Na maan yʋʋm 3 500 woto, Wẽnnaam a Zeova ra togsa neb nins sẽn da tũud-a wã bũmb ning b sẽn segd n maan tɩ b beoog yɩ neere. A yeelame: “Mam ninga vɩɩm la kũum, ne bark la kãab-wẽns y taoore. Yãk-y vɩɩmã, tɩ yãmb ne y yagensã tõe n vɩɩmde.”—Tõodo 30:19.

Nin-kãensã ra segd n bãng n yãka yam, sẽn na yɩl n paam tɩ b beoog yɩ neere. Tõnd me segd n maana woto rũndã-rũndã. Biiblã wilgda d sẽn tõe n maan n wa paam tɩ d beoog yɩ neere. A yetame: ‘La y nong Sẽn-Ka-Saab [a Zeova] sẽn yaa yãmb Wẽnnaamã, n sak bãmb koɛɛgã.’—Tõodo 30:20.

ZÃMSD-Y BIIBLÃ: Sẽn na yɩl n wa nong a Zeova, y segd n deng n zãmsa Biiblã n bãng a Zeova sõma. Y sã n maan woto, y na n bãngame tɩ Wẽnnaam nonga ninsaalbã, la t’a rata y neere. A ratame tɩ y pʋʋsd-a, bala y yell pak-a lame. (1 Pɩyɛɛr 5:7) Biiblã wilgdame tɩ y sã n maan y sẽn tõe fãa n na n bao n bãng Wẽnnaam, “bãmb me na kolg yãmba.”—Zak 4:8.

TŨUD-Y BŨMB NINS Y SẼN ZÃMSDÃ: Kelg Wẽnnaam rat n yeelame tɩ d tũud sagls nins sẽn be Biiblã pʋgẽ wã. Yaa y sã n maan woto “la y na n tõog n maan y tʋʋmã tɩ yɩ sõama, la yaa woto la y na n tõog ne y tʋʋmdã.’—Zozoe 1:8.