ba, kli buan kabia. Jisas pramis munan “pruan nani [ba] raiti wina buan kabia” (Jan 5:​28, 29). Blasi wina Gâd daukaia lukan ba kat, kli buan kabia nani na, paradais tasbaia kum ra iwbia (Aiseya 65:​21-​25). Naika aimakbia na ra, bila wali nani ba siknis apu, raya ban kaia laka bribia. Kan Baibil bila: “Kasakkira nani ba lika, tasbaia ba brih iwbia, ban kaiara sin baha tasbaia ra iwi kabia” (Lawana 37:29).

Job 14:14, 15; Luk 7:​11-​17; bara Wark nani 24:15 ba sin aisi kais.

Gâd ai Walbia dukyara, Nahki Puri Sunaia Sna ki?

DIAKAN BAHAMUNA WALISA:

Sip sa wiaia, rilidian nani sut uplika ba ai pura sunisa. Ban sakuna, upla ailal ba Gâd walras baku ai dara walisa.

BAIBIL DIA SMALKI BA:

Jisas lan wan dauki win, wan pura suni kli kli sim dukya aisaia apia. Naku win: “Puram sunisma bara, bila bahki nani kli kli aisapara” (Matyu 6:7). Gâd wan pura sunra nani walbia yawan want sa kaka, witin yamni kaiki ba kat sunaia sa. Sakuna, taura, Gâd dia yamni kaiki ba pas lan takan kaia sa. Ningkara lika, lan takan ba kat alki daukaia. 1 Jan 5:​14 ba latan sa: “ [Gâd] kupia laka kat [yawan] dia dia makabuya ba wan walisa”.

Lawana 65:2; Jan 14:​6; 16:​23, 24; bara 1 Jan 3:​22 ba sin aisi kais.

Nahki Muni Rayaki ba Lilia Kabia ki?

DIAKAN BAHAMUNA WALISA:

Upla ailal lukisa lalah ba, nina tara kum ba, apia kaka ai wîna daukra pain briaia ba, ai liliaka sakbia. Bara ­bahamuna nina bliki rait lilia takras.

BAIBIL DIA SMALKI BA:

Rait lilia kaia ba dahra, Jisas naku win: “Lilia pali sa wan solka dukya brin dauki nani ba” (Matyu 5:3). Wan solka dukya brin dauki nani ba — spirit laka ra Gâd tanka kasak ba​— briaia yawan trai munbia sa kaka, rait liliaka laka ba sakbia. Baha tanka kasak ba Baibil ra sa. Bara tanka kasak ba nu si, ani rait lilia mai saki ba param kaikma. Yabrika Baibil tanka kasak ba rayakam ta bribia, auyapahkira rayaka kum sin pakisma (Luk 11:28).

Sins laka 3:​5, 6, 13-​18 bara 1 Timoti 6:​9, 10 ba sin aisi kais.

Bisiura tanka 6 dahra laki kaikram ba, dis kaikma dukyara tanka sirpi kum baman sa. Kau want sma ki? “Solka dukya brin dauki nani ba” tilara sma kaka, au takma kaia sa. Tanka pranakira wala nani sin bara ba naku sa: “Gâd uba wan lukisa kaka, diakan tasba ra panis ban takisa? Nahki pamali iwanka kau pain kum briaia sna ki? ”. Naha, bara wala nani dahra sin, Baibil ra tanka param maikisa.

Sakuna, upla ailal Baibil tanka plikbia sapa nu apu sa. Kan Baibil ba uba yahpa sa wisa, bara tanka briaia uba karna sin kaikisa. Bara manka? Baibil tanka briaia dukyara, upla help mai munbia want sma ki? Jehova Witniska nani ba mita, diara wal, misar tam baikaia sip ba maikaia want sa.

Pas baku, Rait pali Baibil ba Dia Smalkisa ki? bukka ba sika, Baibil tanka param wan sakisa, bara upla uya taim apu nani wal laki kaikaia dukyara paskan sa. Walka baku, Baibil stadika kum prisant yabisa. Wamtla lamara Baibil lan Jehova Witniska kum mita, wik bani pyu kunhku kum wamtla ra, apia kaka plis wala kum wima ba ra, waia sip sa. Bara man wal Baibil laki kaikaia. Tasba aiskara upla milian milian nahamuna yamnika sakisa. Bara tila wina ailal sin bila: “ Nanara lika tanka kasak ba pliki sakri sa! ”.

Yuyaka kum kau tara pliki sakaia apu sa. Baibil tanka kasak ba mita, lilia bila kaikan laka kum wankisa. Bara sibrin luki sat sat, wihki wan sinska blakanka sat sat ba wina sin wan nakra klip lanhkisa. Jisas win ba baku: “Kasak tanka ba kaikma, bara kasak tanka ba mita sin pri mai sakbia” (Jan 8:​32).

□ Pramis apukira, Rait pali Baibil ba Dia Smalkisa ki? bukka ba brin ai daukisa.

□ Upla watla kat Baibil stadika yabi bangwisma ba dukyara maisipahkma want sna.

Kau nu takaia want sma? Jehova Witniska nani ra uls.

Diara wala mapara wiras sa kaka, Baibil tikska nani ulbi sakanka na ra taki ba Dawan Bila Aiska ba wina brin.

© 2008 Watch Tower Bible and Tract Society of Pennsylvania

[Lilka alkan dawanka wahia 2 ra taki ba]

© Paul Lowe/Panos Pictures