မိသားစုတွင် ချစ်ခင်ကြင်နာမှု ပြကြလော့
မိသားစုတွင် ချစ်ခင်ကြင်နာမှု ပြကြလော့
“မင်းရှို့ရဲရင် ရှို့လိုက်! ရှို့လိုက်လေ!” တိုရူးသည် သူ၏ဇနီး ယိုကိုအား စိန်ခေါ်လိုက်သည်။ * “ငါတကယ်ရှို့ပစ်မယ်” ဟု ဇနီးက ခွန်းတုံ့ပြန်၍ နှစ်ယောက်တွဲဓာတ်ပုံကို မီးရှို့ရန် မီးခြစ်,ခြစ်လိုက်သည်။ ထို့နောက် “အိမ်ကိုပါ မီးရှို့ပစ်မယ်!” ဟုခပ်ကြမ်းကြမ်း ဆက်ပြောသည်။ ထိုအခါ တိုရူးသည် သူ့ဇနီးကို ပါးရိုက်လိုက်ရာ အငြင်းပွားမှုမှာ အကြမ်းဖက်မှုဖြင့် ပြီးဆုံးသွားလေသည်။
လွန်ခဲ့သောသုံးနှစ်က တိုရူးနှင့်ယိုကိုတို့သည် ပျော်ရွှင်သော မောင်နှံစုံအဖြစ် အိမ်ထောင်သည်ဘဝကို စတင်ခဲ့ကြ၏။ သို့ဖြစ်လျှင် ဘာမှားသွားခဲ့ကြသနည်း။ တိုရူးသည် ရည်မွန်သူဖြစ်ပုံရသော်လည်း သူ၏ဇနီးမှာ မိမိအား ချစ်ခင်ကြင်နာမှုမပြ၊ မိမိ၏ခံစားချက်များကို လျစ်လျူရှုသည်ဟု ယူမှတ်လာလေသည်။ ယိုကို၏ချစ်ခင်ကြင်နာမှုကို တိုရူးတုံ့ပြန်တတ်ပုံမရချေ။ ယိုကိုသည် ယင်းကို မျိုသိပ်မထားနိုင်တော့ဘဲ မကျေနပ်မှုနှင့် ဒေါသတိုးလာခဲ့သည်။ ဤသို့ဖြင့် ယိုကိုသည် အိပ်မရခြင်း၊ စိုးရိမ်ပူပန်ခြင်း၊ ခံတွင်းပျက်ခြင်း၊ စိတ်တိုခြင်း၊ စိတ်ဓာတ်ကျခြင်းနှင့် ထိတ်လန့်ခြင်း စသည့်ဝေဒနာများကို ခံစားရလေသည်။ သို့တိုင် တိုရူးသည် သူ၏အိမ်တွင်းအခြေအနေ တင်းမာနေသည်ကို သတိထားမိပုံမရချေ။ သူ့အတွက် သာမန်သာဖြစ်နေပုံရှိ၏။
“ခဲယဉ်းသောကာလ”
ယနေ့ ဤသို့သောပြဿနာများသည် သာမန်ဖြစ်နေ၏။ ကျွန်ုပ်တို့၏ကာလတွင် လူတို့သည် “ပကတိကြင်နာစုံမက်ခြင်းနှင့် ကင်းသောသူ” တို့ဖြစ်ကြလိမ့်မည်ဟု တမန်တော်ပေါလုက ကြိုဟောခဲ့သည်။ (၂ တိမောသေ ၃:၁-၅) ဤတွင် “ပကတိချစ်ခင်ကြင်နာမှုမရှိခြင်း” ကိုပြန်ဆိုထားသော မူရင်းဂရိစကားလုံးသည် မိသားစုအတွင်း တွေ့ရှိရသော ပကတိကြင်နာစုံမက်ခြင်းကို ဖော်ပြသောစကားလုံးနှင့် အလွန်နီးစပ်၏။ ကျွန်ုပ်တို့ခေတ်တွင် ဤသို့သောချစ်ခင်ကြင်နာမှု ကင်းမဲ့နေသည်ကို အမှန်ပင်တွေ့ရှိရ၏။ မိသားစုတွင် ချစ်ခင်ကြင်နာမှု ရှိကြသည်တိုင် တစ်ဦးကိုတစ်ဦး ထုတ်ဖော်ပြခဲကြပေမည်။
ယနေ့ မိဘများစွာတို့သည် သားသမီးများအား မည်သို့ချစ်ခင်ကြင်နာမှုပြရမည်ကို မသိကြချေ။ အချို့သည် ချစ်ခင်ကြင်နာမှုကင်းမဲ့သော မိသားစုအသိုင်းအဝိုင်းတွင် ကြီးပြင်းလာခဲ့ကြသည်၊ ချစ်ခင်ကြင်နာမှုကိုသာ ခံစားရပြီး ထုတ်ဖော်ပြမည်ဆိုလျှင် ဘဝသည် သာ၍ပျော်ရွှင်ချမ်းမြေ့စရာ ကောင်းနိုင်သည်ကို သူတို့မသိကြပေ။ တိုရူး၏အဖြစ်သည် ထိုသို့ဖြစ်ပုံရ၏။ ကလေးဘဝတွင် သူ၏ဖခင်သည် အလုပ်ခွင်၌ အမြဲအလုပ်များလေ့ရှိပြီး မိုးချုပ်မှ အိမ်ပြန်ရောက်လာတတ်သည်။ တိုရူးနှင့်စကားပြောခဲသည်၊ ပြောသည့်အခါတွင်လည်း ရင့်ရင့်သီးသီးပြောဆိုတတ်သည်။ တိုရူး၏မိခင်သည်လည်း အချိန်ပြည့်အလုပ်လုပ်ပြီး သူ့ကို အချိန်မပေးခဲ့ချေ။ ရုပ်မြင်သံကြားစက်သည် သူ၏ကလေးထိန်းဖြစ်ခဲ့သည်။ သူတို့မိသားစုတွင် ချီးမွမ်းခြင်း၊ စကားပြောဆိုဆက်သွယ်ခြင်း မရှိခဲ့ချေ။
ယဉ်ကျေးမှုကြောင့်လည်း ဖြစ်နိုင်သည်။ လက်တင်အမေရိက၏ ဒေသအချို့တွင် အမျိုးသားတစ်ဦးသည် သူ၏ဇနီးကို ချစ်ခင်ကြင်နာမှု ထုတ်ဖော်ပြခြင်းက ရိုးရာယဉ်ကျေးမှုကို ဆန့်ကျင်ရာကျ၏။ အရှေ့တိုင်းနိုင်ငံများနှင့် အာဖရိကနိုင်ငံများတွင်လည်း ချစ်ခင်ကြင်နာမှုကို စကားအားဖြင့် သို့မဟုတ် အပြုအမူများအားဖြင့် ထုတ်ဖော်ပြခြင်းသည် ရိုးရာဓလေ့နှင့်မကိုက်ညီချေ။ ခင်ပွန်းများသည် သူတို့၏ဇနီးများ၊ သို့မဟုတ် သားသမီးများကို “ချစ်တယ်” ဟုပြောဆိုရန် ရှက်ကြပေမည်။ မည်သို့ပင်ဖြစ်ပါစေ၊ အချိန်ကြာမြင့်စွာ တည်တံ့ခဲ့သည့် ဦးဆုံးမိသားစု၏ဆက်ဆံရေးမှ ကျွန်ုပ်တို့သင်ခန်းစာယူနိုင်သည်။
စံထားအပ်သော မိသားစုဆက်ဆံရေး
မိသားစုအတွက် အကောင်းဆုံးစံနမူနာကို ယေဟောဝါဘုရားသခင်နှင့် ကိုယ်တော်၏တစ်ပါးတည်းသော သားတော်စပ်ကြားရှိ ရင်းနှီးသောဆက်ဆံရေးတွင် တွေ့ရှိရ၏။ သူတို့သည် အလွန်ကောင်းသောနည်းဖြင့် တစ်ဦးကိုတစ်ဦး ချစ်ကြောင်း ထုတ်ဖော်ပြကြသည်။ နောက်ပိုင်းတွင် ယေရှုခရစ်ဖြစ်လာသော ဝိညာဉ်သားသည် မရေတွက်နိုင်သော နှစ်ထောင်ပေါင်းများစွာကျော်ကတည်းက ခမည်းတော်နှင့် ပျော်ရွှင်စွာဆက်ဆံပေါင်းသင်းခဲ့သည်။ သူတို့၏သံယောဇဉ်နှောင်ကြိုးကို ကိုယ်တော် ဤသို့ဖော်ပြခဲ့သည်– “တစ်နေ့ထက်တစ်နေ့ ငါသည် အထူးသဖြင့် ကိုယ်တော်ချစ်ခင်သောသူဖြစ်လာ၏။ ရှေ့တော်၌ အစဉ်မပြတ်ရွှင်လန်းဝမ်းမြောက်လျက်” ရှိ၏။ (သု. ၈:၃၀) သားတော်သည် ခမည်းတော်၏မေတ္တာခံစားရကြောင်း မည်မျှစိတ်ချသနည်းဟူမူ ယေဟောဝါသည် အထူးသဖြင့် မိမိကို နေ့စဉ်နှင့်အမျှ ချစ်ခင်သည်ဟု အခြားသူများကို ပြောပြနိုင်ခဲ့၏။ ကိုယ်တော်သည် ခမည်းတော်ရှေ့မှောက်တော်တွင် အစဉ်ပျော်ရွှင်ခဲ့၏။
လူသားယေရှုအနေနှင့် မြေကြီးပေါ်ရှိစဉ်အခါကပင် ခမည်းတော်၏မေတ္တာကို သားတော်ခံစားရကြောင်း အာမခံချက်ရခဲ့သည်။ ယေရှုနှစ်ခြင်းခံပြီးနောက် “ဤသူကား ငါနှစ်သက်မြတ်နိုးရာ ငါ၏ချစ်သားပေတည်း” ဟူသော ခမည်းတော်၏စကားသံကို ကြားခဲ့၏။ (မဿဲ ၃:၁၇) မြေကြီးပေါ်တွင် ယေရှု၏ဓမ္မအမှုအစပြုချိန်၌ အားရှိဖွယ် မေတ္တာစကားပါတကား! ကိုယ်တော်၏ကောင်းကင်အသက်တာကို အပြည့်အဝပြန်အမှတ်ရစေကာ ခမည်းတော်၏အလိုတော်နှင့်တွေ့ကြောင်း ကြားသိရလိုက်ခြင်းအတွက် ကိုယ်တော် စိတ်ကြည်နူးခဲ့မည်။
ဤသို့ဖြင့် ယေဟောဝါသည် မိမိ၏စကြဝဠာမိသားစုကို အပြည့်အဝ မေတ္တာထုတ်ဖော်ပြခြင်း၌ အကောင်းဆုံးပုံသက်သေဖြစ်တော်မူ၏။ ယေရှုခရစ်ကို ကျွန်ုပ်တို့လက်ခံကြမည်ဆိုလျှင် ကျွန်ုပ်တို့သည်လည်း ယေဟောဝါ၏ချစ်ခင်ကြင်နာမှုကို ခံစားရနိုင်သည်။ (ယောဟန် ၁၆:၂၇) ကောင်းကင်မှ ဘုရားသခင်၏အသံတော်ကို ကျွန်ုပ်တို့ ကြားကြရမည်မဟုတ်သော်လည်း သဘာဝတရားတွင်လည်းကောင်း၊ ယေရှု၏ရွေးနုတ်ဖိုးပူဇော်ရာယဇ်ကို ပြင်ဆင်ပေးမှုတွင်လည်းကောင်း၊ အခြားနည်းများတွင်လည်းကောင်း ထုတ်ဖော်ပြထားသော ယေဟောဝါ၏မေတ္တာတော်ကို ကျွန်ုပ်တို့တွေ့ရမည်ဖြစ်သည်။ (၁ ယောဟန် ၄:၉၊ ၁၀) ယေဟောဝါသည် ကျွန်ုပ်တို့၏ဆုတောင်းချက်များကို နားထောင်ပေးသည့်အပြင် ကျွန်ုပ်တို့အတွက် အကျိုးအရှိဆုံးနည်းဖြင့် ဖြေကြားတော်မူ၏။ (ဆာလံ ၁၄၅:၁၈; ဟေရှာယ ၄၈:၁၇) ယေဟောဝါနှင့် ရင်းနှီးသောဆက်ဆံရေးကို ကျွန်ုပ်တို့ပြုစုပျိုးထောင်ကြလေ ကိုယ်တော်၏မေတ္တာပါဂရုစိုက်မှုအတွက် ပိုမိုကျေးဇူးတင်လေးစားကြလေ ဖြစ်သည်။
သူတစ်ပါးကို စာနာဖို့၊ ညှာတာဖို့၊ ကြင်နာမှုရှိဖို့နှင့် သူတို့အတွက် အလွန်စိုးရိမ်ပူပန်ဖို့ ခမည်းတော်ထံမှ ယေရှု သင်ယူခဲ့သည်။ ကိုယ်တော်က “ခမည်းတော်ပြုတော်မူသမျှအတိုင်း သားတော်လည်းပြု၏။ ခမည်းတော်သည် သားတော်ကို ချစ်တော်မူ၍ ပြုတော်မူသမျှတို့ကို သားတော်အား ပြတော်မူ၏” ဟုရှင်းပြခဲ့သည်။ (ယောဟန် ၅:၁၉၊ ၂၀) ကျွန်ုပ်တို့လည်း ယေရှု ကမ္ဘာပေါ်ရှိစဉ်က ပြသခဲ့သော ပုံနမူနာကို လေ့လာခြင်းဖြင့် ချစ်ခင်ကြင်နာမှုပြနည်းကို သင်ယူနိုင်ကြသည်။—ဖိလိပ္ပိ ၁:၈။
မိသားစုတွင် ချစ်ခင်ကြင်နာမှု—မည်သို့နည်း
“ဘုရားသခင်သည် ချစ်ခြင်းမေတ္တာဖြစ်တော်မူ” ပြီး ကျွန်ုပ်တို့ကို “ဘုရားသခင်၏ပုံသဏ္ဌာန်တော်နှင့်အညီ” ဖန်ဆင်းထားသောကြောင့် ကျွန်ုပ်တို့သည် မေတ္တာကို ခံစားရပြီး ထုတ်ဖော်ပြနိုင်စွမ်း ရှိကြ၏။ (၁ ယောဟန် ၄:၈; ကမ္ဘာဦး ၁:၂၆၊ ၂၇) သို့တိုင် ထိုတတ်စွမ်းမှုသည် အလိုအလျောက်ဖြစ်ပေါ်လာမည်မဟုတ်ချေ။ ချစ်ခင်ကြင်နာမှုကို ထုတ်ဖော်ပြရန် ဦးစွာ ကျွန်ုပ်တို့၏အိမ်ထောင်ဖက်နှင့် သားသမီးများကို ကိုယ်ကိုယ်တိုင် ချစ်ခင်ကြင်နာရမည်ဖြစ်သည်။ သူတို့၏ချစ်စရာအရည်အချင်းများသည် ထူးထူးခြားခြားမဟုတ်သည့်တိုင် ၎င်းတို့ကို မြင်တတ်ဖို့ကြိုးစားပြီး ယင်းတို့ကို ဆင်ခြင်သုံးသပ်ပါ။ ‘ကျွန်မခင်ပွန်း [ဇနီး ဒါမှမဟုတ် သားသမီးတွေ] မှာ ကောင်းကွက်တစ်ကွက်မှ မရှိဘူး’ ဟုသင်ပြောပေမည်။ မိဘပေးစား၍ ယူရသူများသည် မိမိတို့၏အိမ်ထောင်ဖက်များကို မကြင်နာနိုင်ဟု ယူဆကြပေမည်။ အချို့က သားသမီးမယူလိုကြချေ။ သို့တိုင် ဘီ.စီ.အီး. ဆယ်ရာစုနှစ်တွင် ယေဟောဝါသည် မိမိ၏ပုံဆောင်ဇနီးဖြစ်သူ ဣသရေလလူမျိုးအပေါ် မည်သို့သဘောထားကြောင်းကို သုံးသပ်ကြည့်ပါ။ ကိုယ်တော်၏ပရောဖက်ဧလိယက ဣသရေလဆယ်နွယ်တွင် ယေဟောဝါအားဝတ်ပြုသူမရှိဟု ကောက်ချက်ချခဲ့သော်လည်း ယေဟောဝါသည် ထိုလူမျိုးကို သေချာစွာစိစစ်လိုက်သောအခါ ကိုယ်တော်၏ရှေ့တွင် နှစ်သက်ဖွယ်အရည်အချင်းများရှိသူ အတော်များများရှိကြောင်း၊ စု စုပေါင်း ၇,၀၀၀ ပင်ရှိကြောင်း တွေ့ရှိခဲ့၏။ သင့်မိသားစုမှသူတို့၏ ကောင်းကွက်များကို ရှာဖွေခြင်းဖြင့် ယေဟောဝါအား သင်တုပနိုင်သလော။—၃ ဓမ္မရာဇဝင် ၁၉:၁၄-၁၈။
သို့သော် မိသားစုဝင်များသည် သင်၏ချစ်ခင်ကြင်နာမှုကို ခံစားရရန် ယင်းကို သင်ကြိုးစားဖော်ပြရမည်။ ချီးမွမ်းစရာကောင်းသော အရည်အချင်းတစ်ခုခုကို သင်သတိပြုမိသည့်အခါတိုင်း ချီးမွမ်းပေးပါ။ အရည်အချင်းပြည့်မီသော ဇနီးတစ်ဦးအကြောင်း သရုပ်ဖော်ရာတွင် သမ္မာကျမ်းစာက မိသားစုဝင်များ၏ စိတ်ဝင်စားစရာ အရည်အသွေးတစ်ခုကို ဤသို့ဖော်ပြသည်– “သူ၏သားသမီးတို့သည်ထ၍ အမိကို ကောင်းချီးပေးတတ်ကြ၏။ သူ၏ခင်ပွန်းကလည်း . . . သူ့ကို ချီးမွမ်းတတ်၏။” (သု. ၃၁:၂၈၊ ၂၉) ထိုမိသားစုသည် တစ်ဦးကိုတစ်ဦး လေးစားတန်ဖိုးထားကြောင်း စိတ်လိုကိုယ်လျောက် ထုတ်ဖော်ပြကြပုံကို သတိပြုပါ။ ဖခင်သည် သူ၏ဇနီးကို ချီးမွမ်းစကားပြောဆိုခြင်းအားဖြင့် သူ၏သားအတွက် ပုံသက်သေကောင်းပြပြီး သားဖြစ်သူလည်း အိမ်ထောင်ပြုသောအခါ သူ၏အိမ်ထောင်ဖက်ကို စိတ်လိုကိုယ်လျောက် ချီးမွမ်းစကားဆိုရန် အားပေးနေခြင်းဖြစ်သည်။
ထို့ပြင် မိဘများသည် မိမိတို့သားသမီးများကို ချီးမွမ်းစကားပြောဆိုသင့်သည်။ ဤသို့ပြုခြင်းဖြင့် သားသမီးများသည် သူတို့ကိုယ်ကိုသူတို့ လေးစားတတ်လာကြလိမ့်မည်။ အမှန်ဆိုရသော် လူတစ်ဦးသည် ကိုယ့်ကိုယ်ကိုမလေးစားလျှင် ‘သူ၏အိမ်နီးချင်းကို ကိုယ်နှင့်အမျှချစ်’ ရန်မည်သို့ဖြစ်နိုင်မည်နည်း။ (မဿဲ ၂၂:၃၉) အခြားတစ်ဖက်တွင်မူ၊ မိဘများသည် သားသမီးများကို မချီးမွမ်းဘဲ တစ်ချိန်လုံး အပြစ်တင်ဝေဖန်နေမည်ဆိုလျှင် သားသမီးများသည် သူတို့ကိုယ်ကိုသူတို့ လေးစားမှုမရှိနိုင်ဘဲ သူတစ်ပါးကိုလည်း ချစ်ခင်ကြင်နာတတ်မည်မဟုတ်ပေ။—ဧဖက် ၄:၃၁၊ ၃၂။
အကူအညီ သင်ရှာတွေ့နိုင်
သင်သည် မေတ္တာရှိသော အိမ်ထောင်စုအသိုင်းအဝိုင်းတွင် ကြီးပြင်းလာသူ မဟုတ်လျှင်ကော။ ချစ်ခင်ကြင်နာမှုကို ထုတ်ဖော်ပြတတ်ရန် သင်ယူ၍ရနိုင်ပါသည်။ ဦးဆုံးပြုရမည်မှာ အခက်အခဲပြဿနာကို အသိအမှတ်ပြုပြီး တိုးတက်ပြုပြင်ဖို့လိုကြောင်း ဝန်ခံခြင်းဖြစ်သည်။ ဤကိစ္စတွင် သမ္မာကျမ်းစာသည် များစွာအကူအညီပေးသည်။ ကျမ်းစာကို ကြေးမုံမှန်တစ်ချပ်နှင့် နှိုင်းယှဉ်နိုင်၏။ ကြေးမုံမှန်ကဲ့သို့သော ကျမ်းစာသွန်သင်ချက်များဖြင့် ကျွန်ုပ်တို့ကိုယ်ကို ဆန်းစစ်သောအခါ ကျွန်ုပ်တို့စဉ်းစားတွေးခေါ်မှု၏ အပြစ်အနာအဆာများကို တွေ့ရှိပေမည်။ (ယာကုပ် ၁:၂၃) ကျမ်းစာသွန်သင်ချက်များနှင့်အညီ မတော်လျော်သော စိတ်ထားများကို ပြုပြင်ပြောင်းလဲနိုင်၏။ (ဧဖက် ၄:၂၀-၂၄; ဖိလိပ္ပိ ၄:၈၊ ၉) ဤသို့မှန်မှန်ပြုလုပ်၍ “အားမလျော့၊ စိတ်မပျက်ဘဲ ကောင်းသောအကျင့်ကိုကျင့်ကြ” ဖို့လိုသည်။—ဂလာတိ ၆:၉။
အချို့က သူတို့ကြီးပြင်းလာပုံ၊ သူတို့၏ယဉ်ကျေးမှုကြောင့် ချစ်ခင်ကြင်နာမှုကို ထုတ်ဖော်ပြရန် ခက်ခဲပေမည်။ သို့သော် မကြာသေးမီက ပြုလုပ်သော လေ့လာမှုများက ဤသို့သောအခက်အခဲများကို ကျော်လွှားအောင်မြင်နိုင်ကြောင်း ဖော်ပြ၏။ ‘ကလေးဘဝကတည်းက နှလုံးထဲ အခိုင်အမာအမြစ်စွဲနေသော အကျင့်များကိုပင် ပြောင်းလဲပစ်နိုင်သည်’ ဟု စိတ်ရောဂါအထူးကု ဒေါက်တာဒယ်နီယယ် ဂိုလ်မန်က ရှင်းပြသည်။ သမ္မာကျမ်းစာကလည်း ဘုရားသခင်၏ဝိညာဉ်တော်အကူအညီဖြင့် နှလုံးထဲ အခိုင်အမာစွဲနေသော စိတ်သဘောထားများကို ပယ်ဖျက်နိုင်သည်ဟု လွန်ခဲ့သော ၁၉ ရာစုနှစ်ကျော်က ဖော်ပြခဲ့သည်။ ကျွန်ုပ်တို့ကို ဤသို့ဆုံးမ၏– “လူဟောင်း၏အကျင့်တို့နှင့် လူဟောင်း၏ကိုယ်ကို ချွတ်ပယ်၍ . . . အသစ်ပြုပြင်သောလူသစ်ကို ယူတင်ဝတ်ဆောင်သောသူဖြစ်ကြ” လော့။—ကောလောသဲ ၃:၉၊ ၁၀။
မိသားစုသည် မိမိတို့၏အခက်အခဲပြဿနာကို သတ်သတ်မှတ်မှတ် သိရှိပြီဆိုလျှင် မိမိတို့လိုအပ်ရာကို စွဲမှတ်ပြီး ကျမ်းစာလေ့လာနိုင်ကြသည်။ ဥပမာ၊ “ချစ်ခင်ကြင်နာမှု” ကိုသဘောပေါက်ရန် ကျမ်းစာမာတိကာတွင် ရှာဖွေလေ့လာကြည့်နိုင်သည်။ “ယောဘသည် သည်းခံကြောင်းကို သင်တို့ကြားရပြီ။ ထာဝရဘုရားသည် မိမိအမှုကို လက်စသတ်တော်မူရာမှာ အလွန်သနားစုံမက် [“ချစ်ခင်ကြင်နာ၊” ကဘ] တော်မူကြောင်းကိုလည်း သိမြင်ရကြပြီ” ဟုဆိုသော ကျမ်းချက်မျိုးကို သင်တွေ့ရှိပေမည်။ (ယာကုပ် ၅:၁၁) ထို့နောက် ယေဟောဝါသည် ယောဘအား ချစ်ခင်ကြင်နာမှု မည်သို့ပြ၍ သက်ညှာခဲ့ကြောင်း သုံးသပ်ကြည့်ပါ။ သင်သည် သင့်မိသားစုကို ယေဟောဝါနည်းတူ ချစ်ခင်ကြင်နာမှုပြလိုမည်မှာ သေချာသည်။
သို့သော် ကျွန်ုပ်တို့သည် မစုံလင်သူများဖြစ်ကြသောကြောင့် လျှာကို အသုံးပြုရာတွင် “အများသောအားဖြင့် မှားတတ်ကြ၏။” ယာကုပ် ၃:၂) မိသားစုအတွင်း ကျွန်ုပ်တို့၏လျှာကို အားပေးတည်ဆောက်မှုဖြစ်သည့်နည်းဖြင့် အသုံးမပြုဘဲ နေခဲ့ကြပေမည်။ ဤအချိန်အခါမျိုးတွင် ယေဟောဝါကို ဆုတောင်းပြီး မှီခိုအားထားရန် လိုအပ်လာမည်။ လက်မလျှော့ဘဲ ကြိုးစားပါ။ “မခြားမလပ်ဆုတောင်း” ပါလေ။ (၁ သက်သာလောနိတ် ၅:၁၇) မိသားစုတွင် ချစ်ခင်ကြင်နာမှုကို ရလိုသည့်အပြင် ထုတ်ဖော်ပြလိုသော်လည်း ထိုသို့ပြုရန် အဟန့်အတားဖြစ်နေသူများကို ယေဟောဝါ ကူညီပေးပါလိမ့်မည်။
(ထို့ပြင် ယေဟောဝါသည် ခရစ်ယာန်အသင်းတော်တွင် ကြင်နာစွာ ကူညီပေးခဲ့သည်။ ယာကုပ်က “နာသောသူရှိလျှင် သင်းအုပ်တို့ကိုခေါ်၍ သူတို့သည် သခင်ဘုရား၏နာမတော်ကို အမှီပြုလျက် လူနာကို ဆီနှင့်လူး၍ သူ့အပေါ်မှာ ဆုတောင်းကြစေ” ဟုရေးသားခဲ့သည်။ (ယာကုပ် ၅:၁၄) မှန်ပါသည်၊ ယေဟောဝါသက်သေများ၏ အသင်းတော်များရှိ အကြီးအကဲများသည် အချင်းချင်း ချစ်ခင်ကြင်နာမှု ထုတ်ဖော်ပြရန် အခက်တွေ့နေသော မိသားစုမှသူများကို အကူအညီများစွာ ပေးနိုင်ကြသည်။ အကြီးအကဲများသည် ကုထုံးပညာရှင်များ မဟုတ်ကြသော်လည်း သူတို့၏ယုံကြည်သူချင်းများအား အဘယ်အရာ ပြုလုပ်သင့်သည်ဟု မပြောဘဲ ယေဟောဝါ၏ရှုထောင့်ကို ပြန်သတိရစေပြီး သူတို့နှင့်အတူဖြစ်စေ၊ သူတို့အတွက်ဖြစ်စေ ဆုတောင်းပေးခြင်းဖြင့် စိတ်ရှည်စွာ ကူညီပေးနိုင်ကြပါသည်။—ဆာလံ ၁၁၉:၁၀၅; ဂလာတိ ၆:၁။
တိုရူးနှင့် ယိုကိုတို့ကိစ္စတွင် ခရစ်ယာန်အကြီးအကဲများသည် သူတို့၏အခက်အခဲပြဿနာများကို နားထောင်ပေးရန် အမြဲအသင့်ရှိပြီး သူတို့ကို နှစ်သိမ့်ပေးလေ့ရှိ၏။ (၁ ပေတရု ၅:၂၊ ၃) ယိုကိုသည် “ကိုယ်ခင်ပွန်းကိုချစ်သောသူ” ဖြစ်လာစေရန် အကြီးအကဲတစ်ဦးနှင့် သူ၏ဇနီးတို့က ယိုကိုထံ ရံဖန်ရံခါ လည်ပတ်ခဲ့ကြ၏၊ ထိုသို့ဖြင့် ယိုကိုသည် အတွေ့အကြုံရှိ ခရစ်ယာန်အမျိုးသမီးနှင့် ပေါင်းသင်းခြင်းမှ အကျိုးခံစားရ၏။ (တိတု ၂:၃၊ ၄) အကြီးအကဲများသည် ခရစ်ယာန်ချင်းများ၏ စိတ်ဆင်းရဲမှုများနှင့် ဝမ်းနည်းကြေကွဲမှုများကို နားလည်ပေးကြခြင်းအားဖြင့် “လေလုံ၍ မိုးသက်မုန်တိုင်းကွယ်ရာ အရပ်ကဲ့သို့လည်းကောင်း၊ သွေ့ခြောက်သောမြေ၌ စီးသော ချောင်းရေကဲ့သို့လည်းကောင်း” ဖြစ်လာကြပါသည်။—ဟေရှာယ ၃၂:၁၊ ၂။
ကြင်နာသောအကြီးအကဲများ၏ အကူအညီဖြင့် တိုရူးသည် မိမိ၏ခံစားချက်များကို ထုတ်ဖော်မပြတတ်ကြောင်းနှင့် ‘နောက်ဆုံးကာလ’ တွင် စာတန်သည် မိသားစုအစီအစဉ်ကို တိုက်ဖျက်နေကြောင်း သဘောပေါက်လာလေသည်။ (၂ တိမောသေ ၃:၁) တိုရူးသည် မိမိ၏အခက်အခဲကို ကြိုးစားဖြေရှင်းရန် ဆုံးဖြတ်လိုက်၏။ သူကြီးပြင်းလာချိန်တွင် မေတ္တာမခံစားခဲ့ရသဖြင့် ကိုယ်တိုင်လည်း မေတ္တာမထုတ်ဖော်ပြတတ်သည်ကို သဘောပေါက်လေသည်။ တိုရူးသည် ကျမ်းစာကို လေးလေးနက်နက်လေ့လာပြီး ဆုတောင်းခြင်းဖြင့် ယိုကို၏စိတ်ပိုင်းဆိုင်ရာ လိုအပ်ချက်များကို တဖြည်းဖြည်း ဖြည့်ဆည်းပေးနိုင်လေသည်။
ယိုကိုသည် တိုရူးအပေါ် ဒေါသထွက်ခဲ့သော်လည်း တိုရူး၏မိသားစုနောက်ခံကို သဘောပေါက်လာပြီး မိမိ၏အမှားများကို တွေ့မြင်လာသောအခါ မိမိခင်ပွန်း၏ ကောင်းကွက်များကို တွေ့မြင်ရန် အကြီးအကျယ်ကြိုးစားအားထုတ်ခဲ့သည်။ (မဿဲ ၇:၁-၃; ရောမ ၅:၁၂; ကောလောသဲ ၃:၁၂-၁၄) ယိုကိုသည် မိမိ၏ခင်ပွန်းကို ဆက်ချစ်သွားနိုင်ရန် ခွန်အားပေးဖို့ ယေဟောဝါထံ စိတ်အားထက်သန်စွာ အသနားခံတောင်းလျှောက်ခဲ့သည်။ (ဖိလိပ္ပိ ၄:၆၊ ၇) အတန်ကြာလေသော် တိုရူးသည် ဇနီးကို ချစ်မြတ်နိုးကြောင်း သူ၏ချစ်ခင်ကြင်နာမှုကို ထုတ်ဖော်ပြတတ်လာလေသည်။
မှန်ပါသည်၊ သင်သည် မိသားစုအတွင်း ချစ်ခင်ကြင်နာမှုကို မခံစားရ၊ ထုတ်ဖော်ပြရန်လည်း အခက်တွေ့မည်ဆိုလျှင် ထိုပြဿနာကို အမှန်ပင် ကျော်လွှားနိုင်ပါသည်။ သမ္မာကျမ်းစာက ကျွန်ုပ်တို့ကို အကျိုးပြုလမ်းညွှန်ချက် ပေးထား၏။ (ဆာလံ ၁၉:၇) ဤကိစ္စကို အလေးအနက်ထားမည်၊ သင့်မိသားစုဝင်များ၏ ကောင်းကွက်များကို မြင်တတ်ရန် ကြိုးစားမည်၊ သမ္မာကျမ်းစာကို လေ့လာကျင့်သုံးမည်၊ ယေဟောဝါထံ စိတ်အားထက်သန်စွာ ဆုတောင်းပြီး မှီခိုအားထားမည်၊ ရင့်ကျက်သည့် ခရစ်ယာန်အကြီးအကဲများ၏ အကူအညီကို တောင်းဆိုမည်ဆိုလျှင် သင်နှင့် သင့်မိသားစုစပ်ကြား အလွန်တရာကြီးမားသည့် အတားအဆီးဟု ထင်မြင်ရဖွယ်ရှိရာကို အောင်မြင်ကျော်လွှားနိုင်ပါမည်။ (၁ ပေတရု ၅:၇) ယူနိုက်တက်စတိတ်မှ ခင်ပွန်းတစ်ဦးကဲ့သို့ အသင်သည်လည်း ရွှင်လန်းနိုင်ပေမည်။ သူ၏ဇနီးကို ချစ်ခင်ကြင်နာမှု ထုတ်ဖော်ပြရန် အားပေးခံခဲ့ရသည်။ နောက်ဆုံး၌ သူသည် အားယူ၍ “မင်းကို ငါချစ်တယ်” ဟုဇနီးအား ပြောလိုက်သောအခါ ဇနီး၏တုံ့ပြန်ပုံက သူ့ကို အကြီးအကျယ်အံ့အားသင့်စေခဲ့သည်။ ဇနီးသည် ဝမ်းသာမျက်ရည်များစီးကျလျက် “ကျွန်မလည်း ချစ်ပါတယ်၊ ဒါပေမဲ့ ချစ်တယ်လို့ ရှင်ပြောတာ ၂၅ နှစ်အတွင်းမှာ ဒါပထမဆုံးအကြိမ်နော်” ဟုပြောခဲ့သည်။ အသင်သည် သင့်အိမ်ထောင်ဖက်နှင့် သားသမီးများအပေါ် ချစ်ခင်ကြင်နာမှု ထုတ်ဖော်ပြရန် ထိုသို့ နှစ်ရှည်လများ မစောင့်ပါလေနှင့်!
[အောက်ခြေမှတ်ချက်]
^ အပိုဒ်၊ 2 အချို့အမည်များကို ပြောင်းထားသည်။
[စာမျက်နှာ ၂၈ ပါ ရုပ်ပုံ]
ယေဟောဝါသည် ကိုယ်တော်၏နှုတ်မြွက်စကားတော် သမ္မာကျမ်းစာတွင် အကူအညီပေးထား