Tae-i ti amaba? Khoets axasets ta dîsen dîn hîna a ǂhâǂhâsan xa. Sadu tsîn ge ǂgao kao nē dîte ra dîsen:

• Eloba sada amabes ǃnâ tsâba i ra?

• Torogu tsî ǃgomsiga toa i nî?

• Tae-e sada ǀkha ra ī ǁō da ga o?

• ǃÂubasen e hâ i a ǁōhân ǃaroma?

• Mati ta nî ǀgore i da Elob xa ǁnâu-amhe ǁkhā?

• Mati ta ama ǂkhîba a hōǁkhā ûib ǃnâ?

Mapa du nî ǃereamte ôa nē dîti ǃaroma? ǃKharagagu khoena du ga dî o, o du ge ǃkharagagu ǃereamte nî hō. Kerke ǃgû ra khoen tamas ka io ǂgomdi ǂgaeǂgui-aoga du ga dî xawe du ge ǀgau tama ǃereamte a hōǁkhā.

Xawes ge ǀgui ǂkhanisa hâ ǂgomǂgomsa ǃereamte ūhâsa. Amab di ǂkhanis ge. Jesub Xristub ge ǀgores ǃnâ ge mî: “Sa mîs ge a ama.” (Johaneb 17:17) Nētsē ta ge ǁnā mîsa Elobmîs di a ǂan. Sao ra ǂhaweb aits ge kē ǁkhā Elobmîs di ǃgāsa tsî ǁaposa ǃereamte ǀgapiga hâ dîti ai.

TAE-I ǃAROMAS NĒ DÎSA RA DÎHE: ǁKhōǁkhōsa tsî ǂhanu-oǃnâ ǃhūbaib ǃnâ da ge ûi hâ. ǃNāsa ǂgomdi ge ra ǁkhāǁkhā sada ra hōǃâ ǃgomsigu Elob xa ra ǃaromahe ti.

ELOBMÎSA TAE-E RA ǁKHĀǁKHĀ: Elob ge tsū xūna ǃaroma tama hâ. “Elob ge eloxoresase sîsen tama hâ tsî Hoaǀgaixab ge ǂhanuba dawa ǃkhuni tama hâ,” dis ge Jobi di 34:12 sa ra mî. Elob ge ǀnamǀnamxa ǂâibasensa khoena ūba hâ. ǁNā-amagab ge Jesuba ge ǁkhāǁkhāda i da nēti ǀgore: “Sida Îtse ǀhomgu ǃnâ hâtse, . . . sa gaosiba ab hā re. Sa ǂâisa as ī, ǀhomi ǃnâs ta īs ǁkhā khami ǁnāti ǃhūbaib on ai.”(Mateub 6:9, 10) Elob ge sada ǃgamse ra tsâba tsîb ge ǁnās kose ge sī ǁÎb di ǂâibasensa ǁapoǁaposa.—Johaneb 3:16.

Nē xoadi tsîna khomai re Genesis 1:26-28; Jakobub 1:13; tsî 1 Petrub 5:6, 7.

AE-I ǃAROMAS NĒ DÎSA RA DÎHE: Torogu ge ǂgui khoen di ûiga ge ǀamǀam. Hoa da ge khoesi ǃgomsigu xa tsâǀkhā-e hâ.

ELOBMÎSA TAE-E RA ǁKHĀǁKHĀ: Elob ge ge mîǁgui ǁaeb ge nî hā ǁÎb ǂkhîbab hoaraga ǃhūbaib ai nî ǁapoǁapoba. ǁÎb di ǀhomsi Gaosib ǃnāgan ge khoena “toro dīsa ǁkhāǁkhāsen tite.” ǁNās xan ge ǁîn di “ǁkhâi gôagu âna nîra ǃhūb ǃkha-xū kai.” (Jesajab 2:4) Elob ge ǂhanuoǃnâsib tsî ǃgomsigu tsîna nî ǀamǀam. Elobmîs ge ra mîmâi: “Ob ge Eloba mûdi âna xu ǁgamron hoana nî ǀombē; Ob ge ǁōba !aruǀî hâ tide, tsî !oa-i xare-i tsî !au-i tsî ǀhuwuǀhuwusen i xare-i !aruǀî hâ tide. ǂGuron [nētsē da ra tsâ ǂhanuoǃnâsib tsî ǃgomsigu tsîna ǃkhōǂgā hân] go !gôa i xui-ao.”—ǂHai-ǂhais 21:3, 4.

Nē xoadi tsîna khomai re Psalmti 37:10, 11; 46:9; tsî Mixab 4:1-4.

TAE-I ǃAROMAS NĒ DÎSA RA DÎHE: ǂGui ǂgomdi nētsē hâ ti ge khoena ra ǁkhāǁkhā khoets ga ǁō, o i xu-i sats ǃnâ hâ e ra ûiǃkharu ti. ǀNîn ge ra ǂgom ǁōhân ûihâna tsama kai ǁkhā tamas ka iob Eloba eloxoresa khoena ǀamoǀaeb ǀkha ra ǁkhara ti.

ELOBMÎSA TAE-E RA ǁKHĀǁKHĀ: ǁŌb tawab ge ûiba ko toa, khoe-i ge ra ûi ǀû. “ǁŌhân ge xui xare-e ǂan tama hâ” tis ge Ao-ǁnâ-aob 9:5 sa ra mî. ǁŌhân ge xu-e ǂan tama, hōǃâ ǁoa, tsâ ǁoa, tsûtsû da ǁoa tamas ka io ûitsamana a hui ǁoa.—Ao-ǁnâ-aob 12:7.

Nē xoadi tsîna khomai re Genesis 3:19; tsî Ao-ǁnâ-aob 9:6, 10

TAE-I ǃAROMAS NĒ DÎSA RA DÎHE: Ûi ǂgao da ge ra tsî da ge ǀnam ta hâ khoen ǀkha ǁkhoreǁharexase ra hâ ǂgao. Khoesis ǀguisa i ge ī ǁkhoresa sida di ǁōǂoa ge ǀnamǀnamsa na ǁkhapa mû ǂgao sa.

ELOBMÎSA TAE-E RA ǁKHĀǁKHĀ: ǁŌhan ge khâisa nî hō. Jesub ge ge mîmâi ‘ǀhowadi ǃnâ hân hoan nîra ǀkhī.’ (Johaneb 5:28, 29) Elob di ǂâibasens tsoatsoas ǃnâs ǀkha ǀguiǃnâxasen ge khoena khâis aiǂhanuba nî hō ǃhūbaib ai ûisa paradais ǃnâ. (Lukab 23:43) Nē mîmâis hānîǁaeba ǃkhōǂgāhâs ge ǀoasa ǂurusib tsî ǀam-e ūhâ tama ûiba ra ǂâibasen ǁnâuǀnamxa khoen ǃaroma. Elobmîs ge ra mî: “ǂHanu-ain ge ǃhūbaiba nîra ǀomi tsî ǀamose ǁîb ai nîra ǁan.”—Psalmti 37:29.

Nē xoadi tsîna khomai re Job 14:14, 15; Lukab 7:11-17; tsî Ap. !Nae-!khaidi 24:15.

TAE-I ǃAROMAS NĒ DÎSA RA DÎHE: Hoa khoen ge ra ǀgore. Xawe, ǀnîn ge ra tsâ ǁîn ǀoredi ǁnâu-amhe tama di.

ELOBMÎSA TAE-E RA ǁKHĀǁKHĀ: Jesub ge ge ǁkhāǁkhāda i da tā ǀgui ǀgores ǀguisa ǀgore. “Tsî ǀgore du ga o,” tib ge ge mî “tā ǀgomaxase ǀgore ǀūben xase, ǁîn di ǂgui mîdi dīb ǃnâ in nî ǁnâu-amhe, tin ǂâi hâ xui-ao.” (Mateub 6:7) Elob nî sida ǀgorede ǁnâu-am sa da ga ǂgao o, o da ge ǁîb ǂhâba hâ ǀgaus ai nî ǀgore. ǁNāsa dis ǃaroma, da ge nî ǁkhāǁkhāsen ǁîb di ǂgaoǀkhāte tsî ǁnās ǃoagu nî ǀgore. ǂGuro Johaneb 5:14 ge ra mîǃgāǃgā: “xū-e da ga ǁÎb [Elob] di ǂâis ǃoa ǂgan o, ob ge ra ǁnâu-am da.”

Nē xoadi tsîna khomai re Psalmti 65:3; Johaneb 14:6, 14; tsî 1 Johaneb 3:22.

TAE-I ǃAROMAS NĒ DÎSA RA DÎHE: ǂGui khoen ge ra ǂgom mari-i, ǂanǂansasib, tamas ka io îsasib xan nî ǂkhî kaihe di. Nēs ǀkhan ge ǁnā xūna ra ǁgūba​—tsî hoaran da si mûs ge ǂkhîban ūhâ tamasa.

ELOBMÎSA TAE-E RA ǁKHĀǁKHĀ: Jesub ge daoba ge ǁgauda ǂkhîsa ûib ǃaroma nētib ge mî o, “ǃgâiǃōn ge hâ, Elobmîsa ǁnâu tsî ra sâubasena” (Lukab 11:28). Ama ǂkhîba da ge a hōǁkhā sida di kai ǂhâba ta ka dīǀoaǀoa o​—sada di gāgāsi ǃâsa Elob amab tsî ǁîb ǂâibasensa sada ǃaroma ǂans ǃnâ-ū. ǁNâ amab ge Elobmîs ǃnâ ǀgui ra hōhe. Nē amaba ǂans ge nî huida ǁnâuǃāsa tae-i a ǂhâǂhâsas tsî tae-i ǂhâǂhâsa tama hâ ǃkhaisa. Elobmîs ǃnâ hâ amaba da ga mā-am o, sada ǂâi ǀgaugu tsî dī xūna ǂgaeǂguisa, o da ge ǂâibasensa ūhâ ûiba a hōǁkhā.

Nē xoadi tsîna khomai re ǂKhoa-mîdi 3:5, 6, 13-18 tsî 1 Timoteub 6:9, 10.

 Nēb ge go ǃnūbu ǀgau i Elobmîs ǃereamde nē ǃnani dîdi amsi hōsa. Nēn xa ǃnāsase ǂan ǂgaots its ra? ǁNan hîna amaba ra ôan ǃnâts nî hâs ga o, ots ge ǁnāsa ra ǁkhore. ǀNîsits ge nē dîdi xa ra ôasen, Elob ga sida tsâba o, mati i io i toaǁoa ǂkawadib tsî ǃgomsigu tsîna hoa ǁae hâ? Matita ti omaris di ûiǀgauba ǃgâib ǃoa a ǀkharaǀkhara ǁkhā? Elobmîs ge ǀoasa tsî ǂkhîǂkhîsa ǃereamde nē dîdi ai ra mā.

Xawe, ǂguin ge nētse ra îgaǀgē Elobmîsa ôaǃnâsa. ǁÎn ge kaise kaxu ǂkhanis ase ra mû si ǃgomse ra ǁnâuǃāhesa. Satsa Elobmîs ǃnâ ǃereamde hō ǂgaots its ta? Jehovab di ǀHûǀguitimî-aon ge sîsenū xuna ūhâ huitsi ǁkhā na.

ǂGuros ge ǂkhanis What Does the Bible Really Teach? ti ǀon hâ sa. ǁNās ge ǁnati a xoasa kaise dīxuna ūhâ khoena huisa ǂhâǂhâsa dîti ǃereamde ǃgāsase Elobmîsa xu hōsa. ǀGamǁîs ge mari-oǃnâ ǀaweǁguiba Elobmîsa oms tawa ǁkhāǁkhās diba. Jehovab di ǀHûǀguitimî-aon ge sa oms tawa a sari tsi ǁkhā ǃnorasats a tsēs ai ǁaeroba wekheb hoaba Elobmîsa sats ǀkha ǁgams ǃaroma. Miliundi khoen ge ǃhūbaib ǂhawase nē ǀgaub xa ge huihe. ǂGuin ge nēs khaoǃgâ ge mû ǂan tsî ge mî: “Nēsi ta ge amaba go hōǃ”

ǀNîhâ ǂûǂûsa xū-i ge a hōhe ǁoa. Elobmîs amab ge ra ǃnoraǃnorata xōǀkhā hâ xūna ǂgoms, ǂgomaxasib tsî ǁōb tsî ǀaeb tsîna ǃaosa xu. Elobmîs amab ge ǃâubasens, ǂâibasens tsî ǂkhîb tsîna ra mā da. Jesub ge ge mî: “Tsîdu ge amaba nî ǁnâuǃā, tsîb ge amaba sado nî ǃnoraǃnora.”—Johaneb 8:32.