Nopa achtoui carta tlen kintitlanilijkej Cristo itokilijkauaj tlen Corinto 9:1-27
9 ¿Amo uelis nijchiuas tlen na nijneki? ¿Amo nieli apóstol? ¿Amo nikitstok toTeko Jesús? ¿Amo intlaneltokatokej pampa na nijtekipanoua toTeko?
2 Maske sekij amo nechitaj kej apóstol, temachtli nijmati para inmojuantij kena kiampa innechitaj. Pampa inmojuantij inelij kej se sello tlen kinextia nelnelia nieli se toTeko iapóstol.
3 Kiampa nikinnankilia katli nechtlaijiljuiaj.
4 Kinamiki tijkuasej uan tikisej* se tlenijki, ¿axke?
5 Kinamiki timosiuajtisej iuaya se siuatl katli tlaneltoka uan ma yaui touaya kampa tiasej, sanse kej kichiuaj sekinok apóstoles, iikniuaj toTeko uan Cefas,* ¿axke?
6 ¿O san Bernabé uan na moneki titekititosej para tijpiasej tlen ika timopanoltisej?
7 ¿Ajkia tlatekipanoua kej se soldado uan kiixtlaua nochi tlen kitekiuia? ¿Ajkia kitoka uvas uan amo kikua itlajka? ¿O ajkia kinmokuitlauia pilborregojtsitsij uan amo kii ininleche?
8 Amo nikijtoua ni tlamantli kej maseualmej kiijtouaj. Nopa tlanauatili nojkia kiampa kiijtoua.
9 Pampa ipan iTlanauatil Moisés ijkuilijtok: “Amo xijtenilpi* se toro kema kiyolkixtiaj trigo”. ¿San kitekipachoua Dios* nopa torojmej?
10 ¿O moijkuilok nopa tlanauatili para techpaleuis tojuantij? Kena, moijkuilok para techpaleuis, pampa se tlakatl katli tlapoxonia uan se katli kiyolkixtia trigo, moneki tekitisej pampa motemachiaj kikuasej itlajka.
11 Tlaj tiinmechmatiltijtokej itlajtol Dios, ¿amo kinamikiskia intechmakasej tlen ika timopanoltisej?
12 Tlaj sekij kinamiki kichixtosej para xikinpaleuikaj, ¿amo más kinamikiskia tojuantij tijchixtosej xitechpaleuikaj? Maske kiampa kinamiki inkichiuasej, amo tiinmechiljuiaj xitechpaleuikaj, tojuantij tikijiyouiaj nochi tlamantli para amo aka tijtsakuilisej ma kineltoka nopa kuali tlamachtili tlen Cristo.
13 ¿Amo inkimatij katli tlatekipanouaj ipan teokali kikuaj tlen maseualmej kiuikaj nopaya? ¿Amo inkimatij katli tlatekipanouaj ipan tlaixpamitl kiseliaj se kentsi tlen nopaya temakaj?
14 Nojkia toTeko kinnauatik katli kimoyauaj nopa kuali tlamachtili, ma motlanilikaj tlen ika mopanoltisej ika nopa kuali tlamachtili tlen kimoyauaj.
15 Pero na amo kema nijtekiuijtok yon se tlen ni tlapaleuili. Uan amo nikijkuiloua ni pampa nama nijneki xinechmakakaj se tlamantli. Pampa nijnekiskia achtoui nimikis... ¡Amo tleno uelis kichiuas ayokmo ma nimoueyimati pampa nijmoyaua nopa kuali tlamachtili uan amo nitlajtlani tomij!
16 Uajka, tlaj nijmoyaua nopa kuali tlamachtili, nopa amo kichiua ma nimoueyimati, pampa ya nopa moneki nijchiuas. ¡Niteikneltik tlaj amo nijmoyauas nopa kuali tlamachtili!
17 Tlaj nijchiua ni ika nochi noyolo, nijselis se tlateochiuali; pero maske amo nijnekiskia, moneki nijchiuas pampa ya nopa nechnauatijkej ma nijchiua.
18 Uajka, ¿tlake tlateochiuali nijselis? Nopa tlateochiuali eli nijmoyauas nopa kuali tlamachtili uan amo nitlainamas, kiampa ayokmo niinmechtlajtlanis tlamantli, maske kinamiki niinmechtlajtlanis para uelis nijmoyauas nopa kuali tlamachtili.
19 Pampa maske amo nieli itlatekipanojka se akajya, nimochijtok kej se tlatekipanojketl para nikinpaleuis miakej maseualmej.
20 Ika judíos nimochijki kej se judío para nikinpaleuis katli elij judíos. Uan katli moyakanaj ika tlanauatili, nimochijki kej se katli moyakana ika tlanauatili para nikinpaleuis katli moyakanaj ika nopa tlanauatili, maske na ayokmo nimoyakana ika nopa tlanauatili.
21 Katli amo moyakanaj ika tlanauatili, nimochijki kej se katli amo moyakana ika tlanauatili para nikinpaleuis katli amo moyakanaj ika tlanauatili, maske na nimoyakana ika itlanauatil Dios uan ika itlanauatil Cristo.
22 Katli amo tetikej, nimochijki kej se katli amo tetik para nikinpaleuis katli amo tetikej. Nimochijtok kej nochi maseualmej uan nijchiua nochi tlen niueli para nikinpaleuis ma momakixtikaj* maske san se keskij maseualmej.
23 Pero nijchiua nochi ni tlamantli para nikinmatiltis sekinok nopa kuali tlamachtili.
24 ¿Amo inkimatij maske nochi motlalouaj para motlanisej, san setsi tlatlani? Uajka, ximotlalokaj para intlatlanisej.
25 Nojkia, nochi katli motlalouaj para motlanisej,* kinextiaj monauatiaj ipan nochi tlamantli. Kena, inijuantij motemachiaj kiselisej se corona tlen pilini, pero tojuantij tijchiaj tijselisej se corona tlen amo pilini.
26 Yeka, kema nimotlaloua ya nijmati kanke niasiti. Nojkia kej katli tlateuiaj, kema nijmelaua nomax para nitlateuis amo san nijmakilia ajakatl.
27 Na nijnauatia* notlakayo uan nijchiua kej notlatekipanojkaj. Tlaj amo kiampa nijchiuaskia, maske nikinkamanaljuiskia sekinok, Dios amo kuali nechitaskia.
Tlen ijkuilijtok tlatsintla
^ Kanajya kiijtouaj “tikijisej”.
^ Nojkia kitokaxtiyayaj Pedro.
^ Kanajya kiijtouaj “Amo xijtlalili ibozal”.
^ Kanajya kiijtouaj “toTeotsij”.
^ O “ma momanauikaj”.
^ O “nochi katli mauiltiaj”.
^ O “nijtlakaualtia”. Ika griego “nijteuia”.
