Nopa achtoui carta tlen kintitlanilijkej Cristo itokilijkauaj tlen Corinto 14:1-40
14 Nojua xiteiknelijtokaj, pero nojkia xijchijtokaj kampeka inkiselisej nopa yajatili* tlen Dios* temaka ika ichikaualis,* uan nojua más xijtemokaj nopa yajatili para intematiltisej tlen Dios kiijtoua.
2 Pampa katli kamanalti seyok tlajtoli, amo kinnojnotsa maseualmej, kinojnotsa Dios, pampa amo aka kikuamachilia maske Dios ika ichikaualis kipaleuia ma kiijto tlen ya ayamo tematiltia.*
3 Pero katli tematiltia tlen Dios kiijtoua, tlapaleuia ma moskalti inintlaneltokilis sekinok, kinyolchikaua uan kinyoltlalia ika tlen kiijtoua.
4 Katli kamanalti seyok tlajtoli iselti mopaleuia para más ma tlaneltoka, pero katli tematiltia tlen Dios kiijtoua, kinpaleuia toikniuaj tlen tlanechikoli para más ma moskalti inintlaneltokilis.
5 Nechpaktiskia nochi inmojuantij xikamanaltikaj sekinok tlajtoli, pero más nijneki xitematiltikaj tlen Dios kiijtoua. Kena, katli tematiltia tlen Dios kiijtoua, más tlapaleuia que katli kamanalti sekinok tlajtoli, pampa tlaj amo kitlajtolkuepa* tlen kiijtoua amo uelis kinpaleuis toikniuaj tlen tlanechikoli ma moskalti inintlaneltokilis.
6 Pero noikniuaj, tlaj namantsi niasiskia uan nikamanaltiskia ipan sekinok tlajtoli, ¿kenijkatsa inmechpaleuis tlaj amo niinmechiljuis tlen Dios nechnextilijtok, tlaj amo niinmechiljuis tlen amo inkimatij, tlaj amo nitematiltia tlen Dios kiijtoua o tlaj amo niinmechmachtia se tlamantli?
7 Nojkia kiampa pano ika nopa tlamantli tlen amo yoltok tlen ika tlapitsaj o tlatsotsonaj, kej nopa flauta o arpa. Tlaj se akajya kipitsa nopa flauta o kitsotsona nopa arpa pero amo kipatlatia kej kakisti, ¿kenijkatsa kimachilisej sekinok tlake uikatl kitsotsona?
8 Uan tlaj amo kuali kipitsaj nopa trompeta para yasej guerra, ¿ajkia mokualchijchiuas* para yas tlateuiti?
9 Nojkia kiampa pano ika inmojuantij, tlaj inkiijtouaj tlen ouij mokuamachilia, ¿kenijkatsa se akajya kimatis tlen inkiijtouaj? Eliskia kejuak inkinojnotsaj ajakatl.*
10 Ipan Tlaltipaktli onka miak tlajtoli, uan nochi kiijtosneki se tlamantli.
11 Pero tlaj na amo nijkuamachilia tlake kiijtosneki tlen kiijtouaj, katli kamanalti nechitas kej sejkanok* nieua uan na nojkia kiampa nikitas katli kamanalti.
12 Nojkia kiampa pano ika inmojuantij. Yeka, tlaj tlauel inkinekij nopa yajatili tlen Dios temaka ika ichikaualis, xijchiuakaj kampeka tlauel inkipiasej miak yajatili tlen kinpaleuis toikniuaj tlen tlanechikoli ma moskalti inintlaneltokilis.
13 Uajka, katli kamanalti seyok tlajtoli, kema momaijtos* ma tlajtlani para uelis kitlajtolkuepas.*
14 Pampa tlaj nimomaijtoua ipan seyok tlajtoli, amo na nikamanalti, kamanalti nopa yajatili tlen Dios nechmakatok ika ichikaualis, pero amo nijkuamachilia tlen nikijtoua.
15 Uajka, ¿tlake moneki nijchiuas? Kema nimomaijtos nijtekiuis nopa yajatili tlen Dios nechmakatok ika ichikaualis, pero nojkia nimomaijtos para ma mokuamachili tlen nikijtos. Kema niuikas para nijueyichiuas Dios nijtekiuis nopa yajatili tlen ya nechmakatok ika ichikaualis, pero nojkia niuikas para ma mokuamachili tlen nikijtos.
16 Pampa tlaj ta tijueyichiuaskia Dios ika se yajatili tlen ya mitsmakatok ika ichikaualis, uan inmouaya itstok se maseuali tlen ueltsi, ¿kenijkatsa uelis kiijtos “Amén”* kema timomaijtoua para tijtlaskamatis Dios tlaj amo kikuamachilia tlen tikijtoua?
17 Kena, maske tlauel kuali kej tijtlaskamatilia Dios, amo tijpaleuia nopa seyok maseuali para ma moskalti itlaneltokilis.
18 Nijtlaskamatilia Dios pampa nikamanalti más miak tlajtoli que nochi inmojuantij.
19 Maske kiampa ueli nijchiua, ipan tlanechikoli más kuali ma nikijto san makuili tlajtoli* tlen mokuamachilis para uelis nikinmachtis sekinok uan amo ma nikijto 10 mil tlajtoli tlen amo aka kikuamachilis.
20 Noikniuaj, amo xitlalnamikikaj kej konemej. Más kuali xielikaj kej konemej katli amo kimatij kichiuasej tlen amo kuali, pero xitlalnamikikaj kej tlakamej katli ya uejueyij.
21 Ipan nopa Tlanauatili ijkuilijtok: “‘Nikinnojnotsas ni maseualmej tlen ni altepetl ika inintlajtol katli sejkanok euaj, uan ika tlen kiijtouaj katli amo kinixmatij, uan maske kiampa nijchiuas, amo nechtlakakilisej’, kej ni kiijtoua Jehová”.*
22 Uajka, kema kamanaltij sekinok tlajtoli amo kinpaleuia katli ipa tlaneltokaj, kinpaleuia katli amo tlaneltokaj, pero kema tematiltiaj tlen Dios kiijtoua amo kinpaleuia katli amo tlaneltokaj, kinpaleuia katli kena tlaneltokaj.
23 Yeka, tlaj nochi toikniuaj tlen tlanechikoli mosentiliaj ipan se lugar uan nochi kamanaltij ipan sekinok tlajtoli uan onkalakij maseualmej tlen ueltsitsij o katli amo tlaneltokaj, ¿amo kiijtosej para intsontlapolojtokej?
24 Pero tlaj nochi inmojuantij intematiltiaj tlen Dios kiijtoua uan kalaki se katli amo tlaneltoka o se tlakatl tlen ueltsi, nochi tlen inkiijtouaj kitlalnamiktis uan kichiuas kuali ma motlachili.
25 Uan nesis nochi tlen kipia ipan iyolo, yeka motlankuaketsas uan mouijtsomas, kiueyichiuas Dios uan kiijtos: “Dios nelnelia itstok inmouaya”.
26 Uajka noikniuaj, ¿tlake moneki tijchiuasej? Kema inmojuantij inmosentiliaj, se uika se salmo, seyok tlamachtia, seyok kiijtoua tlen Dios kinextilijtok, seyok ueli kamanalti ipan sekinok tlajtoli, uan seyok ueli kiixtoma tlen kiijtosneki. Xijchiuakaj nochi para inmopaleuisej se ika seyok para ma moskalti inmotlaneltokilis.
27 Uan tlaj se keskij kamanaltij ipan seyok tlajtoli, san ma kamanaltikaj omej o eyij, pero sejsentsitsij ma kamanaltikaj, uan se akajya moneki kitlajtolkuepas tlen kiijtosej.
28 Pero tlaj amo aka ueli tlajtolkuepa, uajka amo tleno ma kiijtokaj ipan tlanechikoli uan san ma monojnotsakaj iuaya Dios ipan ininyolo.
29 Ma kamanaltikaj omej o eyij teokamanalouanij* uan nopa sekinok ma kitemolikaj tlake kiijtosneki.
30 Pero tlaj seyok katli nopaya moseuijtok, Dios kinextilia se tlamantli, uajka nopa katli achtoui pejki kamanalti ayokmo tleno ma kiijto.
31 Pampa nochi inmojuantij sejsentsitsij uelis intematiltisej tlen Dios kiijtoua, para nochi ma momachtikaj uan ma moyolchikauakaj.
32 Uan nopa teokamanalouanij moneki kuali moiljuisej kenijkatsa kitekiuiaj nopa yajatili tlen Dios kinmaka ika ichikaualis.
33 Pampa Dios amo kichiua se tlamantli san kej ueli, ya kineki ma onka tlaseuilistli.
Sanse kej mochiua ipan nochi tlanechikoli kampa itstokej katli kiniyokatlalijtokej para Dios,*
34 siuamej amo tleno ma kiijtokaj ipan tlanechikoli, pampa amo kinamiki ma kamanaltikaj. Inijuantij moneki kikauasej ma kinyakanakaj, kej kiijtoua nopa Tlanauatili.
35 Tlaj kinekij kimatisej se tlamantli, ma kitlatsintokikaj ininueue ipan ininchaj, pampa tepinajti se siuatl ma kamanalti ipan tlanechikoli.
36 ¿Inmoiljuiaj itlajtol Dios kiski tlen inmojuantij? ¿Inmoiljuiaj san inmojuantij inkiselijkej?
37 Tlaj se akajya moiljuia eli se teokamanalojketl o kipia se yajatili tlen Dios temaka ika ichikaualis, moneki kikuamachilis para nochi tlen niinmechtlajkuiljuilia ya nopa tlen toTeko tlanauatia.
38 Pero tlaj se akajya amo kipatiita ni tlamantli, Dios nojkia amo kipatiitas.*
39 Yeka noikniuaj, xijchijtokaj kampeka intematiltisej tlen Dios kiijtoua uan xikinkauakaj sekinok ma kamanaltikaj ipan sekinok tlajtoli.
40 Pero xijchiuakaj nochi kej kinamiki uan amo san kej ueli.
Tlen ijkuilijtok tlatsintla
^ O “regalos”, “tekitl”.
^ Kanajya kiijtouaj “toTeotsij”.
^ O “iespíritu”.
^ Xikita tlen Dios ayamo tematiltia.
^ O “kiijtoua tlen kiijtosneki”.
^ O “mokualtlalis”.
^ O “San tlapik inkamanaltiskiaj”.
^ Kanajya kiijtouaj “oksejko”, “sejkoyok”.
^ Kanajya kiijtouaj “motlatlajtis”.
^ O “kiijtos tlen kiijtosneki”.
^ O “kiampa ma eli”.
^ Kanajya kiijtouaj “kamanali”.
^ O “profetas”.
^ O “katli tlatsejtseloltikej”.
^ O uelis “tlaj se akajya amo tleno kimati, nojua kiampa mokauas”.
