Ezayi sebre 38:1-22
38 Wakat kãnga, a Ezekɩyaas lʋɩɩ bãaga, hal n dat n ki.+ A Amooz biig a Ezayi+ sẽn yaa no-rɛɛsã waa a nengẽ, n yeel-a yaa: “Ad a Zeova sẽn yeele: ‘Togs f zakã rãmb f yaoolem koees tɩ f na n kiime. Fo bãagã pa na n sãoog ye.’”+
2 A Ezekɩyaas sẽn wʋm dẽ, a wẽnemda a neng n tees roogã lalg n sɩng a Zeova pʋʋsg n yeel yaa:
3 “Zeova, mam kotame tɩ y tẽeg+ mam sẽn tũ yãmb ne sɩd la ne m sũur fãa wã,+ la mam sẽn maan sẽn yaa sõma yãmb nifẽ wã yelle.” Rẽ poore, a Ezekɩyaas yãba wʋsgo.
4 Dẽ, a Zeova goma ne a Ezayi n yeel-a yaa:
5 “Lebg n tɩ yeel a Ezekɩyaas+ yaa: ‘Ad fo yaab a Davɩɩd Wẽnnaam a Zeova sẽn yeele: “Mam wʋma fo pʋʋsgã.+ Mam yãa fo nintãmã.+ Mam na n paasa fo yõorã woglem yʋʋm piig la a nu,+
6 la m fãag foom ne tẽn-kãngã Asiiri rĩmã nugẽ. Mam na n zab n sõnga tẽn-kãngã.+
7 Ad bãnd ning a Zeova sẽn na n kõ n wilg t’a Zeova na n pidsa a gomdã:+
8 Mam na n kɩtame tɩ wĩntoogã maasem sẽn sigd a Akaaz rʋʋdsẽ wã leb poorẽ nao-yakem piiga.+ La wĩntoogã maasmã sẽn da zoe n sig rʋʋdsẽ wã sɩd leba poorẽ nao-yakem piiga.”’”
9 Ad bũmb ning Zida rĩm a Ezekɩyaas sẽn gʋlse, a sẽn da lʋɩ bãag n wa paam laafɩ wã:
10 Mam da yetame yaa: “Mam vɩɩmã sẽn wa n be a pʋɩ-sʋkãla m segd n kẽng Yaoogã* rignoyẽ.
Mam vɩɩmã woglem na n teka woto.”
11 Mam yeelame yaa: “Mam pa na n le yã a Zah* ye. Mam pa na n le yã a Zah nin-vɩɩsã soolmẽ ye.+
Mam sã n wa be zĩig ning vɩɩm sẽn pa le be wã,mam pa na n le yã ãdem-biisã ye.
12 B viiga mam roogã n tall n looge,+wa b sẽn viig rũm-kɩɩm fu-roogo.
Mam pila m vɩɩmã wa sʋn-wʋgd sẽn pil peende.Wẽnnaam kʋrga mam vɩɩmã wa peend gĩsi.
Wĩndgã pukr n tãag a lʋɩɩse, yãmb tara maam n dabd m baasgẽ.+
13 Mam gãnega m yam n gũud yibeoogo.
La yẽ wõrda mam kõabã fãa wa gɩgemde.Wĩndgã pukr n tãag a lʋɩɩse, yãmb tara maam n dabd m baasgẽ.+
14 Mam fĩinda wa sɩlaalle, la wa liuul a to.*+Mam wũusda wa marwalle.+
Mam naka m neng n get yĩngr hal tɩ m ninã pãng sɛ:+
‘Zeova, mam bee yel-pakr meng pʋgẽ!Yɩ-y mam sõangda!’+
15 Mam na n yeelame tɩ bõe?
Wẽnnaam goma ne maam, la a sõng maam.
Mam na n sika m meng m vɩɩmã tõre,m sũ-sãangã sẽn yaa kãsengã yĩnga.
16 ‘Zeova, yaa bõn-kãensã* maasem yĩng la ninsaal fãa vɩ.Yaa bãmb maasem yĩng me la mam ket n vʋʋsdẽ.
Yãmb na n kõo maam laafɩ, la y bas-m tɩ m vɩɩmde.+
17 Mam da pa tar bãan ye. Ra yaa sũ-sãams bala.La yãmb sẽn nong maamã yĩnga,yãmb fãaga maam ne kũum.*+
Yãmb loba m yel-wẽnã fãa y poorẽ.*+
18 Bala Yaoogã* pa tõe n waoog yãmb ye.+Kũum pa tõe n pẽg yãmb ye.+
Neb nins sẽn sigd bokẽ wã pa tõe n yã yãmb tʋʋmã sẽn wilgd tɩ y yaa sɩd soabã ye.+
19 Yaa nin-vɩɩs bal n tõe n pẽg yãmba,wa mam sẽn maand rũndã wã.
Ba tõe n sõnga a kom-dibli tɩ b bãng tɩ yãmb yaa sɩd soaba.+
20 Zeova, fãag-y maam.Tõnd na n yɩɩla mam yɩɩlã ne yʋʋm-teed sẽn tar rissi,+d vɩɩmã tõre, yãmb a Zeova roogẽ wã.’”+
21 Rẽ poore, a Ezayi yeelame yaa: “Bao-y kankam-gil koɛɛng n wa ning nod-tãoodrã, tɩ rĩmã yĩns na n sãoogame.”+
22 A Ezekɩyaas ra sok-a lame: “Bõe n na n yɩ bãnd n wilg tɩ mam na n kẽnga a Zeova roogẽ wã?”+
Vẽnegr toor-toore
^ Ges-y gom-biis võor bilgrã zĩigẽ.
^ “Zah” wã yaa a Zeova yʋʋrã bool-koɛɛga.
^ Pa rẽ bɩ, “bulwãoogo.”
^ Rat n yeel tɩ Wẽnnaam goamã la a tʋʋmã.
^ Bɩ, “ne sãoong boko.”
^ Bɩ, “Yãmb yãka m yel-wẽnã fãa y taoore.”
^ Ges-y gom-biis võor bilgrã zĩigẽ.
