¿Á KIVI nda̱kú koo ini na̱ ndásakáʼnu Jehová ni yáʼana nu̱ú tu̱ndóʼo ni túvina ña̱ va̱ása kivi chindeétáʼan ña̱yóʼo xíʼinna? Iin ta̱ xi̱naní Job ni̱ya̱ʼara nu̱ú táʼan ña̱yóʼo. Ná kotoyó ndáaña va̱ʼa nda̱kiʼinra.

Ta̱ Job xi̱kuura táʼan ta̱ Abrahán ta ni̱xi̱yora ñuu Arabia ña̱ íyo tiempo vitin ta ta̱yóʼo ni̱xi̱yora tiempo tá ni̱xi̱yo na̱ ñuu Israel ñuu Egipto. Jehová ke̱ʼéra iin asamblea chí ndiví ta ni̱ka̱ʼa̱nra xa̱ʼa̱ ta̱ Job xíʼin ndiʼi na̱ ángel. Ta kántu ndíkaa̱ ta̱ Ndi̱va̱ʼa xíniso̱ʼora. Nu̱ú ndiʼina, nda̱sakáʼnu Jehová ta̱ Job xa̱ʼa̱ ña̱ nda̱kú ni̱xi̱yo inira ta saátu ni̱na̱ʼa̱ra ña̱ xi̱kandíxarara. Soo ta̱ Ndi̱va̱ʼa ni̱ka̱ʼa̱nra ta̱ Job ndásakáʼnura Jehová xa̱ʼa̱ ña̱ʼa ña̱ táxira ndaʼa̱ra, saáchi ku̱a̱ʼání ña̱ʼa xi̱taxira ndaʼa̱ra ta xi̱ndaara miíra. Ta̱ Ndi̱va̱ʼa ni̱ka̱ʼa̱nra ña̱ tá ná ndañúʼu ndiʼi ña̱ va̱ʼa ña̱ kúúmií ta̱ Job kixáʼara sa̱a̱-inira kunira Jehová.

Ndióxi̱ ta̱xira ña̱ ná kindaa ta̱ Ndi̱va̱ʼa ndiʼi ña̱ xi̱kuumií ta̱ Job, xa̱ʼníra se̱ʼera ta tá ndiʼi ta̱xira kue̱ʼe̱ ndaʼa̱ra. Ña̱ kǒo níxi̱kunda̱a̱-ini ta̱ Job kúú ña̱ ta̱ Ndi̱va̱ʼa xi̱keʼé ndiʼi ña̱yóʼo, kǒo níxi̱kunda̱a̱-inira nda̱chun kúú ña̱ xi̱taxi Jehová ndiʼi tu̱ndóʼo yóʼo. Soo nisaá, va̱ása nísandákoora Jehová.

Tasaá ni̱xa̱a̱ u̱ni̱ na̱ xi̱ka̱ʼa̱n na̱ xi̱kuu migo ta̱ Job ta xi̱ka̱ʼa̱nna ku̱a̱ʼání ña̱ va̱ása va̱ʼa xíʼinra. Ndiʼi ña̱ ni̱ka̱ʼa̱nna xíʼinra yóʼo va̱xiña nu̱ú libro ta̱ Job, xi̱kuni̱na sáxi̱nu̱na inira ña̱ Ndióxi̱ kúú ta̱ ta̱xi castigo ndaʼa̱ra xa̱ʼa̱ ña̱ʼa ña̱ va̱ása va̱ʼa xi̱keʼé se̱ʼéra. Nda̱a̱ ni̱ka̱ʼa̱nna ña̱ va̱ása ndíʼi̱-ini Ndióxi̱ xa̱ʼa̱ na̱ ndásakáʼnu miíra ta ni va̱ása ndáa-inirana. Soo ta̱ Job va̱ása níxiinra kuniso̱ʼora ña̱ xi̱ka̱ʼa̱nna ta ni̱ka̱ʼa̱nra ña̱ nda̱kú koo inira xíʼin Jehová nda̱a̱ ná kuvira.

Iin ña̱ va̱ása va̱ʼa kúú ña̱ ke̱ʼéra ña̱ nda̱kiʼinra tu̱ʼunra. Ta̱ Elihú, iin ta̱ loʼo ta̱ xi̱niso̱ʼo ndiʼi ña̱yóʼo, ni̱ka̱ʼa̱nra xíʼinra xa̱ʼa̱ ña̱ ni̱ndiʼiníka inira ña̱ ka̱ʼa̱n va̱ʼa inkana xa̱ʼa̱ra nu̱úka ña̱ ka̱ʼa̱n va̱ʼana xa̱ʼa̱ Jehová. Ta ni̱ndaʼyira nu̱ú na̱ xi̱ka̱ʼa̱n ña̱ kúúna migo ta̱ Job.

Tándi̱ʼi Jehová ni̱ka̱ʼa̱nra xíʼin ta̱ Job ña̱ va̱ása va̱ʼa xi̱keʼéra xa̱ʼa̱ ña̱ xi̱ndakiʼinníra tu̱ʼun miíra. Ta xi̱niñúʼura ndiʼi ña̱ livi ña̱ i̱xava̱ʼara, ta ni̱ka̱ʼa̱nra ni loʼo ndee̱ kǒo kúúmií na̱ yiví nu̱ú ndee̱ ña̱ kúúmií Jehová. Ta̱ Job vitání ni̱xi̱yo inira ta xi̱niso̱ʼora ña̱ ni̱ka̱ʼa̱n Jehová xíʼinra. Ta Jehová ta̱ kúni̱ní xíni miíyó ta kúndáʼvi-inira xínira miíyó, sandúva̱ʼara ta̱ Job xa̱ʼa̱ kue̱ʼe̱ ña̱ xi̱kuumiíra ta nda̱a̱ u̱vi̱ yi̱chi̱ka ta̱xi Jehová ña̱ ku̱i̱ká ndaʼa̱ra nu̱úka ña̱ xi̱kuumiíra tá ya̱chi̱ ta saátu ta̱xira inka u̱xu̱ se̱ʼera (Santiago 5:11). Xa̱ʼa̱ ña̱ nda̱kú ni̱xi̱yo ini ta̱ Job ni̱na̱ʼa̱ra nu̱ú ta̱ Ndi̱va̱ʼa ña̱ kiviva nda̱kú koo ini miíyó na̱ yiví xíʼin Jehová ni yáʼayó nu̱ú tu̱ndóʼo ña̱ ndeéní.

(Nu̱ú libro ta̱ Job kanaña.)