Marcos 16:1-8
-
ToTajtsin Dios okiyoliti Jesús (1-8)
16 Ijkuak otlanki tonal sábado, María Magdalena, María imama Santiago uan noijki Salomé, okikojkej ajuiak para kitlaliliskiaj icuerpo Jesús.
2 Mostlatika ijkuak yokiski tonaltsin uan peua semana,* nonmej siuamej oyajkej kanin otoktoka Jesús.
3 Yejuan omotlajtlaniayaj: “¿Akin techtokilis tetl tlen ika tentsaktok kanin toktok Jesús?”.
4 Pero ijkuak oajkotlachixkej, okitakej yokitokijkej tetl maski ueyi okatka.
5 Ijkuak okalakej kanin otoktoka Jesús, okitakej inyekma okatka se telpochtli tlen okipiaya itlaken ueyak uan istak. Nonmej siuamej omotlajtlachialtijkej.
6 Telpochtli okinmilui: “Amo ximomojtikan. Namejuan onankitemokoj Jesús Nazareno tlen okimiktijkej itech kouitl. Pero amo nikan kajki porque toTajtsin Dios okiyoliti. Xikitakan nikan okatka.
7 Pero xikinmiluitij idiscípulos uan noijki Pedro: ‘Yoyajki Galilea, ompa nankitaskej ijkon ken onamechilui’”.
8 Siuamej oyajkej maski omotlajtlachialtijkej uan ouiuiokayaj. Amikaj itlaj okiluijkej porque omomojtiayaj.*
Notas
^ Nin tonal itoka domingo. Insemana judíos opeuaya ika non tonal.
^ Seki copias miak inpati tlen yiuejkika okinmijkuilojkej ika griego tlami ika tlen kijtoua versículo 8.
