Nitlakatki ipan se pilaltepetsi tlen kitokaxtiaj Acul, tlen mopantia ipan Guatemala. Nochampoyouaj elij ixiles, inijuantij kiskej tlen maseualmej katli kamanaltij maya. Nikamanalti español uan nojkia nijyeko tlajtoli ixil. Nimoskaltik kema mochiuayaya tlauilankayotl ipan nopa altepetl, tlen uejkajki 36 xiuitl. Ipan nopa tlauilankayotl mijkej miakej ixiles.

Kema nijpixtoya naui xiuitl, noikni katli kipixtoya chikome xiuitl kiauiltiyaya se granada uan toponki. Noikni mijki uan na ayokmo uelki nitlachia. Yeka, monejki nechtitlanisej ipan altepetl Guatemala pampa nopaya eltoya se escuela kampa kinmachtiyayaj katli amo uelij tlachiaj, nopaya nijyeko nitlapouas ika braille. Katli nopaya tekitiyayaj, amo nechkauayayaj ma nikamanalti ininuaya sekinok konemej uan nopa konemej amo kinekiyayaj mouikasej nouaya. Nochipa niitstoya noselti, yeka nijnekiyaya ma asi nopa tonali kema niitstoskia ome metstli iuaya nonana pampa ya tlauel nechikneliyaya. Kema nikaxitik matlaktli xiuitl, nonana mijki. Tlauel nechyolkoko pampa san ya tlauel nechikneliyaya.

Kema nijpixtoya once xiuitl, nitlakuepilik Acul uan monejki nias niitstoti kampa itstoya notepotsikni uan ichampoyouaj. Maske inijuantij kuali nechmokuitlauijkej, amo uelkej nechpaleuiaj ika tlen nijyolmatiyaya. Yeka, nikiljuiyaya toTeotsij: “¿Kenke mijki nonana? ¿Kenke ayokmo nitlachia?”. Maseualmej nechiljuiyayaj kiampa nechpanok pampa toTeotsij kiampa kinejki. Nopa kichijki ma nimoiljui toTeotsij amo teiknelia uan tetlaijiyouiltia, yeka nijnekiyaya nimomiktis.

Kema amo titlachias, ayokmo kuali tijyolmatis yon uelis tijchiuas se keski tlamantli. Kema nieliyaya niokichpil maseualmej nechchiualtijkej miakpa ma nimoteka ininuaya o nechijitskijkej. Amo kema nikintlateljuik pampa nimoiljuiyaya axaka nechikneliyaya. Maseualmej amo kuali nechitayayaj yon nechkamanaljuiyayaj. Tlauel nimokuesouayaya uan amo nimotemachiyaya ipan maseualmej, yeka nochipa nijnekiyaya niitstos noselti.

Kema nijpixtoya trece xiuitl, se toikni iuaya isiua nechkamanaljuijkej ipan escuela kema nechka nitlakuaskia. Inijuantij nechtemojkej pampa se siuatl katli tlamachtiyaya nechteikneltiitayaya uan kiniljuik ma nechpaxalotij. Toikniuaj nechpouilijkej Biblia kiijtoua katli amo uelij tlachiaj, tlachiasej uan katli miktokej, moyolkuisej (Isaías 35:5; Juan 5:28, 29). Maske nechpaktiyaya nikintlakakilis, amo nikinnankiliyaya pampa amo tlauel nikamanaltiyaya. Maske kiampa nieliyaya, toikniuaj kinextijkej kipiaj ininyolo, nechiknelijkej uan nechmachtijkej tlen Biblia kiijtoua. Monekiyaya ikxinejnemisej se 10 kilómetros (6 millas) kampa onkayaya uejueyi tepetl uan kiampa onasiyayaj kampa niitstoya.

Noikni nechiljuik maske toikniuaj eliyayaj teikneltsitsij kuali moyoyontiyayaj. Tlauel nechikneliyayaj, yeka nochipa nechmakayayaj se tlamantli. Nikitak inijuantij nelnelia eliyayaj Cristo itokilijkauaj pampa kichiuayayaj kampeka kinpaleuisej sekinok.

Kema nimomachtiyaya Biblia, nijtekiuiyaya amatlajkuiloli ika braille. Maske kuali nijkuamachiliyaya tlen nimomachtiyaya, ouij nijmatki nijneltokas se keski tlamachtili. Amo nijneltokayaya tlaj toTeotsij kitekipachouayaya tlen nechpanoyaya, uan tlaj sekinok nechikneliskiaj kej ya. Maske nijkuamachilik kenke toTeotsij kikaua ma titlaijiyouikaj, ouij nijmatki nikitas kej noTata katli tlauel nechiknelia. *

Tlen nijyekok ipan Biblia, nechpaleuik ma nijpatla tlen nimoiljuiyaya. Nikitak kenijkatsa toTeotsij kiyolkokoua uan kitekipachoua tlen techpano. Uan kenijkatsa kiyolmati kema itekipanojkauaj kintlaijiyouiltiaj, ya kiijtoua: “Nikitstok kejatsa tlaijiyouiaj notlakauaj [...]. Nijkaktok keja chokaj” (Éxodo 3:7). Kema nikitak kenijkatsa Jehová tlauel nechiknelia, nijmaktilik nonemilis uan nimosentlalik nijtekipanos. Ipan 1998 nimoatsonpoliuiltik uan nimochijki se tlen Jehová itlajtoltemakauaj.

Kema nikaxitik se xiuitl nimoatsonpoliuiltijtoya, niajki nimomachtito ipan altepetl Escuintla, kampa kinmachtiyayaj katli amo tlachiaj. Se ueuejtlakatl katli tlatekipanouayaya ipan se tlanechikoli tlen nopa altepetl, kimatki tlauel ouij nijmatiyaya nias tlanechikoli ipan Acul pampa monekiyaya niikxinejnemis uan nikixkotonas nopa uejueyi tepetl, kej kichiuayayaj toikniuaj katli nechmachtijkej. Yeka, nopa toikni kiiljuik se toikni uan ichampoyouaj tlaj ueliskia nimokauas ininchaj uan ma nechpaleuikaj nias tlanechikoli. Ipan ni tonali inijuantij nojua nechmokuitlauiaj kej se tlen ininchampoyouaj.

Toikniuaj nojkia kichijtokej sekinok tlamantli kampa kinextijtokej tlauel nechikneliaj. Yeka nimotemachia Jehová itlajtoltemakauaj nelnelia elij Cristo itokilijkauaj katli tlauel moikneliaj (Juan 13:34, 35).

Nama nikita kena nitlapaleuia, uan nojkia nijmati tlake tlateochiualistli nechmakas toTeotsij teipa. Nimosentlalia nikinpaleuis maseualmej ma kiixmatikaj tlen Biblia tlamachtia uan amo ipan tlen nechpano. Nojkia, nitlatekipanoua ipan tlanechikoli kej ueuejtlakatl uan kemantika nijpanoltia tlamachtili ipan sekinok tlanechikoli. Tlauel niyolpaki pampa nojkia ueli nikinmachtia miakej maseualmej katli yauij ipan uejueyi tlanechikolistli.

Ipan 2010, niajki El Salvador pampa nimomachtito ipan Escuela de Entrenamiento Ministerial (nama kitokaxtiaj Kampa kinmachtiaj katli senkistok tlatekipanouaj). Tlen nijyekok nechpaleuik nojua kuali ma nitlatekipano. Nojkia nikitak Jehová tlauel nechpatiita uan nechiknelia, uan ya kipaleuia katli ueli maseuali ma kitekipano.

Jesús kiijtok: “Más pakilistli kiselia tlen temaka se tlenijki, uan axkeja tlen kiselia” (Hechos 20:35). Tlauel niyolpaki pampa nama ueli nikinpaleuia sekinok maske amo kema nimoiljuijtoya tlaj kiampa nijchiuaskia.