Nimoskaltik ipan altepetl Los Ángeles (California, Estados Unidos), kampa itstoyaj maseualmej katli kinamakayayaj drogas uan onkayaya miak pandillas. Notatauaj kinpixkej chikuasej ininkoneuaj uan na nielki katli ompaejketl.

Kema nieliyaya niokichpil, nonana techuikayaya ipan se iglesia evangélica. Uan kema nimotelpokachijki ayokmo nijchiuayaya tlen nopaya kiijtouayayaj. Sejse domingo niuikayaya ipan iglesia uan ipan semana niauiyaya kampa kichiuayayaj iljuitl, nijtekiuiyaya drogas uan nimotekayaya ininuaya sekinok.

Tlauel nimosisiniyaya uan nima nijnekiyaya nitlateuis. Nijtekiuiyaya tlen ueli tlamantli kema nitlateuiyaya pampa nijnekiyaya nikintlanis sekinok. Tlen nimomachtik ipan iglesia amo tlauel nechpaleuik, pampa nikijtouayaya: “ToTeotsij kipaktia momakuepas, uan na nojkia kiampa nijneki nijchiuas”. Nechka xiuitl 1970, kema nijpiayaya 18 xiuitl, pejki nechpaktia tlen moiljuiyayaj katli kiniljuiyayaj Panteras Negras. Inijuantij kinixmatiyayaj pampa kinekiyayaj kinmanauisej sekinok maseualmej. Na nojkia pejki nimosentilia ininuaya se keskij katli yauiyayaj escuela uan nojkia kiampa moiljuiyayaj. Miakpa timosentiliyayaj uan tiojtsakuayayaj, yeka nojkia kitsakuayayaj escuela.

Na amo nijnekiyaya nijchiuas san nopa. Pejki nijchiua sekinok tlamantli tlen amo kuali pampa tlauel nitekualankaitayaya. Kemantika, nouampoyouaj uan na tiauiyayaj cine uan tijtlachiliyayaj películas kampa nesiyaya kenijkatsa ipan Estados Unidos tlauel kintlaijiyouiltiyayaj katli euayayaj África uan kinchiualtiyayaj ma tekitikaj. Pampa amo techpaktiyaya nopa, pejki tikinmakiliaj se keskij telpokamej chipaktikej katli nojkia yauiyayaj cine. Kemantika tiauiyayaj kampa itstoyaj maseualmej katli chipaktikej pampa tijnekiyayaj tikinmakilisej.

Ipan nopa tonali noikniuaj uan na techixmatiyayaj kej katli san kichiuayayaj tlen amo kuali, uan tekichiuanij amo kuali techitayayaj. Se noikni katli teipaejketl mouikayaya ininuaya katli itstoyaj ipan se pandilla uan kichiuayayaj tlen tlauel amo kuali, uan na nojkia nimouikayaya ininuaya. Tlauel amo kuali nimonejnemiltiyaya.

Itatauaj se nouampo eliyayaj Jehová itlajtoltemakauaj uan nechtlanejkej ma nia ininuaya ipan se tlanechikoli. Kema achtoui niajki nikitak inijuantij amo eliyayaj kej sekinok maseualmej. Nochi kipixtoyaj se Biblia uan kitekiuiyayaj. ¡Konemej uan telpokamej nojkia kiixtomayayaj se keski tlamachtili! Nimosentlachilik kema nijmatki toTeotsij itoka Jehová, uan pampa kitekiuiyayaj kema tlamachtiyayaj (Salmo 83:18). Maske katli nopaya itstoyaj kampa ueli euayayaj, inijuantij amo mochikoitayayaj.

Maske achtouia amo nijnekiyaya ma nechmachtikaj ika Biblia, kena nechpaktiyaya nias tlanechikoli. Se youali kema niitstoya ipan tlanechikoli, se keskij nouampoyouaj yajkej kampa tlatsotsonayayaj o concierto, uan nopaya kimiktijkej se telpokatl pampa kinejkej kikixtilisej ichamarra tlen kuetlaxtli. Ualmostla inijuantij tlauel yolpaktoyaj ika tlen kichijtoyaj. Uan kema kinuikakej kampa tekichiuanij, amo moyolkokouayayaj. Kintsajkej ipan cárcel uan miakej kiniljuijkej amo kema kinkixtiskiaj. ¡Tlauel niyolpajki pampa amo niajki ininuaya! Uajka nimosentlalik nijpatlas nonemilis uan peuas nimomachtis Biblia.

Na tlauel nitechikoitayaya, yeka nimosentlachilik kema nikitak se keski tlamantli tlen kichiuaj Jehová itlajtoltemakauaj. Se neskayotl, kema se Jehová itlajtoltemajka katli eliyaya chipaktik monekiyaya yas seyok altepetl, kiiljuik se toikni iuaya isiua katli amo eliyayaj chipaktikej ma kinmokuitlauikaj ikoneuaj. Nojkia, seyok toikni iuaya isiua katli eliyayaj chipaktikej, kiselijkej ipan ininchaj se telpokatl katli amo eliyaya chipaktik. Ya nopa kichijki ma nikita Jehová itlajtoltemakauaj nelia kichiuaj tlen Jesús kiijtok ipan Juan 13:35: “Nochi tlakamej kimachilisej para nelia innomomachtijkauaj intla nelia inmoiknelisej”. Nikitak nelnelia nikinpantijtoya katli eliyayaj noikniuaj.

Kema pejki nimomachtia Biblia, nikitak monekiyaya nijpatlas kej nieliyaya. Monejki nijchiuas kampeka amo san nijnextis amo nimosisinia, nojkia monejki nijpatlas notlalnamikilis uan nikitas tlauel kuali tlaj kiampa nimonejnemiltis (Romanos 12:2). Ika yolik nijpatlatiajki nonemilis, uan ipan enero 1974, nimoatsonpoliuiltik kej se tlen Jehová itlajtoltemakauaj.

Kema ya nimoatsonpoliuiltijtoya nojua monejki nijchiuas kampeka nijpatlas kej nieliyaya. Se neskayotl, se tonali kema titlajtolmoyauayayaj kajkalpa, nikitak se tlachtejketl kiuikayaya iradio nocarro uan nijtepotstokak. Kema nechka nikitskiskia, kimajkajki nopa radio uan motlalojtejki. Teipa, kema nikinpouiliyaya sekinok toikniuaj tlen nechpanotoya, se toikni katli kuali tlaneltoka nechiljuik: “¿Tlake tijchijtoskia tlaj kena tikitskitoskia nopa tlakatl?”. Ika tlen nechiljuik, nikitak nojua monekiyaya nijpatlas se keski tlamantli ipan nonemilis.

Ipan octubre 1974 pejki nitlatekipanoua kej precursor. Sejse metstli nitlajtolmoyauayaya se cien horas. Teipa, nechtlanejkej ma nitlatekipanoti ipan kali Betel tlen Brooklyn (Nueva York). Ipan 1978 niajki nijmokuitlauito nonana ipan Los Ángeles, pampa mokokouayaya. Kema panok ome xiuitl, nimosenkajki iuaya Aarhonda. Ya nochipa nechpaleuik ma nijmokuitlaui nonana, katli teipa mijki. Teipa techtlanejkej ma tiakaj Kampa momachtiaj ipan Galaad, uan kema tlanki timomachtiaj, techtitlankej ma titlatekipanotij kej misioneros ipan Panamá, uan nama nojua nikaj tiitstokej.

Maske ya nimoatsonpoliuiltijtoya, kemantika nojua ouij nijmatki amo nimosisinis. Kema kiampa nechpano, nia sejkanok o nijchiua seyok tlamantli tlen nechpaleuia amo ma nimokualani ininuaya sekinok maseualmej. Kema nosiua, uan sekinok maseualmej kiitaj nijchiua kampeka amo nimosisinis, nechiljuiaj tlauel kuali tlen nijchiua uan na nojkia nimosentlachilia. Nijmati noselti amo ueltoskia nijpatlas nonemilis. Nimotemachia Biblia nelnelia kinpaleuia maseualmej ma kipatlakaj ininnemilis pampa kipia “chikaualistli” (Hebreos 4:12).

Biblia nechpaleuijtok ma nikita amo san tlapik niitstok uan ayokmo ma nimosisini. Ayokmo aka nijmakilia, nama nikinpaleuia sekinok ma kiixmatikaj toTeotsij. Uelki nijmachtik se tlakatl katli achtouia iuaya nimokualankaitayaya. Kema ya moatsonpoliuiltijtoya, tiitstoyaj sansejko se keski tonali uan nama nojua kuali timouikaj. Nosiua uan na tikinpaleuijtokej kipano ochenta maseualmej ma kitekipanokaj Jehová.

Tlauel nijtlaskamatilia Jehová pampa nechpaleuijtok ma nikita amo san tlapik niitstok uan kichijtok ma niyolpaki pampa niitstok ininuaya noikniuaj katli tlauel nechikneliaj.