Lʋɩɩs-y sẽn tar yõodã taoore. Biiblã pʋgẽ, b sagenda tõnd tɩ d “bãng bũmb nins sẽn tar yõod n yɩɩdã n bake.” (Filip rãmbã 1:10) Gʋls-y bũmb nins sẽn tar yõodã, wall sẽn yaa yãgb yellã, pa rẽ bɩ a yiibã fãa sebr zugu. La tẽeg-y tɩ bũmb sẽn tar yõod tõeeme n pa bũmb sẽn yaa yãbg yell ye. Wala makre, rɩɩb raabo. Sẽn paase, bũmb sẽn wõnd yaa yãbg yell tõeeme n pa bũmb sẽn tar yõod wʋsg ye. Wala makre, paam n ges emisiõ d sẽn nong televisiyõ wã. a

Reng-y n beool-y-yã. Koɛɛg soab 10:10 yetame yaa: “Lar noor sã n mud tɩ b pa saas-a, yaa tɩlɛ tɩ ned ning sẽn tar-a n tʋmdẽ wã wɩsg a menga.” B paasa vɛrse wã pʋgẽ yaa: “La yam sõngda ned t’a tõogd a sẽn maande.” Rẽ kõta tõnd yam-bʋgo? Saas-y y larã. Rat n yeel tɩ y reng n beoole, sẽn na yɩl n da sãam y sẽkã ye. Viig-y tʋʋm kẽer sẽn pa tar yõodo, wall y pʋd n bas-b menga, bala sãamda y sẽkã la y pãngã. Yãmb sã n sa tʋʋmd ning pĩnda, n ket n tar sẽka, bõe yĩng tɩ y pa na n sɩng tʋʋmd a to y sẽn da magd n na n wa tʋme? Y sã n reng n beoole, y na n tõog n wa tʋma tʋʋm nins y sẽn da magd n na n tʋmã neere, wa ra-wãad sẽn tar yam sẽn na n saas a larã neerã.

Ra gĩd-y y vɩɩmã ne bũmb wʋsg ye. B sã n kos-y tɩ y maan bũmb sẽn pa tar yõodo, wall sẽn sãamd y sẽkã, bɩ y tõdge. Y sã n tʋmd tʋʋm wʋsgo, la y wae n dɩkd sɛk ne nebã, na n paasa y yɩɩrã, la kɩt tɩ y pa le tar sũ-noog ye.

Tʋʋmã viigri, la sãmbse. “Ned sã n get sobgo, a pa na n bʋd ye. La ned sã n get sawatã, a pa na n kẽeb ye.” (Koɛɛg soaba 11:4) Rẽ kõta tõnd yam-bʋgo? Ned sã n nong n viigd a tʋʋma, a sãamda a sẽka, a pa tõogd n tʋmd sõma me ye. Ka-koaad sã n gũud tɩ yɛlã fãa zems kɛpɩ t’a yaool n bʋde, a pa na n tol n bʋd bɩ n kẽeb ye. Woto me, d tõe n wa basame tɩ vɩɩmã zu-loeesã kɩt tɩ d maand sãmbse. D tõe n tagsame me tɩ d segd n gũume hal n wa bãng yɛlã fãa vɩʋʋg n yaool n yãk yam. Yaa sɩd tɩ d sã n dat n bãng n yãk yam bũmb sẽn tar yõod wɛɛngẽ, d segd n maana vaeesgo. Yel-bũn 14:15 yetame yaa: “Gũus-m-meng soab tagsda a sẽn na n maan bũmb ningã zug neere.” La togs sɩdã, d yam-yãkr wʋsg pʋgẽ, sãmbs n be be.— Koɛɛg soaba 11:6.

Maan bũmb fãa tɩ zems kɛpɩ wã. Zak 3:17 yetame yaa: “Yam ning sẽn yit yĩngrã [pa rẽ bɩ Wẽnnaam nengẽ wã] rengd n kɩtame tɩ ned . . . maand bũmb fãa ne yam.” Yaa vẽeneg tɩ d sã n dat n maan bũmb fãa tɩ zems kɛpɩ seka pẽgre! La sasa ningã, maan bũmb fãa tɩ zems kɛpɩ wã tõe n looga noore, hal tɩ wa ne sũ-sãamse, tɩ d pa tõog n ta d bõn-daabã me ye. Wala makre, ned sã n zãmsd buud-gom-zẽnga, a segd n ninga a yamẽ t’a na n wa tudgame, la tɩ yaa rẽ n na n sõng-a t’a tõog n zãms buud-gomdã. La ned sẽn dat n maan bũmb fãa tɩ zems kɛpɩ na n yɛɛsda a na n wa yeel bũmb tɩ pa woto. Manesem a woto yaool n pa na n sõng-a t’a tõog n zãms buud-gomdã sõma ye. Sẽn são yaa d sẽn na n yɩ sik-m-mens rãmba, n mi tɩ pa bũmb fãa la d tõe n maan ye! Yel-bũn 11:2 yetame yaa: “Yam bee ne sik-m-mens rãmba.” Sẽn paase, ned sẽn yaa sik-m-meng soab la sẽn mi tɩ pa bũmb fãa la a tõe n maan sã n wa tudgi, a laada a menga.

Modg-y n paam-y sẽk tʋʋmã la pemsmã kokr yĩnga. Biiblã yetame yaa: “Vʋʋsg sẽn zems nug-pidingu, n são tʋʋm-toog sẽn pid nug-pʋs a yiibu, la f sẽn na n digd sobgo.” (Koɛɛg soaba 4:6) Naoor wʋsgo, neb nins sẽn yaa tʋʋmã yembsã pa rɩt b ‘tʋʋm-toog sẽn pid nug-pʋs a yiibã’ yõod ye. Koɛɛg-koɛɛga, b pa tar sẽka, bɩ pãng n na n dɩ b tʋʋmdã yõod ye. Sã n yaa ne kʋɩɩmbã, yaa ‘vʋʋsg sẽn zems nug-piding’ n pak-ba, b sãamda b sẽka me. Biiblã sagenda tõnd tɩ d tall tagsg sẽn zemse: D segd n tʋma wʋsgo, la d rɩ d tʋʋmdã yõodo. Woto yaa “Wẽnnaam kũuni.”—Koɛɛg soaba 5:19.

Gõe-y tɩ sekdẽ. Biibl-gʋlsd a yembr yeelame yaa: “Mam na n gãandame n gũs ne laafɩ.” (Yɩɩn-sõamyã 4:8) Kom-kãsembsã segd n gũsa lɛɛr a nii yʋng fãa, sẽn na yɩl n paam yĩns keelem, tɩ b sũur noom ne b menga, la b tõe n tags neere. Rẽ wɛɛngẽ, gõeemã pa sẽk sãang ye. Bala d sã n gõe tɩ sekdẽ, sõngdame tɩ d pʋ-tẽerã vɩ sõma, tɩ rẽ me sõngd tɩ d tõe n zãms bũmb nana-nana. La d sã n pa gõe sõma, yɩl n zãms bũmb na n yɩɩ toog ne-do. A tõe n yɩɩ sabab tɩ d maan agsɩdã, tɩ d tudgdẽ, bɩ n lebg ned sũur sẽn yikd tao-tao.

Yãk-y bũmb nins y sẽn dat n wa maanã. Biiblã yetame yaa: “Ned sẽn na n maand sũ-noog ne bũmb ning a nifã sẽn ne wã n são a sẽn na n saad n pʋgd bũmb nins a sẽn tʋllã.” (Koɛɛg soaba 6:9) Rẽ kõta tõnd yam-bʋgo? Yam soab pa basd t’a tʋlsmã soog a vɩɩmã, sẽn yɩɩd fãa tʋlsem nins a sẽn mi t’a pa tol n tõe n pids-bã. A pa basd t’a yam kẽ piblisite ninga, pa rẽ bɩ bũmb sẽn wilgd t’a tõe n paama samd nana-nana ye. A pʋd n modgdame tɩ bũmb nins a sẽn tarã, wall “bũmb ning [a] nifã sẽn ne wã” sekd-a.

Tags-y bũmb nins y sẽn kɩs sɩd ne wã yelle. Yaa bũmb nins y sẽn kɩs sɩd ne wã n sõngd yãmb tɩ y bãng sẽn yaa sõma, sẽn tar yõodo, la sẽn na n naf-yã. D sã n dɩk yãmb vɩɩmã n mak ne peemd b sẽn tão, yaa bũmb nins yãmb sẽn kɩs sɩd ne wã n na n sõng-y tɩ y bãng y vɩɩmã sẽn na n tees neng ningã. Bũmb nins y sẽn kɩs sɩd ne wã sã n yaa bõn-sõma, na n sõng-y lame tɩ y bãng n lʋɩɩs sẽn tar yõodã taoor y vɩɩmã pʋgẽ, la y ra sãam y sẽkã beoog sẽn vẽeg fãa ye. Yɛ la y tõe n maan vaeesg n bãng sẽn yaa sõma? Neb wʋsg maanda vaeesg Biiblã pʋgẽ, bala b miime t’a kõta ned yam.—Yel-bũnã 2:6, 7.

Lʋɩɩs-y nonglmã taoore. Kolos rãmb 3:14 yetame tɩ “nonglem kɩtdame tɩ neb zemsd taab sõma.” D sã n pa tar nonglem, d pa tõe n tall sũ-noog hakɩɩka, d sũur pa tõe n noom ne d mengã me, sẽn yɩɩd fãa zakã pʋgẽ. Neb nins sẽn maand b toog kae ne bõn-kãngã sẽn yaa sɩdã, n lʋɩɩsd arzɛgsã baoob taoorã pa na n paam sũ-noog ye. Dẽnd pa zaalem la b sẽn wilgd Biiblã pʋgẽ tɩ nonglmã la bũmb ning sẽn tar yõod n yɩɩdã, n gomd a yell naoor wʋsgã ye.—1 Korẽnt rãmbã 13:1-3; 1 Zã 4:8.

Bao-y sẽk n bao n bãng Wẽnnaam. A Geoff yaa rao sẽn tar pag sẽn nong-a, kamb a yiib sẽn tar sũ-noogo, zo-rãmb hakɩɩka, la a tʋmd ãmbilãns-rãmbã zĩigẽ. La a sẽn tʋmd tʋʋmd ningã kɩtame tɩ naoor wʋsgo, a neẽ nebã sẽn namsdẽ la b kiidẽ wã. A ra sokda a meng yaa: “Vɩɩmã tɛk la woto bɩ?” Daar a ye a wa n karma sɛb a Zeova Kaset rãmbã sẽn yiisi, n paam a sogsgã leoor tɩ yɩ-a noogo.

A Geoff ra gomda bũmb nins a sẽn bãngdã yell ne a pagã la a kambã, tɩ kɩt tɩ bãmb me da rat n bãng n paase. Zakã rãmb wa n sɩnga Biiblã zãmsgo. Rẽ naf-b-la wʋsg b vɩɩmã pʋgẽ, la sõng-b tɩ b pa sãam b sẽkã ye. Ne Biiblã zãmsgã maasem, b bãngame tɩ b tõe n wa paam n vɩɩmda wakat sẽn kõn sa tẽngã zugu, namsg la yɛl a taab sẽn ka yõod sẽn pa na n le zĩnd a pʋgẽ.—Vẽnegre 21:3, 4.

A Geoof kibarã tẽegda tõnd a Zeezi Kirist goamã. A ra yeelame yaa: “Sũ-noog rãmb la neb nins sẽn mi tɩ b segd n baoo Wẽnnaamã.” (Matiye 5:3) Yãmb na n sakame n bao sẽk n bao n bãng Wẽnnaam bɩ? Hakɩɩka, yaa rẽ bal maaneg n na n sõng yãmb tɩ y paam yam n da sãam y sẽkã ye.