TLEN SEKINOK KIIJTOUAJ

Miakej moiljuiaj amo kenijki kema mauiltiaj ika tomij tlaj kichiuaj kej tekichiuanij kiijtouaj. Kemantika tekichiuanij kichiuaj loterías uan se achi tlen nopa tomij kitekiuiaj kampa kinpaleuiaj maseualmej.

TLEN KIIJTOUA BIBLIA

Maske Biblia amo kiijtoua tlaj amo kinamiki timauiltisej ika tomij, kena kiijtoua se keski tlamantli tlen techpaleuia ma tijmatikaj tlake moiljuia toTeotsij tlen nopa tlamantli.

Kema maseualmej mauiltiaj ika tomij, kinekij kitlanisej inintomij sekinok. Uan kema kiampa kichiuaj kiixnamikij tlen Jesús kiijtok: “Amo xijnekikaj nochi tlamantli tlen onka” (Lucas 12:15). Maseualmej mauiltiaj pampa kinekij tlapijpiasej. Maske amo nochipa tlatlanij, katli kichiuaj loterías kiijtouaj tlaj timauiltis uelis tijtlanis tlauel miak tomij. Miakej ya nopa kinekij, yeka kitlaliaj miak tomij kema mauiltiaj. Katli kichiuaj nopa loterías amo kinpaleuiaj maseualmej pampa kichiuaj ma kinekikaj nima kitlanisej miak tomij.

Katli mauiltiaj ika tomij kinextiaj amo kintekipachoua tlen kinpano sekinok pampa kinekij kitlanisej nopa tomij tlen sekinok kipolouaj. Uan Biblia kiijtoua amo aka kinamiki kitemos “tlen kuali para ya iselti”, uan “ma tijchiuakaj tlen kinpaleuis sekinok” (1 Corintios 10:24). Se tlen nopa Matlaktli Tlanauatili tlen kimakakej Moisés kiijtoua: “Amo xikixtokakaj niyon se tlamantli tlen seyok iaxka” (Éxodo 20:17). Kema se akajya mauiltia uan mosentlalia tlatlanis, kineki sekinok ma kipolokaj inintomij uan kiampa ya mokauas ika nochi nopa tomij.

Biblia nojkia kiijtoua amo kinamiki timoiljuisej nopa suerte eli kejuak se chikaualistli tlen uelis techpaleuis kuali ma tiitstokaj. Uejkajkia, se keskij israeleuanij amo tlaneltokayayaj ipan toTeotsij uan pejkej kiueyichiuaj nopa teotsij tlen moiljuiyayaj kinpaleuiyaya ma tlatlanikaj. ¿Kenijkatsa kiitak Jehová tlen kichijkej? Ya kiijtok: “Inkichiuayayaj miak tlamantli tlen axkuali yonke niinmechtlachilijtok. Uan inkitlapejpeniyayaj inkichiuasej tlamantli tlen inkimatiyayaj para na tlauel nechkualankamaka” (Isaías 65:​11, 12).

Ipan se keskij altepemej, ika se achi tlen nopa tomij tlen kisentiliaj kema kichiuaj loterías, kinpaleuiaj ma momachtikaj sekinok uan nojkia kinpaleuiaj ma kipiakaj tlen ika mopanoltisej. Maske kiampa kichiuaj, nopa tomij kitlanij pampa miakej kinekij kipiasej tlen sekinok kipolouaj. Nojkia, kinextiaj moiljuiaj san ipan inijuantij uan kinekij kitlanisej se tlamantli maske amo tleno kichijtokej.

“Amo xikixtokakaj niyon se tlamantli tlen seyok iaxka” (Éxodo 20:17).

TLEN KIIJTOUA BIBLIA

Biblia kiijtoua “tlakamej tlen tlauel kinekij miak tomij, nimantsi uetsisej, pampa tlajtlakoli kinyoltilanas. Eltok keja se tlaketstli tlen kinmasiltia. Uan inijuantij peuasej kinekisej más tlamantsitsij tlen kinijtlakos. Uan ya nopa kinuikas ipan se ojtli tlen kixoleuas ininyolis hasta teipa mopolosej” (1 Timoteo 6:9). Se akajya mauiltia ika tomij pampa tlauel kineki tlapijpias. Nopa tlamantli tlauel amo kuali, yeka toTeotsij iTlajtol kiijtoua moneki amo kema tijchiuasej (Efesios 5:3).

Kema se akajya mauiltia, moiljuia uelis nima kitlanis miak tomij, uan nopa kichiua ma peua kiikneli. Biblia kiijtoua katli tlauel kiikneliaj tomij peuaj kichiuaj ipan ininnemilis “miak tlamantli tlajtlakoli”. Uan kema se akajya kineki kipias miak tomij, uelis tlauel motekipachos uan ayokmo kuali tlaneltokas ipan toTeotsij. Biblia kiijtoua katli kinekij tlauel tlapijpiasej “kipantijtokej miak tlakuajkualojkayotl” (1 Timoteo 6:10).

Katli tlauel kinekij tlapijpiasej, amo kuali kiyolmatij, amo yolpakij ika tlen kipiaj uan kinekij nojua tlauel miak tomij. Eclesiastés 5:10 kiijtoua: “Yonke se tlakatl tlauel kineki kipias tomij, axkema kipias hasta ayok kinekis. Uan tlen kineki elis rico, axkema moiljuia para ya kipia miak ricojyotl”.

Tlauel miakej maseualmej katli kinekiyayaj mauiltisej, nama ayokmo uelij kikauaj. San ipan Estados Unidos itstokej tlauel miakej maseualmej katli san kinekij mauiltijtosej ika tomij.

Maske ipan Proverbios 20:21 kiijtoua katli kinekij kipiasej miak tomij uelis kena kipiasej, toTeotsij amo kinteochiuas. Nojkia, katli kinekij nochipa mauiltijtosej, uelis motlauikaltisej, kipolosej nochi tlen kipiaj, ininuampoyouaj, ininteki o ininchampoyouaj. Tlaj tijchiuaj tlen Biblia tetlajtolmaka techpaleuis amo ma tikixnamikikaj nopa tlaouijkayotl tlen kipiaj katli san kinekij mauiltisej.

“Tlakamej tlen tlauel kinekij miak tomij, nimantsi uetsisej, pampa tlajtlakoli kinyoltilanas. Eltok keja se tlaketstli tlen kinmasiltia. Uan inijuantij peuasej kinekisej más tlamantsitsij tlen kinijtlakos. Uan ya nopa kinuikas ipan se ojtli tlen kixoleuas ininyolis hasta teipa mopolosej” (1 Timoteo 6:9).