1. Mâ hâisi-amsab ge kēbo-aob Jesajaba Israelǁaesa mā?

 KĒBO-AOB Jesajab ge Jehovaba “amab Elob” ase ra ǁguiǃā. Amab ti hâ mîs ge “amen” ti ra ǂâibasen. (Jes. 65:16) “Amen” ti hâ mîs ge ī nî tis tsîna ra ǂâibasen. “Amen” ti hâ mîs ga Elobmîs ǃnâ Jehovab tamas ka io Jesub ǃaroma sîsenūhe, o i ge ra ǁapoǁapo ǁnā xū-i nî ama kaisa. ǁNā-amaga i ge Jesajab haisi-ams Israelǁaesab ge mîbasa ge ǃgāsa i. Jehovab ga xū-e mîmâi, o i ge ǁnā xū-e hoaǁae nî ī. Jehovab ge ǁîb mîmâide dīǀoaǀoas ǃnâ ge ǁgau ǂgomǃgâhe ǁkhāb a ǃkhâisa.

2. Tae-i ǃaroma da Jehovab mîmâis hānîǁāeb xa hâs ǃnâ ǂgomǃgâsiba nî ūhâ? Tsî mâ dîde da nî ǃhoaǃgao?

² ǁKhā ǂgomǃgâsiba da a ūhâ ǁkhā Jehovab mîmâis hānîǁaeb dis ǃnâ? ǁAubexa 800 kuriga Jesajab di ǁaeba ǃkharu tsîb ge apostel Pauluba ge ǁguiǃā, tae-i ǃaroma di Elob mîmâide hoaǁae a ǂgomǂgomsa ǃkhaisa. Apostel Paulub ge ge mî, ‘īǁoa i ge a Elob nî ǂhūmî ǃkhaisa.’ (Heb. 6:18) ǀAusa xu i ǀgui ǁaeb ai ǃanu ǁgammi tsî au ǁgammi tsîna ǂoaxa ǁoa, khami i ge Jehovab amab di ǃgaoǃgaoba a ǂhūmî ǁoa. ǁNā-amaga da ge ǀoasase hoa xūn Jehovab da mîna a ǂgom ǁkhā. ǁÎb di mîmâidi hānîǁaeb xa hâ di tsîna ǃkhōǂgā hâse. Nē ǁkhāǁkhāǃâs ǃnâ da ge saora dîde nî ǃhoaǃgao. Hānîǁaeb tae-e nî mādasab Jehovaba ra mîmâi? Matib Jehovaba ra ǂgomǃgâ kai da ǁîb mîmâidi nî ama kaisa?

3. (a) Mâ mîmâisan Elob ǃoaba-aona a ǀnam? (ǂHaiǂhais 21:​3,4) (b) Matin ǀnîna nē mîmâisa ra ǃkhōǃoa?

³ Mîmâis hîna da nî ǃhoaǃgaos ge Elob ǃoaba-aon, ǃhūbaib ǂhabase hâna kaise a ǀō-aisaba. (Khomai re ǂHaiǂhais 21:​3, 4 sa.) “ǁŌ-i ǃaruǀî hâ tide, ǃoa-i tamas ka io ā-i tamas ka io tsû-i xare-i ge hâ tide,” ti hâ ǁaeb nî hā tib ge Jehovaba ge mîmâi. Nē xoade da ge aoǁnâ sîsenni ǃnâ khoena ǁkhaeǂgaos ǃaroma ra sîsenū. Tsî ra ǁgau paradais mati nî īsa. ǀNî khoena mati nē mîmâisa ra ǃkhōǃoa? ǀNîn ge ra mî, “nēs ge kaise a buruburuxa, tita ge ǂgom tama hâ ama ī-i nîsa.”

4. (a) Jehovab ge paradais mîmâisa a dī ob ge tae-e ǂan i sida tsēdi ǃnâ nî ī-e? (b) Mîmâisa dīs xōǀkhāb Jehovaba tae-i tsîna ge dī?

⁴ Jehovab ge Johanneba nē mîmâis paradais disa xoamâi kai. Ob ge ge ǂan i nētsē da nē ǃâubasensa khoen ǀkha nî ǀgoragusa Gaosib ǃgâiǂhôasa da ga aoǁnâ o. Jehovab ge ge ǂan i kaise i ǂgui khoena nî ǃgombasa, nē ‘ǀasaǀasan’ hānîǁaeb ǃnâ nî īsa ǂgomsa. (Jes. 42:9; 60:2; 2Kor. 4:​3, 4) ǁNā-amaga da mati nauna nî hui în ǂHaiǂhais 21:​3, 4 ǃnâ hâ mîmâis nî ama īsa ǂgom? Tsî mati da sida di ǂgomǃgâsiba a ǀgaiǀgai ǁkhā Jehovab tsî ǁîb mîmâidi ǃnâ? Jehovab ge ǁaposa ǃaromade ge māda î da ǁîb mîmâide ǂgomǃgâ. Mâ ǃaromadeb ge mā?

5. Mâ xoade Elobmîs mîmâidi ǃnâ ǂgomǃgâs ǃaromasa ra māda? Tsî mâpa da ǁîde hō ǁkhā?

⁵ ǃAromas hîna da Jehovab mîmais paradais dis ǃnâ ǂgom ǁkhās ge sao ra xoas ǃnâ hâ. ǁNāpa da ge ra khomai: “Tsîb ge trons ai ǂnôaba ge mî: “Mû, hoana ta ra ǀasa kai!” Tsîb ge ǁnāpa xu ge mî: “Nē mîde xoamâi re, ǁîdi a ama tsî ǂgomǂgomsa xuige.”—J.ǂHa. 21:​5, 6.

6. ǂHaiǂhais 21: 5, 6 ǃnâ xoasa mîde mati sida ǂgomǃgâsib Elob mîmâidi ǃnâ da ūhâte ra ǀgaiǀgai?

⁶ Tae-i ǃaromadi nē mîde sida di ǂgomǃgâsib Elobmîs ǃnâ da ūhâba ra ǀgaiǀgai? Nē xoadi ǃnâb Jehovaba ra dī xū-i ge, ǂkhani-i hîna ǂgomǃgâsiba ra māda eb ra xoa khami ī, ǁîb mîmâisab nî ǃkhōǀgarasa. Elob mîmâis ge ǂHaiǂhais 21:3, 4 ǃnâ ra hō-e. Xaweb ge 5 tsî 6ǁî ǁāraǃā ra ǃnâ xoaǃgao tsî ra ǂgomǃgâ kai da ǁîb mîmâis nî ama ī ǃkhaisa. Hā re î da Jehovab di mîde kō hîna ra ǀgomǀgom ǃgaode.

7. Koroǁî xoaǀgoras ǃnâ hâ mîde tae-i ǃaroma a ǀō-aisa?

⁷ Tsî 5ǁî ǁarāǃās ge nēti ra tsoatsoa, “tsîb ge trons ai ǂnôaba ge mî.” (J.ǂHa. 21:5) Nē mîdi ge kaise a ǀō-aisa Jehovab ge ǂHaiǂhais di ǂkhanis ǃnâ ǃnona ǃnādi ǀguide aitsama ǃhoa amaga. Nē ǁapoǁaposa mîdi ge ǀhomǃgā-i tamas ka io khâisa hōhâ Jesub xa mîhe tama hâ xawe Jehovab xa aitsama mîsa. Nē mîdi ge ra ǂgomǃgâ kai da î da saorase ra mîhe mîde ǂgomǃgâ. Tae-i ǃaroma? Jehovab a “ǂhumî” ǁoa amaga. (Tit. 1:2) Nē mîdi ge ǂHaiǂhais 21:​5, 6 ǃnâ xoasa mîde ra ǁapoǁapo.

8. Jehovaba tae-e ra mî hîna ra ǁgau-e ǁîb mîmâidi nî ama īsa? (Jesajab 46:10)

⁸ Saorase hā re î da, “mû” ti hâ mîsa ǃhoaǃgao. (J.ǂHa. 21:5) Grike gowab mîs “mû” ti hâs ge ǂguiǃnāde ǂHaiǂhais ǂkhanis ǃnâ ra sîsenūhe. Nē ǁgâiǂuisens ge khomai-ao-e ra mîba, ī-i tae-i saorase ra mîhes ai ǃgaoǃgâ. Eloba tae-e saorase ra  mî? “Hoana da ra ǀasa kai,” Jehovab ge nē ǀkharaǀkharana hānîǁaeb ǃnâ nî dī. Xaweb nē mîmâide nî ama dīǀoaǀoasab ra ǂgomǃgâ amagab ge, ǀnaib ge nē ǀkharaǀkharana a dī khami ra mî.—Khomai re Jesajab 64:10 sa.

9. (a) ‘Hoana ta ra ǀasa kai’ ti hâ mîde tae-e ǃoa ra ǁnaeǁgau? (b) Tae-e nēsi hâ ‘ǀhomgu’ tsî ‘ǃhūbaib’ ǀkha nî ī?

⁹ ǂHaiǂhais 21: 5 ǃnâ hâ mîdi ‘hoana ta ra ǀasa kai’ ti hâte ta ge saorase nî ǃhoaǃgao. Nēsa tae-e ra ǂâibasen? Nē Elobmîs danaǃâs ge ǀgam xūn Jehovab ra dīn xa ra ǃhoa ǀkharaǀkharas tsî ǀasaǀasas. ǂGurose, Jehovaba tae-e nî ǀkharaǀkhara? ǂHaiǂhais 21:1 ǃnâ da ge ra khomai: “ǂGuro ǀhommi tsî ǂguro ǃhūbaiab ge go ǃgû-ī.” “ǂGuro ǀhommi” ge ǂgīǂgōsi ǂgaeǂguis hîna ǁGâuab tsî ǁîb demongu xa ra ǂgaeǂguihena ǃoa ra ǁnaeǁgau. (Mat. 4:​8, 9; 1Jhn. 5:19) Elobmîs ǃnâ i ra sîsenūhe khami i ge “ǃhūbaib” ti hâ mîsa, ǃhūbaib ǃnâ ǁan hâ khoena ǃoa ra ǁnaeǁgau. (Gen. 11:1; Psa. 96:1) ǁNā-amaga i ge “ǂguro ǃhūbaib” ti i ra mîhe o, nētsē ûihâ eloxoresa khoena ǃoa ra ǁnaeǁgau. Jehovab ge nēsi hâ “ǀhommi” tsî “ǃhūbaib” tsîna ǃgâiǃgâis ǀguisa di tide. Xaweb ge hoase hîkākā tsî nî ǀasaǀasa. Nēsi hâ ǀhommi tsî ǃhūbaib tsînab ge “ǀasa ǀhom-i tsî ǀasa ǃhūbaib” ǀkha nî ǃkhōǃkhuni. ǁNās ge ra ǂâibasen ǀasa ǂhanub nî ǂgaeǂgui tsoatsoasa ǂhanu-ai khoen ǂam-ai.

10. Jehovaba tae-e nî ǀasa kai?

¹⁰ ǂHaiǂhais 21:5 ǃnâb ge Jehovaba saoraseb nî ǀasaǀasa xūna ra mî. ǃGaoǃgâ re Jehovab ge mî tama hâ, ‘ǀasa xūn hoana’ ta ge ra kuru. Xaweb ge ge mî ‘hoana ta ra ǀasa kai’ ti. Mâ ǀgaugu ǃnâb Jehovaba hoa xūna nî ǀasa kai? (J.ǂHa. 21:5) Jehovab ge ǃhūbaib tsî khoen tsîna nî ǂgauǂgau în ǀoasasib kōse sī. Jesajab ge kēbo khamib ge Jehovaba hoa ǃhūbaiba îsase nî dī Edens ǃhanab khami. Mâ khoe-i hoa-i tsîn ge nî ǀasaǀasa-e. ǃHoran, ǂgīn, ǂganaǂgaehân tsî ǁōhân tsîn ge khâisa nî hō.—Jes. 25:8; 35:​1-7.

11. Jehovaba mâ mîmāsa Johanneba ge mā? Tsî tae-i ǃaroma?

¹¹ Tae-i tsînab ge Eloba ǁapoǁapo î da ǁî-i ǃnâ ǂgomǃgâsiba ūhâ? Jehovab ge Johanneba ge mîba: “Nē mîde xoamâi re, ǁîdi a ama tsî ǂgomǂgomsa xuige.” (J.ǂHa. 21:5) Jehovab ge “xoa” ti hâ mîmâis ǂam-ai ǃnāsa-e ge dī, ǃaromas tsînab ge ge mā. Mîb ge ge ǁîdi a “ama tsî ǂgomǂgomsa xuige.” ǃGôaǃgâ da ge ra Johanneb ge “xoa” ti hâ mîmāsa a ǁnâuǀnam ǃkhais ǃaroma. Nēs xa ǃaroma-e hâse da ge Elob di mîmâis paradais xa hâsa khomai tsî hānî ǀkhaegu xa a ǂâiǃgâ ǁkhā.

12. Jehovaba tae-i ǃaroma “dītoahego” ti ge mî?

¹² Elob ge saorase ge mî: “Dītoahe go!” (J.ǂHa. 21:6) Nē xoas ǃnâb ge Jehovaba nē xūn hoana ǀnai dīǀoaǀoahe hâ khami ra mî. ǁÎb ge nēti i ǀgaub ǃnâ a ǃhoa ǁkhā, xū-i ǁîba a ǁkhae ǁoa amaga îb ǁîb ǂâisa dīǀoaǀoa. Jehovab ge ǀkhara xū-i hîna ǁÎb mîmâisa ra ǁapoǁapo-e ge mî. Tae-eb ge mî?

13. Jehovaba tae-i ǃaroma “tita ge Alfata tsî Omegata tsoatsoata tsî ǀunita” ti ge mî?

¹³ ǀNai da go ǃhoaǃgao hâ i khamib ge Jehovaba aitsama, ǃnona ǃnāde ǁhapos  ǃnâ Johanneb ǀkha ge ǃhoa. (J.ǂHa. 1:8; 21:​5, 6; 22:13) Mâ ǃnās hoas aib ge Jehovaba “tita ge Alfata tsî Omegata” ti ge mî. Grikeǁî xoa ǀgaub ge Alfa ti hâ mîs ǀkha tsoatsoa tsî Omega ti hâ mîs ǀkha ra ǀam. “Tita ge Alfata tsî Omegata” ti hâ mîs ǃnâ-ūb ge, Jehovaba ra huida î da ǁnâuǃā, xū-eb ga tsoatsoa ob nî dītoasa.

14. (a) Aiǁgau-e mā re mâǁaeb Jehovaba ‘Alfa tsî Omega’ ti nî mîsa? (b) Genesis 2:​1-3 ǃnâ hâ mîde mâ ǂgomǃgâsiba ra māda?

¹⁴ Jehovab ge Adammi tsî Eva hârab ge kuru toas khaoǃgâ. ǁÎb ǂâibasens khoesib tsî ǃhūbaib ǀkhab ūhâsa ǁîra ge mîba. Elobmîs ge ra mî: “Tsîb ge Eloba ǁîra ǀkhae tsî ge mî: ‘Ôananôagu, î ǃgôab ǃnâ ǂguiǂguisen, î ǃhūbaiba ǀoaǀoa, î ǁîb ǂama gaosîsen.’” (Gen. 1:28) “Tita ge tsoatsoata,” ǁnāpab ge ǁÎb ǂâibasensa ge ǁguiǃā. ǁAeb ge nî hā ǀoasa ǁnâuǀnamxa surib, Adammi tsî Evasa xu ra hāb ǃhūbaiba paradais ǃnâ nî ǀkharaǀkharasa. ǁNā ǁaeb ai i ge Jehovab tita ge “Omegata” ti ra mî khami nî ī. “ǀHommi tsî ǃhūbaib tsîkhab” ge ǂnubi toas khaoǃgâb ge Jehovaba xū-e ge mî, hîna ra ǁgau-e ǁîb ǂâibasens nî ama dīǀoaǀoahesa. Nēs ge Genesis 2:​1-3 ǃnâ ra hōhe. (Khomai re.) Jehovab ge hûǁî tsēsa ǁîb ǃaroma ǃanu tsēs ase ge ǁhûiǂui. Nēsa tae-e ra ǂâibasen? Jehovab ge ge ǁapoǁapo khoesib tsî ǃhūbaib ǃaromab ūhâ ǂâibasensab nî dīǀoaǀoasa. Nēs ge hoase nî dīǀoaǀoahe hû tsēdi ǀams ai.

15. Tae-i ǃaromab ge ǁGâuaba ǀnîsi gere ǂâi Jehovabab nî ǁkhaesa îb ta ǁîb mâmâisa dīǀoaǀoa?

¹⁵ Adammi tsî Eva hâra ge ǁnâuǀnamoǃnâs khaoǃgâb ge ǁōb tsî ǁoreb tsîna ǁîra  surib ǃnâ ge khoraǂuisen. (Rom. 5:12) Nēs ǀkha i ge a mûsen ǁkhā ǀoasa kurusa ūhâ khoen, hîna Jehovaba nî ǁnâuǀnaman ǃhūbaiba nî ǀoaǀoa ǃkhaisa. Īǁkhā-e ǁGâuab Jehovaba nî ǁkhaesa îb ǁÎb ǂâisa dīǀoaǀoa? ǁGâuab ge ǀnîsi gere ǂâi Jehovab ǁîb mîmâisa ǃkhōǀgara tide ti. ǀNîsib ge gere ǂâi Jehovab Adammi tsî Eva hâra nî ǃgam ti. Xaweb ga ǁnāsa dī hâ ob ge ǁGâuaba ǂhûmi-aob a di ga ǂgari-am bi hâ. Tae-i ǃaroma? Genesis 11:18 ǃnâb ge Jehovaba Adammi tsî Evas tsîna ge mîba, ǁîra surib ǃhūbaiba nî ǀoaǀoasa.

16. ǁGâuaba tae-i ǃaroma Jehovab mîmâide dīǀoaǀoa tama hâ ti ge ǂgari-am?

¹⁶ Mâ mîǁgui-i tsînab ge ǁGâuaba ǀnîsi ǂâis ǃnâ ūhâ i? ǀNîsib ge ǁGâuaba ge ǂâihâ i Jehovab, Adammi tsî Eva hâra nî mā-amsa î ra ǀoasa kurusa ūhâ tama suriba hō. Hîna tātsēs tsîna ǀoasasiba sīǃnâ tidena. (Aoǁn. 7:20; Rom. 3:23) Ti i ga ī hâ o, ob ge ǁGâuaba Jehovaba mîs di dī-ao tamab hâ ti ga ǂgari-am hâ. Tae-i ǃaroma? Nēs Elob ǂâibasens ǃhūbaiba ǀoasa kurusa ūhâ surib Adammi tsî Evas tsîra dib ǀkha ǀoaǀoasa dīǀoaǀoa tama hâ amaga.

17. Jehovaba mati Edeni ǃhanab ǃnâ ge ī xū-e ge sîsenǂam? Tsî ǀamǂoasa mati nî ī? (Ai-īsib mû re.)

¹⁷ ǂHûmi-ao tamab hâsa ǁgaus xab ge Jehovaba Adammi tsî Eva hâra ge mā-am î ra ǀgôana hō. Nē ǀgaub ǃnâ i ge Jehovab mîsa ge ama kai tsîb ǁîba ǂhûmi-ao tama hâsa. (Psa. 92:5) Tsîb ge Jehovaba ge ǁgau xū-e dīsab ga mîmâi, o i xū-i xare-e ǁkhaebi tidesa. ǁÎb ǂâibasensab ge ge ǃkhōǀgara. Tsîb ge ǁnâuǀnamxa “surib” Adammi tsî Eva hâra tiba nî sâu, suriba ge mā. Nē surib ge ǁîb ûiba xoremarib ase ni mā, îb khoena sâu. (Gen. 3:15; 22:18) ǁGâuab ge nēsa ge ǃâubasen tama hâ i. Tae-i ǃaroma? Nē xoremarib ǀnammi ai a ǃgaoǃgaosa amaga. (Mat. 20:28; Jhn. 3:16) ǁGâuab ge nē ǀgauba ūhâ tama hâ, ǁîb xa ǀguib ge ra ǂâi. Xoremarib xa ǃaroma-e hâse i tae-e a īǁkhā? Xristub ǂgaeǂguis ǀoadisi kurigu ǀams dis ai i ge, ǁnâuǀnamxa surib Adammi tsî Evas tsîn diba paradais ǃhūbaiba nî ǀumi. Jehovab ge tsoatsoas ǃnâ mîmâi hâ-i khami. ǁNā ǁaeb aib ge Jehovaba “Omega” ti nî mî.

18. Eloba mâ ǃnona ǂgomǃgâsiga ra māda? (“ ǃNona ǃaromadi Jehovab mîmâisa ǂgomǃgâs tidi” ti hâ boksisa mû re.)

¹⁸ Nē ǁkhāǁkhāǃâs ǃnâ da go ǃhoaǃgao xūna ǂâis ǃnâ ūhâse. Mati da khoena a ǂgomǃgâ kai ǁkhā nē xūn nî ama īsa? ǂGurose, Jehovab ge aitsama nē mîmâisa ge dī. ǂHaiǂhais di ǂkhanis ge ra mî: “Tsîb ge trons ai ǂnôaba ge mî: Mû, hoana ta ra ǀasa kai!” ǁÎb ge gā-aisib, ǀgaib tsî turab tsîna ūhâ ǁîb mîmâisa ama kaisa. ǀGamǁîse, Jehovab ge ǁîb mîmâis ǃnâ ǂgomǃgâsiba ūhâ tsî i ge ǁîb mûǁae ǀnai i dīǀoaǀoasa khami ī. ǁNā-amagab ge ra mî: “ǁÎb mîdi ama tsî ǂgomǂgomsa . . tsî dītoahe hâsa.” ǃNonaǁîse, xū-i ge Jehovaba a ǁkhae ǁoa tsoatsoab hâ xū-e dītoasa. ǁNā-amagab ge mî ǁkhā: “Tita ge Alfata tsî Omegata, tsoatsoa tsî ǀunita.” Jehovab ge nî ǁgau ǁGâuab a ǂhûmi-ao ǃkhaisa. Tsîb Jehovaba ǁkhae hō tidesa ǁîb ǂâisa dīǀoaǀoasa.

19. Khoen ga Elob mîmâis paradais dis ǃnâ ǂgom tama io tae-e du a dī ǁkhā?

¹⁹ Mâǁaeb hoab hîna da Jehovab mîmâi hâ xū-e, khoe-i ǀkha ra ǀgoragub ge sida ǂgomǃgâsiba ra ǀgaiǀgai. Saora ǃnās ai du ga ǂHaiǂhais 21:4 ǃnâ hâ mîde, khoe-i ǀkha ǀgoragu tsî i ga khoe-e “nēs ge kaise a buruburuxa, ǂgom tama ta ge hâ ama ī-i nîsa” ti a mî o. Tae-e du a dī ǁkhā? Tae-i ǃaroma du koro tsî ǃnaniǁî ǁaraǃāde khomai tama hâ? Khoe-e ǁgau re Jehovaba mati ra ǂgomǃgâ kai dasa.—Jesajab 65:16.