Ña̱ sánáʼa̱ tu̱ʼun Ndióxi̱
¿Ndáaña kuu tá ná ndatiin Ndióxi̱ ku̱a̱chi xíʼin na̱ yiví?
Ña̱ artículo yóʼo chindeétáʼanña xíʼún ña̱ ndani̱ʼún nu̱ú Biblia ña̱ kúúmiíún sava ña̱ kúni̱ún kunda̱a̱-iniún xa̱ʼa̱. Tá kúni̱ún, na̱ testigo Jehová kivi chindeétáʼanna xíʼún ña̱ va̱ʼa kunda̱a̱-iniún xa̱ʼa̱ ña̱yóʼo.
1. ¿Ndáaña kúú ki̱vi̱ ña̱ ndatiin Ndióxi̱ ku̱a̱chi xíʼin na̱ yiví?
Na̱ʼná ña̱ va̱xi yóʼo náʼa̱ña ña̱ ndákanixi̱ní savana xa̱ʼa̱ ki̱vi̱ ña̱ káʼa̱n Biblia xa̱ʼa̱ ña̱ ndatiin Ndióxi̱ ku̱a̱chi xíʼin na̱ yiví. Savana ndákanixi̱nína ña̱ ndakutáʼan ku̱a̱ʼání níma̱ na̱ ni̱xi̱ʼi̱ nu̱ú íyo Ndióxi̱ xáʼnda chíñura, ña̱ ndatiinra ku̱a̱chi xíʼinna xa̱ʼa̱ ña̱ ke̱ʼéna: savana ndakiʼinna ña̱ kutakuna chí ndiví ta savana ku̱ʼu̱nna xo̱ʼvi̱na ini iin ndayá á xi̱tu̱n. Soo síínva íyo ña̱ káʼa̱n Biblia xa̱ʼa̱ ki̱vi̱ ña̱ ndatiin Ndióxi̱ ku̱a̱chi xíʼin na̱ yiví, chi ña̱ keʼéra kúú ña̱ sandíʼi-xa̱ʼa̱ra ña̱ va̱ása va̱ʼa íyo nu̱ú ñuʼú yóʼo (Salmo 96:13). Ndióxi̱ nda̱kaxinra ta̱ Jesús ña̱ koora Juez ña̱ viíní ndatiinra ku̱a̱chi xíʼin na̱ yiví (Kaʼvi Isaías 11:1-5 xíʼin Hechos 17:31.)
2. ¿Ndáa ki̱ʼva vií koo ndiʼi ña̱ʼa tá ná ndatiin Ndióxi̱ ku̱a̱chi xíʼin na̱ yiví?
Ta̱ nu̱ú ta̱a, ta̱ Adán, va̱ása níkandíxakara ña̱ ni̱ka̱ʼa̱n Jehová Ndióxi̱. Xa̱ʼa̱ ña̱kán ndiʼi na̱ kúú se̱ʼera kíʼvina ku̱a̱chi, xóʼvi̱na ta̱ xíʼinna (Romanos 5:12). Ña̱ va̱ʼa ndasavií ta̱ Jesús ndiʼi ña̱ va̱ása va̱ʼa ña̱ ke̱ʼé ta̱ Adán, ta̱ Jesús sandátakura ku̱a̱ʼání na̱ yiví na̱ ni̱xi̱ʼi̱. Nu̱ú libro ña̱ Apocalipsis káʼa̱nña ña̱yóʼo kuuña ti̱xin mil ku̱i̱ya̱ ña̱ kaʼndachíñu ta̱ Jesucristo. (Kaʼvi Apocalipsis 20:4, 11, 12.)
Na̱ ndataku ndatiinna ku̱a̱chi xíʼinna, soo va̱ása ndatiinna ku̱a̱chi xíʼinna xa̱ʼa̱ ña̱ʼa ña̱ ke̱ʼéna tá kúma̱níka kuvina, chi ndatiinna ku̱a̱chi xíʼinna xa̱ʼa̱ ña̱ káʼa̱n ña̱ va̱xi nu̱ú rollo ña̱ káʼa̱n ña̱ capítulo 20 ña̱ Apocalipsis xa̱ʼa̱ (Romanos 6:7). Ta̱ apóstol Pablo ni̱ka̱ʼa̱nra xa̱ʼa̱ “na̱ ke̱ʼé ña̱ va̱ʼa ta saátu na̱ ke̱ʼé ña̱ va̱ása va̱ʼa” tá ni̱ka̱ʼa̱nra xa̱ʼa̱ na̱ ndataku ta kivi xa̱a̱na sakúaʼana xa̱ʼa̱ Ndióxi̱. (Kaʼvi Hechos 24:15.)
3. ¿Ndáaka ña̱ kuu tá ná ndatiin Ndióxi̱ ku̱a̱chi xíʼin na̱ yiví?
Na̱ yiví na̱ ni̱xi̱ʼi̱ ta va̱ása níkunda̱a̱-inina xa̱ʼa̱ Jehová ta ni va̱ása níkachíñuna nu̱úra tá ná ndatakuna saá kúú ña̱ kivi xa̱a̱na keʼéna ña̱ kúni̱ra. Tá ná keʼéna ña̱yóʼo ndatakuna ta “koona ndiʼi tiempo”. Soo na̱ ndataku ta kǒo xíínna keʼéna ña̱ kúni Ndióxi̱ na̱yóʼo “ndatiinna ku̱a̱chi xíʼinna” (Kaʼvi Juan 5:28, 29 xíʼin Isaías 26:10; 65:20.)
Tá xa̱a̱ ná ndiʼi mil ku̱i̱ya̱ ña̱ ndatiin Ndióxi̱ ku̱a̱chi xíʼin na̱ yiví, Jehová taxira ña̱ ndikó tuku na̱ yiví koona nda̱a̱ táki̱ʼva ni̱xi̱yona tá xa̱ʼa̱ tá kǒo ku̱a̱chi níxikuumiína (1 Corintios 15:24-28). Va̱ʼaní ña̱ ndakiʼinna xa̱ʼa̱ ña̱ xíniso̱ʼona ña̱ káʼa̱n Ndióxi̱. Ta̱ Ndi̱va̱ʼa ta̱ xi̱ndasi mil ku̱i̱ya̱ ti̱xin iin ya̱vi̱ naá, Ndióxi̱ sañára ta̱yóʼo ña̱ va̱ʼa kotondosóra na̱ yiví ta ña̱yóʼo kúú ña̱ so̱ndíʼi keʼé ta̱ Ndi̱va̱ʼa. Ta̱ Ndi̱va̱ʼa nda̱a̱ ndáaka ña̱ keʼéra ña̱ sakúxíkara na̱ yiví nu̱ú Jehová, soo na̱ kuchiñu ya̱ʼa nu̱ú ña̱yóʼo kivi kutakuna ndiʼi tiempo nu̱ú ñuʼú. (Kaʼvi Isaías 25:8 xíʼin Apocalipsis 20:1, 7-9.)
4.¿Ndáa inka ki̱vi̱ ndatiin Ndióxi̱ ku̱a̱chi xíʼin na̱ yiví ta taxira bendición ndaʼa̱na?
Ña̱ Biblia káʼa̱nña xa̱ʼa̱ inka ki̱vi̱ ña̱ ndatiin Ndióxi̱ ku̱a̱chi xíʼin na̱ yiví. Ña̱yóʼo kúú ña̱ ndiʼi-xa̱ʼa̱ ña̱ʼa ña̱ íyo ñuyǐví yóʼo. Ña̱yóʼo iin kama kixaa̱ña nda̱a̱ tá ku̱u tá ku̱un sa̱vi̱ kini tá tiempo ta̱ Noé, ta sandíʼi-xa̱ʼa̱ra ndiʼi na̱ yiví na̱ kéʼé ña̱ va̱ása va̱ʼa. Si̱lóʼo kúma̱ní Ndióxi̱ sandíʼi-xa̱ʼa̱ra na̱ yiví na̱ va̱ása íxato̱ʼó miíra na̱ ndi̱va̱ʼaní-ini, ta saá ndiʼi na̱ yiví na̱ koo kán nina ña̱ va̱ʼa kúú ña̱ keʼéna (Kaʼvi 2 Pedro 3:6, 7, 13.)
