Tlauel mitspaleuis tlaj tikixmatis Jehová

¿TECHPOLOUA tijmatisej se tlamantli tlen tlauel ipati? Kena, pampa nojua moneki tikixmatisej toTeotsij. ¿Kenke? Pampa miakej maseualmej kiitstokej tlauel kinpaleuijtok kiixmatisej toTeotsij uan kiselijtokej miak tlateochiualistli.

Jehová, katli kichijki ma moijkuilo Biblia, kineki ma tikixmatikaj. Katli kiijkuilok se salmo, kiijtok: “Ma kimatikaj maseualmej ta motoka Jehová, san ta tlauel tiUeyi ipan nochi Tlaltipaktli”. ToTeotsij kimati tlauel techpaleuis tlaj tikixmatisej. “Na niDios niinmoTeko tlen niinmechmachtia para inkimatisej tlen kuali para inkichiuasej”. ¿Kenijkatsa techpaleuis tlaj tikixmatisej Jehová? (Salmo 83:18, TNM; Isaías 48:17).

Kema tikixmatij toTeotsij techpaleuia ma tikixnamikikaj kuesoli, ma timotemachikaj tijselisej tlen toTeotsij kiijtojtok uan kuali ma tijyolmatikaj. Nojkia techpaleuia amo ma timoiljuikaj kej sekinok maseualmej kema motlajtlaniaj tlen tlauel ipati. ¿Tlake motlajtlaniaj?

¿Kenke tiitstokej?

Maske maseualmej kichijchijtokej miak yajyankuik tlamantli, nojua motlajtlaniaj: ¿Kenke tiitstokej? ¿Tlake techpanos teipa? ¿Kenke techchijchijkej? Tlaj amo technankiliaj ni tlajtlanili, amo kuali tijyolmatij. ¿Kiampa kiyolmatij miakej maseualmej? Kema nechka peuaskia xiuitl 2000, kintlajtlanijkej maseualmej tlen Alemania nopa tlajtlanili uan miakej kiijtojkej amo kimatiyayaj kenke tiitstokej. Uelis kampa tiitstok nojkia kiampa moiljuiaj.

Tlaj amo tijmati kenke tiitstok, amo tijmatis tlake tijchiuas ipan monemilis. Miakej kiampa kinpano, yeka san mosentlaliaj tlauel momachtisej o tlatominpiasej, uan maske kiampa kichijtokej amo kuali kiyolmatij. Miakej motekipachouaj pampa amo kimatij kenke tiitstokej, yeka ayokmo kinekij itstosej. Kiampa kipanok se ichpokatl, yeka nopa periódico International Herald Tribune, kiijtok: “Ichampoyouaj tlauel tlatominpiayayaj uan amo tleno kipolouayaya”. Maske kipixtoya miak tlamantli uan tlauel yejyektsi eliyaya, kiyolmatiyaya itstoya iselti uan amo yolpakiyaya, yeka momiktik kema kitolok miak pajtli tlen kiiljuiaj barbitúricos. Uelis nojkia tijmati tlen se keskij maseualmej katli kiyolmatiyayaj itstoyaj ininselti uan teipa momiktijkej.

¿Tikitstok kenijkatsa ixtlamatinij kinekij kiixtomasej kenke tiitstokej? Nopa semanario alemán Die Woche kiijtoua: “Maske tlen kichiuaj ixtlamatinij techpaleuia ipan se keski tlamantli, amo uelis techpaleuis ma tijtekipanokaj toTeotsij. Maske miakej tlaneltokaj ipan evolución uan ipan física cuántica, amo kinyolchikaua yon kinpaleuia ma itstokaj ika temachili”. Maske ixtlamatinij momachtijtokej miak tlamantli uan kimatij kenke pano se keski tlamantli, amo uelij kiixtomaj kenke tiitstokej yon tlake kinpanos teipa. Tlaj san timotemachiskia ipan tlen ixtlamatinij kiijtouaj, amo kema ueliskia tijmatisej kenke tiitstokej. Yeka, nopa periódico Süddeut­sche Zeitung, kiijtoua “nochi tijnekij se akajya ma techyakana”.

San katli techchijchijki uelis kuali techyakanas. ToTeotsij kinchijchijki maseualmej, yeka san ya kimati kenke tiitstokej. Biblia kiijtoua Jehová kinchijchijki maseualmej pampa kinekiyaya ma momiakilikaj uan ma kimokuitlauikaj Tlaltipaktli. Nojkia kinekiyaya ma tijnextikaj ipan tonemilis se keski kuajkuali tlamantli kej xitlaualistli, tlalnamikilistli uan tlaiknelijkayotl. Kema tijkuamachiliaj kenke techchijchijki Jehová, nojkia tijkuamachiliaj kenke tiitstokej (Génesis 1:​26-​28).

¿Tlake uelis tijchiuas?

Tlaj achtouia amo tijmatiyaya kenke tiitstokej, tlake techpanos teipa o kenke techchijchijkej, Biblia kiijtoua tlaj tijneki tijmatis nopa, moneki kuali tikixmatis Jehová. Jesús kiijtok: “Inijuantij kipiaj yolistli yankuik para nochipa intla mitsixmatij ta tlen melauak tiDios uan axaka seyok, uan nojkia nechixmatij na niJesucristo tlen tinechtitlantok”. Nojkia moneki tijnextis kuajkuali tlamantli kej tlaiknelijkayotl uan timosentlalis tiitstos kema tekichijtos toTeotsij iTlanauatijkayo ipan Tlaltipaktli. Nopa mitspaleuis xiyolpaki uan timotemachis nelia moaxitis tlen tijselis teipa. Uajka tijmatis kenijkatsa monankilia tlen tlauel tijnekiyaya tijmatis (Juan 17:3; Eclesiastés 12:13).

¿Nojua timotekipachojtosej tlaj tijmatisej ni tlamantli? Ma tikitakaj tlen kipanok Hans. * Maske achtouia kimatiyaya se kentsi tlen toTeotsij, amo kipaleuik ipan inemilis pampa kitekiuiyaya drogas, siuanemiyaya, kichiuayaya tlen amo kuali uan kipaktiyaya kitekiuis motos. Ya kiijtok: “Maske nijchiuayaya nochi ni tlamantli, amo niyolpakiyaya”. Kema kipixtoya se 25 xiuitl, Hans mosentlalik kiixmatis toTeotsij, yeka pejki momachtia Biblia. Teipa kuali mouampojchijki iuaya Jehová uan kikuamachilik kenke tiitstokej, nopa kipaleuik ma kipatla inemilis uan ma moatsonpoliuilti kej se Jehová itlajtoltemajka. Senkistok tlatekipanojtok se matlaktli xiuitl kej precursor. Ya kiijtoua: “Tlauel tiyolpakis tlaj tijtekipanos Jehová uan amo tlaj tijchiuas seyok tlamantli. Tlauel nechpaleuijtok pampa nikixmati Jehová”.

Maseualmej amo san kintekipachoua kimatisej kenke tiitstokej, nojkia kema kiitaj ipan Tlaltipaktli pano tlen amo kuali, kichiua ma motlajtlanikaj sekinok tlamantli.

¿Kenke kiampa panok?

Kema se akajya kiixnamiki se kuesoli, nima motlajtlania: ¿Kenke kiampa panok? Tlaj tijnekij tikijiyouisej nopa kuesoli, achtoui moneki tijmatisej kenke kiampa techpano. Uan tlaj katli kiixnamiki nopa kuesoli amo kimati kenke kiampa kipanok, nojua tlaijiyouijtok uan amo yolpaki. Ma tikitakaj tlen kipanok se tenaj katli itoka Bruni.

“Ya panok se keski xiuitl mijki nopilsiuapil Susanne. Na nitlaneltokayaya ipan toTeotsij, yeka niajki nikitato se totajtsi pampa nijnekiyaya ma nechyolchikaua. Ya nechiljuik toTeotsij kiuikak pampa kinekiyaya se iluikaejketl. Kema mijki nopilsiuapil tlauel nechyolkokok uan nojkia kichijki tlauel ma nijkualankaita toTeotsij”. Bruni tlaijiyouijtoya uan moyolkokojtoya miak xiuitl. Nojua kiijtoua: “Se Jehová itlajtoltemajka nechnextilik ika Biblia kenke amo kinamikiyaya nijkualankaitas toTeotsij, uan nijkuamachilik ya amo kiuikatoya Susanne ipan iluikak uan amo eliyaya se iluikaejketl. Nopa kokolistli tlen kipixtoyaj eli pampa titlajtlakolejkej. Nosiuapil kejuak kochtok uan Jehová nechka kiyolkuis. Nojkia nijyekok toTeotsij kinchijchijki maseualmej pampa kinekiyaya nochipa ma itstokaj ipan se yejyektsi xochimili ipan Tlaltipaktli, uan nopa nechka mochiuas. Kema nijyekok kenijkatsa eli Jehová, kichijki ma nijneki nijnechkauis uan ayokmo tlauel nimoyolkuesok” (Salmo 37:29; Hechos 24:​15; Romanos 5:​12).

Tlauel miakej maseualmej tlaijiyouiaj pampa onka tlauilankayotl, mayantli uan kema kintlasojsoljuilia se tlenijki. Bruni kuali kiyolmatki kema kiitak ipan Biblia Jehová amo kichiua ma techpano tlen amo kuali yon amo kinekiyaya ma titlaijiyouikaj uan nojkia nechka kitlamiltis tlen amo kuali. Nochi tlen nama pano kinextia tiitstokej ipan “itlamia tonali” uan nechka moaxitis kema tlamis tlen techtlaijiyouiltia (2 Timoteo 3:​1-5; Mateo 24:​7, 8).

¿Kenijkatsa uelis tikixmatis toTeotsij?

Maske Hans uan Bruni tlaneltokayayaj ipan toTeotsij, kimatiyayaj tlen amo melauak pampa amo kuali kiixmatiyayaj. Kema mosentlalijkej kuali kiixmatisej Jehová, kiselijkej miak tlateochiualistli. Kema kimatkej tlen achtouia motlajtlaniyayaj, kinpaleuik kuali ma kiyolmatikaj uan ma motemachikaj ipan tlen kiselisej teipa. Miakej Jehová itlajtoltemakauaj nojkia kiampa kinpanotok.

Tlaj tijnekij tikixmatisej Jehová moneki kuali timomachtisej Biblia, pampa nopaya kiijtoua kenijkatsa eli uan tlake kineki ma tijchiuakaj. Ipan achtoui siglo kiampa kichijkej se keskij maseualmej. Nopa tepajtijketl Lucas kiijtok nopa tlaneltokanij tlen tlanechikoli tlen Berea (Grecia) “kitlakakilijkej itlajtol toTeko ika pakilistli uan teipa mojmostla kitemouayayaj ipan iTlajtol toTeko para kimatisej intla melauak tlen Pablo kiniljuik o axtle” (Hechos 17:​10, 11).

Nojkia, Cristo itokilijkauaj tlen achtoui siglo mosentiliyayaj (Hechos 2:​41, 42, 46; 1 Corintios 1:​1, 2; Gálatas 1:​1, 2; 2 Tesalonicenses 1:⁠1). Uan ipan ni tonali nojkia kiampa kichiuaj. Jehová itlajtoltemakauaj nojkia mosentiliaj uan kinpaleuiaj sekinok ma kinechkauikaj Jehová uan ma kitekipanokaj ika miak pakilistli. Tlaj timouikas ininuaya Jehová itlajtoltemakauaj katli itstokej nechka mochaj, mitspaleuis nojua kuali tikixmatis Jehová pampa maseualmej kinextiaj se keski tlamantli kej ininTeotsij, uan Jehová itlajtoltemakauaj kichiuaj kampeka kinextisej kuajkuali tlamantli tlen toTeotsij kinextia (Hebreos 10:​24, 25).

¿Timoiljuia san tlapik tlaj tijchiuas kampeka tikixmatis toTeotsij? Ximoiljui ipan ni: kema tijnekij tijchiuasej se tlamantli ipan tonemilis nojkia moneki tijchiuasej kampeka. Ma timoiljuikaj kenijkatsa nopa atletas kichiuaj se ueyi kampeka mokualchijchiuasej. Se neskayotl, Jean-Claude Killy, katli eua Francia, uan kitlantok se medalla de oro olímpico ipan esquí, kiijtoua tlake moneki kichiuas se akajya katli kineki kintlanis sekinok: “Moneki timokualchijchiuas matlaktli xiuitl uan nochipa timoiljuijtos kenijkatsa titlatlanis [...]. Sejse xiuitl moneki timoiljuijtos uan timokualchijchiuas ipan nopa tlamantli”. ¡Maske mokualchijchiuaj miak xiuitl, san kitekiuiaj matlaktli minutos! Yeka, nojua eli tlauel ipati tikixmatis Jehová pampa nopa mitspaleuis tijselis tlateochiualistli tlen uejkauas nochipa.

Kuali timouampojchiuas iuaya toTeotsij

Nochi techpaktiskiaj kuali tiitstosej. Yeka, tlaj tijneki tijmatis kenke tiitstokej uan kenke onka se keski tlamantli tlen kintlaijiyouiltia maseualmej, uajka ximosentlali timomachtis Biblia, kiampa tikixmatis Jehová. Tlaj kiampa tijchiuas, mitspaleuis kuali tiitstos nochipa.

¿Asis se tonali kema ayokmo tijyekosej tlen Jehová? Katli kiuikaj miak xiuitl kitekipanojtokej Jehová nojua mosentlachiliaj ika tlen kiyekojkej uan tlen nojua kiyekojtiauij. Uan tlaj nojua kuali tikixmajtiasej toTeotsij, tlauel tiyolpakisej uan kuali timouikasej iuaya. Ma timoyoliljuikaj kej apóstol Pablo, ya kiijtok: “ ¡Nelia ueyi toTeko Dios uan onpano ueyi itlalnamikilis uan nochi tlen yajaya kimati! Axaka uelis kimachilis tlen toTeko motlalijtok kichiuas. Niyon axueli tijmatisej kejatsa kichiuas tlamantli, niyon nopa ojtli tlen kiuika. ¿Ajkeya kimachilia itlalnamikilis toTeko? ¿Ajkeya kimachtis toTeko tlake ma kichiua? ¡Axaka!” (Romanos 11:​33, 34).

[Tlatsintla kiijtoua]

[Tlajtoli katli pankisa]

Maseualmej nojua motlajtlaniaj tlen tlauel ipati: ¿Kenke tiitstokej? ¿Tlake techpanos teipa? ¿Kenke techchijchijkej?

[Tlajtoli katli pankisa]

“Kema nijyekok kenijkatsa eli Jehová, kichijki ma nijyolmati niitstok inechka”.

[Tlajtoli katli pankisa]

“Tlauel tiyolpakis tlaj tijtekipanos Jehová uan amo tlaj tijchiuas sekinok tlamantli. Tlauel nechpaleuijtok pampa nikixmati Jehová”.