Tixtieq Tkun Taf Iżjed dwar il-​Bibbja?

 Għala Għandek Taqraha l-​Bibbja?

IL-​BIBBJA hija ktieb differenti minn kwalunkwe ktieb ieħor. Fiha nsibu tagħlim mimli mħabba mingħand Alla. (1 Tessalonikin 2:13) Jekk tapplika dak li tgħallem il-​Bibbja, se jkollok benefiċċji kbar. Se ssir tħobb lil Alla iżjed u jkollok relazzjoni iktar mill-​qrib miegħu, id-​Donatur taʼ “kull ħaġa tajba li tingħata u kull don perfett.” (Ġakbu 1:17) Se ssir taf kif tersaq lejh fit-​talb. Meta tkun għaddej minn żminijiet diffiċli, tkun tistaʼ tara kif Alla jgħinek. Jekk tgħix ħajtek fi qbil mal-​livelli mniżżlin fil-​Bibbja, Alla jagħtik ħajja taʼ dejjem.—Rumani 6:23.

Il-Bibbja fiha veritajiet li jagħtuna dehen spiritwali. Dawk li jiksbu l-​għarfien tal-​Bibbja jinħelsu mill-​ideat żbaljati li jiddominaw il-​ħajjiet taʼ miljuni taʼ nies. Per eżempju, billi nkunu nafu l-​verità dwar x’jiġri meta mmutu ma nibqgħux nibżgħu li l-​mejtin jistgħu jagħmlulna l-​ħsara jew inkella li qrabatna jew ħbiebna li huma mejtin qegħdin ibatu. (Eżekjel 18:4, Karm Żammit) It-​tagħlim Bibliku dwar l-​irxoxt ifarraġ lil dawk li tilfu l-​maħbubin tagħhom fil-​mewt. (Ġwann 11:25) Il-​fatt  li nkunu nafu dwar l-​anġli ħżiena jiftħilna għajnejna dwar il-​perikli taʼ l-​ispiritiżmu u jgħinna nifhmu għala fid-​dinja hawn daqshekk inkwiet.

Il-prinċipji divini tal-​Bibbja juruna kif nistgħu ngħixu b’mod li jġibilna benefiċċji fiżiċi. Per eżempju, li nkunu ‘meqjusin,’ jew moderati, huwa importanti ħafna biex ikollna saħħa tajba. (1 Timotju 3:2) Billi “nitnaddfu minn kull tidnis tal-​ġisem u tar-​ruħ,” nevitaw li ngħarrqu saħħitna. (2 Korintin 7:1) L-​applikar tal-​pariri t’Alla li nsibu fil-​Bibbja jgħinna wkoll biex ikollna rispett lejna nfusna u ferħ fiż-​żwieġ tagħna.—1 Korintin 6:18.

Jekk tapplika l-​Kelma t’Alla, se tkun iktar ferħan. L-​għarfien Bibliku jgħinna nsibu l-​paċi tal-​moħħ u l-​kuntentizza u jagħtina tama. Jgħinna niżviluppaw u ntejbu kwalitajiet mill-​aħjar bħalma huma l-​mogħdrija, l-​imħabba, il-​ferħ, il-​paċi, it-​tjieba, u l-​fidi. (Galatin 5:22, 23; Efesin 4:24, 32) Kemm jekk aħna rġiel jew nisa miżżewġin, missirijiet jew ommijiet, inkella wlied, kwalitajiet bħal dawn jgħinuna nkunu persuni aħjar.

 Ġieli ħsibt dwar il-​futur? Il-​profeziji tal-​Bibbja juruna li qegħdin ngħixu fi żmien importanti ferm fl-​istorja tal-​bniedem. Dawn il-​profeziji mhux biss jiddeskrivu s-​sitwazzjoni dinjija taʼ llum imma juruna wkoll li Alla dalwaqt se jbiddel din id-​dinja f’ġenna taʼ l-​art.—Apokalissi 21:3, 4.

Għajnuna biex Tifhem il-​Bibbja

Forsi ġieli pprovajt taqra l-​Bibbja imma ma stajtx tifhimha. Forsi ma tafx fejn għandek tfittex fil-​Bibbja biex issib it-​tweġibiet għall-​mistoqsijiet tiegħek. Jekk inhu hekk, m’intix waħdek. Ilkoll kemm aħna għandna bżonn l-​għajnuna biex nifhmu l-​Kelma t’Alla. Ix-​Xhieda taʼ Jehovah, f’madwar 235 pajjiż, joffru li jgħallmu l-​Bibbja lil miljuni taʼ nies. U dan jagħmluh bla ħlas. Huma jieħdu pjaċir jgħinu lilek ukoll.

Ġeneralment, l-​aħjar mod biex tistudja l-​Bibbja hu li tistudjaha pass pass, billi tibda mit-​tagħlim bażiku. (Lhud 6:1) Hekk kif tkompli titgħallem, tkun tiflaħ iżjed għall-​“ikel sħiħ”—jiġifieri, il-​veritajiet li jidħlu iktar fil-​fond. (Lhud 5:14) Il-​Bibbja hija l-​awtorità. Pubblikazzjonijiet ibbażati fuq il-​Bibbja, bħall-​browxer Alla X’Jirrikjedi Minna?, se jgħinuk tifhem ir-​referenzi Skritturali fuq diversi suġġetti.

 Lest li Tqattaʼ Ftit Ħin Kull Ġimgħa biex Tifhem il-​Bibbja?

Ġeneralment, l-​istudju tal-​Bibbja jsir f’ħin u f’post konvenjenti għalik. Ħafna individwi jistudjaw fil-​privatezza taʼ darhom. Jerġaʼ oħrajn jistudjaw fuq it-​telefon. Il-​programm taʼ l-​istudju m’huwiex xi klassi b’ħafna nies imma arranġament privat imfassal għaċ-​ċirkustanzi persunali tiegħek, inkluż il-​livell t’għarfien u edukazzjoni li għandek. Ma jsir l-​ebda eżami, u ma jkollokx minn xiex tistħi jew tħossok mifxul. Tingħata tweġiba għall-​mistoqsijiet tiegħek dwar il-​Bibbja, u titgħallem kif ikollok relazzjoni iktar mill-​qrib m’Alla.

M’għandekx għalfejn tħallas għal studju tal-​Bibbja bħal dan. (Mattew 10:8) Jiġi offrut bla ħlas lin-​nies taʼ kull reliġjon, u lil dawk li m’għandhom l-​ebda reliġjon iżda li b’interess sinċier iridu jkunu jafu iżjed dwar il-​Kelma t’Alla.

Min jistaʼ jieħu sehem fid-​diskussjoni? Il-​familja tiegħek kollha. Jistgħu jieħdu sehem ukoll xi ħbieb li tkun tixtieq tistieden. Inkella jekk tippreferi, id-​diskussjoni tistaʼ ssir miegħek biss.

Xi wħud iwarrbu siegħa kull ġimgħa biex jistudjaw il-​Bibbja. Jekk tistaʼ tqattaʼ iktar ħin jew m’għandekx daqshekk ħin fil-​ġimgħa, ix-​Xhieda lesti li jirranġaw biex jgħinuk.

 Stedina biex Titgħallem

Nistidnuk tikkuntattja lix-​Xhieda taʼ Jehovah. Mod wieħed kif tistaʼ tagħmel dan hu billi tikteb f’xi wieħed mill-​indirizzi t’hawn taħt. Imbagħad isir arranġament biex xi ħadd jiġi u jikkonduċi studju tal-​Bibbja bla ħlas miegħek.

□ Ibagħtuli kopja tal-​browxer Alla X’Jirrikjedi Minna?

□ Jekk jogħġobkom ikkuntattjawni rigward studju tal-​Bibbja fid-​dar bla ħlas.

Jekk mhux indikat mod ieħor, il-​kwotazzjonijiet Skritturali kollha huma meħudin mill-​Bibbja Għaqda Biblika Maltija, It-​Tieni Edizzjoni (1996).