FERNANDO a majmauiyaya se kentsi pampa omej ueuejtlakamej kiiljuijkej kinekiyayaj kamanaltisej iuaya. Se tonali, kema ya kinpaxalojtoya toikni katli tepaxaloua chijchikuasej metstli, ueuejtlakamej kiiljuijkej tlake monekiyaya kichiuas tlaj kinekiyaya kiselis sekinok tekitl ipan tlanechikoli. Kema panotiajki tonali, Fernando moiljuiyaya tlaj se tonali kitekimakaskiaj kej ueuejtlakatl. Namanok sampa kinpaxalok toikni katli tepaxaloua chijchikuasej metstli. Nama, ¿tlake kiiljuisej ueuejtlakamej?

Se tlen nopa omej toikniuaj kipouilik 1 Timoteo 3:1 uan kiiljuik kiselijtoyaj se amatlajkuiloli kampa kiijtouayaya kitekimakatoyaj kej ueuejtlakatl. Fernando kuali kintlakakilik ueuejtlakamej, mosentlachilik uan kiijtok: “¿Tlake?”. Nopa toikni sampa kiompauilik, uan Fernando ixuetskak. Uan kema kinmatiltijkej toikniuaj ipan tlanechikoli, nochi yolpajkej.

Tlauel kuali tlaj se akajya kineki ma kitekimakakaj ipan tlanechikoli. Apóstol Pablo kiijkuilok: “Intla se tlakatl kineki mochiuas se ueuejtlaneltokaketl para tlayakanas ipan tlasentilistli, kineki se kuali tekitl” (1 Tim. 3:1). Ni tlajtoli kinpaleuijtok miakej toikniuaj nojua ma kinekikaj kiselisej sekinok tekitl ipan tlanechikoli. Yeka, ipan Jehová itlanechikol itstokej miakej ueuejtlakamej uan tlapaleuianij katli kuali kichiuaj ininteki. Uan pampa momiakiliaj toikniuaj, nojua monekij katli ‘kinekisej mochiuasej ueuejtlaneltokanij para tlayakanasej ipan tlasentilistli’. ¿Kenijkatsa moneki kichiuasej? Katli kinekij elisej ueuejtlakamej, ¿moneki ajachika motlajtlanijtosej kema kinmakasej nopa tekitl, kej kichijki Fernando?

Nopa tlajtoli “kineki mochiuas” mokixtijtok ipan tlajtoli griego uan kineki kiijtos tlauel tijnekis se tlamantli uan kejuak timotilanas pampa tijnekis tikasis se tlenijki. Ni kichiua ma timoiljuikaj kema se akajya motilana pampa kineki kitekis se kuauitl itlajka. Apóstol Pablo amo kinejki kiijtos se akajya kinekis mochiuas se ueuejtlakatl san pampa kineki kinnauatis sekinok. ¿Kenke amo? Pampa katli ika nochi ininyolo kinekij elisej ueuejtlakamej kinekij kichiuasej “se kuali tekitl” uan amo kinekij ma kinuejkapantlalikaj.

Tlen moneki kichiuas katli kineki ma kitekimakakaj ipan tlanechikoli ijkuilijtok ipan 1 Timoteo 3:2-7 uan Tito 1:5-9. Ika tlen kiijtoua ni textos, se ueuejtlakatl tlen miak xiuitl tlatekipanojtok, katli itoka Raymond, kiijtoua: “Na nikita tlauel ipati kenijkatsa tielij. Maske moneki kuali tikamanaltis uan titlamachtis, nojkia tlauel ipati sekinok ma kiitakaj kuali timonejnemiltia, amo san kej ueli tijchiua se tekitl, timonejnemiltia ika tlalnamikilistli, tijtlamiltia moteki, kuali tikinselia katli mitspaxalouaj uan tijpia moyolo”.

Se toikni katli kuali iyolo kinextia amo aka uelis kiteiljuis pampa amo kitlachilia yon kichiua tlen Jehová kiita sokiyo, kichiua tlen xitlauak, monauatia, kinextia tlalnamiki, kinkuamachilia sekinok uan amo san kej ueli kichiua se tlamantli. Yeka, toikniuaj motemachiaj kinpaleuis kema kipiasej tlaouijkayotl uan kuali kiyakanas tlanechikoli. Kuali kinselia sekinok uan kiampa kinyolchikaua telpokamej uan katli pejtokej monechikouaj touaya. Uan kipaktia kichiuas tlen kuali, kinyolchikaua uan kinpaleuia katli mokokouaj uan katli ya ueuejtixtokej. Kichiua ni kuajkuali tlamantli pampa kineki kinpaleuis sekinok uan amo pampa kineki nima ma kitekimakakaj kej ueuejtlakatl. b

Nochi ueuejtlakamej uelis kintlajtolmakasej uan kinpaleuisej katli kinekij kipiasej sekinok tekitl ipan tlanechikoli. Nopa toikni katli kineki kiselis sekinok tekitl ipan tlanechikoli moneki kichiuas se keski tlamantli. Henry, katli miak xiuitl tlatekipanojtok kej ueuejtlakatl, kiijtoua: “Tlaj tijneki ma mitstekimakakaj ipan tlanechikoli, xijchiua se ueyi kampeka tijchiuas tlen Jehová kiijtoua moneki kichiuasej katli kinekij elisej ueuejtlakamej”. Teipa kiijtok tlen ijkuilijtok ipan Eclesiastés 9:10: “ ‘Nochi tlamantli tlen asi momako para tijchiuas, xijchiua ika nochi nopa chikaualistli tlen tijpia’. ni kiijtosneki ika nochi mochikaualis. Kuali xijchiua moteki kema ueuejtlakamej mitsiljuisej xikinpaleui ika se tlamantli ipan tlanechikoli. Kuali xijseli nochi tekitl tlen mitsmakasej maske kemantika san titlachpanas. Xikilnamiki nochi kiitasej nopa tekitl tlen ta tijchiua”. Tlaj tijneki teipa tielis se ueuejtlakatl moneki kuali titekitis uan tielis titemachtli ipan nochi tekitl tlen mitsmakaj ipan tlanechikoli. Nochipa moneki tijnextis timoechkapanoua, amo tijnekis titlapijpias yon timoueyimatis (Mat. 23:8-12).

Sekij katli kinekij kipiasej se tekitl ipan tlanechikoli, uelis kinekisej kiniljuisej ueuejtlakamej ya ma kintekimakakaj. Uan sekij kualanij kema ueuejtlakamej kintlajtolmakaj. Ni toikniuaj kualtiaskia ma motlajtlanikaj: “¿San nijtemoua tlen na nijneki o nijneki nikinmokuitlauis ika tlaiknelili Jehová itekipanojkauaj?”.

Nojkia, ueuejtlakamej moneki nochipa kiilnamiktosej tlen kiijtoua 1 Pedro 5:1-3: “Xikinnextilikaj se kuali ojtli”. ¿Kenijkatsa uelis kiampa tijchiuas? Tlaj ya titlatekipanoua kej ueuejtlakatl o ayamo, amo ximoiljui yon xijchiua tlen amo kuali, nojkia amo xikualani uan xijpia moyolo. Kema se akajya eli ueuejtlakatl ipan tlanechikoli amo kiijtosneki ayokmo tlajtlakole (Núm. 12:3; Sal. 106:32, 33). Uelis se toikni moiljuis: “Noyolo axnechteiljuia para nijchijtok tlen axkuali”, maske kiampa moiljuis, uelis sekij amo kiampa moiljuiaj pampa kiitaj nojua moneki kipatlas se keski tlamantli (1 Cor. 4:4). Yeka, tlaj ueuejtlakamej mitstlajtolmakasej ika Biblia, kuali xikintlakakili, amo xikualani uan xijchiua ipan monemilis tlen mitsiljuijkej.

Miakej toikniuaj kimatij pano miak tonali uan amo kintekimakaj. ¿Kemantika timokualankamaka pampa uejkajkia tijnektok tijselis se tekitl ipan tlanechikoli uan amo mitsmakaj? Uajka xikilnamiki tlen kiijtoua ni texto: “Kema se tlakatl mojmostla kichia para kiselis se tlenijki uan axasi imako, nelia kiyolkokoua. Pero kema se kineki se tlamantli uan teipa kiselia, nelia yolpaki” (Prov. 13:12).

Kema tikitas amo ueli tijpia se tlamantli tlen tijneki, uelis timokuesos. Kiampa kipanok Abraham. Jehová kiniljuijtoya ya uan Sara kipiaskiaj se ininkone, maske kiampa kiniljuijtoya, panok miak xiuitl uan amo kipiayayaj se ininkone (Gén. 12:1-3, 7). Kema Abraham kipixtoya miak xiuitl, kiiljuik Jehová: “ToTeko, Ta Tlen Más Tijpia Tlanauatili, san tlapik para tinechmakas miak tlamantli pampa axnijpia se konetl [...]. Axtinechmakatok niyon se nokone”. Maske Jehová kiiljuik kena kimakaskia tlen kitenkauilijtoya, monejki panos 14 xiuitl (Gén. 15:2-4; 16:16; 21:5).

¿Ayokmo yolpajki kitekipanos Jehová pampa ayamo kimakatoya se ikone? Amo. Abraham nochipa motemachik Jehová kichiuaskia tlen kiijtojtoya. Yeka, ya nojua kichixki tlen kiijtojtoya kimakas. Apóstol Pablo kiijkuilok: “Abraham kipixki iyolo uan kichixki uan asik tonal kema toTeko kimakak Isaac keja kitenkauilijtoya” (Heb. 6:15). Teipa, Jehová tlauel kiteochijki kej amo kema moiljuijtoya. ¿Tlake techmachtia tlen kipanok Abraham?

Tlaj mitspaktiskia tielis ueuejtlakatl uan panotok miak xiuitl uan ayamo kiampa mitstekimakaj, amo ximokueso; nojua ximotemachijto ipan Jehová uan xijtekipano ika pakilistli. William, se toikni katli kinpaleuijtok miakej toikniuaj kuali ma tlatekipanokaj, kiijtoua: “Moneki panos tonali tlaj tijneki tijchiuas tlen mitspaleuis tijselis sekinok tekitl ipan tlanechikoli. Se toikni uelis kinextis kenijkatsa eli uan tlen ueli kichiua, kema kiitaj kenijkatsa monejnemiltia uan kenijkatsa kichiua tlen kinauatiaj. Sekij moiljuiaj san yolpakisej tlaj kintekimakasej ipan tlanechikoli. Nopa amo nelia, uan uelis kichiuas se akajya san ya nopa ma moiljuijto. Se akajya nelnelia yolpaki kema kitekipanoua Jehová uan amo kitlauelkaua, maske kampa ueli itstok uan kichiua tlen ueli tekitl ipan tlanechikoli”.

Se toikni monejki mochias matlaktli xiuitl uan teipa kitekimakakej kej ueuejtlakatl. Ya kiijtoua tlen kiyekok kema momachtik amochtli Ezequiel ipan capítulo 1: “Jehová kiyakana icarro, itlanechikol, kej ya kiita kuali. Se tlamantli amo pano kema tojuantij tijnekij, eli kema Jehová kiijtoua. Maske tlauel nijneki nielis ueuejtlakatl, amo tlauel ipati tlen na nijneki o tlen nimoiljuia ueliskia nijpias. Uelis tlen na nijneki amo eli tlen Jehová kiita nechpoloua”.

Tlaj se tonali tijneki titlatekipanos kej ueuejtlakatl, ximosentlali tikinpaleuis toikniuaj ma yolpakikaj. Tlaj tijmati yolik panotia tonali uan amo mitstekimakaj, amo ximokueso yon xikualani. Raymond, katli tikijtojkej achtouia, kiijtoua: “Kema se akajya san kineki tlapijpias, amo kema yolpaki ika tlen kipia. Tlaj san timoiljuijtos ipan nopa tlamantli, amo tijtekipanos Jehová ika pakilistli”. Yeka xijchiua kampeka tijnextis kuajkuali tlamantli, uan nojua xijpia moyolo. Uan nojkia xijpoua Biblia, kiampa nojua kuali titlaneltokas. Nojua tlauel xitlajtolmoyaua uan xitlamachti ika Biblia. Xikinpaleui mochampoyouaj uan ximomachti ininuaya. Xiyolpaki kema tiitstos ininuaya toikniuaj. Nochi ni kichiuas kuali xijyolmati maske ayamo tijselia se tekitl ipan tlanechikoli.

Tlaj tijchijtok kampeka tijchiuas tlen Jehová kiniljuia ma kichiuakaj katli kinekij elisej ueuejtlakamej, xijkaua nopa ma mitspaleui tijnextis sekinok kuajkuali tlamantli uan xitlapaleui ipan tlanechikoli. Jehová uan itlanechikol amo kinekij ximokueso yon xikualani. Ya nochipa kinpaleuia uan kinteochiua katli kitekipanouaj ika nochi ininyolo. Uan xikilnamiki, kema Jehová kiteochiua se akajya amo kichiua ma tlaijiyoui (Prov. 10:22).

Maske panotok miak tonali tijchixtok ma mitstekimakakaj, nojua xijchiua kampeka kuali titlaneltokas. Jehová amo kema kiilkauas tlen ta tijchiua pampa tijneki tijnextis kuajkuali tlamantli, tlauel titlapaleuia ipan tlanechikoli uan kuali tikinmokuitlauia mochampoyouaj. Nochipa xijtekipano Jehová ika pakilistli maske mitsmakasej tlen ueli tekitl ipan tlanechikoli.