Niyolik Quebec, tein moajsi itech altepet Quebec ompa Canadá, kampa motajtoua francés. Notatuan, Louis uan Zélia, semi nechtasojtayaj. Nopopaj amo semi tajtouaya uan semi kiuelitaya taixtajtoltis. Nejua nikuelitaya nitajkuilos uan satepan niknekia nitekitis kampa kiteixmatiltiaj tanauatilmej.

Keman nikpiaya kemej 12 xiujmej, Rodolphe Soucy, akin iuan tekitia nopopaj, uan okse takat, techkalpanokoj. Katkaj itaixpantijkauan Jiova. Nejua amo semi nikinixmatia itaixpantijkauan Jiova uan amo semi nechyolnotsaya inintaneltokalis. Sayoj ke nikuelitak ke katkaj kualtakamej keman kinankiliayaj tonetajtaniluan ika Biblia uan ke taixejekol tein kijtouayaj. Notatuan no kiuelitakej nejon, uan yejua ika peuak timomachtiaj Biblia.

Itech nejon tonalmej, niyaya kaltamachtiloyan kampa tamachtiayaj tiopixkamej. Kemansa nikintapouiaya akin iniuan nimomachtiaya tein nimomachtijtoya itech Biblia. Tiopixkamej kimatkej nejon. Semej amo kitemoj kinextis ika Biblia ox melauak tein nikijtouaya, ta kiniluij akin iniuan nimomachtiaya ke nitaixnamikia. Semi ouij nejon tein panok, sayoj ke semi nechpaleuij, porin nikajsikamatik ke tein ompa tamachtiayaj amo mouikaya ika tein kijtoua Biblia. Nikitak ke amo monekiaok ompa nimomachtis. Notatuan nechkaujkej maj niyani okse kaltamachtiloyan.

Niksentokaya nimomachtiaya Biblia, sayoj ke ayamo nikixtaliaya niktekitilis Jiova porin nimouia nitanojnotsas kajkalpan. Tiopixkamej kichiuayaj maj amo techkakinij uan semi techixnamikiaj.  Maurice Duplessis, akin yekinika peuak taixyekana ompa Quebec, semi mokuia iniuan tiopixkamej. Ika inepaleuil, taltikpakneminij kinkuejmolouayaj uan hasta kinmaayaj itaixpantijkauan Jiova. Itech nejon tonalmej, tokniuan monekia kinextiskej yolchikaualis uan ijkon ueliskia tanojnotsaskej.

Tokniuj John Rae yejua semej akin nechpaleuij maj amo nimoui. Yejua kiselij tamachtilis tapoual chiknaui tein motemaka Galaad. Maski uejkaujya kitekitilijtoya Jiova amo moueyimatia uan uelia iuan se tajtouaya. Maski amo miakpa nechyolmajxitij, ikuali neskayot semi nechpaleuij. Kemej kiouijmakaya tajtos francés, miakpa niyaya iuan nitanojnotsati uan nikpaleuiaya maj tanojnotsa itech nejon tajtol. Kuali nimouikas iuan John nechpaleuij maj nikixtali nimochiuas itaixpantijkauj Jiova. Nimoauij itech tonal 26 metsti mayo xiuit 1951, majtakti xiuit satepan ke yekinika nitajtoj iniuan itaixpantijkauan Jiova.

Tonechikol ompa Quebec amo ueyi katka uan miakej katkaj precursores. Ininneskayo nechpaleuij maj no nimochiua precursor. Itech nejon tonalmej, keman titanojnotsayaj amo tikuiaj amaixmej, ta sayoj Biblia. Yejua ika monekik timomachtiskej okachi kuali tikuiskej Biblia. Nimochikauak nikixmatis seki tajkuilolmej tein nechpaleuiskiaj maj niknexti ke melauak tein kijtoua Biblia. Sayoj ke, miakej amo kinekiaj kiixtajtoltiskej okseki Biblias, ta sayoj tein tiopixkamej kiixtaliayaj.

Itech xiuit 1952, nimonamiktij iuan Simone Patry, se tokniuj kayot ompa Quebec. Tinemitoj Montreal, uan keman ayamo ajsia se xiuit tikpiakej se siuapiltsin, Lise. Maski tepitsin achto ke timonamiktiskiaj amo katkaok niprecursor, Simone uan nejua timochikauayaj amo tikpiaskej miak taman porin tiknekiaj titapaleuiskej kemej kalyetouanij itech tanojnotsalis uan tiyaskej nochi nechikolmej.

Niknemilij oksepa nimochiuas precursor majtakti xiuit satepan. Itech xiuit 1962, niyajki Betel tein moajsi Canadá nikselito tamachtilis tein kiseliaj tayekananij tein uejkauaya se metsti. Tokniuj Camille Ouellette uan nejua timosenkaujkej itech se kali. Yejua semi kiyolpaktiaya tanojnotsalis uan nejon semi nechyolnotsak, okachiok porin kipiaya inamik uan se ikonetsin. Itech nejon tonalmej, ompa Quebec sayoj seki tokniuan akin kipiayaj konemej katkaj precursores. Sayoj ke yejua  nejon kinekia kichiuas Camille. Itech nochi nejon metsti, nechyolchikauak maj nikita ox ueliskia oksepa nimochiuas precursor. Seki metsti satepan, nikitak ke oksepa niueliskia. Sekin kijtojkej ke amo ueliskia nikchiuas, sayoj ke nimochiuak precursor porin nikmattoya ke Jiova nechpaleuiskia maj okachi nitanojnotsa.

Itech xiuit 1964, Simone uan nejua techtitankej maj titapaleuitij kemej precursores especiales ompa Quebec, kampa tikayomej. Ompa titapaleuijkej miak xiujmej. Itech nejon tonalmej, maski amo semi techixnamikiajok kemej achto, sekin kisentokayaj techtauelitayaj.

Se sábado tiotak, policías nechkitskijkej ompa Sainte-Marie, se xolalkonet tein amo uejka moajsia iuan Quebec. Se policía nechtsakuato porin nitanojnotsaya kajkalpan uan amo nikpiaya se amat tein kinextiaya ke ueliskia nitanojnotsas. Satepan, nechuikakej iuan se tekiuaj akin monotsaya Baillargeon, se takat akin se kimouiliaya. Nechtajtanij akoni nechtajtouiskia. Keman nikiluij ke yeskia Glen How, * se tokniuj akin katka abogado uan semi kiixmatiaj, nejon takat mouik uan kijtoj: “¡Amo, yejua amo!”. Glen How semi kiixmatiaj porin miakpaya kintajtouijka miakej tokniuan uan kinkixtijka. Amo uejkauak uan tekiuanij nechkixtijkej.

Kemej semi techixnamikiaj ompa Quebec, semi ouij katka maj techtaneujtianij se kali kampa titaxtaujtoskiaj kampa ueliskia tikpiaskiaj tonechikoluan. Sayoj tikajsikej se kali kampa kinkalakiayaj carros kampa semi taseseyaya. Tokniuan kipiayaj se tepos tein ika takauantiayaj uan seki horas achto ke peuaskia nechikol timotaliayaj iixpan uan timotapouiayaj seki taman tein ika timoyolchikauayaj.

Semi nechyolpaktia nikitas ke miakejya mochiuanij itaixpantijkauan Jiova ijkon kemej panouanij xiujmej. Itech xiujmej 1960 hasta 1969, sayoj moajsiaj seki nechikolmej kampa amo miakej mosentiliayaj ompa Quebec, Côte-Nord uan Gaspé. Axkan, itech nejon xolalmej moajsij miakej tokniuan akin mosentiliaj itech kualtsitsin Kalmej kampa tiMosentiliaj.

Itech xiuit 1970, Simone uan nejua peuak titakalpanouaj itech nechikolmej, uan itech xiuit 1973 peuak titakalpanouaj itech distrito. Itech nejon xiujmej, semi nechpaleuij ininneskayo okseki tokniuan takalpanouanij, kemej Laurier Saumur * uan David Splane. * Satepan ke tamia se ueyi nechikol, David uan nejua timoyolmajxitiayaj keniuj ueliskia okachi kuali titamachtiskej. Nikelnamiki ke se tonal nechiluij: “Léonce, semi nikuelitak motanojnots tein ika timatamik. Semi kuali, sayoj ke ika nochi tein tikijtoj nejua nikchiuaskia eyi tanojnotsmej”. Nejua nimomattoya  nikijtos miak taman itech tanojnotsmej, sayoj ke monekia nikijtos sayoj tein kinamikia.

Tokniuan akin takalpanouayaj itech distrito monekia kinyolchikauaskej tokniuan akin takalpanouayaj itech nechikolmej. Sayoj ke miakej tokniuan ompa Quebec nechixmatiaj, yejua ika kinekiaj tanojnotsaskej nouan keman nikinkalpanouaya tokniuan takalpanouanij. Semi nikuelitaya iniuan nitanojnotsas, sayoj ke amo semi iniuan niyetoya tokniuan takalpanouanij. Se tonal, se tokniuj takalpanojkej nechelnamiktij: “Kuali yetok iniuan xitanojnotsa tokniuan, sayoj ke xikelnamiki ke nejin semana tiualaj nejua tinechitako. Nejua no nikneki xinechyolchikaua”. Semi nechpaleuij tein nechiluij.

Itech xiuit 1976, nechpanok se taman tein semi nechtayokoltij. Nosiuatsin, Simone, kokolispeuak uan momikilij. Semi nechpaleuij keman tisenyetoyaj porin amo kitemouaya itanejnekilis uan semi kitasojtaya Jiova. Nochipa nitanojnotsas nechpaleuij maj amo semi nitayokoyani, uan niktasojkamatilia Jiova porin semi nechpaleuij itech nejon tonalmej. Satepan nimonamiktij iuan Carolyn Elliott, se precursora akin tajtoua inglés uan tapaleuito ompa Quebec. Yejua kiuelita kinpaleuis oksekin, okachiok akin amo semi tajtouaj oso akin kimachiliaj ke amo ininka motekipachouaj. Semi nechpaleuij keman nitakalpanouaya itech nechikolmej.

Itech metsti enero xiuit 1978, nechiluijkej maj nitamachti itech yekinika Tamachtilis tein kiselia akin tekiti kemej Precursor tein mochiuaskia ompa Quebec. Semi nimouia, porin ijkon kemej akin kiseliskiaj tamachtilis, nejua no amo keman nikselijtoya nejon tamachtilis nion nikitstoya amatajkuilol tein ika se momachtia ompa. Sayoj ke moajsiaj miakej akin uejkaujya katkaj precursores. Yejua ika, maski nejua nitamachtiaya, semi nechpaleuijkej akin nikinmachtiaya.

No itech nejon xiuit, mochiuak ueyi nechikol “Fe victoriosa” ompa Montreal itech Estadio  Olímpico. Amo keman mochiujtoya se ueyi nechikol kemej nejon ompa Quebec. Mosentilijkej panoua ochenta mil. Nejua nechixtalijkej maj nitajto iniuan akin kiteixmatiltiaj tanauatilmej. Miakej iniuan nitajtoj uan semi niyolpakik porin kuali toka tajtojkej. Techchiuilijkej netajtanilmej tein mokakik itech radio uan moitak itech televisión panoua 20 horas, uan itech periódico miakkan toka tajtojkej. Nejon tapaleuij maj miakej okachi kiixmatinij Jiova uan itaixpantijkauan.

Itech xiuit 1996, mopatak tein uejkaujya nikchiujtoya. Satepan ke nimoauij, peuak nitapaleuia itech tajtol francés ompa Quebec. Sayoj ke axkan nechtitankej maj nitakalpano itech se distrito ompa Toronto kampa motajtoua inglés. Nikmachiliaya ke amo niueliskia uan semi nimouia niktemakas tanojnotsmej porin amo semi niuelia nejon tajtol. Monekia okachi niktataujtis Jiova uan okachi iuan nitakuaujtamatis.

Ome xiuit tiyetoyaj Toronto uan axkan ueli nikijtoua ke semi kualtsin tein nikpanok. Carolyn nechpaleuij maj amo nimouini nitajtos inglés, uan tokniuan nechpaleuijkej uan nechyolchikaujkej. Niman kuali timouikakej iniuan.

Achto ke mochiuaskia ueyi nechikol tein uejkauaya ome tonal, viernes tiotak nikuelitaya nitanojnotsatiuj kajkalpan kemej se hora, maski monekiaok nikchiuas miak taman. Sekin xa motajtaniayaj keyej niyaya nitanojnotsati, ta onkaya miak tekit. Sayoj ke nikitak ke semi nechyolchikauaya nitajtos iniuan taltikpakneminij. Uan hasta axkan niyolpakiok nochipa keman nitanojnotsa.

Itech xiuit 1998, Carolyn uan nejua techtitankej Montreal maj titapaleuitij kemej precursores especiales. Miak xiujmej nitapaleuij maj moixtali keniuj motanojnotsaskia kampa miakej panouaj uan nitajtouaya iniuan akin kiteixmatiltiaj tanauatilmej uan niknextiaya ke amo melauak tein taltikpakneminij techijtouiliayaj. Axkan, Carolyn uan nejua tikuelitaj tikinnojnotsaskej akin yankuixtok mokaltalikoj Canadá, akin miakpa kinekij okachi kiixmatiskej tein Biblia tamachtia.

Nimoauij sesenta y ocho xiujmej achtoya uan keman itech nitanemilia semi nimotasojkamati. Semi kuali nimomachilia porin nechyolpaktia nitanojnotsas uan porin nikinpaleuiani miakej maj kiixmatikan tein yekmelauj tamachtia Biblia. Satepan ke noixuiuan moskaltijkej, nosiuapil Lise uan inamik mochiujkej precursores regulares. Semi nechyolpaktia nikitas ke Lise kisentoka kiyolpaktia tanojnotsas. Uan okachi nikintasojkamatilia tokniuan akin ika ininneskayo uan inintayolmajxitilis nechpaleuijkej maj kuali nimouika iuan Jiova uan maj nikchiua tekimej tein nikselij itech inechikol. Nikajsikamatik ke uelis tiksentokaskej tikchiujtoskej tekit tein techmakaj itech inechikol Jiova sayoj komo titakuaujtamatij itech iespíritu (Sal. 51:11). Nochipa niktasojkamatilis Jiova porin nechmakak ueyi tatiochiualis maj nikueyitali itokay (Sal. 54:6).