KEMA amo kuali tijyolmati, uelis ayokmo tijneki tiitstos. Tlaj kiampa mitspano, uelis tijkuamachilia tlen kiyolmati Adriana. Ya tlauel mokuesouayaya, moyolkokouayaya uan moiljuiyaya amo aka kiyolchikauaskia. Teipa, tepajtianij kiiljuijkej kipixtoya nopa kokolistli tlen kichiuayaya ma mokueso miak tonali.

Xikita tlen kipanok Kaoru, se tlakatl katli eua Japón, ya kinmokuitlauik itatauaj katli ya ueuejtixtokej uan mokokouaj. Kaoru kiijtoua: “Ipan nopa tonali, ipan noteki nijmatiyaya tlauel nechtetsopayayaj. Teipa, ayokmo nimayanayaya uan ayokmo ueliyaya nikochi. Nijnekiyaya nimikis pampa ayokmo nijnekiyaya nitlaijiyouijtos”.

Se tlakatl tlen eua Nigeria, tlen itoka Ojebode kiijtoua: “Nochipa nimotekipachouayaya uan tlen ueli tlamantli kichiuayaya ma nichoka. Uan yeka nijnekiyaya nimomiktis”. Maske Ojebode, Kaoru uan Adriana amo momiktijkej, nechka 800,000 maseualmej kena momiktiaj sejse xiuitl.

Miakej katli momiktiaj elij tlakamej, uan miakej tlen inijuantij amo kiniljuiaj sekinok ma kinpaleuikaj pampa pinauaj. Jesús kiijtok katli mokokoua, moneki yas kampa tepajtijketl (Lucas 5:31). Yeka, tlaj amo kuali tijyolmati, amo xipinaua uan xikiniljui sekinok ma mitspaleuikaj. Miakej maseualmej katli mokuesouaj miak tonali yajtokej kampa se tepajtijketl, uan nopa tlauel kinpaleuijtok. Ojebode, Kaoru uan Adriana yajkej kampa se tepajtijketl uan nama kuali kiyolmatij.

Tepajtianij kinmakaj pajtli maseualmej katli mokuesouaj miak tonali, kiniljuiaj ma yakaj kampa se psicólogo o kemantika kiniljuiaj ma kichiuakaj ni ome tlamantli. Nojkia, katli mokokouaj tlauel kinyolchikaua kema ininchampoyouaj uan ininuampoyouaj kinpaleuiaj, kema kikuamachiliaj tlen kiyolmatij uan kinextiaj kipiaj ininyolo ininuaya. San Jehová tlauel kuali touampo uan techmakatok se tlamantli tlen tlauel techpaleuia: Biblia.

Maseualmej katli motekipachouaj miak tonali uejkaua mopajtiaj uan moneki kipatlasej se keski tlamantli ipan ininnemilis. Maske tijpia nopa kokolistli, uelis timotemachis teipa kuali tiitstos. Kiampa moiljuia Ojebode, ya kiijtoua: “Nijneki nikitas kema moaxitis tlen kiijtoua Isaías 33:24, kampa kiijtoua asis se tonali kema amo aka kiijtos mokokoua”. Ta nojkia mitsyolchikauas tijmatis toTeotsij kitenkajtok “se yankuik Tlaltipaktli” kampa “ayok kema aki [...] mokuesos” yon motekipachos (Apocalipsis [Revelación] 21:1, 4). Uajka, ayokmo kema timoyolkokos. Nojkia, ayokmo kema kiampa tijyolmatis yon amo tikilnamikis (Isaías 65:17).