Marcos 3:1-35
3 Jesús oksepa okalak itech se sinagoga.* Ompa okatka se tlakatl tlen amo ueli okoliniaya ima.
2 Fariseos san okitayaj Jesús kox kipajtiskia non tlakatl tonal sábado uan ijkon kiteluiskiaj.
3 Jesús okilui tlakatl tlen amo ueli okoliniaya ima: “Ximoketsa tlatlajkotia”.
4 Satepan Jesús okintlajtlani: “¿Tlen uelis tikchiuaskej sábado? ¿Tikchiuaskej tlen kuali noso tlen amo kuali? ¿Titemiktiskej noso ikaj tikpaleuiskej?”. Pero yejuan amitlaj okijtojkej.
5 Jesús okualanki uan omoyolkoko ijkuak okitak okatkaj yoltlakuauakej. Ye okilui tlakatl: “Xikmelaua moma”. Tlakatl okimela ima uan opajtik.
6 Fariseos okiskej uan san niman omotlapouitoj inuan akinmej okipaleuiayaj Herodes ken kimiktiskiaj Jesús.
7 Jesús uan idiscípulos oyajkej itempa mar. Miakej tlen ochantiayaj Galilea uan Judea iuan oyajkej.
8 Noijki oajsitoj akinmej ochantiayaj Jerusalén, akinmej ochantiayaj Idumea, akinmej ochantiayaj itempa aueyatl Jordán, akinmej ochantiayaj ik Tiro uan Sidón porque okimatkej tlen okichiuaya.
9 Ijkuakon okinmilui idiscípulos makipixtokan se barco tsikitsin para kinejnekis* uan ijkon amo kipatsmiktiskiaj.
10 Jesús miakej yokinpajtijka ikinon kokoxkej okipatsmiktiayaj porque okinekiayaj kikitskiskej para makinpajti.
11 Hasta ejekamej* ixpan omotlankuaketsayaj ijkuak okitayaj uan chikauak okijtouayaj: “¡Te tiiKone Dios!”.
12 Pero Jesús miak uelta okinnauati amikaj makiluikan akin okatka ye.
13 Satepan otlejkok itech se tepetl, okinnotski san akinmej ye okinek uan yejuan okajsitoj.
14 Ye okinpejpenki 12 tlakamej uan okintokayoti apóstoles. Yejuan iuan yaskiaj uan kintitlaniskia matetlapouitij.
15 Noijki kinmakaskia chikaualistli para makinkixtikan ejekamej.*
16 Ijkin omotokayotiayaj 12 tlakamej tlen okinpejpenki Jesús: Simón tlen noijki okitokayoti Pedro,
17 Santiago uan Juan itelpochuan Zebedeo (yejuan noijki okintokayoti Boanerges, nin tlajtoli kijtosneki “ikoneuan tlatikuinili”),
18 Andrés, Felipe, Bartolomé, Mateo, Tomás, Santiago itelpoch Alfeo, Tadeo, Simón Cananita*
19 uan Judas Iscariote tlen satepan okitemakti Jesús.
Satepan Jesús okalak itech se kali.
20 Ompa oksepa miakej oajsitoj ikinon Jesús uan idiscípulos nion amo ueli otlakuayaj.
21 Ijkuak ifamilia Jesús okimatki tlen opanotoka, okitemotoj para kiuikaskiaj porque okimoluiayaj yokuatlapolo.
22 Akinmej otlamachtiayaj tlanauatil tlen oualayaj* Jerusalén, okijtouayaj: “Belcebú* kajki ijtik nin tlakatl. Ye kinkixtia ejekamej* porque Diablo kimaka chikaualistli”.
23 Pero Jesús okinnotski uan okintlapoui ika neskayomej.* Okijto: “¿Ken uelis Satanás iselti mokixtis?
24 Se altepetl pojpoliuis tla akinmej ompa chantij mokualaniaj.
25 Se familia pojpoliuis tla moxexelouaj.
26 Noijki ijkon, Satanás pojpoliuis tla iselti mokualania uan moixnamiki.
27 Tla ikaj kalaki ichan se tlakatl chikauak para kitlachtekis, moneki achto kilpis tlakatl. San ijkon uelis kichtekis nochi tlen onka ichan.
28 Ne namechiluia, toTajtsin Dios kintlapojpoluilis nochi intlajtlakol akinmej tlajtlakolchiuaj uan tlauijuikaltiaj.
29 Pero amo keman kitlapojpoluis akin kiuijuikaltis iespíritu santo. Nochipa yetos tlajtlakole”.
30 Jesús ijkon okijto porque yejuan okijtouayaj: “Nin tlakatl kipia se ejekatl”.*
31 Ijkuakon oajsitoj imama uan ikniuan Jesús, pero omokajkej kiauak uan ikaj okititlankej makinotsati.
32 Miakej ompa okatkaj* uan okiluijkej: “Momama uan mokniuan katej kiauak uan mitstemouaj”.
33 Pero ye okinmilui: “¿Akin nomama uan akinmej nokniuan?”.
34 Jesús okinmitak akinmej ompa okatkaj* uan okijto: “¡Ninmej nokniuan uan nomama!
35 Nochtin akinmej kichiuaj tlen kineki toTajtsin Dios, yejuan nokniuan uan nomama”.
Notas
^ Xikita diccionario.
^ Noso “kitekitiltis”, “kikuis”.
^ Noso “demonios”.
^ Noso “demonios”.
^ Noso “akin okipaktiaya tlapaleuis”.
^ Noso “oualtemouayaj”.
^ Ijkon kitokayotiaj Satanás.
^ Noso “demonios”.
^ Noso “ejemplos”.
^ Noso “demonio”.
^ Noso “oeuatokaj”, “oyetokaj”.
^ Noso “oeuatokaj”, “oyetokaj”.
