Biblia kinpaleuik kuali ma monejnemiltikaj

¿Tlake kipaleuik se siuatl ma yolpaki maske kema eliyaya se siuapil tlauel tlaijiyouik? ¿Tlake kipaleuik se político katli tlauel mosisiniyaya ma kipatla inemilis uan ma eli se kuali toTeotsij itekipanojka? Ma tikitakaj tlake kiijtouaj.

“Tlauel nijnekiyaya ma nechiknelikaj” (INNA LEZHNINA)

TLAKATKI IPAN: 1981

EUA: RUSIA

SEKINOK TLAMANTLI: TLAUEL TLAIJIYOUIK KEMA ELIYAYA SIUAPIL

TLEN NECHPANOK: Notatauaj amo tlakakij, uan na nojkia amo nitlakaki. Tlauel niyolpakiyaya, uan kema nijpixtoya chikuasej xiuitl notatauaj kiixpolojkej nopa amatl kampa nesiyaya mosenkajtoyaj. Maske nieliyaya nisiuapil, nijkuamachilik tlen panoyaya uan tlauel nechyolkokok. Kema panok nopa, notata uan noikni katli achtouiejketl mokajkej ipan Troick, uan nonana nechuikak Cheliabinsk. Teipa nonana sampa monamiktik, uan notepotstata tlauel tlaiyaya uan techmakiliyaya.

Ipan 1993, misauik noikni katli eliyaya achtouiejketl. Nopa tlauel techyolkokok. Nonana pejki tlai uan nojkia pejki nechmakilia. Na tlauel nijnekiyaya ma nechiknelikaj. Maske niajki ipan miak iglesias pampa nijnekiyaya ma nechyolchikauakaj, amo kiampa kichijkej.

BIBLIA NECHPALEUIK KUALI MA NIMONEJNEMILTI: Kema nijpiayaya 13 xiuitl, se katli iuaya nimomachtiyaya ipan escuela eliyaya se tlen Jehová itlajtoltemakauaj, ya nechpouilik tlen uejkajkia kinpanok se keskij toTeotsij itekipanojkauaj tlen uala ipan Biblia. Tlauel nechpaktik nijmatis kenijkatsa Noé uan Job kuali kitekipanojkej toTeotsij maske kiixnamijkej miak tlaouijkayotl. Nima pejkej nechmachtiaj ika Biblia, uan pejki nia tlanechikoli.

Ipan Biblia nijyekok miak tlamachtili tlen tlauel nechpaktik. Tlauel niyolpajki pampa nijmatki toTeotsij kipia itoka (Salmo 83:18). Nojkia, nimosentlachilik kema nikitak ipan Biblia xitlauak kiijtouayaya tlen panoskia ipan “itlamia tonali” (2 Timoteo 3:​1-5). Uan tlauel niyolpajki kema nijmatki moyolkuisej katli miktokej. Ximoiljui: ¡sampa nikitas noikni! (Juan 5:​28, 29).

Maske tlauel niyolpaktoya, amo nochi yolpajkej. Nonana uan notepotstata kinkualankaitayayaj Jehová itlajtoltemakauaj, yeka nechchiualtiyayaj ayokmo ma nimomachti Biblia ininuaya. Na nimosentlalijtoya amo nijkauas nimomachtis pampa tlauel nechpaktiyaya tlen nechmachtiyayaj.

Tlauel ouij nijmatki pampa nochampoyouaj kualaniyayaj. Uan teipa panok seyok tlamantli tlen amo kuali: noikni katli teipaejketl uan katli iuaya niauiyaya tlanechikoli, nojkia misauik. Kema panok nopa, Jehová itlajtoltemakauaj itstoyaj nouaya uan kinextijkej tlauel nechikneliaj. ¡Ya nopa nijnekiyaya kema nieliyaya nisiuapil! Nojkia nikitak ya ni eli religión tlen melauak, yeka ipan 1996 nimoatsonpoliuiltik pampa nijnejki nielis se tlen Jehová itlajtoltemakauaj.

¿KENIJKATSA NECHPALEUIJTOK? Kipia chikuasej xiuitl nimonamiktik iuaya Dmitry, ya eli se kuali tlakatl. Sansejko titlatekipanouaj ipan kali Betel tlen San Petersburgo. Nama, notatauaj ayokmo tlauel kualanij pampa nijtekipanoua Jehová.

¡Tlauel nijtlaskamatilia Jehová pampa nikixmatki! Uan pampa nijtekipanoua, nechpaleuijtok tlauel ma niyolpaki.

“Nijnekiyaya nijmatis miak tlamantli” (RAUDEL RODRÍGUEZ RODRÍGUEZ)

TLAKATKI IPAN: 1959

EUA: CUBA

SEKINOK TLAMANTLI: SE POLÍTICO KATLI TLAIJIXNAMIKIYAYA

TLEN NECHPANOK: Nitlakatki ipan La Habana (Cuba) uan nimoskaltik kampa itstoyaj maseualmej katli teikneltsitsij, nopaya nochipa moteuiyayaj. Tlauel nechpaktiyaya yudo uan sekinok tlamantli kampa kinmachtiyayaj tlateuisej.

Notatauaj nechiljuijkej ma nimomachtiti universidad pampa kiitayayaj nechpaktiyaya nimomachtis. Kema niitstoya universidad, pejki nimoiljuia amo kuali tlanauatiaj ipan noaltepe, yeka pejki nikinijixnamiki tekichiuanij. Se tonali, na uan se katli iuaya nimomachtiyaya tijteuijkej se policía pampa tijnekiyayaj tijkixtilisej ipistola, uan tlauel tijkokojkej ipan itsonteko. Yeka, techtsajkej uan kiijtojkej techmiktisej. ¡San nijpixtoya 20 xiuitl uan nechka nechmiktiskiaj!

Kema niitstoya noselti kampa nechtsaktoyaj pejki nimoiljuia tlake nijchiuaskia kema nechmiktiskiaj, pampa amo nijnekiyaya nijnextis nimajmaui. Nojkia nijnekiyaya nijmatis miak tlamantli, kej kenke maseualmej amo kichiuaj tlen xitlauak uan kenke tiitstokej.

BIBLIA NECHPALEUIK KUALI MA NIMONEJNEMILTI: Teipa techiljuijkej amo techmiktiskiaj, san techtsakuaskiaj treinta xiuitl. Ipan nopa tonali nikinixmatki se keskij Jehová itlajtoltemakauaj katli kintsaktoyaj pampa kiueyichiuayayaj toTeotsij. Nimosentlachilik pampa amo majmauiyayaj uan amo mokuesouayayaj. Maske kinchiuilijtoyaj tlen amo xitlauak, inijuantij amo kualantoyaj uan yolpakiyayaj.

Inijuantij nechiljuijkej kenijkatsa kineki toTeotsij ma itstokaj maseualmej. Ika Biblia nechnextilijkej toTeotsij kichiuas ni Tlaltipaktli se xochimili kampa kichiuasej san tlen xitlauak uan ayokmo kichiuasej tlen amo kuali. Nojkia san itstosej maseualmej katli kichiuasej tlen toTeotsij kipaktia uan nochipa itstosej kuali (Salmo 37:29).

Maske nechpaktiyaya tlen nechmachtiyayaj, na amo nieliyaya kej inijuantij. Nijmatiyaya ouij amo nimokalakis ipan política o amo nimomakuepas, yeka pejki nijpoua Biblia. Kema nijtlamipojki, nijkuamachilik san Jehová itlajtoltemakauaj monejnemiltiaj kej Cristo itokilijkauaj katli itstoyaj ipan achtoui siglo.

Kema nimomachtik Biblia, nikitak monekiyaya nijpatlas miak tlamantli ipan nonemilis. Monekiyaya nijpatlas kej nikamanaltiyaya pampa san tlemach nikijtouayaya. Nojkia monekiyaya ayokmo nitlachichinas uan ayokmo nimokalakis ipan política. Maske nijmatki ouij, ika Jehová itlapaleuil yolik nijpatlatiajki se keski tlamantli ipan nonemilis.

Tlauel ouij nijmatki ayokmo tlauel nikualanis, uan nojua nijtlajtlania toTeotsij ma nechpaleui. Tlauel nechpaleuijtok se keski textos, kej Proverbios 16:32, nopaya kiijtoua: “Más kuali tlen kipias iyolo uan axkualani que tlen itstok tetik. Más kuali tlen monauatis ika iselti para axkichiuas tlen fiero, que se tlen kitlanis se altepetl”.

Ipan 1991, kampa nitsaktoya nimoatsonpoliuiltik ipan se tambo, kiampa nimochijki se tlen Jehová itlajtoltemakauaj. Kema panok se xiuitl, na uan sekinok katli nojkia tsaktoyaj techkixtijkej uan techtitlankej España pampa nopaya itstoyaj touikaljuaj. Kema niasito, nima pejki nimonechikoua ininuaya Jehová itlajtoltemakauaj, inijuantij tlauel kuali nechselijkej uan nechpaleuijkej.

¿KENIJKATSA NECHPALEUIJTOK? Nama tlauel niyolpaki uan nijtekipanoua toTeotsij iuaya nosiua uan nopilichpokauaj. Nojkia tlauel niyolpaki pampa nikinmachtia sekinok tlen Biblia tlamachtia. Kemantika nikilnamiki kema nieliyaya nitelpokatl nechka nechmiktiskiaj uan tlauel nijtlaskamatilia toTeotsij ika tlen nama nijselijtok. Amo san niyolpaki pampa amo nimijki, nojkia pampa nimotemachia teipa kuali tiitstosej. Nijneki nikitas kema ni Tlaltipaktli elis se xochimili kej toTeotsij kiijtojtok kichiuas, kampa nochi kichiuasej tlen xitlauak uan “ayok kema aki mikis” (Apocalipsis 21:​3, 4).

[Tlajtoli katli pankisa]

“Tlauel niyolpajki pampa nijmatki toTeotsij kipia itoka”

[Tlaixkopinkayotl]

Noueue uan na tlauel techpaktia tikinmachtisej katli amo tlakakij tlen Biblia tlamachtia