Xa̱ʼa̱ ña̱ va̱ása níxikuumií ta̱ Jesús ku̱a̱chi, kǒo níya̱ʼara nu̱ú ku̱a̱ʼá tu̱ndóʼo xíʼin ña̱ kundi̱ʼi̱-inira nda̱a̱ táki̱ʼva ndóʼo miíyó na̱ yiví. Soo, xi̱ndi̱ʼi̱ní-inira xa̱ʼa̱ na̱ yiví ta nda̱a̱ xi̱keʼéra ku̱a̱ʼá ña̱ʼa xa̱ʼa̱na. Va̱ása níkeʼé kuitíra ña̱ kivi chindeé miína chi ke̱ʼéra ku̱a̱ʼáka ña̱ʼa xa̱ʼa̱na. Xa̱ʼa̱ ña̱ xi̱kundáʼvi-inira xi̱xinirana ña̱kán chi̱ndeétáʼanra xíʼinna. Kivi kotoyó sava ejemplo ña̱ va̱xi nu̱ú capítulo 32, 37, 57 xíʼin 99.

Ndiʼi na̱ yiví na̱ xa̱a̱ síín síín ku̱i̱ya̱ xi̱kuni̱na kuyatinna nu̱ú ta̱ Jesús saáchi va̱ása níxi̱ndakanixi̱níra ña̱ ndáyáʼvikara nu̱ú na̱ yiví kán. Ña̱ xi̱na̱ʼa̱ra ña̱ xi̱kuʼvi̱-inira xi̱xinirana, va̱ʼaka xi̱kunina xíʼinra. Ná kotoyó ndáa ki̱ʼva xi̱na̱ʼa̱ra ña̱ xi̱kunda̱a̱-inira xíʼin ña̱ xi̱ndoʼona nu̱ú capítulo 25, 27 xíʼin 95.

Ta̱ Jesús ndiʼi ki̱vi̱ xi̱ka̱ʼa̱nra xíʼin Ndióxi̱ ni tá ni̱xi̱yo mitúʼunra á ni tá ni̱xi̱yo ku̱a̱ʼá na̱ xi̱ndasakáʼnu Ndióxi̱. Ku̱a̱ʼá yichi̱ xi̱ka̱ʼa̱nra xíʼinra su̱ví kuití tá xa̱a̱ kuxura. Tá xi̱ka̱ʼa̱nra xíʼin Ndióxi̱ xi̱taxira tíxa̱ʼvi ndaʼa̱ra ta saátu xi̱ndasakáʼnurara, ta xi̱ka̱ʼa̱nra xíʼinra ña̱ ná chindeétáʼanra xíʼinra tá kúma̱níka ndaka̱xinra keʼéra iin ña̱ʼa ña̱ ndáyáʼvi. Ná kotoyó ña̱ va̱xi nu̱ú capítulo 24, 34, 91, 122 xíʼin 123.

Sava yichi̱, nu̱úka ña̱ ndakindee̱ ta̱ Jesús, va̱ʼaka xi̱chindeétáʼanra xíʼin na̱ yiví. Va̱ása níxindi̱ʼi̱-inira xa̱ʼa̱ iinlá mií kuitíra. Ta xíʼin ña̱ ke̱ʼéra yóʼo va̱ʼaní yichi̱ sa̱ndákoora nu̱úyó, ná kotoyó ndáa ki̱ʼva ni̱na̱ʼa̱ra ña̱ va̱ʼa ña̱ kúúmiíra nu̱ú capítulo 19, 41 xíʼin 52.

Ta̱ Jesús va̱ása nísanáʼa̱ kuitíra ña̱ ixakáʼnu-iniyó xa̱ʼa̱ inkana, chi saátu chi̱núura yichi̱ nu̱úyó xa̱ʼa̱ ña̱ i̱xakáʼnu-inira xa̱ʼa̱ na̱ discípulora ta saátu xa̱ʼa̱ inkaka na̱ yiví. Ná kotoyó ndáa ki̱ʼva ke̱ʼéraña nu̱ú capítulo 26, 40, 64, 85 xíʼin 131.

Profecía xi̱ka̱ʼa̱nña ña̱ ku̱a̱ʼání na̱ judío kundasína kunina ta̱ Mesías ta na̱ sa̱a̱-ini kuni miíra kaʼnínara. Xa̱ʼa̱ ña̱ xi̱kunda̱a̱-ini ta̱ Jesús ña̱ kundoʼora ña̱yóʼo sana kivi kachiyó ña̱ va̱ása chika̱a̱víra ndee̱. Soo nu̱úka ña̱yóʼo chi̱ka̱a̱níra ndee̱ ña̱ sa̱náʼa̱ra na̱ yiví xa̱ʼa̱ Ndióxi̱. Ta saá va̱ʼaní yichi̱ chi̱núura nu̱ú miíyó na̱ ndíku̱n miíra, tá va̱ása xíín na̱ yiví kuniso̱ʼona miíyó á tá sásina nu̱úyó. Ná ndakanixi̱níyó xa̱ʼa̱ ña̱ káʼa̱n capítulo 16, 72 xíʼin 103.

Ta̱ Jesús xi̱xini̱kara ta ndíchiní ni̱xi̱yora nu̱ú na̱ yiví ku̱a̱chi. Ta̱yóʼo kǒo ku̱a̱chi níxikuumiíra. Nda̱a̱ ni iinna kǒo kivi koo nda̱a̱ táki̱ʼva ni̱xi̱yora ni ndakanixi̱nína nda̱a̱ táki̱ʼva ndákanixi̱níra. Soo ni saá, vitá ni̱xi̱yo inira ta ka̱chíñura nu̱ú inkana. Kivi sakúaʼayó xíʼin ña̱yóʼo ña̱ vitá koo iniyó nu̱ú capítulo 10, 62, 66, 94 xíʼin 116.

Ta̱ Jesús kúee ni̱xi̱yo inira xíʼin na̱ discípulora ta saátu xíʼin inka na̱ yiví ni tá va̱ása níxi̱keʼéna táʼan ña̱ xi̱keʼé miíra á ni tá va̱ása níxi̱ndiku̱nna consejo ña̱ xi̱taxira ndaʼa̱na. Xi̱ndikó tukura xi̱ka̱ʼa̱nra xíʼinna ndáaña xíniñúʼu keʼéna, ña̱ va̱ʼa sakúaʼana kuyatinna nu̱ú Jehová. Ná kotoyó ndáa ki̱ʼva kúee ni̱xi̱yo ini ta̱ Jesús nu̱ú capítulo 74, 98, 118 xíʼin 135.