VUSUNGA vuka? Vusunga ku tuala ha vihula via seho ya kama vi ve ku ihula cikuma vantu. Halumo nenu mue ku lihula nguenu:

• Vuno Njambi ua tu haka seho mpundu ni?

• Vindzita na tuyando tangua vi ka hua ni?

• Vika vie ku soloka kuli etu nga tu tsa?

• Vuno vatsi tangua va ka sanguka ni?

• Vati nja pande ku vundila linga Njambi evue vivundilo viange?

• Vati nji hasa ku uana ndzolela mu muono?

Kulihi mu hasa ku uana vikumbulula via vihula evi? Kua kala mavulu a engi a seteka ku kumbulula. Vunoni mavulu aco ka a litombuele mu vikumbulula viao. Mavulu amo e ku soloka ngue a kala na vikumbulula via vusunga lelo, vunoni mu nima ya ntsimbu seho yavio ye ku hua kaha ve ku a soneka mueka ni ku soneka eka.

Vunoni kuli limo livulu lia kala na vikumbulula vi tu hasa ku tsiliela. Lia pua livulu lia vusunga. Yesu Kilistu ua vundilile ngueni: “Lizi liove likelio vusunga.” (Yoano 17:17) Lizi lia tumbuile lia pua Mbimbiliya ya ku lela. Ha mafo a na hatako, mu ka mona mu vuihi vikumbulula via vusunga via Mbimbiliya ku vihula vili helu.

VIE KU KATULA ECI CIHULA: Tuli na ku yoya mu mavu a ku sula a vukenia na vuhenge. Cingi ca vakua malombelo ve ku longesa nguavo Njambi ikeye ue ku koka tuyando linga eseke lutsilielo lua vantu.

VI YA LONGESA MBIMBILIYA: Njambi ke ku koka vupi. Ku Yombi 34:10 va sonekako nguavo: ‘Ka citava Njambi a linge vupi, na mukua ngolo yose mangana a linge vipi.’(NW ) Njambi ua kala na vutumbe vua cili ku vantu. Ngeci mukemuo Yesu ua tu longesele ku vundila ngueni: “Tatetu u li muilu . . . Vuangana vuove vu ize. Cizango cove va ci linge, ngue muilu, ngecize ha mavu.” (Mateo 6:9, 10) Njambi ua tu uma mutima ngeci ua lingile cuma ca kama cikuma mu ku puisamo cizango ceni.​—Yoano 3:16.

Tandenu naua Njenisisi 1:26-28; Tiango 1:13; na 1 Petulu 5:6, 7.

VIE KU KATULA ECI CIHULA: Vindzita vi li na ku lundumuna vantu va vengi ntsimbu yose. Kaha tu vose tu vandambo ku tuyando.

VI YA LONGESA MBIMBILIYA: Njambi ua handeka laza via ntsimbu ya ka neha ciyulo ha mavu. Omo Vuangana vueni vu ka putuka ku sika, vantu “ka va ka lilongesa ndzita naua.” Kaha “va ka fula mikuale yavo mu ku puisa matemo.” (Isaya 2:4) Njambi a ka fumisako vuhenge vuose na tuyando. Mbimbiliya ya kulahesa nguayo: “[Njambi] a ka hunda masozi ose ku meso avo; na ku tsa ka ci ka kala naua; cipue ku-linienga na vusiua ka ci ka kala naua, cipue ku lila, cipue ku vavala viuma via ku livanga [hamo lika na vuhenge na tuyando] vi na hiti.”​—Ku-Solola. 21:3, 4.

Tandenu naua Visamo 37:10, 11; 46:9; na Mika 4:1-4.

VIE KU KATULA ECI CIHULA: Cingi ca vakua malombelo ve ku longesa nguavo mu muntu mua kala cimo ce ku yoya mu nima ya ku tsa ceni. Vakuavo va tsiliela nguavo vatsi va hasa ku yandesa vantu ni nguavo Njambi ue ku hana kasitiku ku vakua vupi mu ku va mbila mu ngehena va ka ueme miaka yose.

VI YA LONGESA MBIMBILIYA: Nga muntu a tsa ke ku kalako naua. Ku Ekelesiaste 9:5 va sonekako nguavo: “Vatsi ka va tantekeya na vimo viahi.” Ngeci mukemuo vatsi ka va hasa ku yandesa cipue ku kuasa vatoni muomu ka va tantekeya na vimo viahi kaha ka va hasa ku linga na cimo cahi.​—Visamo 146:3, 4.

Tandenu naua Njenisisi 3:19 na Ekelesiaste 9:6, 10.

VIE KU KATULA ECI CIHULA: Na umo ua lema kutsa uahi, tu vose tua tonda ku yoya mu ndzolela hamo lika na vaze va tua lema. Ka ci tu komouesa ku mona ngecize tua kala na cizango ca ku mona lueka vavusoko vuetu va tsa.

VI YA LONGESA MBIMBILIYA: Cingi ca vatsi tangua va ka sanguka. Yesu ua kulahesele ngueni vaze “va li mu vihilo . . . va ka tuhukamo.” (Yoano 5:28, 29) Ku liya na vutumbe vua katete vua Njambi, vaze va ka sanguka va ka kala na civezikiso ca ku yoya mu Palandaizi ha mavu. (Luka 23:43) Cikulaheso caco ca pua ku ka hana muono ua ku tantuluka na cihindu ku vantu va ku ononoka. Mbimbiliya nguayo: “Vakua vuviuke va ka suana cifuti, kaha va ka kalamo ku miaka na miaka ya ya-ye.”​—Visamo 37:29.

Tandenu naua Yombi 14:14, 15; Luka 7:11-17; na Vilinga 24:15.

VIE KU KATULA ECI CIHULA: Vantu va mu malombelo ose ve ku vundila. Vunoni, vavengi nguavo Njambi ke ku kumbulula vivundilo viavo.

VI YA LONGESA MBIMBILIYA: Yesu ua tu longesa ngecize ka tua pandele ku hilukila-hilukila mezi amo lika mu vivundilo vietu, ngueni: “Mu ku vundila kati u hilukile-hilukilemo.” (Mateo 6:7) Nga tu tonda Njambi a pue na ku ivua vivundilo vietu, tua pande ku vundila mu njila ya mu ya ku mutima. Linga tu vi puisemo, ha katete tua pande ku lilongesa cika cizango ca Njambi kaha na ku ci linga. Mukanda ua 1 Yoano 5:14, ua handeka nguauo: “Nga tu vundila vimosi via litombola na cizango ceni [Njambi], ikeye a ku tu ivua.”

Tandenu naua Visamo 65:2; Yoano 14:6, 14; na 1 Yoano 3:22.

VIE KU KATULA ECI CIHULA: Vavengi ve ku singanieka nguavo zimbongo, ku tsimana ni ku sungama ca muvila vie ku neha ndzolela. Ngeci ve ku fuitangana ku vi tonda​—vunoni ambe va vi uane kasi ka ve ku ivua ndzolela mu muono.

VI YA LONGESA MBIMBILIYA: Yesu ua soluele mua ku uanena ndzolela mua handekele ngueni: “Va vezika vevua lizi lia Njambi na ku li niunga.” (Luka 11:28) Tu hasa lika ku uana ndzolela ya vusunga mu muono nga tu lihakela kapandi ka ku saka ndzala ya kama i va kala nayo vantu vose​—ya ku tantekeya vusunga hali Njambi na vutumbe vueni kuli yetu. Vusunga vuaco vua kala mu Mbimbiliya. Ku vu tantekeya ci ka tu kuasa ku nongonona vika mpundu via kala na seho na vize ka viesi nayo. Nga tu tavesa vusunga vua mu Mbimbiliya vu tu tuamenene mu viose vi tu linga tu ka uana ndzolela mu muono.​—Mateo 5:3.

Tandenu naua Visimo 3:5, 6, 13-18; na 1 Timoteo 6:9, 10.

 Tua handeka lika mu vuihi ha vikumbulula via Mbimbiliya ku vize vihula 6. Mu tonda ku tantekeya vikuavo ni? Nga nenu mua pua umo ua vaze va tonda ku ‘ivua lizi lia Njambi na ku li niunga’ tuli na vusunga nguetu mu tonda mpundu ku vi tantekeya. Nga mua kala na vihula vikuavo ngeci mua: ‘Nga Njambi ua tu haka seho, Vika necelela vupi na tuyando ku tualelelaho mu miaka ya ku lana ngeci? Vati nji hasa ku tuala ku lutue muono ua ha ndzivo yetu?’ Mbimbiliya ya hana vikumbulula via vusunga mpundu ku vihula evi na vikuavo via vingi.

Vunoni, matangua ano, va vengi ka va lemene cikuma ku tanda Mbimbiliya. Ve ku handeka nguavo ya laza cikuma ngeci ya kaluua ku ivuisisa. Mu tonda vukuasi vua ku uana vikumbulula via mu Mbimbiliya ni? Vakaleho va Yehova va hasa ku mi kuasa mu vinjila vivali.

Njila ya ku livanga, ve ku hana livulu Vika Mpundu vi i Longesa Mbimbiliya? Livulu liaco vali viukisila ku kuasa vantu ka va kele cikuma na ntsimbu, va hase ku tantekeya vikumbulula via Mbimbiliya ku vihula via seho. Ya mu civali, ve ku longesa Mbimbiliya vuana ku vantu ha vindzivo viavo. Citava umo ua Vakaleho va Yehova ua tunga ha hiehi nenu, a pua na ku iza ku ndzivo yenu ni cihela ceka ci mu lihanguila enu vavene, a ku simutuile nenu mu vuihi via Mbimbiliya simano ku simano. Vantu va vengi mu mavu ose va na lilongesa Mbimbiliya mu njila eyi vene. Cingi cavo va na hete ha ku handeka na ndzolela ya kama nguavo: “Nja uana vusunga!”

Ka kua kele cuma ca kala na seho ngue ku tantekeya vusunga vua mu Mbimbiliya. Mukonda vusunga vuaco vue ku patula vantu ku vuoma vua vimbembesi via vipi, ku makuli na ku viuma vikuavo vie ku vuisa vuoma. Vue ku tu hana lulavelelo, vutumbe mu muono na ndzolela. Yesu ua handekele ngueni: “Kaha mu ka tantekeya vusunga na vusunga vu ka mi patula.”​—Yoano 8:32.