EBARIBARI yaddi? Ebaribari ya makoho ofuneya athu yakohiliwa. Podi wera we onowabihaga wiikoha:

• Ebaribarene Mulugu ononipwatha iyo?

• Nnere ofiya nlabo koddo ni goyi emale?

• Empadduwa ddi muthu akwa?

• Ehikalawo yojhehera wathu ekwile?

• Ginere ddi wihina Mulugu iwe malobelwaga?

• Ginere ddi wi gifwanye ohagalala?

We onafwanye wuvi dhowakula dha makoho yala? Wadhowa mbibliyotekani naari muloja munagulihiwa malivuru, mohanganyedha onere waafwanya malivuru gwe enwoga wi nihikanna dhowakuladha. Mowindo, malivuru ala enovanyihana. Mudhidhi wowinjhivene malivuru amodha enakala ninga ehikanna ebaribari, nahuna ogavirile mudhidhi vang’ono enovira ni enolebiwa dilabili naari enopwehiwavo malivuru amodha.

Mbwenye nihikalawo livuru nimodha ninna dhowakula dhororomeleya. Thi livuru neebaribari. Yesu Kristu uhulobela wa Mulugu igi: “Madhu enyu beebaribari.” (João 17:17) Peeno nihanona Madhu ala di Bibliya Otaleleya. Bibliya onowawakula makoho ala matanu nammodha mwamakalelo okweya ni ororomeleya. Voharela kasugwa dhowakuladha.

MWAHA WA NIKOHO: Nnakala mwilaboni mudhanle obure ni ohogowa. Magereja owinjhiva enahudhiha wi goyi nnonihu ofuna wa Mulugu.

BIBLIYA ANAHUDHIHA DDI: Mulugu kanadha erana ebure. Jó 34:10 anawoga igihina: “Mulugu ebaribari kaneerana dhithu dhabure, Akopolo Dhatene kanadha eerana dhithu dhovirigana!” Mulugu ohukanna efunelo yodhivela naathu. Bumwahaya Yesu anihudhihiye olobela: “Babihu, ali odhulu, . . . Omweninyu odhe. Efunelwinyu yereye veelaboni ya vati, ninga odhulu.” (Mateus 6:9, 10) Mulugu onoonipwatha vanlubale iyo. Oliye ohulabihedha kopolo dhaye ahihiyedhedhe wihina erena efunelwaye.​—João 3:​16.

Kasugwa dholebiwa ndha: Gênesis 1:​26-​28; Tiago 1:13; 1 Pedro 5:​6, 7.

MWAHA WA NIKOHO: Koddo enodhowave yapaga athu gwe. Atene iyo nnowabihaga woona goyi.

BIBLIYA ANAHUDHIHA DDI: Mulugu ohuwoga wi osongolo animadha atikitedhe murenddele veelaboni yatene yavati. Ni Omwenaye, onamathonga wodhulu, athu “kinadha ehudhera koddo.” Mbwenye, aliwa “enere ohana futhidhiwa dhikale iba.” (Isaías 2:4.) Mulugu anere omariha ohogowa watene ni goyi. Bibliya onopaganya: “[Mulugu] anere wavuda mitoridhiwa dhatedhene mwintonimwiwa, kavindha vikala okwa, kutho, wibulela naari widdela. Dhego dhamundduli [vamodha ni ohogowa ni goyi nnonihu peeno] dhovira.”—Revelação 21:3, 4.

Kasugwa dholebiwa ndha: Salmo 37:10, 11; 46:9; Miqueias 4:​1-4.

MWAHA WA NIKOHO: Magereja owinjhiva avelaboni yavati enahudhiha wi muthu akwa kakwile. Ethu mmaningoni mwaye enokalawove. Amodha enawoga wi anookwa enowawoniha goyi athu eliwo. Obe enohudhiha wi Mulugu onowatabusa athu abure othukuthani wamotho.

BIBLIYA ANAHUDHIHA DDI: Muthu akwa, kaawo. Eclesiastes 9:5 anawoga igihina: “Anookwa kinonne ethu.” Wona wi anookwa kinonne ethu ne kineera ethu, aliwa kinakavihera naari kinawoniha goyi athu eliwo.​—Salmo 146:​3, 4.

Kasugwa dholebiwa ndha: Gênesis 3:​19; Eclesiastes 9:​6, 10.

MWAHA WA NIKOHO: Iyo nnoofuna okalawo. Nnoofuna ojhavo egumi naale nnadhivelihu. Nihikanna efunelo yowawona dilabili athu nnadhivelihu ekwile.

BIBLIYA ANAHUDHIHA DDI: Muthithi wowinjhiva waathu ekwile emmadha evenyiwe. Yesu ohupaganya: “Aatene eli mmahame ammubuweloni . . . enere ovenya.” (João 5:28, 29) Mooligana ni efunelo Mulugu anniyena omambelelo, athu enavenyihiwe wi ekalena egumi veelaboni yavati, enaakalege mparayizu. (Lucas 23:43) Mpaganyola wosongolo athu owiwelela enere okanna egumi yologomana ni yohimala. Bibliya anawoga igihina: “Athu owogowa enere okala elabo yavati, wihina ekalegemo malabo amatene.”—Salmo 37:29.

Kasugwa dholebiwa ndha: Jó 14:14, 15; Lucas 7:​11-​17; Atos 24:15.

MWAHA WA NIKOHO: Athu aatene enadhowa ogereja enoolobela. Nahuna, owinjhiva waaliwa enowona wi malobelwiwa kinaakuliwa.

BIBLIYA ANAHUDHIHA DDI: Yesu unihudhiha orabela wadidela madhu mamodhave naalobelaga. Oliye ohuwoga igihina: “Mwalobelaga, kamwawogege madhu mamodhave mudhidhi watene.” (Mateus 6:7) Nafuna wi Mulugu awiwe malobelwihu, enofuneya nlobelege mwamakalelo anarumeliye. Mowindo, enofwanela ohudhera efunelo ya Mulugu, ni nlobelege wodhela efunelo yela. João obajha 5:14 anawoga igihina: “Ethu sithu nnamulobihu wodhele efunelwaye, oliye annaniwa.”

Kasugwa dholebiwa ndha: Salmo 65:2; João 14:​6, 14; 1 João 3:​22.

MWAHA WA NIKOHO: Athu owinjhiva enubuwela wi korowa, othetheliwa ni owoma winodhiha ohagalala. Mowindo, aliwa enowilibihedha wi ekanne dhithu dhendha, yakanna enowona wi kinahagalala.

BIBLIYA ANAHUDHIHA DDI: Yesu ohoniha ethu bani enafuneya wi muthu afwanye ohagalala, igihina: “Ohagalala bayo enanona wi nihikanna efunelo yomuzimuni.” (Mateus 5:3) Nnere ofwanya ohagalala webaribari naveda ohudhera ebaribari ya Mulugu ni efunelwaye anniyena ni iyovano. Ebaribari ela enafwanyeya mBibliyani. Onona ebaribari ela enere onikavihedha onona ethu eli yofwanelela ni yohifwanelela. Neenya wi ebaribari ya mBibliyani yeddihe dhosakula dhehu ni dhowera dhehu nnere okanna egumi yohagalala.​—Lucas 11:28.

Kasugwa dholebiwa ndha: Provérbios 3:​5, 6, 13-​18; 1 Timóteo 6:​9, 10.

 Ndha sowakula dhogwaddela dha makoho matanu nammodha Bibliya anawakuliye. Wofuna ononave? Wakala mmodha waale “enanona wi nihikanna efunelo yomuzimuni,” mwebaribari yowakulawo enakale ehe. Podi wi we ohukanna makoho amodha, ninga: ‘Akala Mulugu onoonipwatha iyo, mwahaya bwaddi aneenyeye okalawo obure ni goyi mudhidhi wowinjhivene? Gineere ddi wihina gikanne egumi yapama yavamuralani?’ Bibliya onowawakula makoho ala ni makoho amodha mwamakalelo okweya ni ohagalasa.

Athu awaddeene peeno kinamwiileri Bibliya. Enubuwela wi livuru ninlubale noorusa ononelamo. Onoofuna okaviheriwa ofwanya dhowakula dha mBibliyani? Anamona a Jeova enovaha dhego bili dhoofuneya dhinukavihedhe we.

Yoroma thi livuru O Que a Bíblia Realmente Ensina? Livuru nna nlebiwe wi nakavihere athu enna mudhidhi vang’ono wi efwanye mBibliyani dhowakula dhokweya dha makoho ofuneya. Yanabili, ohudhera wa Bibliya mwamahala. Namona a Jeova addamane niwe anere wukavihera omuhudhera Bibliya mwamahala vade vawo naari mburo mmodhene onathomiwe. Oliye anere wuwaredhela sumana dhatedhene awogaga niwe wodhela mwaha wa mBibliyani mudhidhi vang’ono. Athu gwe elabo yatene ehikaviheriwa wodhela dhohudhera ndha. Owinjhiva yahihagalala ni yahiwoga yigihina: “Giifwanya ebaribari!

Ebaribari sithu yathima muthu anafwaneliye afwanye. Ebaribari ya mBibliyani enonobola wawova malavi, othuwathuwa ni wova bure. Bibliya ononivaha njhehedho, efunelo yegumi ni ohagalala. Yesu ohuwoga igihina: “Munonona ebaribari, ebaribari enere wuwobolani.”—João 8:32.