Ezayi sebre 59:1-21
59 Gese! A Zeova nugã pa koɛɛg wʋsg n pa tõe n fãage,+a tʋbrã me pa yẽd* n pa tõe n wʋm ye.+
2 Yaa yãmb kongrã n welg yãmb ne y Wẽnnaamã.+
Y yel-wẽnã kɩtame t’a solg a neng ne-yã,la a zãgs t’a kõn kelg-y ye.+
3 Bala yãmb nug-pʋsã rẽgma ne zɩɩm,+tɩ y kongrã rẽgem y nug-biisã.
Yãmb no-bɩmsã togsda zirẽ-beedo,+ tɩ y zɩlmã gomd goam sẽn yaa kɛgr vũn-vũni.
4 Ned baa a ye pa teend sẽn yaa tɩrga,+la ned baa a ye pa kẽnd bʋʋd zĩigẽ sɩd yĩng ye.
Bãmb teega bõn-vɩɩdo,+ la b gomd goam sẽn ka võore.
Bãmb dɩkda yel-beed pʋga, n dogd sẽn yaa wẽnga.+
5 Bãmb wũunda wag-toaag gɛla,la b wʋgd sʋlg gãmbre.+
Ned sã n wãb b gɛlã, a na n kiime.La b gell sã n wã, põeer n yita.
6 Bãmb gãmba wã pa na n yɩ b fuug ye.B pa na n tõog n pil b mens ne bũmb ning b sẽn maanã me ye.+
Bãmb tʋʋmã yaa wẽnse,la b nusã tʋmda nen-kɛglem tʋʋma.+
7 Bãmb naoã zoetame n na n maan wẽnga,la b yãgdame n na n daag bʋʋm soab zɩɩm.+
B tagsa wã yaa tags-wẽnse.Sãoong ne yel-beed n be bãmb soayã zutu.+
8 Bãmb pa bãng laafɩ sorã ye.Tɩrlem pa be b so-bugsẽ wã ye.+
Bãmb tugsa b soayã golemse,la ned ning fãa sẽn kẽnd b zut kõn paam laafɩ ye.+
9 Yaa rẽ n so tɩ zemsg zãag ne tõndo,tɩ tɩrlem me pa tat tõnd ye.
Tõnd da tẽeda vẽenem, la ade, yaa lik bal n be!Tõnd da tẽeda vẽenem payy, la tõnd ket n kẽnda lik bida pʋgẽ.+
10 Tõnd babendame n baood lals wa zoense,la d tar bablg wa neb nin sẽn pa ne.+
Tõnd lagsda wĩnto-sʋk wa zĩ-sobdo,la pãens rãmb sʋka, d yaa wa kũum.
11 Tõnd fãa wũunda wa urs-rãmb* n pa satẽ,la d wũusda ne nimbãaneg wa marwala.
Tõnd da tẽeda tɩrlem, la d pa paam ye.Tõnd da tẽeda fãagre, la a zãra ne tõndo.
12 Bala tõnd kɩɩsgã yaa wʋsg yãmb taoore,+la tõnd ned kam fãa yel-wẽn ningd-a-la taale.+
Bala tõnd mii d kɩɩsgã tiiri.Tõnd mii d kongrã neere.+
13 Tõnd beega a Zeova, n zãgs-a.Tõnd wẽnemda d poor n tees d Wẽnnaamã.
Tõnd goma weoogr la kɩɩsg yelle.+Tõnd tagsa d sẽn tõe n yag ziri to-to, n gom rẽ yell vũn-vũn d sũurẽ.+
14 B kɩtame tɩ tɩrlem tar n leb poorẽ,+la zemsg yasa hal zĩ-zãrgẽ.+Bala sɩdã* lak n lʋɩɩ zãma wã zĩigẽ,la sẽn yaa tɩrg pa tõe n kẽ be ye.
15 Sɩd* menemame,+la b zuuda ned ning fãa sẽn zãagd a meng ne wẽnga.
A Zeova yãa rẽ la pa yɩ-a noog ye.*Bala tɩrlem da pa be ye.+
16 Yẽ yãame tɩ ned ra kae ye.Ned pa yõk sɛɛga, tɩ ling-a.Woto, yẽ meng nug waa ne fãagre,*la yẽ meng tɩrlmã teel-a lame.
17 Dẽ, yẽ yeelga tɩrlem wa kut fuugu,*la a fõgen fãagrã* kut puglã a zugẽ.+
Yẽ yeelga sũ-dokr wa fuugu,+la a pil a meng ne yẽesem wa kobre.*
18 A na n keoo bãmba, bũmb ning b sẽn maanã yĩnga:+
Sẽn zabd-b ne yẽ wã keoor na n yɩɩ sũ-puugri, la a bɛɛbã na n paama sɩbgre.+
Ko-sʋk tẽnsã me na n deega yaood ning b sẽn segd ne wã.
19 Wĩndg sẽn lʋɩtẽ dãmbã na n zoee a Zeova yʋʋrã,tɩ wĩndg sẽn pukdẽ dãmbã zoe a ziirã.Bala a Zeova na n waa wa kʋɩlg ko-zoetem,a vʋʋsmã sẽn kɩtd tɩ zoetẽ.
20 A Zeova yeelame: “Fãagdã*+ na n waa Siyõ,+a Zakoob roogã rãmb sẽn wẽnemd n bas b yel-wẽnã nengẽ.”+
21 A Zeova yeelame yaa: “La sã n yaa ne maam, ad kaool ning mam sẽn maan ne bãmbã:+ ‘Mam vʋʋsmã sẽn be fo zugã, ne m goamã m sẽn ning fo noorẽ wã, pa na n zãag ne fo noore, fo kambã noore, wall f yagensã noor masã tɛka, la wakat fãa yĩng ye.’” Yaa a Zeova n yeele.
Vẽnegr toor-toore
^ Ebre, “zɩs.”
^ Yaa we-rũng sẽn tar nao a naas n yaa bedre, t’a noorã wõnd baag noore.
^ Bɩ, “pʋ-peelmã.”
^ Bɩ, “Pʋ-peelem.”
^ Ebre, “la ra yaa wẽng a nifẽ.”
^ Bɩ, “kɩtame t’a paam tõogre.”
^ Bɩ, “kobr sẽn yaa bãg-vɩɩdo.”
^ Bɩ, “tõogrã.”
^ Bɩ, “gãn-tika.”
^ Bɩ, “Soab ning sẽn lebs n da wã.”