1. Tae-e da ge kurib ǀhaos 2023 ǃnâ ge hâ is tawa ǁkhāǁkhāsen?

 KURIB ǀhaos 2023 ǃnâ ge hâ-is a tawa da ge sida ǂgoms xa hâ ǀasa ǂâiǀgauga ge ǁnâu. Tsî i ge ge ǂanǂanhe ǀkharaǀkharan sida aoǁnâ sîsenni ǃnâ nî hâsa. Aiǁgauses tsîna da ge ge ǁkhāǁkhāsen ǀnî khoen ǃēsa nî ūhâsa în Jehovab ǀkhāb ai mâ, Babilons di hîkākās khaoǃgâ. ǁNāpas tsîna i ge ge ǂanǂanhe Novemberi 2023 sa xūn aoǁnâ-aona, aoǁnâ sîsenni ǃnân go dī xūn hoan ǃnuriba māǂgā tidesa. Nēsa ra ǂâibasen sida aoǁnâ sîsenni ǁnātikōse ǁgariǁgarisa tamasa? Tātsēs tsîna.

2. Tae-i ǃaroma i sida aoǁnâ sîsen-e ra ǁgariǁgarisa ǁaeb ra ī khami? (Markub 13:10)

² Tsēdi ra ǃkharu khami i ge sida aoǁnâ sîsen-e kaise ra ǁgariǁgarisa. Tae-i ǃaroma? ǁAeb da mâ toa amaga. Jesub ge ǀuniga tsēdi ǃnâ i aoǁnâ sîsen-e nî ī ǀgaub xa mî xū-e ǃgaoǃgâ re. (Khomai re Markub 13:10 sa.) Mateub di ǃnaeǃkhais ǃoagub ge Jesuba ge mî, ǃgâiǂhôas ǃhūbaib ǂhabase nî aoǁnâhesa “ǀams nî” hās aiǃâ. (Mat. 24:14) Nēs ge ǁGâuab di eloxoresa ǃhūbaib hîkākāhes xa ra ǃhoa. Jehovab ge “tsēs tamas ka io īri” ǁnā xū-i nî īs diba ǂan. (Mat. 24:36; 25:13; ǃNǃkh. 1:7) Mâ tsēs hoas ǃkharuras ge ǁnā tsēsa ǃoa ra ǀgūǀgū da. (Rom. 13:11) ǁNā-amaga  da ge ǀams nî hās kōse nî aoǁnâ ǀgara.

3. Tae-e ra ǂkhâǃnâ da i da aoǁnâ?

³ Sida aoǁnâ sîsenni xa da ra ǂâiǃgâ khami da ge sao ra dîsa ǂâis ǃnâ nî ūhâ. Tae-i ǃaroma da ǃgâiǂhôasa ra aoǁnâ? ǀNammi ge ra ǂkhâǃnâ da i da aoǁnâ. Aoǁnâ sîsenni ǃnâ da ra dī xūn ge sida ǀnamma ra ǁgau. ǁNās ge ǃgâiǂhôasa da ūba hâ ǀnammi, khoen tsî hoan ǂam-ai Jehovaba da ūba hâ ǀnammi tsîna ǃkhōǂgā hâ. Hā re i da nēna saogu rase ǃhoaǃgao.

AOǁNÂ SÎSEN-E DA A ǀNAM AMAGA DA GE RA AOǁNÂ

4. ǃGâiǂhôa-e da ga ǁnâu, o da mati ra tanisen?

⁴ ǃGâiǂhôa-e du ge ǁnâu o du ge tsâ ǀgaub xa du ǂâi-oa ǁkhā? ǀNîsi i ge babakiro-e ge ǃnae sadu omaris ǃnâ tamas ka io du ge ǂhâ du ge hâ i sîsen-e ge hō. ǁNā ǂhôa-e du ge ǁnâu o du ge ǀnîsi kaise gere ǃgâiaǂgao naun ǀkha ǁî-e ǀgoragusa. ǃGâiǂhôas Elob Gaosib xa hâsa du ge ǁnâu os tsîna du ge ti gere tsâ?

5. Mati du gere tsâ ǂguroǃnās ase du ge amaba Elobmîsa xu ǁkhāǁkhāsen o? (Ai-īsiga mû re.)

⁵ ǂÂi-oa re mati du gere tsâsa ǂguroǃnās ase du ge amaba Elobmîsa xu ǁkhāǁkhāsen o? ǁKhāǁkhāsen du ge ge sadu ǀhomsi ǁGûb a ǀnam du ǃkhaisa tsîb da ǂhâbasa i du ǁîb omaris di ǃâ kai. Tsîb ge ra mîmâi tsûbab nî ǀamǀam tsî hoa ǃgomsina nî ūbesa. Tsî da ge ǃâubasen ǁkhā sada ǁō ge ǀnamsaben ǁkhāba nî ûisa ǀasa ǃhūbaib ǃnâ. (Mrk. 10:​29, 30; Jhn. 5:​28, 29; Rom. 8:​38, 39; J.ǂHa. 21:​3, 4) Nē amab hîna du ge ǁkhāǁkhāsen nî ge kaise ge ǃgâiaǂgao kai du. (Luk. 24:32) ǁKhāǁkhāsen du ge xūna du ge ge ǀnam tsî mâ khoe-i hoa-e gere ǁgamba ǂgao. ǀGopeǀnō re Jeremiab 20:9 sa.

6. Tae-e du Ernesti tsî Rose hâra di aiǁgausa xu ra ǁkhāǁkhāsen?

⁶ Sao ra aiǁgausa ǃgaoǃgâ re, ǃgâsab  Ernest b ti ǀon hâb ge ge disi kurixa i ǁîb dadasab ge ǁō o. Ernesti ge ra mî: “ǂÂi ta ge gere: ǀhomma ǃoab ge ī? Tamas ka io ǀamosib kōseb nî ǁō ǀgara? Suri ta ge gere ǀkhara ǀgôan hîna dadasaga ūhâna.” Ernesti ge ǁaeba xu ǁaeb ǀkha ǀhōbadi ǂgās ǀkha ǃgû tsî ǁîb dadasab ǀhōbas tawa ǃhonǁgoa tsî gere ǀgore: “Toxoba Elotse ǂan ǂgao ta ge ra ti dadab mâpa hâsa.” Ernesti ge 17 kuriga dadasab ǁōb khaoǃgâ Elobmîs ǁkhāǁkhāsensa māsenxase ge ūǃoa. ǁÎb ge ge ǂkhî i ǁkhāǁkhāsen nî ge o ǁōhâ khoe-i xū-i xare-e ǀūsa, ǃgamse ǁom hâ khoe-i khami. Tsîs Elobmîsa hānîǁaeb ǃnâ khâisa ra mîmâisa. (Aoǁn. 9:​5, 10; ǃNǃkh. 24:15) ǀAms aib ge ǂgui kurinab gere ǂan ǂgao dîdi di ǃereamde ge hō. Ernesti ge kaise gere mûǂûi Elobmîs amab hînab gere ǁkhāǁkhāsen nî xa. ǁÎb taras Rose tsîn ge ǁîb Elobmîs ǁkhāǁkhāsens ǃnâ gere ǁhao. Tsîs ge ǁîs tsîna ǁkhāǁkhāsens gere xūna ge ǀnam. ǁÎra ge 1978 ge ǁāǁnâhe. Ôasase ra ge ǁîra omaris, ǀhōsan tsî naun tsîna gere aoǁnâba ǁkhāǁkhāsen ra ge ǀō-aisa amab xa. Ernesti tsî Rose hâra ge 70 xa ǃnāsa khoena ge hui in Jehovaba ǂan tsî ǁāǁnâ kaisen.

7. Tae-e ra ī Elobmîsa da ūba hâ ǀnammi ga sida ǂgaogu ǃnâ ǃnomaǃkhō o? (Lukab 6:45)

⁷ Elobmîs ǃnâ da ra ǁkhāǁkhāsen xūna da ga ǀnam, o da ge mâ khoe-i hoa-i ǀkha ra ǀgoragu ǂgao. (Khomai re Lukab 6:45 sa.) ǂGurokham ǁaeb ǁkhāǁkhāsaben Jesub din ge mî khami da ge ra tsâ: “Tātsē khom ge sikhoma sikhom ge mû tsî ǁnâu ǃgâina khoena ǃhoabaǀû ǁoa.” (ǃNǃkh. 4:20) ǁNātikōse da ge amaba a ǀnam tsî da ge ǀguis xa ǃnāsa khoen ǀkhā nē Elobmîs amaba ra ǀgoragu ǂgao.

KHOENA DA A ǀNAM AMAGA DA GE RA AOǁNÂ

8. Tae-e ra ǂkhâǃnâ da i da naun ǀkha ǃgâiǂhôasa ǀgoragu? (Boksisa mû re “ Khoena ǀnam—tsî ǁkhāǁkhāsabedī.”) (Ai-īsiba mû re.)

⁸ Jehovab tsî ǁîb ǀGôab khami da ge khoena ǀnam. (ǂKhm. 8:31; Jhn. 3:16) ǁNā khoen “ǃâubasenoǃnâ” tsî “Elob ose” ûihâna da ge kaise ra ǀkhom. (Efe. 2:12) ǁÎn ǃgomsin xa ǃaroma-e hâsen ge ǃgam ās ǃnân hâ khami a tsâ ǁkhā. Xawe da ge sida ǁîna tsurib ǀkha ra ǂgaeǂûi ǁnā āsa xu. Nēsa da ge Gaosib ǃgâiǂhôasa aoǁnâs ǃnâ-ū ra dī. ǁÎna da ǀnam tsî ra tsâba amaga da ge ra ǁgûtsâ ǃgâiǂhôasa ǁîn ǀkha ǀgoragusa. Nēs xan ga ǁnâu, o i ge ǃâubasensa mā nî tsî nî hui nî în nēsi  ûib ǃnâ ǃgâiaǂgao. ǁNās tsîn ge ǁîna ǃēsa nî mā în Elob di ǀasa ǃhūbaib ǃnâ ǀamosib kōse “ama ûiba” ūhâ ǁkhā.—1Tim. 6:19.

9. Mâ ǃkhâikhomsa da hānîǁaeb ǃaroma ra mā tsî tae-i ǃaroma? (Esegieli 33:​7,8)

⁹ Khoena da ūba hâ ǀnammi ge ra ǂkhâǃnâ da i da ǁîna ǃkhâikhom eloxoresa ǃhūbaib di hîkākās xa. (Khomai re Esegieli 33:​7, 8 sa.) Sida ǁanǁare-aon tsî omaris ǁanin Jehovaba ǃoaba tama hân tsîna da ge ra ǀkhom. ǂGui khoen ge hānî kai tsēs xan a ǀūse ra ûi. ǁNāb ge “kaise kai ǂōǂōsib, tātsēs tsîna ge ǃhūbaib ǃnâ ī tama hâ i tsî ǁkhāti ǁkhawa mûhe tideba”. (Mat. 24:21) ǁÎna da ge tae-i ǀgoraǃgâs ǁaeb ai nî īsa ra mîba ǂgao. ǂGurose i ge Babilons kaisa nî hîkākāhe. Tsî ǁnāpaxu hoaraga eloxoresa ǃhūbaib tsîna Armagedons tawa. (J.ǂHa. 16:​14, 16; 17:​16, 17; 19:​11, 19, 20) ǀGore da ge ra in ǃnāsa khoena mîba nî da ra xūna ǃgâ tsî nēsi sida ǀkha Jehovaba ǀguiba ǃoaba. Tae-e ǁnân sida ǃkhâikhomsa ǃgâ taman ǀkha nî hā, sida omaris ǁanina ǃkhōǂgāhâse?

10. Tae-i ǃaroma i ǂhâǂhâsa khoena mîbasa ǀgūǁae-i tae-e nî īsa?

¹⁰ ǃKharugo ǁkhāǁkhāǃâs ǃnâ da go ǃhoaǃgao khami, Jehovab ǂâis ge în ǁnān ǁîb ǃnâ ǂgomsa ra ǁgau tsoatsoana sâuhe, Babilons kais di hîkākāhesan ra mû ǁaeb ai. ǁNās ǀkha i ge kaise a ǂhâǂhâsa i da nēsi ǁîna nē ǃkhâikhoms xa mîba. Nēs xa ǂâiǃgâ re, nēsi da ǁîna ra mîba xūn ge ǂâi-oan nî xū-e ra mā nî. (ǀGopeǀnō re Esegieli 33:33 sa.) Īǁkhā i ge a nē ǃkhâikhoms sida xun ge ǁnâus xan ǂâiǃgâ tsîn nî ǂkhâǃnâhesa, Jehovaba sida ǀkha ǀguiba ǃoabasa ǃonkhaon nîs aiǃâ. Filipis ǃnâ ge ǃkhōsis ǃnâ ǂnôa-i khoeb hîna ge “ǁkhōǁkhōsa ǃhūǂgubi-i” khaoǃgâ Jehovaba ǃoaba tsoatsoab, khamin ge ǀnîna ǀnîsi Babilons kais di hîkākāhesan ga mûǂan, o Jehovaba nî ǃoaba tsoatsoa.—ǃNǃkh. 16:​25-34.

JEHOVAB TSÎ ǁÎB ǀONS TSÎNA DA A ǀNAM AMAGA DA GE RA AOǁNÂ

11. Mati da Jehovaba ǂkhaisib, ǃgôasib tsî ǀgaib tsîna ra mā? (ǂHaiǂhais 4:11) (Ai-īsiga mû re.)

¹¹ Hoan xa ǂhâǂhâsa ǃaromas ǃgâiǂhôasa da ra aoǁnâbas ge Jehovab tsî ǁîb ǃanu ǀonsa da a ǀnam amaga. Sida aoǁnâ sîsen-e da ge Jehovaba da ra ǃoaba ǀgaub ase ra mû ǁîba da a ǀnam amaga. (Khomai re ǂHaiǂhais 4:11 sa.) ǂGaoba xu ǃkhō-am tsî da ge ra mî: Sida ǃKhū tsî Elotse, Sats ge anu ǂkhaisib, ǃgôasib  tsî ǀgaib tsîna ǃkhōǃoasa. Naun ǀkha da ga Jehovab ge “hoaraga xūna kuru” tsî ûiba mādas xa ǀgoragu, o da ge ǁîba ǂkhaisib tsî ǃgôasib tsîna ra ǁgau. Jehovaba da ge sida ǀgaiba ra mā, sida ǁaeb, ǁkhāsib tsî ū da hâ xūna da ga aoǁnâ sîsenni ǃnâ ǀoasase sîsenū o. (Mat. 6:33; Luk. 13:24; Kol. 3:23) Jehovaba da a ǀnam amaga da ge ǁîb xa ra ǃhoa. ǂKhâǃnâhe da ge ra nauna Jehovab ǀons xa mîbasa tsî tae-es da ǂâibasens tsîna. Tae-i ǃaroma?

12. Mati da sida aoǁnâ sîsenni ǃnâ Jehovab ǀonsa ra ǃanuǃanu?

¹² Jehovaba da ūba hâ ǀnammi ge ra ǂkhâǃnâ da i da ǁîb ǀonsa ǃanuǃanu. (Mat. 6:9) ǁNās ǀkha da ge nauna ǁGâuab ge Jehovab xa mî ama tama ǂhûmi ǂhôana ra mî-unuba ǂgao. (Gen. 3:​1-5; Job. 2:4; Jhn. 8:44) Aoǁnâ sîsen-e da ga dī, o da ge ǁkhoaǂgaose ǁnān hîna ra ǃgâna amaba sida Elob Jehovab xa ra mîba. Hoa khoen Jehovab di mâǂoa ra ǀnammi xa nî ǂansa da ge ra ǂhâba. Tsîb ǁîba ǂhauǃnâsib tsî ǂhanu-aisib tsîn ǃna ra ǂgaeǂguisa. Tsîb ǁîb Gaosiba ǀgūǁae hoa ǃgomsina nî ǀam kai tsî ǂkhîb tsî ǃgâiaǂgaob tsîna khoesiba nî māsa. (Psa. 37:​10, 11, 29; 1Jhn. 4:8) Jehovab ǃgâi ǀonsa da ga sida aoǁnâ sîsenni ǃnâ ǁkhauba, o da ge ǁîb ǀonsa ra ǃanuǃanu. Kaise da ge ra ǃgâiaǂgao Jehovab di ǃoaba-aon ase da nî dī xūna da ra dī amaga. Tae-i ǃaroma da ti ra mî?

13. Jehovab di ǃoaba-aon ase ǂanhesa da tae-i ǃaroma ra ǃgôaǃgâ? (Jesajab 43:​10-12)

¹³ Jehovab ge ge ǁhûida i da ǁîb di ǀhûǀguitimî-ao kai. (Khomai re Jesajab 43:​10-12 sa.) ǂGui kuriga ǃkharu tsîs ge ǂGaeǂguira sorosa sao rase sîǂkhanis ǃnâ  ge mî: “Kai aiǂhanub hoada ūhâ ǁkhāb ge Jehovab di ǃoaba-aon ase ǂgaihesa.” c Tae-i ǃaroma? Sao ra aiǁgausa ǃgaoǃgâ re, sadu ǃoagub ga ǁhōba ǁkhopa-am-e o du ge khoe-i hîna a ǂhauǃnâ-e sadu di ǃkhō-am-ao-i ase nî ǁhûi. Nē khoe-i ge ǃgâi ǀonsa dībasen hâ tsî i ge ǁî-i ra mî xu-e a ǂgomǃgâhe ǁkhā. ǁÎb di ǀhûǀguitimî-aon ase ǁhûidas ǃnâ-ūb ge Jehovaba ra ǁgau, sidab ǃgâise a ǂansa tsîb ra ǂgomǃgâ dasa amaba da ǁîb xa nî mîsa. Kai aiǂhanub ase da ge ǁîb ǃoaba-aose ǂanhesa ra ǃgôaǃgâ tsî ǁnās ǀkha mâǃēs hoasa sîsenū tsî ǁîb ǀonsa ra ǂanǂan. Tsî ra ǁgau ǁîb xa ge mîhe ǂhûmi xūn ama tamasa. Nēsa dīs ǃnâ-ū da ge ra ǁgau amabes ǃnâ da ǁîb di ǀhûǀguitimî-aosa.—Psa. 83:18; Rom. 10:​13-15.

ǀAMS KŌSE DA GE NÎ AOǁNÂ

14. Tae-e ǀgūǁae nî ī?

¹⁴ Hānîǁaeb ǃnâ nî ī xūna ǃoa da ge ra mûǂûi. Jehovab di mâxōǀkhās ǀkha da ge ra ǃâubasen matin ǂguina amaba kai ǁgâiǀāb aiǃâ nî ūǃoasa. Kaises tsîna da ge ra ǂkhî matin ǂguina ǁGâuab ǃhūbaiba xu ǂoaxa tsî Jehovaba nî ǃoabasa.—ǃNǃkh. 13:48.

15-16. Tae-e da nî dī ǀgara tsî mâǁaeb kōse?

¹⁵ Nēsi da ge dī da nî sîsen-e ūhâ. Kai aiǂhanub ge ǃgâiǂhôasa ǃhūbaib ǂhabase aoǁnâsa. Xawe da ge ǁkhā ǁaeb ai aiǃgû tsî khoena nî mîba ǀgūǁae-i tae-e nî īsa. Khoen ge nî ǁnâu nē eloxoresa ǃhūbaib di ǀams ǀgūǁae nî hāsa. ǁNā ǀgoraǃgâs ǁaeb ga hā, on ge nî ǂanǃgâ sida go ro aoǁnâ haisi-ams Jehova Eloba xu ra hāsa.—Ese. 38:23.

¹⁶ Tae-e da nēsi nî mîǁgui dīsa? ǀNammi ge ra ǂkhâǃnâ da ǃgâiǂhôasa aoǁnâsa tsî hoan ǂam-ai Jehovab tsî ǁîb ǃanu ǀonsa ǀnamsa. Aoǁnâ ǀgara da ge nî māsenxasib, ǁgariǁgarisasib tsî ǁkhoaǂgaosib tsîn ǀkha Jehovab “ǂâu-i ge go” ti nî mîs kōse.