“XIA mochaj, xikinpouili moteixmatkauaj nopa ueyi tlamantli tlen toTeko mitschiuilijtok uan keja mitsiknelia”. Kiampa kiiljuik Jesús se tlakatl katli kinekiyaya mochiuas se itokilijka. Uelis ichampoyouaj itstoyaj nechka altepetl Gadara, kampa eltok ueyi atl Galilea. Tlen Jesús kiijtok kinextia se tlamantli tlen nochi maseualmej kinekij kichiuasej: kiniljuisej ininchampoyouaj se keski tlamantli tlen tlauel kipatiitaj (Mar. 5:19).

Maske maseualmej nojua kiampa kichiuaj, sekij nojua tlauel kinextiaj uan sekinok amo. Yeka kema se akajya peua kitekipanoua toTeotsij Jehová, kineki kiniljuis ichampoyouaj tlen kineltoka. ¿Kenijkatsa uelis kichiuas? Uan ¿kenijkatsa uelis kinpaleuis ichampoyouaj katli kipiaj seyok religión o katli amo tlaneltokaj ipan toTeotsij? Biblia kiijtoua se keski tlamantli tlen tlauel techpaleuis.

Ipan achtoui siglo, Andrés elki se tlen nopa achtoui maseualmej katli kimatkej Jesús eliyaya nopa Mesías. ¿Ajkia nima kiiljuito? “Yajki xitlauak kitemoto iikni, Simón, uan kiiljuik: ‘Tijpantijkej nopa Mesías’. (Pampa ipan inintlajtol kitokaxtijkej nopa Cristo)”. Teipa kiuikak Pedro kampa itstoya Jesús uan kiampa ya nojkia ueliskia mochiuas se itokilijka (Juan 1:​35-42).

Kema panok se chikuasej xiuitl, Pedro itstoya ipan Jope uan kiiljuijkej ma yaui Cesarea, ichaj Cornelio katli kinyakanayaya tlateuianij. ¿Ajkia inijuantij itstoyaj kampa asito? Biblia kiijtoua: “Cornelio kinchixtoya [Pedro uan katli yauiyayaj iuaya]. Yajaya kinnotstoya ichampoyouaj uan iuampoyouaj tlen más kinixmatiyaya uan nochi kinchiayayaj sansejko”. Ika tlen kichijki Cornelio, kinpaleuik ichampoyouaj ma kitlakakilikaj Pedro uan kiampa inijuantij kitlapejpeniskiaj tlake kichiuasej (Hech. 10:​22-33).

¿Tlake techmachtia tlen kichijkej Andrés uan Cornelio ika ininchampoyouaj?

Andrés uan Cornelio kichijkej se keski tlamantli pampa kinekiyayaj kinpaleuisej ininchampoyouaj. Andrés kipaleuik iikni ma kiixmati Jesús, uan Cornelio kinsentilik ichampoyouaj pampa kinekiyaya ma kitlakakilikaj Pedro. Maske kiampa kichijkej, inijuantij amo kinchiualtijkej ininchampoyouaj ma mochiuakaj Cristo itokilijkauaj. ¿Tlake techmachtia ni tlamantli, uan kenijkatsa uelis tijchiuasej kej inijuantij? Uelis tikiniljuisej tochampoyouaj se keski tlamantli tlen Biblia tlen tlauel techpaktik, tijchiuasej se keski tlamantli kampa ueliskia kimatisej tlen Biblia tlamachtia uan tikinpaleuisej ma kinixmatikaj sekinok toikniuaj. Maske kiampa tijchiuasej, nochipa moneki tikintlepanitasej uan amo tijchiuasej amo kuali ma kiyolmatikaj yon tikintetsopasej. Tlaj tijnekij tijmatisej kenijkatsa uelis tikinpaleuisej, tlauel techpaleuis tlaj tikitasej tlen kinpanok Jürgen uan Petra, katli euaj Alemania.

Petra momachtiyaya ininuaya Jehová itlajtoltemakauaj uan moatsonpoliuiltik. Iueue kinyakanayaya soldados uan achtouia amo kipaktik pampa Petra pejki momachtia. Kema panotiajki tonali, iueue kiitak inijuantij tlamachtiaj tlen melauak, yeka teipa nojkia moatsonpoliuiltik uan nama tlatekipanoua kej ueuejtlakatl. ¿Tlake kiijtoua Jürgen kinpaleuis katli kinpiaj ininchampoyouaj katli amo kitekipanouaj Jehová?

Jürgen kiijtoua: “Amo xijchiualti nojkia ma kineltoka tlen ta tijneltoka yon xikiljui miak tlamantli tlen tijmati, tlaj kiampa tijchiuaskia uajka ayokmo kinekis mitstlakakilis. Kemantika uelis tikiljuis tlamantsitsij tlen tikitas kipaleuis o nojkia tijpaleuis ma kinixmati toikniuaj katli sanse ininxiui o katli kinpaktia kichiuasej sanse tlamantli. Kiampa kena uelis tijpaleuis mouikal”.

Apóstol Pedro uan ichampoyouaj Cornelio nima kinpaleuik tlen Biblia tlamachtia. Uan sekinok maseualmej katli itstoyaj ipan achtoui siglo, nojua tlauel uejkajkej.

Se keskij Jesús iuikaljuaj pejkej tlaneltokaj ipan ya kema tlajtolmoyauayaya. Se neskayotl, uelis Santiago uan Juan eliyayaj imachikniuaj, uan ininnana, Salomé, eliyaya iaui. Uelis ya eliyaya se tlen nopa “miakej [...] siuamej” katli kinpaleuiyayaj Jesús uan itokilijkauaj “ika tlen monekiyaya” (Luc. 8:​1-3).

Se keskij Jesús ichampoyouaj achtouia amo tlaneltokayayaj ipan ya. Se tonali, kema kipano se xiuitl Jesús moatsonpoliuiltijtoya, miakej maseualmej mosentilijkej ipan se kali pampa kinekiyayaj kitlakakilisej. “Uan kema kikajkej iteixmatkauaj [...], ualajkej para kiuikasej pampa kiijtouayayaj: ‘Molokojchijtok’ ”. Teipa, kema iikniuaj kiiljuijkej kanke ueliskia yas, ya amo kiniljuik tlake kichiuaskia. ¿Kenke kiampa kichijki? Pampa “inijuantij, axkineltokayayaj” (Mar. 3:21; Juan 7:⁠5).

¿Tlake techmachtia tlen Jesús kichijki? Ya amo moyolkokok kema sekij kiijtojkej uiuitixtoya. Uan kema mijki uan moyolkuik, kinyolchikajki ichampoyouaj pampa monextik iixpa iikni Santiago. Kema Jesús kiampa kichijki, kinpaleuik Santiago uan nopa sekinok iikniuaj ma motemachikaj ya eliyaya nopa Mesías. Teipa, inijuantij itstoyaj ininuaya itokilijkauaj uan sekinok tlaneltokanij ipan se kali tlen Jerusalén uan nojkia kiselijkej toTeotsij itonal. Uan kema panok tonali, Santiago uan Judas, katli eliyayaj Jesús iikniuaj, kiselijkej se tekitl tlen tlauel ipati (Hech. 1:​12-14; 2:​1-4; 1 Cor. 15:⁠7).

Ipan ni tonali, sanse kej ipan achtoui siglo, se keskij tochampoyouaj amo nima kitlapejpeniaj kitekipanosej Jehová. Ma tikitakaj tlen kipanok Roswitha, katli eliyaya católica kema iueue mochijki se Jehová itlajtoltemajka ipan 1978. Maske ya amo kipaktik pampa iueue kiampa kichijki, kema panok se keski xiuitl ayokmo kiampa moiljuik. Kiitstiajki Jehová itlajtoltemakauaj tlamachtiaj tlen melauak, uan ipan xiuitl 2003 moatsonpoliuiltik. ¿Tlake kipaleuik? Tlen kichijki iueue, maske achtouia isiua tlauel kitlaijiyouiltiyaya, ya kipiayaya iyolo uan amo sanse kichiuayaya. ¿Tlake kiijtoua Roswitha? “Uelis tijchiuas miak tlamantli tlaj nochipa tijpias moyolo”.

Monika moatsonpoliuiltik ipan 1974, uan omej ikoneuaj nojkia mochijkej Jehová itlajtoltemakauaj kema panok se diez xiuitl. Maske iueue Hans amo kualaniyaya pampa momachtiyayaj, ya moatsonpoliuiltik ipan xiuitl 2006. ¿Tlake kiijtouaj inijuantij? “Amo kema xijtlauelkaua Jehová maske teipa sekinok kinekisej kiampa xijchiua”. Hans nojkia kipaleuik pampa ichampoyouaj nochipa kinextiyayaj tlauel kiikneliaj. Uan motemachiyayaj se tonali nojkia kitekipanoskia Jehová.

Se tonali, Jesús kiijtok tlen Biblia tlamachtia eli kejuak atl tlen temaka nemilistli (Juan 4:​13, 14). Maske tijnekij tochampoyouaj nojkia kejuak ma kiikaj nopa atl tlen tlauel kinpaleuis, amo tijnekij tikinchiualtisej sanima ma kiikaj tlauel miak. Kema tikinpouilisej tochampoyouaj tlen tijneltokaj, uelis tijchiuasej kuali ma kiyolmatikaj o amo. Biblia kiijtoua: “Se tlakatl tlen itstok xitlauak iixpa toTeko moyoliljuia kejatsa tlanankilis” uan “se tlakatl tlen tlalnamiki, momokuitlauia ika tlen kiijtoua. Kuali kimati para teseseltis uan teyolpitsaua ika itlajtol keja kinamiki”. ¿Kenijkatsa uelis tijchiuasej tlen nikaj kiijtoua? (Prov. 15:28; 16:23).

Se siuatl katli kineki iueue ma kineltoka tlen ya kineltoka, “moyoliljuia kejatsa tlanankilis”. Nopa kiijtosneki amo nima kiijtoua tlen moiljuia uan kuali kiita tlen kiijtos. Amo kema moneki kinextis san ya tlauel tlalnamiki o kichiua tlen xitlauak uan iueue amo. Kiampa nochi tlen kiijtos kichiuas ma yolpaktokaj uan ma itstokaj ika tlaseuilistli. Uan tlaj kineki kuali kitlapejpenis tlen kiijtos, nopa siuatl uelis motlajtlanis: “¿Kema nikita noueue kuali kiyolmati uan kineki kamanaltis? ¿Tlake tlamantli kipaktia kiijtos kema kamanalti? ¿Tlake kipaktia kipouas? ¿Kipaktia ciencia, política o kema mauiltiaj? ¿Tlake uelis nijchiuas tlaj nijneki ma kipakti tlen Biblia tlamachtia uan nojkia nijtlepanitas tlen kiyolmati uan tlen moiljuia?”.

Amo san moneki tikiniljuisej tochampoyouaj ajachika tlen tijneltokaj tlaj tijnekij ma asi ipan ininyolo nopa kuali tlamachtili, nojkia moneki tijnextisej ipan tonemilis tlen tikiniljuiaj.

Jürgen katli achtouia tikijtojkej, kiijtoua: “Nochipa xijchiua ipan monemilis tlen Biblia kiijtoua. Kiampa mochampoyouaj kiitasej tijchiua tlen kuali maske amo kiijtosej”. Hans katli moatsonpoliuiltik treinta xiuitl teipa tlen isiua, nojkia kiijtoua: “Moneki kuali timonejnemiltisej. Nopa kichiuas tochampoyouaj katli amo kitekipanouaj Jehová ma kiitakaj nelnelia techpaleuia tlen Biblia tlamachtia”. Tochampoyouaj moneki kiitasej amo tielij sanse kej sekinok pampa kuali titlaneltokaj uan tlen timomachtiaj techpaleuia kuali ma timonejnemiltikaj.

Apóstol Pedro kiniljuik ni tlamantli siuamej katli kinpiayayaj ininueue katli amo tlaneltokayayaj: “Intla se siuatl kipia iueue, ma kikauili iueue para ma kiyakana. Uan intla kej nopa kichiua, yonke se kipia iueue tlen axkineltoka itlajtol toTeko, iueue kiitas para kuali iyolis isiua, uan ika yolik kineltokas toTeko yonke axtleno isiua kiiljuia. Kiitasej senkistok kuali tlen inkichiuaj uan kenijkatsa tlauel intlatlepanitaj. Axtlauel ximokuatotonikaj para se inmoyejyejka tlen inmotlalilisej inmopani. Amo ximokuesokaj kenijkatsa inmoxiljuisej, uan tlake tlamantli oro inmotlalilisej uan tlake yoyomitl patiyo inmokentisej. Más kuali xijtemokaj se inmoyejyejka tlen eltok ipan inmoyolo. Xijpiakaj teiknelili ika nochi uan nochipa ximoechkapanokaj para kej nopa inkipiasej inmoyejyejka tlen axkema tlamis, pampa ya nopa tlen ipati iixtla toTeko” (1 Ped. 3:​1-4).

Pedro kiijtok nopa siuamej katli kitekipanouaj Jehová uelis kinpaleuisej ininueue ma tlaneltokakaj ika tlen kichiuaj. Se tosiuaikni katli itoka Christa, moatsonpoliuiltik ipan xiuitl 1972 uan kiilnamiki tlen kiijtoua nopa texto, yeka nojua kichiua kampeka kipaleuis iueue ma tlaneltoka. Maske iueue momachtia ininuaya Jehová itlajtoltemakauaj, ayamo moiljuijtok kitekipanos Jehová. Kemantika yaui tlanechikoli uan kuali mouika ininuaya toikniuaj. Uan inijuantij kitlepanitaj uan kimatij ya kinamiki kitlapejpenis tlen kichiuas. ¿Tlake kichiua Christa pampa kineki ma asi ipan iyolo nopa kuali tlamachtili?

Ya kiijtoua: “Nimosentlalijtok nijchiuas tlen Jehová kineki. Uan nojkia nijchiua kampeka kuali nimonejnemiltis uan kiampa nijpaleuis noueue nojkia ma tlaneltoka maske amo tleno nikiljuia. Nochipa nijchiua tlen ya kineki tlaj amo kiixpano tlen Biblia tetlajtolmaka. Nijtlepanita uan nijmati ya kinamiki kitlapejpenis tlen kichiuas, uan nimotemachia Jehová kipaleuis”.

Tlen kipanok Christa kinextia tlauel ipati tijkuamachilisej tlen sekinok kiyolmatij. Maske ya nochipa yaui tlanechikoli uan tlajtolmoyaua, nojkia kichiua kampeka kikuamachilis tlen iueue kiyolmati. Ya kimati moneki kinextilis iueue kiiknelia, kichiuas kampeka itstos iuaya uan kimokuitlauis. Nochi moneki tijchiuasej kampeka tijkuamachilisej tlen kiyolmatij tochampoyouaj katli amo kitekipanouaj Jehová. Biblia kiijtoua: “ToTeko kitlalijtok se kuali hora para sejse tlamantli”. Ni nojkia kiijtosneki moneki tijchiuasej kampeka tiitstosej ininuaya tochampoyouaj katli amo kitekipanouaj Jehová, kej tonamik. Kema kiampa kichiuaj, kinpaleuia kuali ma mokamanaljuikaj. Uan miakej kiitstokej nopa kinpaleuia amo ma kiyolmatikaj itstokej ininselti, kinuejkatlalijtokej yon ma kualanikaj (Ecl. 3:⁠1).

Itata Holger, moatsonpoliuiltik veinte xiuitl teipa tlen sekinok ichampoyouaj. Holger kiijtoua: “Tlauel ipati tijnextilisej touikal tikikneliaj uan ma kiita timomaijtouaj ipampa”. Uan Christa kiijtoua: “Mojmostla nimotemachijtos se tonali noueue kitekipanos Jehová”. Nochipa moneki timoiljuisej se tonali tochampoyouaj kichiuasej tlen Biblia kiijtoua. Amo ma tikintlauelkauakaj.

Moneki nochipa kuali timouikasej ininuaya tochampoyouaj, tikinpaleuisej ma kiixmatikaj tlen Biblia tlamachtia uan tijchiuasej ma asi ipan ininyolo. Tlaj tijnekij kiampa tijchiuasej, nochipa moneki tikinnankilisej “ika yamanik uan ika tlatlepanitakayotl” (1 Ped. 3:15).