Biblia kinpaleuik kuali ma monejnemiltikaj

¿TLAKE tlamantli tlauel kipatiitak ipan inemilis se tlakatl katli eua Escocia maske kiurpixtoya se empresa uan tlauel momachtijtoya? ¿Tlake kipaleuik se tlakatl ayokmo ma auilnemi uan ma kikaua cocaína? ¿Tlake kipaleuik se telpokatl katli eua Eslovenia ayokmo ma tlai? Namantsi tikitasej tlake kinpaleuik.

“Nesiyaya tlauel kuali niitstoya” (JOHN RICKETTS)

TLAKATKI IPAN: 1958

EUA: ESCOCIA (REINO UNIDO)

SEKINOK TLAMANTLI: KIPIXTOYA SE EMPRESA

TLEN NECHPANOK: Amo nimoskaltik niteikneltsi pampa tijpixtoyaj tlen ika timopanoltisej, notata eliyaya se soldado británico, yeka amo tiitstoyaj san ipan altepetl Escocia, nojkia tiitstoyaj ipan Inglaterra, Alemania, Kenia, Malasia, Irlanda uan Chipre. Uan kema nijpixtoya chikueyi xiuitl, nimomachtik ipan miak internados ipan Escocia, uan tlanki nimomachtia ipan Universidad de Cambridge.

Kema nikaxitik 20 xiuitl pejki nitekiti ipan se industria petrolera, uan niuejkajki chikueyi xiuitl. Achtoui nitekitik ipan América del Sur uan teipa ipan África, uan nitlamito ipan Australia Occidental. Nopaya nijpeualtik se empresa katli teipa nijnamakak.

Uan kema nijnamakak nopa empresa tlauel nechpaleuik, yeka kema nikaxitik 40 xiuitl, ayokmo nitekitik uan san nechtlaxtlauiyayaj. ¿Nama tlake nijchiuaskia? Pejki kampa ueli nipaxaloua. Ompa nitlaminenki ipan Australia ika motocicleta. Uan niajki kampa ueli ipan Tlaltipaktli. Nesiyaya tlauel kuali niitstoya.

BIBLIA NECHPALEUIK KUALI MA NIMONEJNEMILTI: Kema nechka nijkauaskia nitekitis, nijnekiyaya nijtlaskamatilis toTeotsij tlen nechmakatoya. Yeka, pejki nia ipan Iglesia Anglicana kampa notatauaj nechuikayayaj, amo nechpaktik pampa nopaya amo tlauel tlamachtiyayaj ika toTeotsij iTlajtol. Teipa nimomachtik ininuaya mormones uan nojkia amo nechpaktik pampa amo tlauel kipatiitaj Biblia.

Se tonali, Jehová itlajtoltemakauaj nechpaxalokoj, nima nikitak tlen tlamachtiyayaj eltoyaj ipan toTeotsij iTlajtol. Inijuantij nechnextilijkej tlen ijkuilijtok ipan 1 Timoteo 2:3, 4. Nopaya kiijtoua toTeotsij “kineki nochi tlakamej ma momakixtikaj uan ma kimatikaj tlen nelia melauak”. Nikitak Jehová itlajtoltemakauaj amo san kipatiitaj tlen kiijtoua Biblia, nojkia tlamachtiaj tlen nelia melauak.

Kema nimomachtijtiajki, kuali nijkuamachilik tlen nelnelia melauak. Nijmatki nopa tlamachtili tlen trinidad amo melauak uan toTeotsij uan Jesús amo elij sanse (Juan 14:28; 1 Corintios 11:3). ¡Tlauel niyolpajki kema nijmatki nopa! Pejki nimoiljuia keski tonali panotoya uan amo nijkuamachilijtoya nopa tlamachtili.

Teipa pejki nimonechikoua ininuaya Jehová itlajtoltemakauaj. Tlauel nechpaktik kema nikitak tlauel teikneliaj uan kitlepanitaj toTeotsij itlanauatiljuaj. Nesiyayaj tlauel kuali ininyolo uan amo itstoyaj sekinok kej inijuantij. Nikitak nelnelia moikneliyayaj, yeka nimotemachik inijuantij itstoyaj ipan religión tlen melauak (Juan 13:35).

¿KENIJKATSA NECHPALEUIJTOK? Kema ya nimoatsonpoliuiltijtoya nikixmatki Diane, katli moskaltijtoya kej se Jehová itlajtoltemajka, nechpaktik nopa kuajkuali tlamantli tlen kinextiyaya ipan inemilis, yeka nimosenkajki iuaya. Nikitak Jehová tlauel nechteochijki pampa nosiua tlauel nechiknelia uan nechpaleuia.

Tlauel tijnekiyayaj tiasej titlatekipanotij kampa amo itstoyaj miakej tlajtolmoyauanij. Yeka ipan 2010, tiajkej altepetl Belice, ipan Centroamérica. Nopaya titlajtolmoyajkej uan tikinkamanaljuijkej maseualmej katli tlauel kiikneliaj toTeotsij uan tlauel kinekij kiixmatisej.

Nama nijpia tlaseuilistli ipan noyolo uan ipan notlalnamikilis pampa nijmati tlen melauak tlen toTeotsij uan tlen Biblia. Nojkia tlauel nitlajtolmoyaua uan nikinpaleuijtok miakej maseualmej ma kimatikaj tlen Biblia tlamachtia. Tlauel niyolpaki kema nikita maseualmej kipatlaj ininnemilis kema momachtiaj Biblia, kej na nijpatlak nonemilis. Nama nijmati kenijkatsa nijtlaskamatilis toTeotsij ika nochi tlen nechmakatok.

“Nechnojnotskej ika tlaiknelili” (MAURÍCIO ARAÚJO)

TLAKATKI IPAN: 1967

EUA: BRASIL

SEKINOK TLAMANTLI: TLAUEL AUILNEMIYAYA

TLEN NECHPANOK: Nimoskaltik ipan pilaltepetsi Avaré, nechka nopa ueyi altepetl São Paulo. Nochi katli nopaya mochantijtoyaj tekitiyayaj ipan fábricas uan ipan sekinok tlamantli.

Notata mijki kema ayamo nitlakatiyaya. Kema nieliyaya niokichpil uan nonana amo itstoya nochaj, nimokentiyaya iyoyo. Yeka, teipa pejki nitlachiua kej se siuatl uan maseualmej pejkej nechiljuiaj nimosiuaneki. Teipa pejki nimoteka ininuaya telpokamej uan nojkia kemantika ininuaya tlakamej katli ya uejueyij.

Kema nojua nieliyaya nitelpokatl niauiyaya bares, clubes nocturnos uan kemantika ipan teopantinij pampa nikintemouayaya tlakamej uan siuamej katli ueliskia ininuaya nimotekas. Kema mochiuayaya carnaval, na nimoyoyontiyaya kej se siuatl uan nimijtotiyaya ipan desfiles ininuaya sekinok katli nojkia kalaktoyaj ipan se escuela tlen samba. Tlauel nechixmatiyayaj.

Nouampoyouaj eliyayaj katli motlakanekiyayaj, mosiuanekiyayaj, auilnenkasiuamej uan katli kitekiuiyayaj drogas. Sekij nechiljuijkej ma nijtekiui crack o cocaína, uan nimantsi nimomatki nijtekiuis. Kemantika seyoual nitlachichinayaya ininuaya, uan kemantika se tonal nitlachichinayaya noselti. Ninesiyaya tlauel nikokoxkatik, yeka sekij kiijtouayayaj nijpixtoya sida.

BIBLIA NECHPALEUIK KUALI MA NIMONEJNEMILTI: Ipan nopa tonali nikinixmatki Jehová itlajtoltemakauaj. Inijuantij nechnojnotskej ika tlaiknelili uan nechpouilijkej tlen kiijtoua Romanos 10:13, nopaya kiijtoua: “Nochi tlen kinojnotsasej toTeotsij Jehová ika itoka momanauisej” (Traducción del Nuevo Mundo). Ipan nopa texto nijkuamachilik tlauel moneki nijtekiuis toTeotsij itoka. Kema nijchichinayaya crack seyoual, teipa nijtlapouayaya ventana, niajkotlachiayaya iluikak uan nimochokiliyaya uan nikiljuiyaya Jehová ma nechpaleui.

Nikitak nonana tlauel moyolkokouayaya pampa tlauel amo kuali tlen nijchiuayaya. Yeka, nimosentlalik ayokmo kema nijtekiuis drogas. Teipa pejki nimomachtia Biblia ininuaya Jehová itlajtoltemakauaj. Inijuantij nechiljuijkej tlen nimomachtiskia, nechpaleuiskia ma nijkaua tlen nimomajtoya nijchiua. ¡Uan kiampa panok!

Kema nojua nijyekojtiajki tlen Biblia tlamachtia, nikitak monekiyaya nijpatlas kej nimonejnemiltiyaya pampa nojua nimosiuanekiyaya. Tlauel ouij nijmatki nijkauas ni tlamantli, pampa nopa pejki nijchiua kema nojua nieliyaya niokichpil. Monekiyaya nijpatlas se keski tlamantli. Yeka, nikintlauelkajki katli eliyayaj nouampoyouaj uan ayokmo niajki bares yon clubes nocturnos.

Maske tlauel ouij nijpatlak nonemilis, nechyolchikauayaya pampa nijmatiyaya Jehová kitekipachouayaya tlen nechpanoyaya uan kipatiitayaya tlen nijchiuayaya (1 Juan 3:19, 20). Ipan xiuitl 2002, ayokmo nijchijki kej kichiuaj katli mosiuanekij uan uelki nimoatsonpoliuiltia kej se Jehová itlajtoltemajka.

¿KENIJKATSA NECHPALEUIJTOK? Nonana tlauel yolpajki uan mosentlachilik pampa kiitak nijpatlak nonemilis, yeka nojkia pejki momachtia Biblia. Tlauel amo kuali tlen kipanok pampa teipa kipixki se kokolistli tlen kitlanauik itsontekuich. Maske kiampa kipanok, kichiua kampeka nojua momachtis Biblia uan kiiknelijtos Jehová.

Kipia chikueyi xiuitl nijchiua kampeka nitlajtolmoyauas uan nikinmachtis maseualmej tlen Biblia tlamachtia. Maske kemantika nojua nechyoltilana tlen amo kuali, tlauel nechyolchikaua nijmatis tlaj amo nijchiuas nopa tlamantli, Jehová tlauel yolpakis.

Tlauel kuali nijyolmati pampa nimonechkauik ika toTeotsij uan nimonejnemiltia kej ya kipaktia. Nama nieli se tlakatl katli tlauel yolpaki.

“Tlaili amo kema nechixuitiyaya” (LUKA ŠUC)

TLAKATKI IPAN: 1975

EUA: ESLOVENIA

SEKINOK TLAMANTLI: TLAUEL TLAIYAYA

TLEN NECHPANOK: Nitlakatki ipan altepetl Liubliana, Eslovenia. Maske niyolpakiyaya kema nieliyaya niokichpil, kema nijpixtoya naui xiuitl, notata momiktik. Uan pampa panok nopa, nonana tlauel tekitik uan kiampa techiskaltiskia noikni uan na.

Kema nijpixtoya 15 xiuitl niajki niitstoto iuaya noueyinana. Nechpaktiyaya niitstos nopaya pampa nechka itstoyaj nouampoyouaj, uan ya kena nechkauayaya ma nijchiua sekinok tlamantli, uan nonana amo. Kema nikaxitik 16 xiuitl, pejki nimouika ininuaya katli tlaiyayaj sejse chikueyi. Nijkajki ueueyak notsonkal, pejki san kej ueli nimoyoyontia uan teipa pejki nitlachichina.

Maske nijtekiuik sekinok drogas, san tlaili tlauel nechpaktiyaya. Teipa amo san nikijiyaya se kentsi vino, nijtlamiyaya se botella. Nijmatiyaya kenijkatsa nijchiuas amo ma nesi niiuintitoya. Kemantika san pampa noijiyo kiijnekuiyayaj nechiljuiyayaj nitlaitoya, san amo kimatiyayaj tlaj nikijitoya miak cerveza tlamaneloli ika vodka.

Miakpa nikinpaleuik nouampoyouaj ma nejnemikaj pampa iuintitoyaj kema tikisayayaj ipan discoteca maske na tlauel nitlaitoya uan inijuantij amo. Se tonali nijkajki se nouampo kiiljuik seyok, tlaili amo kema nechixuitiyaya. Kiampa kintlaijiljuiaj ipan Eslovenia katli tlauel tlaij. ¡Nopa tlauel nechyolkokok!

Yeka, pejki nimoyoliljuia tlen nijchiuayaya ipan nonemilis. Nijyolmatiyaya amo tleno nopati, nochi tlen nijchiuayaya amo kichiuayaya ma niyolpaki.

BIBLIA NECHPALEUIK KUALI MA NIMONEJNEMILTI: Ipan nopa tonali, nikitak se katli iuaya nimomachtijtoya kipatlatoya inemilis uan ayokmo tlauel mosisiniyaya. Na nijnejki nijmatis kenke mopatlatoya, yeka nijtlanejki ma ticafenitij pampa nijnekiyaya nikamanaltis iuaya. Nechiljuik Jehová itlajtoltemakauaj kimachtiyayaj ika Biblia. Nojkia nechiljuik se keski tlamantli tlen kimachtiyayaj. Nochi tlen nechiljuik amo kema nijkaktoya pampa amo kema nimokalakijtoya ipan se religión. Pejki nimonechikoua ininuaya uan nechmachtijtiajkej ika Biblia.

Kiampa nijyekojtiajki tlamachtili tlen tlauel nechyolchikajki. Nijmatki tiitstokej ipan “itlamia tonali” uan amo uejkauas toTeotsij kintsontlamiltis katli amo kualmej, uan katli kuali ininyolo itstosej ipan se yejyektsi xochimili (2 Timoteo 3:1-5; Salmo 37:29). Yeka, ayokmo nijnejki nijchiuas tlen amo kuali pampa nojkia nijnekiyaya niitstos ipan xochimili.

Kema nikinpouilik nouampoyouaj tlen nechmachtiyayaj ipan Biblia, inijuantij san nechpinajtijkej. Nopa nechpaleuik pampa nikitak amo nelnelia eliyayaj nouampoyouaj. Nojkia nijkuamachilik nitlaiyaya pampa nimouikayaya ininuaya katli nojkia tlaij. Inijuantij san kinekiyayaj moiuintisej kema tlamiskia nopa semana.

Ayokmo nimouikak ininuaya uan nimouampojchijki ininuaya Jehová itlajtoltemakauaj. Inijuantij amo san nechyolchikauayayaj, nojkia kiikneliyayaj toTeotsij uan kichiuayayaj kampeka monejnemiltisej kej ya kipaktia. Tlauel nechpaleuijkej, uan teipa ika yolik ayokmo nitlaik.

¿KENIJKATSA NECHPALEUIJTOK? Nijtlaskamatilia Jehová pampa ayokmo moneki nitlais uan kiampa niyolpakis. Amo nijmati kenijkatsa niitstoskia nama tlaj amo nijpatlatoskia nonemilis. Nama kena tlauel kuali nijyolmati.

Kipia chikome xiuitl nitlatekipanoua ipan kali Betel tlen Eslovenia. Nama nelnelia tlauel niyolpaki pampa nikixmati uan nijtekipanoua Jehová.