1-2. ǀNîna mati dî-amgus xa ra tsâ?

 DÎ-AMGUS ǁaeb ǃnâts ge, ǁkhoaxa ǁaeb tsî ǃgâiaǂgaob tsîna a ūhâ ǁkhā. Nēsi ro ga dî-amgu, o ro ge ra ǂhâba î ro ǃgâi ǁaeba ūhâ tsîn xūna nî ǂhanuse ǃgûsa. Ama as ge nēb ge ǂgui dî-amgu ra khoen ǃaroma a ǁkhoaxa ǁae. Tsion, a ti ǀon hâ ǃgâsas Etopiab ǃnâ ǁan hâs ge ra mî: “Tita tsî ti aob tsîn gere dî-amgu om ge ǂhâǂhâsa xūn xa ǁgam tsî âis tsîna gere dī. ǂKhîta ge ge mûǂan ta ge o, kaise ta a ǀnam khoeba ta ge ǀhao ū o. Tsîb ǁîb tsîna a ǀnamte ǃkhaisa.”

² Alesio ti ǀon hâ ǃgâsab, Nederlands ǃnâ ǁan hâb ge ra mî: “Kaise i ge ge ǁkhoaxa i ti kaikhoesa ǃgâise ǂansa. Xawen ge ǃgomsin tsîna ge hâ i.” Nē ǁkhāǁkhāǃâs ǃnâ da ge ǀnî ǃgomsin hîna a hâ ǁkhān tsî ǀnî Elobmîs daoǁgaudi dî-amgu ra khoen a sîsenū ǁkhāte nî ǃhoaǃgao în ǃgâi mîǁguiga dī. Tsî naun ǀhaohâb ǃnâ hân dî-amgu ra khoera a hui ǁkha ǀgaub tsîna ni ǃhoaǃgao.

DÎ-AMGUS DI ǂÂIBASENS

3. Dî-amgusa tae-e ra ǂâibasen? (ǂKhoamîdi 20:25)

³ Dî-amgus ge a ǁkhoaxa ǁkhā, ǃgammeb ǃnâ ī a ǀam ǁkhā ǃkhais ǃgao. ǁÎra ǃgammeb tsēs ai ra ge Jehovab ǃoa-ai ra mîmâi ǀnamgu tsîra nî ǃgôagu ǃkhaisa, ǁîra ǁōb tsēs kōse. Jehovab ǃoa-ai da mîǁgui-e nî dīs aiǃâ da ge nē ǁkhōba ǃgâise nî ǂâiǃgâ. (Khomai re ǂKhoamîdi 20:25 sa.) ǁNās ge ǁkhāti a ama, ǃgammeb mîǁguiba ra ga dī o. Dî-amgus ǁaeb ǃnâ ra ge khoera ǃgâise ǂangu tsî ǃgâi mîǁguiba ra dī. ǀNî ǁaegu ai ra ge ra mîǁgui îra ǃgamme tamas  ka io ra ge ra mîǁgui îra dî-amgusa ǀamǀam. Mîǁgui ra ga îra dî-amgusa ǀamǀam, os ge ǁnāsa ǂâibasen tama tsū xū-e ra go dī ti. ǁNās ge ra ǂâibasen dî-amgus go ǁîs ǂâibasensa a dīǀoaǀoasa, nēs ge go hui îra ǃgâi mîǁguiba dī.

4. Tae-i ǃaroma da dî-amgus xa ǂhanu mûǂuiba nî ūhâ?

⁴ Kaise i ge a ǂhâǂhâsa, ǃgamme tama khoe-i ǂâis ǃnâ ni ūhâsa, ǀgam khoen ra dî-amgusa îra ǂanǂui ǃgamme ǂgao ra rasa. ǁNās ge ra ǂâibasen, ǃgammets tide tits a ǂan khoe-ets dî-am tide ǃkhaisa. ǃGamme tama khoen ǀguin ge nēti ī ǂhanu ǂâi ǀgauba ūhâ tide. Hoatsama da ge ǂhanu ǂâi ǀgauba dî-amgus xa nî ūhâ. Aiǁgaus ase ǀnîn ge ra ǂâi, khoera ga dî-amgu o ra nî ǃgammesa. Nē ǂâi ǀgauba ǃgamme tama Xristeǁîna mati ra tsâǀkhā? ǃGamme tama ǃgâsas Melisa ti ǀon hâs Amerikab ǃnâ ra hâs ge ra mî: “ǃGâsa ra ga dî-amgu on ge ǀnî ǃgâsana ǁîra ǁgâiba ra mā tsî ra ǃâubasen ira ǃgamme. Nēs xa ǃaromahe hâse ra ge hōgu tama ra ga ī xawe nē dî-amgusa ǀamǀam tama. ǀNî ǃgamme tama ǃgâsan ge dî-amgusa xu hoase ra ǂgōsen. ǁÎn ra hō ǁgâib ge a ǃaroma ǁkhā în ǂâiǂhansen.”

ǃGÂISE ǂANGUS

5-6. Dî-amgu ra khoena mâ xūna nî ǃhoaǃgao? (1 Petrub 3:4)

⁵ Dî-amgu ro ra ǁaeb ǃnâ i tae-e nî hui mîǁguisa, ǃgamme ro nîs tamas ka io ro ǃgamme tidesa? Kaise ǃgâise ǂangu re. Īǁkhā i ge a ǀnaits ge ǀnî xūrona ǂan isa ǁnā khoe-i xa dî-amgu ro nîs aiǃâ. Xawets ge nēsi ǃēsa ūhâ, îts ǁnā khoe-i ‘îsasib ǂgaoba xu hâba’ ǂan. (Khomai re 1 Petrub 3:4 sa.) Dî-amgu ro ra ǁaeb ǃnâts ge ǁnā khoe-i Jehovab ǀkha ūhâ ǀhōsagusis, ûi ǀgaub tsî ǂâi ǀgaub xas tsîna ǃnāsase ra ǁkhāǁkhāsen. ǁAeb ra ǃkharu khamits ge ǁnā khoe-i xa saora dîde a ǃeream tsoatsoa ǁkhā: ‘Sîma ǀnamgu, tanigu tsî a kōǃgâ gu ǁkhā?’ (ǂKhm. 31:​26, 27, 30; Efe. 5:33; 1Tim. 5:8) ‘Sîma ǁaeba ra ǁamaǂui tsî hâ nî ǂhâsiga ra kōǃgâ? Supu-e ǁî-i di ǃnubusiga kō ǃkharusa?’ (Rom. 3:23) ǂÂis ǃnâ ūhâ re, ǂangu ro ra ǁaeb ai: Saro ǀgui xūn xa ǃgâibahes ge ǂhâbasa tama xawe mati ro saro ǃkhargagu ûiǀgauga ra sîsenǀhaos ge a ǂhâǂhâsa.

 ⁶ Tae-ets noxoba nau khoe-i xa a ǁkhāǁkhāsen ǁkhā? ǀGaisa ǀnamats nē khoe-e nî omkhâibas aiǃgâ î ge a ǂhâǂhâsa, îts ǀnî hâ xūn tsîna nē khoe-i ǀkha ǃhoaǃgao. Aiǁgaus ase, nau khoe-i ûib ǃnâ ra sīǃnâ ǂgao tsî ra mîǁguibasen xūn xa. Sā ǂurusib, marin ǃgomsin tamas ka io sa ûib ǃnâ ge ī xūn tsâǀkhātsi gen xas tsîna ǃhoaǃgao re. ǂHâbasa tama i ge hâ dî-amgu tsoatsoa ro ra ǁaeb ai, nē xūn hoan xa ǃhoasa. (ǀGopeǀnō re Johaneb 16:12 sa.) ǀNî xūn sa ûib ǃnâ ge īn xa hâ xūn di dîdets ga tsoatsoas ǃnâ ǃeream ǂgao tama io, o nau khoe-e mîba re. Xawe ǁaeb ra ī khami i ge a ǂhâǂhâsa ǁnā dîde ǃereamsa, î-i khoe-e ǂhanu mîǁguiba dī ǁnās ai ǃgaoǃgao hâse. Xawe ǁaeb ge nî hā îts nē xūn xa ǂhauǃnâse ǃhoa.

7. Dî-amgu ra khoera mati ǃgâise a ǂangu ǁkhā? (“ ǃNūseba xu dî-amgus.” ti hâ boksisa mû re.) (Ai-īsiga mû re.)

⁷ Matis nau khoe-e ǃamkuse a ǂan ǁkhā? ǀGui ǀgaub ge dîna dî tsî ǂōrisase ǃgâsa. Hoa ro ge tsâ ro ra ǀgaub xa ǂhauǃnâse ǃhoa tsî nî ǃeream. (ǂKhm. 20:5; Jak. 1:19) ǁNāsa dīs ǃaroma ro ge a mîǁgui ǁkhā, iro xūna ǀguiba dī saro ǁgamǀhaosa nî supusupu na. Aiǁgaus ase ǀguiba ǂû ǀhao, khoen hâ ǃkhain dawa ǃgû tsî xūna ǀguiba dī. ǀHōsan tsî ǀaokhoen tsîn ǀkha hâ ǀhaos ǃnâ-ū ro ge ǃgâise nî ǂangu. ǃAruǀî mîǁgui re îts xūna dī, ǁgau nî na mati i nau khoe-e ǃkharagagu mâsigu tsî ǃkharagagu khoen ǁaegu ra tanisen ǀgausa. Kō re taenab ge Aschwin ti ǀon hâ ǃgâsab Nederlands ǃnâ ra hâba a dītsâsa. Alisiasab gere dî-am ǁaeb xab ge nēti ra mî: “ǃNāsase ǂangus ǀkha nî hui xūnam ge ǀguiba gere dī. Aiǁgaus asem ge supu xūrona ǀguiba gere dī, ǂû sâis tamas ka io oms tawa nî dī-e xūna ai ǀguiba sîsen ǀhaos tsîna. ǁNā xūnam ra dī ǁaeb ǃnâm ge nau khoe-i di ǃgâi ǀgaugu tsî ǂkhabusasigu tsîna ge mû ǁkhā i.”

8. Dî-amgu ra khoera mati ǀguiba ǁkhāǁkhāsensa xu ǃgâiba a hō ǁkhā?

⁸ Elobmîs tsî Elobmîs ai ǃgaoǃgaosa ǂkhanina ǀguiba ǁkhāǁkhāsens ǃnâ-ū ro ge ǃgâise a ǂangu ǁkhā. ǃGamme ro ga ǁaeb ai ro ge omaris ǃoabas ǃaroma ǁaeba nî ǁamaǂui, îb Eloba saro ǃgammeb di ǂhâǂhâsa ǃâb ase ī. (Aoǁn. 4:12) ǁNā-amaga tae-i ǃaroma ro ǀnîsi ǁaeba ǁamaǂui tama hâ, iro ǀguiba ǁkhāǁkhāsen dî-amgu  ro ra ǁaeb ǃnâ? Ama as ge dî-amgu ra khoera ge nēsi omari tama tsîb ge ǃgâsaba noxoba dî-am-i ra ǃgâsas dana tama. Xawe ro ge hoaǁae ǀguiba ǁkhāǁkhāsens ǃnâ-ū, mati-i nau khoe-e Jehovab xa ra tsâsa a ǂanǂui ǁkhā. Maksi tsî Lisa tsîn ge ǃgamme hâ khoe-aogura Amerikab ǃnâ ra hâra. ǁÎra ge ǀnî hâ ǃgâiba ge ǀama dî-amgu ra gere o. ǁÎb ge saorase ra mî: “Dî-amgum gere ǁaeb di tsoatsoas ǃnâm ge, dî-amgus, ǃgammeb tsî omaris ûib xa hâ ǂkhanina ǀguiba gere ǁkhāǁkhāsen. ǁNā ǂkhanina xu ǁkhāǁkhāsens ge ge huimî îm ǂgui ǂhâǂhâsa xūn ǃgomse ga ǁgam tsoatsoahe hâna ǃhoaǃgao.”

ǂÂIǃGÂHE ǁKHĀ ǀKHARA XŪN

9. Dî-amgu ra khoera taena ǂâis ǃnâ nî ūhâ, ǁîra dî-amgus xa nau khoena mîbasa?

⁹ Ham-e ro nî mîba dî-amgu ro rasa? Saro ge ǁnāsa nî mîǁgui. Dî-amgus ǁaeb ǃnâ ro ge a mîǁgui ǁkhā ǀoro khoen ǀguina mîbasa. (ǂKhm. 17:27) Nēsa dīs ǃnâ-ū ro ge ǂhâbasa tama ǁgâib tsî ǂgui dîna xu ra ǂgōsen. Xawe ro ga khoe-e mîba tama ī, o ro ge ǀguriǀgurisen ǁkhā nau khoen nî ǂanǂuisa ǃaos xa ǃaromahe hâse. Nēs ge kaise nî ǁkhōǁkhōsa. ǁNā-amaga î ge nî gā-ai îts ǀnîna ǂanǂan, ǃgâi ǀapemās tsî huib tsîna nî mā tsi na. (ǂKhm. 15:22) Aiǁgaus asets ge mîǁgui ǁkhā, ǀnî ǀaokhoen, gagasise ǀgaisa ǀhōsan tamas ka io ǀhaohâb ǃûi-aoga mîbasa.

10. Dî-amgu ra khoera tae-e a dī ǁkhā î ra ǃâitsâga a ǃaroma ǁkhā ǃkhaina xu ǂgōsen? (ǂKhoamîdi 22:3)

¹⁰ Matits Jehovaba dî-amgus ǁaeb ǃnâ ǃgôasiba nî ǁgau? Tsâsigu ra ǀgai khamits ge nau khoe-i xa ǃnāsase nî ǂgae-e. Tae-e nî huitsi îts Jehovaba ǂkhîǂkhî tide xūna xu ǂgōsen? (1Kor. 6:18) ǀAiba ūhâ ǃhoa ǀgaub, ǀguri hâs tsî ā ǀhorosa xu ǂgōsen. (Efe. 5:3) Nē xūn ge sorosise ǁgoe-ūgus turaba ǀgaiǀgai ǁkhā tsî ǂhanu xūna dīsa ni ǃgom kai. Tae-i ǃaroma ro ǃnā korobe ǃhoaǃgao tama, tae-e ro nî dīsa Jehovaba ǃgôasiba ǁgausa dî-amgu ro ra ǁaeb ǃnâ? (Khomai re ǂKhoamîdi 22:3 sa.) ǃGaoǃgâ re tae-i ge Dawiti tsî Almas tsîna huisa, Etopiaba xu hâra. ǁÎra ge ra mî: “ǂGui khoen gere hâ ǃkhaib tawam ge gere hâ ǀhao tamas ka io ǂgui ǀhōsan ǁaegu. Tātsēm ge audos tamas ka io oms ǃnâ ǀguiba ǀguri ge hâ tama hâ i. ǁNās ǀkham ge ǃâitsâb ǃnâ nî ǂgā mî ǃkhaina xu gere ǂgōsen.”

11. Dî-amgu ra khoera mâ xūna ǂâis ǃnâ nî ūhâ ǀnamma ra ga ǁgaugu o?

¹¹ Dî-amgu ra khoera ǀnamma nî ǁgaugu? Saro ǀnammi ra ǀgai khami ro ge a mîmâi ǁkhā, i ro ǀnî ǃgâi ǀgaugu ǃnâ ǀnamma ǁgaugu. Xawe i ga saro ǁgoe-ugus turaga ǀgai, o i ge kaise ni ǃgom gā-ai mîǁguiga dīsa nau khoe-i xa. (ǀG.ǁna. 1:2; 2:6) ǀNamma ǁgaugus ge ǃkhō-oasensa ra ǃgom kai tsîts ge Jehovaba ra ǂkhîoǃnâ kai xūna a dī ǁkhā. (ǂKhm. 6:27) ǁNā-amaga ǀnai Jehovab daoǁgaudi tsî taena ro nî dīs tsî dī tides tsîna ǃhoaǃgao. b (1Tes. 4:​3-7) Saora xūna ro ge a dîsen ǁkhā: ‘Hâ ǃnâm ra ǃās, ǂkharis tsî ǃhūb khoen tsîna mati ǁgaum ra ǀnammi xa ra ǂâi? Nē tanisen ǀgauba sîm ǀgui-i di ǁgoe-ugus turaba a ǀgaiǀgai ǁkhā?’

12. Dî-amgu ra khoera ga ǁnâusāguna ūhâ, o ra tae-e nî dī?

¹² ǃGomsin tsî ǁnâusāgun tsînats mati a sîsenǂam ǁkhā ǀgaus. ǁAeba xu ǁaeb ǀkha  ro ga ǁnâusāgu, o i ra ǂâibasen ǃgâiba gu tama ro hâ ti? Hoaǁaes ose o. ǃGamme hâ khoen ge ǀnî ǁaegu ai ra ǁnâusāgu. ǀGaisa ǃgammeb ge ǀgam khoen ǀguiba sîsenǀhao tsî ǁîn ǃkharagagusiga a sîsenǂam ǁkhāna xu hâ. ǁNā-amaga i ge nēsi ro saro ǃgomsina ra sîsenǂam ǀgauba ra ǁgau, saro ǃgammeb nî sîsens tamas ka io sîsen tidesa. Saora xūna ro ge a dîsen ǁkhā: ‘ǃHoaǃgaom ra xūnam ǃnomsase ǃgôasib ǃnâ ra dī? Sîm ǃnubusina mûǂan tsîm ra dītsâ ǃgâiǃgâisa? ǃKhaesem nau khoe-e ǃēsa mā, ǀûbaba ǂgan tsî ra ǀûba?’ (Efe. 4:​31, 32) Xawe ro ga ǃnāsa ǁaeba ǁnâugu tama ī tamas ka io dî-amgu ro ra ǁaeb ǃnâ ǂhāba, ob ge nē mâsiba ǃgammeb khaoǃgâ ǃgâiǃgâihe tide. Mûǂants ga o nau khoe-i sats ǃgao ǃgâi tamasa, o dî-amgusa ǀam kai. ǁNās ge hoaro ǃaroma nî ǃgâi mîǁgui.

13. Mâ xūna dî-amgu ra khoera nî hui, îra mîǁgui matikō gaixuse ra nî dî-amgusa?

¹³ Matikō gaixuse ro nî dî-amgu? ǃKhae mîǁguigu ge ǃgâi tama ǀamǂoasa ra hau. (ǂKhm. 21:5) ǂÂusa ǁaeba ū tsî dî-amgus ge nî hui iro ǃgâise ǂangu. Xawe ro ge tā ǂanapegase gaixuse nî dî-amgu. Elobmîs ge ra mî: “Mâiǂuihe hâ ǃâubasens ra ǂgaoba tsûtsû.” (ǂKhm. 13:12) ǁNās ǂam-ai ro ǃnāsase ra dî-amgu khami î ge, a ǃgom ǁkhā ǁgoe-ugus tsâsiga xu ǂgōsensa. (1Kor. 7:9) Matikō gaixuse ro nî dî-amgus ai ǂâisa ǂnûis xa, dîsen re: ‘Tae-e ta a dī ǁkhā î ta nē khoe-e ǃnāsase ǂan tsî ǃgâi mîǁguiba dī?’

NAUNA DÎ-AMGU RA KHOERA MATI A HUI ǁKHĀ?

14. Mâ ǀkhara ǀgaugu ǃnâs tsînats dî-amgu ra khoera a hui ǁkhā? (Ai-īsiba mû re.)

¹⁴ Dî-amgu ra khoera da ga ǂan, o da mati ǁîra a hui ǁkhā? ǁÎra da ge ǁkhau ǁkhā îra sida ǀkha ǂû ǀhao, omaris ǃoabasa dī tamas ka io ǃgâi ǁaeba ūhâ. (Rom. 12:13) ǁNā huib ǀkha ra ge ǃnāsase a ǂangu ǁkhā. ǀNîsi du ge ǁîra ǀkha ǀguiba ǂoa, audos ǃnâ ǃnari tsî sadu omsa ǃoa a ǁkhau ra ǁkhā ira tā ǀguri hâ. (Gal. 6:10) Alisias aiǃâ go ro ǃhoaǃgaohes ge ra ǂâi oa, tae-e ra ge Aschwin hâra gere ǃgôaǃgâsa. ǁÎs ge ra mî: “Kaisem ge gere ǂkhî ǃgâsan gere ǁkhau mî o, îm ǁîna sari ǀgurim ge sarigu ǂgao tama hâ i amaga.” ǁÎra ǀkha hoaǁae hâsats ga ǂganhe, ots tae-i ǃaroma nēsa aiǂhanub ase mû tama? ǂAnbasen its tā dî-amgu ra khoera ǀguri ǁnāxu xawe ǂanǃgâs  tsîna di re mâ ǁaets ǁîra soa-e nî māsa ira ǁgamǀhao.—Fil. 2:4.

15. Tae-en ǀhōsana a dī ǁkhā în dî-amgu ra ǃgâsara hui? (ǂKhoamîdi 12:18)

¹⁵ Dî-amgu ra khoera tsîna da ge a hui ǁkhā, mî da ra xūn tsî mî tama da hâ xūn ǃnâ-ū. ǀNî ǁaegu ai i ge a ǂhâǂhâsa î da ǃkhō-oasen tsî tā xū-e mî. (Khomai re ǂKhoamîdi 12:18 sa.) Aiǁgaus ase da ge ǀnîsi nau ǃgâsana dî-amgu ra ǃgâsara xa ra mîba ǂgao, xawe ra ge ǂgao tama hâ î da tā khoena mîba. ǁÎra aitsâma khoena ra mîba ǂgao amaga. Tā da ge dî-amgu ra ǃgâsara nî ǀhoe tsî ǁîra ge dī mîǁguigu ǃaroma nî mîǁgaiǁgai. (ǂKhm. 20:19; Rom. 14:10; 1Tes. 4:11) ǁNās xōǀkha da ge tā xūna nî mî tsî dî-amgu ra khoera ǁgâiba nî mā dîna ni dî mâǁae ra nî ǃgammesa. Elise ti ǀon hâ ǃgâsas tsî ǁîs aob tsîn ge ra ǂâi-oa: “Kaise i ge ge taoxa i nau khoen ge noxobam ǃhoaǃgao tama ǀapeǁguigu sîm ǃgammeb digu xa gere dî o.”

16. Mati da nî tanisen khoe-ra ga dî-amgusa ǀam kai o?

¹⁶ Tae-e da nî dī khoera ga mîmâi o, ira dî-amgusa ǀam kai? Sida ǀkha dī xu-e ūhâ tama dîn tamas ka io ǀkhā-e ǁhûisa xu da ge nî ǂgōsen. (1Pet. 4:15) Lea ti ǀon hâ ǃgâsas ge ra mî: “ǁNâu ta ge ge naun ge tita ge ǃgâsaba ǀgoraxu ǃkhais xa gere ǃhoasa. Tsî ta ge ǁnās xa ge tsûtsûhe.” ǃGâsara ga dî-amgu ǀû, o da ge tā nî mî ǁgai mîǁguiba ra go dīsa. ǃNāsa ǁaeba î ge ra ǂâibasen, dî-amgus go ǁîs ǂâibasensa a dīǀoaǀoasa tsî ǃgâsara a huisa îra ǃgâi mîǁguiba dī. Xawe i ge ǀnîsi dī ra ge mîǁguiba tsûaǂgao tsî ra ǀguritsâsen kai ra. ǁNā-amaga da ge ǁîra da nî hui ǀgauga nî ôa.—ǂKhm. 17:17.

17. Dî-amgu ra ǃgâsara tae-e aiǃgû tsî nî dī?

¹⁷ Mû da go khamis ge dî-amgusa ǁîs ǃgomsina ūhâ xawes tsîna i ge ǃgâiaǂgaoba a mā ǁkhā. Jesikas ge ǂâi-oa tsî ra mî: “ǂHauǃnâse ta ga mî, os ge dî-amgusa ǂgui sîsen-e ǃkhōǂgā hâ. Xawe ta ge ra ǂkhî, ǁnā ǁaeb tsî ǁkhāsib tsînam ge sîsenūsa îm ǃgâise ǂangu.” Nēsi ro ga dî-amgu o ro ge aiǃgû tsî ǁnā ǁaeba nî sîsenū ǃgâise ǂangusa. Nēsa ro ga di, o i ge nî hui iro ǃgâi mîǁguiba dī.