Sejse tlen tojuantij moneki kitlapejpenis tlake kichiuas

“Sejse tojuantij moneki tijchiuasej cuentas ika toTeko Dios ika tlen tijchijtokej” (ROMANOS 14:12).

1. ¿Tlake kitlapejpenijkej kichiuasej nopa eyij telpokamej?

 IPAN Babilonia, Sadrac, Mesac uan Abednego kiixnamijkej se ueyi tlaouijkayotl. Monejki kitlapejpenisej tlaj kiueyichiuaskiaj nopa teteyotl kej Nabucodonosor kiijtojtoya o amo kichiuaskiaj uan kinmajkauaskiaj ipan tlitl. Amo kipiayayaj miak tonali, yeka amo ueliyayaj kintlatsintokiaj sekinok tlake kinamikiyaya kichiuasej. Inijuantij amo majmajkej uan nima kiijtojkej: “Totlanauatijka, [...] axtijueyichiuasej nopa tlaixkopinkayotl, niyon axtimotlankuaketsasej iixpa nopa teteyotl tlen oro tlen tijchijchijtok” (Daniel 3:1-18). Inijuantij ininselti kitlapejpenijkej tlake kichiuaskiaj.

2. 1) ¿Ajkia inijuantij kitlapejpenijkej tlen Jesús kichiuiliskiaj? 2) Ika tlen panok, ¿kinextia amo itlajtlakol nopa tlanauatijketl?

² Nama ma tikitakaj tlen panok chikuasej siglos teipa. Maske nopa tlanauatijketl kikajki nochi tlen nopa maseualmej kiijtojtoyaj tlen Jesús uan kiitak amo tlaixpanotoya, maseualmej kinekiyayaj ma kimiktikaj. Maske nopa tlanauatijketl amo kinekiyaya kiampa ma kichiuakaj, kinkajki sekinok ma kitlapejpenikaj tlen kichiuiliskiaj. Teipa kiijtok: “Na axnijuika tlajtlakoli para ma mikis ni tlakatl”. Kiampa kinextik amo kinekiyaya ma kitlajtlakoltikaj ika tlen kipanoskia Jesús. Yeka, kinkauilik maseualmej ma kikuapilokaj. Nopa tlanauatijketl, Poncio Pilato, amo kichijki tlen monekiyaya uan kinkajki sekinok ma kitlapejpenikaj tlen ya kinamikiyaya kitlapejpenis. Maske nopa tlanauatijketl kinektoskia kinextis ya amo itlajtlakol ika tlen panok, ya kichijki tlen tlauel amo kuali pampa amo kitlajtolsenkajki Jesús kej kinamiki (Mateo 27:​11-26; Lucas 23:​13-25).

3. ¿Kenke amo kinamiki tijkauasej sekinok ma kitlapejpenikaj tlen tijchiuasej?

³ Uan kema monekis tijtlapejpenisej tijchiuasej se tlenijki, ¿tielisej kej nopa eyij hebreos o tikinkauasej sekinok ma kitlapejpenikaj tlen moneki tijchiuasej? Tlaj se akajya kineki kitlapejpenis se tlenijki, moneki kuali tlalnamiktos. Yeka, tetajmej moneki kitlapejpenisej tlake kichiuasej ininkoneuaj katli nojua pilsiltsitsij. Maske kemantika uelis tlauel ouij tijmatisej tijtlapejpenisej tijchiuasej se tlenijki pampa achtoui moneki kuali timoiljuisej uan tikitasej se keski tlamantli, kena uelis kuali tijtlapejpenisej tlen tijchiuasej. Tojuantij uan sekinok katli kuali tlaneltokaj amo kinamiki tikijtosej tlake moneki kichiuas se akajya, pampa nopa sejse moneki kitlapejpenis (Gálatas 6:​1, 2). Ma tikilnamikikaj Biblia kiijtoua “sejse tojuantij moneki tijchiuasej cuentas ika toTeko Dios ika tlen tijchijtokej” (Romanos 14:12). Nojkia, “sejse tojuantij tijpiaj toteki para tijmokuitlauisej tlen tojuantij tonemilis” (Gálatas 6:⁠5). Uajka, ¿tlake techpaleuis kuali tijtlapejpenisej tlen tijchiuasej? Achtoui, moneki tikilnamikisej amo nochi tiuelij tijchiuaj uan ipan tlake tlamantli kena tiyajatij.

Tlen techpaleuis

4. ¿Kenijkatsa tlen kichijkej Adán uan Eva techpaleuia kuali tijtlapejpenisej tlen tijchiuasej?

⁴ Nopa achtoui tlakatl uan nopa achtoui siuatl, Adán uan Eva, kitlapejpenijkej tlen amo kuali: kikuajkej itlajka nopa “kuauitl tlen temachiltia tlen kuali uan tlen axkuali” (Génesis 2:​16, 17). ¿Kenke kiampa kichijkej? Biblia kiijtoua: “Nopa siuatl momakak cuenta para yejyektsi itlajka nopa kuauitl uan nesiyaya kuali para kikuas. Uajka kiixtokak pampa nojkia kinejki kipias tlalnamikistli. Yeka kitejki se uan kikuajki. Uan teipa kimakak iueue uan ya nojkia kikuajki” (Génesis 3:⁠6). Kej tikitaj, Eva san kitlapejpenik tlen ya kinekiyaya, uan nopa kichijki Adán nojkia ma kichiua kej ya. ¿Tlake panok pampa kiampa kichijkej? Nama tijpiaj tlajtlakoli uan nochi timikij (Romanos 5:12). Tojuantij amo nochi tiuelij tijchiuaj, yeka tlen kichijkej Adán uan Eva techmachtia se tlamantli: tlaj tijkauaj Jehová ma techyakana, techpaleuis kuali ma tijtlapejpenikaj tlen tijchiuasej.

5. ¿Kenijkatsa techyakana Jehová, uan tlake moneki tijchiuasej tlaj tijnekij ma techpaleui?

⁵ ¡Tlauel tiyolpakij pampa Jehová tlauel kuali techyakana! Biblia kiijtoua: “Intla inmojuantij inkikauasej iojui toTeko uan inmokuapolosej, uajka ika inmoika inkikakisej se itos tlen kiijtos: ‘Axya ni nopa ojtli. Uajka ximokuepakaj uan xijtokilikaj ne ojtli’ ” (Isaías 30:21). Jehová kejuak technojnotsa ika iTlajtol, yeka moneki timomachtisej uan kuali tijmatisej tlen nopaya kiijtoua. Tlaj tijnekij kuali tijtlapejpenisej se tlenijki, moneki tijchiuasej kampeka kuali tijkuamachilisej tlamachtili tlen ouij. Nojkia, moneki tijtekiuisej totlalnamikilis uan kiampa tikitasej tlake tlamantli eli kuali uan tlake amo, ni kiijtosneki moneki tijchiuasej tlen timomachtiaj ipan Biblia (Hebreos 5:14).

6. ¿Tlake techpaleuis kuali ma elto totlalnamikilis?

⁶ Nojkia, totlalnamikilis techpaleuis kuali ma tijtlapejpenikaj se tlenijki pampa uelis tikitasej tlaj tlen tijchiuasej eli kuali, uan ‘techteljuis kema tijchiuaj tlen axkuali’ (Romanos 2:​14, 15). Tlaj tijnekij ma techpaleui totlalnamikilis, moneki kuali timomachtisej Biblia uan tijchiuasej tlen nopaya kiijtoua. Kema se akajya amo kipia kuali itlalnamikilis nima uelis moyakanas ika tlen sekinok kichiuaj uan monejnemiltis kej inijuantij momajtokej. Nojkia, kampa itstok uan tlen sekinok kiijtouaj uelis kichiuas amo kuali ma kitlapejpeni tlen tijchiuas. ¿Tlake pano ika totlalnamikilis kema amo tijtlakakiliaj uan tikixpanoj tlen Biblia tlanauatia? Kej panotias tonali, ayokmo techyolkokos. Uelis elis kej kema se tlapiali kitlaliliaj se sello ika se tepostli tlen tlauel totonik, uan teipa ayokmo kikokoua kampa kitlatijkej (1 Timoteo 4:⁠2). Uan kema totlalnamikilis moyakana ika tlen Biblia kiijtoua, techpaleuis ma tijtlapejpenikaj tlen tijchiuasej.

7. ¿Tlake techpaleuis kuali ma tijtlapejpenikaj tlen tijchiuasej?

⁷ Kej tikitstokej, tlaj tijnekij kuali tijtlapejpenisej tlen tijchiuasej, moneki kuali tijmatisej tlen Biblia kiijtoua uan tijmatisej kenijkatsa tijchiuasej ipan tonemilis. Yeka, amo kinamiki nima tijtlapejpenisej se tlenijki, moneki tijchiuasej kampeka tikitasej tlen Biblia techtlajtolmaka uan timoyoliljuisej ipan nopa tlamantli. Tlaj kuali tijmatij tlen Biblia tlamachtia uan tlaj totlalnamikilis moyakana ika tlen nopaya kiijtoua, techpaleuis kuali tijtlapejpenisej tlen tijchiuasej, maske uelis monekis nima tijtlapejpenisej se tlenijki kej kichijkej Sadrac, Mesac uan Abednego. Nama, ma tikitakaj ome tlamantli tlen moneki tijtlapejpenisej, uan kiampa tijnextisej tlaj kuali titlalnamikij.

¿Ajkia elij touampoyouaj?

8, 9. 1) ¿Tlake textos techpaleuia amo ma timouampojchiuakaj ininuaya katli kichiuaj tlen amo kuali? 2) ¿Moneki amo timouampojchiuasej san ininuaya katli kichiuaj tlen amo kuali? Xikixtoma kenke kiampa tikijtoua.

⁸ Apóstol Pablo kiijkuilok: “Intla se kuali tlakatl nemi ika fiero tlakamej, kiijtlakosej nopa kuali tlen kinekiyaya kichiuas” (1 Corintios 15:33). Uan Jesús kiniljuik itokilijkauaj: “Axininaxkauaj ni Tlaltipaktli” (Juan 15:19). Kema tijpouaj ni textos, tikitaj amo kinamiki timouampojchiuasej ininuaya katli momekatiaj, auilnemij, tlachtekij, moiuintiaj o katli kichiuaj sekinok tlamantli tlen amo kuali (1 Corintios 6:​9, 10). Uan kema kuali timomachtiaj Biblia, nojkia tikitaj amo kinamiki tikitasej tlamantli tlen amo kuali ipan cine, televisión, computadora o tijpouasej ipan sekinok amochtli. Nojkia, amo kinamiki tikamanaltisej ipan internet ‘ininuaya katli kipiaj ome ininixayak’ (Salmo 26:4).

⁹ Uajka, ¿ueliskia timouampojchiuasej iuaya se akajya katli amo kichiua tlen axkuali maske amo tlaneltoka ipan toTeotsij? Biblia techiljuia “nochi sekinok tlakamej kampa ueli ipan Tlaltipaktli mokauaj ipan ichikaualis Axkualtlakatl” (1 Juan 5:19). Nopa kiijtosneki maseualmej katli amo kuajkualmej amo elij san katli momekatiaj o katli kichiuaj sekinok tlamantli. Yeka, san moneki timouampojchiuasej ininuaya katli kiikneliaj Jehová.

10. ¿Tlake techpaleuis kuali tijtlapejpenisej tlaj tiitstosej ininuaya sekinok maseualmej?

¹⁰ Amo uelis timouejkatlalisej tlen nochi maseualmej yon amo moneki kiampa tijchiuasej (Juan 17:15). Nochi Cristo itokilijkauaj titlajtolmoyauaj, tiauij escuela o titekitij, uan nochi ni tlamantli kichiua ma tiitstokaj ininuaya sekinok maseualmej. Uan katli monamiktijtokej iuaya se katli amo tlaneltoka, uelis nojua tlauel itstokej ininuaya sekinok katli amo kitekipanouaj Jehová. Tlaj totlalnamikilis moyakana ika Biblia, tijkuamachilisej amo eli sanse tiitstosej ininuaya sekinok maseualmej uan timouampojchiuasej ininuaya (Santiago 4:⁠4). Kiampa uelis kuali tijtlapejpenisej tlaj tijchiuasej se keski tlamantli ipan escuela, kej timijtotisej uan timauiltisej, o tlaj tiasej titlakuatij ininuaya katli titekitij.

Kuali ma tijtlapejpenikaj kanke titekitisej

11. ¿Tlake achtoui moneki tikitasej kema tijtemouaj se tekitl?

¹¹ Tlaj tijchiuaj tlen Biblia kiijtoua, techpaleuis kuali ma tijtlapejpenikaj se tekitl, uan kiampa uelis tikinpanoltisej tochampoyouaj (1 Timoteo 5:⁠8). Achtoui moneki timoiljuisej tlake tijchiuasej ipan nopa tekitl. Amo kinamiki titekitisej kampa kiixpano tlen Biblia kiijtoua. Yeka, se Cristo itokilijkaj amo kinamiki tekitis kampa kiueyichiuaj teotsitsij, kampa tlachtekij, amo kuali kitekiuiaj estli o ipan sekinok tekitl kampa kiixpano Biblia. Nojkia, amo istlakati yon tekajkayaua maske katli kitekimaka kiiljuia kiampa ma kichiua (Hechos 15:29; Apocalipsis 21:⁠8).

12, 13. ¿Tlake tlamantli nojkia moneki tikilnamikisej kema tijtlapejpenisej se tekitl?

¹² ¿Uan tlaj se tekitl nesi amo kiixpano se tlanauatili tlen Biblia kiijtoua? Tlaj nojua kuali timomachtiaj Biblia uan tikitaj tlake tlamantli kikualankaita Jehová, techpaleuis ma tikilnamikikaj onka sekinok tlamantli tlen moneki tikitasej. Se neskayotl, ¿moneki tekitis se toikni kampa tlen kichiuaj kiixpano tlen Biblia kiijtoua, kej kema se akajya kiselia llamadas kampa mauiltiaj uan kitlanij tomij? Nojkia, moneki timoiljuisej kanke kikixtiaj nopa tomij uan kanke titekitij. Tlaj se toikni tekiti iselti, ¿tlapaleuiskia kampa monekiskia kixauas o kitlapas se iglesia, maske kimati tlaj kiampa kichiuas kinpaleuis religiones tlen amo melauak? (2 Corintios 6:​14-16).

¹³ Nama ma timoiljuikaj katli techtekimaka kiselia se tekitl kampa moneki moxauas o motlapas se iglesia. Tlaj kiampa panos, moneki tikitasej tlaj tojuantij tijyakanasej nopa tekitl uan tlaj tlauel titekitisej nopaya. ¿Uan ueliskia titlapaleuisej ipan se tekitl kampa amo kiixpano Biblia, kej titemajmakasej amatlajkuiloli, maske tijmatij nopaya itstokej katli kichiuaj tlen amo kuali? Moneki tikitasej tlake kiijtoua Mateo 5:45. Nojkia, moneki tijmajtosej ika tlen mojmostla tijchiuasej amo ma techyolkoko totlalnamikilis (Hebreos 13:18). Kej tikitstokej, tlaj tijnekij kuali tijtlapejpenisej se tekitl, moneki tikitasej tlake tlamantli kipaktia Jehová uan tlake amo, uan ika tlen tijchiuasej amo ma techyolkoko totlalnamikilis.

‘Ximoiljui tlake ipakilis toTeko ipan nochi tlamantli tlen tijchiuas’

14. ¿Tlake moneki tijchiuasej kema tijtlapejpenisej se tlenijki?

¹⁴ ¿Uan tlake tijchiuasej tlaj monekis tijtlapejpenisej kanke timomachtisej uan tlaj tijselisej se keski pajtli? Tlauel techpaleuis tlaj tikilnamikij tlake tetlajtolmaka Biblia uan timoiljuiaj kenijkatsa uelis tijchiuasej ipan tonemilis. Tlanauatijketl Salomón, katli itstoya ipan Israel, kiijtok: “Ximotemachi ipan toTeko ika nochi moyolo. Amo xijtokili san tlen motlalnamikilis mitsiljuia. Ximoiljui tlachke ipakilis toTeko ipan nochi tlamantli tlen tijchiuaskia, uan yajaya mitsyakanas ipan se ojtli tlen xitlauak” (Proverbios 3:​5, 6).

15. ¿Tlake tijyekouaj tlen kichijkej Cristo itokilijkauaj kema monekis tijtlapejpenisej tijchiuasej se tlenijki?

¹⁵ Nochipa ma tikilnamiktokaj tlen tijtlapejpeniaj uelis kinpaleuis o amo sekinok maseualmej. Se neskayotl, Cristo itokilijkauaj tlen achtoui siglo ayokmo kichiuayayaj se keski tlamantli tlen kiijtouayaya nopa Tlanauatili tlen Moisés kimakakej. Nama inijuantij ueliyayaj kikuaj se keski tlakualistli, tlen uejkajkia kiitayayaj amo tlapajpaktik. Maske kiampa kichiuayayaj, Pablo kiniljuik tlake ueliskiaj kichiuasej tlaj se tlakualistli kitlaliyayaj ininixpa teotsitsij. Ya kiijtok: “Intla se tlakualistli kichiuas para se noikni ma tlajtlakolchiua, axkema nijkuas sampa para axnijchiuas ma uetsi noikni” (1 Corintios 8:​11-13). Toikniuaj tlen achtoui siglo monekiyaya kichiuasej kampeka amo kinyolkokosej inintlalnamikilis sekinok. Nojkia, ipan ni tonali amo kinamiki tijtlapejpenisej se tlenijki tlen kichiuas ma “tlajtlakolchiua” se toikni (1 Corintios 10:​29, 32).

Ma tijtemokaj toTeotsij itlalnamikilis

16. ¿Kenijkatsa tlamaijtoli techpaleuia kema tijtlapejpeniaj se tlenijki?

¹⁶ Tlamaijtoli tlauel techpaleuis kema monekis tijtlapejpenisej tlake tijchiuasej. Santiago kiijtok: “Intla se tlen inmojuantij kineki achi más tlalnamikilistli pampa axkimati tlachke ipakilis toTeko ipan inemilis, ma kitlajtlani toTeko uan yajaya kimakas. Yajaya tlen temaka miak tlalnamikilistli, uan axkiajuas pampa kitlajtlania” (Santiago 1:⁠5). Jehová amo kualani kema tijtlajtlaniliaj se tlenijki, yeka uelis tikiljuisej ma techmaka tlalnamikilistli uan kiampa kuali tijtlapejpenisej tlen tijchiuasej. Kema tikiljuiaj tlen nelnelia techtekipachoua uan tijkauaj ma techyakana, itonal kichiuas kuali ma tijkuamachilikaj nopa textos tlen tijpouaj uan techilnamikilis kema tikixpanoj tlen Biblia kiijtoua.

17. ¿Kenijkatsa sekinok uelis techpaleuisej ma tijtlapejpenikaj tlen tijchiuasej?

¹⁷ ¿Uelis techpaleuisej sekinok ma tijtlapejpenikaj tlake tijchiuasej? Kena. Ipan tlanechikoli, Jehová kintlalijtok toikniuaj katli kuali tlaneltokaj (Efesios 4:​11, 12). Yeka, uelis tikintlatsintokisej kema monekis tijtlapejpenisej se tlamantli tlen tlauel ipati. Toikniuaj kuali kimatij tlen Biblia tetlajtolmaka uan kipiaj miak xiuitl tlatekipanojtokej, yeka uelis techpaleuisej ika se keski textos uan kiampa tikachtouitlalisej tlen tlauel ipati (Filipenses 1:​9, 10). Maske uelis techpaleuisej, moneki tikilnamikisej inijuantij amo uelis kiijtosej tlake tijtlapejpenisej, pampa nopa san tojuantij kinamiki tijchiuasej.

¿Nochipa kuali kisas tlen tijtlapejpenisej?

18. ¿Tlake ueliskia panos maske kuali tlen tijtlapejpenijkej?

¹⁸ Tlauel techpaleuis kema tijtlapejpenisej tijchiuasej se tlenijki uan amo tikixpanosej tlen Biblia kiijtoua, maske uelis kemantika tikixnamikisej tlen amo kuali. Se neskayotl, Sadrac, Mesac uan Abednego kimatiyayaj tlaj amo kiueyichiuaskiaj nopa teteyotl ueliskiaj mikisej (Daniel 3:​16-19). Uan kema nopa apóstoles kiniljuijkej katli itstoyaj ipan Sanedrín san kineltokaskiaj toTeotsij uan amo maseualmej, nopa tlakamej kinuijuitejkej apóstoles uan teipa kinkajkej ma yakaj (Hechos 5:​27-29, 40). Nojkia, ma tikilnamikikaj “tlen ueli tlamantli axkuali ueli kipantis aki ueli tlakatl kema axkichia”, uan nopa uelis kichiuas ma kiixnamiki tlen amo kuali ika tlen kitlapejpenik (Eclesiastés 9:11). Yeka, tlaj tijpiaj se kuesoli maske kuali tlen tijtlapejpenijkej, uelis timotemachisej Jehová techpaleuis ma tikijiyouikaj, uan ya techteochiuas (2 Corintios 4:⁠7).

19. ¿Tlake techpaleuis kuali ma tijtlapejpenikaj se tlamantli?

¹⁹ Kej tikitstokej, kema tijtlapejpenisej tijchiuasej se tlamantli moneki tikitasej tlen Biblia kiijtoua, timoyoliljuisej ipan tlen tijpouaj uan tijchiuasej ipan tonemilis. ¡Tlauel tijtlaskamatiliaj Jehová pampa techpaleuia ika itonal uan ika toikniuaj katli kuali tlaneltokaj! Yeka, kuali ma tijtekiuikaj nochi tlen Jehová techmakatok, uan ma tikilnamiktokaj sejse tojuantij kinamiki kuali tijtlapejpenisej tlake tijchiuasej.

¿Tlake tijyekok?

• ¿Tlake moneki tijchiuasej uan kiampa kuali tijtlapejpenisej se tlenijki?

• ¿Kenijkatsa touampoyouaj uelis techpaleuisej kuali ma titlaneltokakaj?

• ¿Tlake moneki tikilnamikisej kema tijtlapejpenisej se tekitl?

• ¿Tlake techpaleuis kuali tijtlapejpenisej tlen tijchiuasej?

[Tlajtlanili tlen monankilis]

[Tlaixkopinkayotl]

Tlen kitlapejpenijkej Adán uan Eva techmachtia se tlamantli tlen tlauel ipati

[Tlaixkopinkayotl]

Achtoui ma tikitakaj tlake kiijtoua Biblia, uan kiampa uelis tijtlapejpenisej tlake tijchiuasej