Achtouia tetajmej eliyayaj katli achtoui kiniljuiyayaj ininkoneuaj tlake kiijtosneki kema se tlakatl uan se siuatl motekaj sansejko. Kej moskaltijtiauiyayaj ininkoneuaj, tetajmej kiniljuiyayaj tlen ueliskia kikuamachilisej.

Ipan ni tonali ayokmo kiampa eli. Nopa amochtli The Lolita Effect, kiijtoua: “Ipan ni tonali, konemej katli nojua pilsiltsitsij kampa ueli kiitaj kema se tlakatl uan se siuatl motekaj sansejko, uan ipan programas tlen kimauisouaj konemej kinextiaj amo kenijki kema se tlakatl uan se siuatl motekaj sansejko”. ¿Kinpaleuia konemej ni tlamantli o amo?

Kampa ueli nesi kema se tlakatl uan se siuatl motekaj sansejko. Ipan nopa amochtli Talk to Me First, Deborah Roffman kiijkuilok: “Kema mokamanaljuiaj maseualmej, tlen nesi ipan películas, amochtli, uikatl, tlen kinamakaj ipan televisión uan tlen nopaya kipanoltiaj, tlen motlajkuiljuiliaj, tlen ika mauiltiaj, tlaixkopinkayotl tlen ika motlanamakiaj, ipan teléfonos uan ipan computadoras nesi tlamantli tlen kichiua miakej [piltelpokatsitsij, telpokamej, ichpokamej uan konemej] ma moiljuikaj tlen amo kinamiki, uan maske amo kimatij, nopa tlamantli kichiua ma moiljuikaj tlauel ipati kema se tlakatl uan se siuatl motekaj sansejko”.

Katli tlanamakaj nojkia amo kuali tlen kichiuaj. Inijuantij kinamakaj yoyomitl tlen kitekiuiaj konemej uan tlen kichiua ma nesi inintlakayo, nopa kichiua konemej ma kinekikaj kuali nesisej maske nojua pilsiltsitsij. Nopa amochtli So Sexy So Soon kiijtoua: “Katli tlanamakaj kimatij konemej kinekij kuali ma kinitakaj sekinok konemej, yeka kinamakaj tlen kinpaktia. Kinamakaj nopa yoyomitl pampa kinekij konemej ma kikouakaj tlamantli tlen yankuik uan amo pampa kinekij ma moixtokakaj”.

Amo san moneki tijmatis tlake kiijtosneki. Amo eli sanse tijmatis kenijkatsa tekiti se carro uan kuali tijnemiltis. Nojkia, maske se akajya kimati tlake kiijtosneki kema se tlakatl uan se siuatl motekaj sansejko, nopa amo kiijtosneki kuali kitlapejpenis tlen kichiuas.

Tlen tikitstokej: Nama tlauel moneki tikinpaleuis mokoneuaj kuali ma ‘kitekiuikaj inintlalnamikilis’ “para kiixmatisej tlen kuali uan tlen axkuali para kichiuasej” (Hebreos 5:⁠14).

Xikamanalti iuaya mokone. Maske tipinaua tikiniljuis mokoneuaj tlake kiijtosneki kema se tlakatl uan se siuatl motekaj sansejko, moneki kiampa tijchiuas (texto tlen mitspaleuis: Proverbios 22:6).

Xikinixtomilijtia ika yolik. Amo san moneki sempatsi uejkauas tikamanaltitos iuaya mokone tlen nopa tlamantli, uelis tikamanaltis iuaya kema inpaxalotij o kema inkichiuasej se tlamantli inmochaj. Tlaj tijneki mokone ma mitsiljui tlake moiljuia, xijtlatsintoki: “¿Kenke timoiljuia kitlaliaj nopa tlaixkopinkayomej kema kinamakaj se tlamantli?”, uan amo xikiljui: “¿Mitspaktia tlen nesi?”. Kema ya mitsnankilijtos, uelis tijtlajtlanis: “¿Uan ta tlake timoiljuia?” (texto tlen mitspaleuis: Deuteronomio 6:6, 7).

Kej moskaltijtiasej. Konemej katli nojua pilsiltsitsij uelis kiniljuisej kenijkatsa nelnelia inintoka ininpiltlakayo (órganos sexuales) uan tlake uelis kichiuasej o kiijtosej kema se akajya kinekis kinijitskis. Kej moskaltijtiasej uelis tikinixtomilis kenijkatsa kema se tlakatl uan se siuatl motekaj sansejko uelij kitlakatiltiaj se konetl. Kiampa kema motelpokachiuasej o moichpokachiuasej, kikuamachilisej kenke mopatlatia inintlakayo uan kenke moneki kiitasej kej kinamiki kema se tlakatl uan se siuatl motekaj sansejko.

Xijmachti kuajkuali tlamantli. Kema nojua pilsiltsi, xijmachti mokone ma tlatlepanita, amo ma tlakajkayaua uan amo ma tlachteki. Kiampa kuali mitstlakakilis kema tikixtomilis tlake kiijtosneki kema se tlakatl uan se siuatl motekaj sansejko. Xikiljui tlake tijneltoka. Se neskayotl, xikiljui tlaj ta amo kuali tikita kema motekaj sansejko katli amo mosenkajtokej. Xikixtomili kenke amo kuali uan tlake uelis kipanos tlaj kiampa kichiuas. Nopa amochtli Beyond the Big Talk kiijtoua: “Uelis se piltelpokatsi amo motekas iuaya se akajya tlaj kimati itatauaj amo kuali kiitaj”.

Xijchiua tlen tikijtoua. Kuali ximonejnemilti. Ximotlatsintoki: “¿Niuetska kema tetlauetskiltiaj ika tlajtoli tlen sokiyo? ¿Nijtekiuia yoyomitl tlen kichiua tlauel ma nesi notlakayo? ¿Nechpaktia nimoixuetskilis o nijnextis nikixtoka se akajya katli amo eli nonamik?”. Tlaj kiampa tijchiua, mokoneuaj amo kichiuasej tlen tikinmachtia (texto tlen mitspaleuis: Romanos 2:​21).

Xikita kej kinamiki. Jehová kichijki se tlakatl uan se siuatl katli ya mosenkajtokej ma motekakaj sansejko, uan nopa kichiua ma yolpakikaj (Proverbios 5:​18, 19). Xikiljui mokone kena uelis kiampa kichiuas kema ya mosenkajtos, uan amo tlaijiyouis kej maseualmej katli motekaj sansejko kema ayamo mosenkauaj (1 Timoteo 1:18, 19).