“Nochi tlen yejyektsi uan tlen kuali tijseliaj, techmaka toTeko tlen itstok [...] iluikak” (Santiago 1:17). Ni texto kinextia kenijkatsa toTeotsij Jehová techmaka miak tlamantli ika nochi iyolo. Maske tlauel miak, san setsi nelia tlauel ipati. ¿Tlake techmakatok? Jesús kiijtok tlake ipan Juan 3:16: “ToTeko nelia miak kiniknelia nochi tlakamej ipan ni Tlaltipaktli uan yeka kititlanki iKone iyojtsi para mikis ininpampa. Uan keja nopa nochi tlen kineltokasej, axpoliuisej, pero kipiasej yolistli tlen yankuik para nochipa”.

ToTeotsij techmakak iKone iyojtsi, uan san ya nopa tlen tlauel ipati katli tijselijtokej ipan tonemilis, amo kema techmakasej seyok tlamantli tlen tlauel ipati. Ika tlen toTeotsij techmakak, uelis timomakixtisej tlen tlajtlakoli, ayokmo tiueuejtiasej yon timikisej (Salmo 51:5; Juan 8:34). Maske tijchiuaskiaj miak tlamantli, toselti amo kema tiueliskiaj timomakixtisej. Pampa toTeotsij tlauel techiknelia, kichijki tlen moneki uan kiampa techmakixtiskia. Kema Jehová temakak iyojtsi iKone, Jesucristo, kej se tlaxtlauili, maseualmej uelkej motemachiaj itstosej nochipa uan ayokmo kema mikisej. Uan, ¿tlake nopa tlaxtlauili? ¿Kenke tlauel monekiyaya? ¿Uan tlake moneki tijchiuasej tlaj tijnekij ma techpaleui?

Se akajya temaka se tlaxtlauili pampa kineki kimakixtis seyok o pampa kineki sampa kipias tlen kipolojtok. Biblia kiijtoua toTeotsij kinchijchijki Adán uan Eva. Inijuantij amo eliyayaj tlajtlakolejkej uan ueliskiaj itstosej nochipa ipan se xochimili ininuaya ininkoneuaj (Génesis 1:26-28). Kema kiixpanokej toTeotsij mochijkej tlajtlakolejkej uan kipolojkej nochi nopa tlamantli tlen ueltoskia kipiasej. ¿Tlake panok pampa tlajtlakolchijkej? Biblia kiijtoua: “Tlajtlakoli pejki ipan Tlaltipaktli pampa san se tlakatl tlajtlakolchijki. Uan [...] nojkia pejki miki[li]stli. Uajka ama miki[li]stli techasi [...] pampa nochi titlajtlakolchijtokej” (Romanos 5:12). Inijuantij ayokmo elkej xitlauakej uan kinpanoltilijkej ininkoneuaj tlajtlakoli, uan yeka nochi timikij.

Nopa tlaxtlauili tlen temakaj moneki kiixtlauas nochi tlen polijtok. Adán tlajtlakolchijki kema kinejki kiixpanos toTeotsij uan inemilis ayokmo elki xitlauak. Biblia kiijtoua yeka nochi Adán ikoneuaj tlajtlakolchiuaj uan mikij. Maseualmej ueliskiaj momakixtisej tlaj temaktiliskiaj seyok nemilistli katli nojkia eliskia xitlauak: Jesús inemilis (Romanos 5:19; Efesios 1:7). Pampa toTeotsij tlauel teiknelia, temakak nopa tlaxtlauili, yeka nama maseualmej uelis motemachisej kipiasej tlen Adán uan Eva kipolojkej: itstosej nochipa ipan se xochimili (Apocalipsis [Revelación] 21:3-5).

Amo onka seyok tlamantli tlen tlauel ipati, pampa nopa tlaxtlauili uelis kichiuas ma tiitstokaj nochipa. Nelia “tlauel kuali” tlen toTeotsij techmakatok. Tlaj tijnekij tijkuamachilisej kenke tlauel kuali uan tlauel ipati, ma tikitakaj kenijkatsa toTeotsij kichijki nopa naui tlamantli tlen tikijtojkej ipan nopa tlamachtili tlen panok.

Techmakak tlen tijnekij. Nochi timaseualmej tijnekij tiitstosej nochipa pampa kiampa techchijchijkej (Eclesiastés 3:11). Maske tijnekij nopa, san ika nopa tlaxtlauili uelis tijpiasej nemilistli. Biblia kiijtoua:  “Intla se tlakatl tlajtlakolchiua, kipantia miki[li]stli keja itlaxtlauil, pero toTeko Dios techmaka se regalo kema tijneltokaj toueyiTeko Jesucristo, uan nopa regalo eltok yolistli yankuik para nochipa” (Romanos 6:23).

Techmakak tlen techpoloua. Yon se maseuali ueliskia temakas nopa tlaxtlauili. Biblia kiijtoua: “Pampa toyolis eltok se tlamantli tlen miak ipati. Axonka niyon se tomij ipan nochi Tlaltipaktli tlen ika uelis moixtlauas” (Salmo 49:8). Tlauel monekiyaya toTeotsij ma techmakixti tlen tlajtlakoli uan mikilistli. ToTeotsij kichijki tlen monekiyaya uan yeka “Jesucristo ya tlaxtlajki totlauikilis” (Romanos 3:23, 24).

Techmakak kema monekiyaya. Biblia kiijtoua: “Cristo mijki ipampa nochi tojuantij kema noja tieliyayaj titlajtlakolchiuanij” (Romanos 5:8). ToTeotsij kiixtlajki totlajtlakoljuaj “kema noja tieliyayaj titlajtlakolchiuanij”, nopa kinextia nelia tlauel techiknelia maske titlajtlakolejkej. Uan maske titlaijiyouiaj, tijchiaj ika pakilistli kema ayokmo kiampa tiitstosej.

Techmakak ika pakilistli uan ika nochi iyolo. Biblia kiijtoua tlake kiyololinik toTeotsij ma temaka iKone kej se tlaxtlauili: “ToTeko technextilik hasta kanke techiknelia pampa techtitlanilik iKone iyojtsi para ma uala ipan ni Tlaltipaktli para ma tijpiakaj yolistli yankuik ipampa ya. Ya ni technextilijtok se teiknelijkayotl tlen melauak. Axtojuantij tikiknelijkej toTeko uan yeka Cristo ualajki. Elki toTeko Dios techiknelik uan yeka techtitlanilik iKone para yajaya elis nopa tlakajkaualistli tlen tlaxtlauas ipampa totlajtlakoljuaj” (1 Juan 4:9, 10).

¿Tlake uelis tijchiuas tlaj nelia tlauel tijtlaskamati tlen toTeotsij techmakatok? Xikilnamiki tlen Jesús kiijtok ipan Juan 3:16, tlaj titlaneltokas ipan ya, uelis timomanauis. Biblia kiijtoua “tlaneltokili” kiijtosneki “tijneltokaj para temachtli panos nopa tlamantli tlen toTeko techtenkauilijtok” (Hebreos 11:1). Tlaj tijnekij kiampa tijpiasej totlaneltokilis, moneki tikixmatisej tlen melauak. Yeka timitstlaneuij xijchiua kampeka tikixmatis toTeotsij, katli techmakak nopa “kuali tlamantli”, uan xijyeko tlake uelis tijchiuas tlaj tijneki ma mitspaleui Jesús imikilis uan kiampa tiitstos nochipa.

Uelis tijmatis tlen melauak tlaj tikitas nopa tlamachtili tlen eltok ipan jw.org. Jehová itlajtoltemakauaj tlauel techpaktiskia timitspaleuisej. Tijmatij tlaj nojua tijyekojtias tlen nopa tlaxtlauili uan kenijkatsa mitspaleuia, nojkia tikijtos ni: “Tlaskamati toTeko Dios [uan] Jesucristo” (Romanos 7:25).