¿Tlen techmachtia nochi tlen onka?

“Nimitstlatlaujtia xikintlajtlani yolkamej yejuan mitsmachtiskej, noijki yolkamej tlen patlanij yejuan mitsiluiskej. Noso, xikita tlali ye mitsmachtis uan michimej tlen katej ijtik atl mitsiluiskej” (JOB 12:7, 8).

YIUEJKIKA ixtlamatkej momachtijtokej ken chijchitokej yolkamej uan xochitl, tlen yejuan momachtiaj moixmati ken biomimética, para kinchijchiuaskej yankuikej teposmej uan okseki tlamantli para okachi kuali ma tekipano tlen yionka. Ijkuak tikitas tlen nikan timomachtiskej ximotlajtlani, ¿akin ijkon okinchijchi yolkamej uan xochitl?

Ialetas ballena jorobada

¿Tlen kinmachtia akinmej kinchijchiuaj aviones nin yolkatl? Xamo miak. Ballena jorobada tlen okachi ueyi etik kanaj 30 toneladas, ijkon ken se camión remolque tlen okachi ueyi, ueyak kanaj 12 metros, itlalnakayo tlakuauak uan kinpiaj uejueyij ialetas ken iajasuan. Pero san niman ueli molinia amo oui kichiua. Ijkon mota ijkuak kineki tlakuas yaui intlampa michimej, peua tlejko uan kinyaualojtij, kimomolotstij atl para kintsakuilis michimej ijkon kinnechikoua uan kintoloua.

Ixtlamatkej omotlajtlaniayaj ken ueli san niman molinia nin yolkatl tla itlalnakayo tlakuauak. Otlatemojkej uan okajsikej ken kinpia ialetas non kipaleuia. Itempa ialeta se avión melajtik pero itempa ialeta ballena tojtolontik.

Ijkuak nin ballena jorobada molinia ijtik atl ialetas tojtolontik kipaleuia para atl amo ma kitsakuili ijkuak motlaloua. ¿Ken kichiua? Revista Natural History kijtoua ialetas ballena jorobada kipaleuia kualtsin ma moyaualojtij uan amo ma kitsakuili atl, tla ialetas amo yetoskiaj tojtolontikej amo uelis san niman motlaloskia atl ipan ialetas.

¿Tlen techmachtia? Tla inaleta aviónes yetoskia tojtolontik ken kipia ballena jorobada non kinpaleuiskia para amo oui ma motlalokan ijkuak patlanij uan xamo amo monekis kintlaliliskej miak inaletas aviónes uan amo okachi kinyektlalijtoskej. John Long, akin kinyektlalia aviónes kijtoua: “Xamo yikinchijchiuaskej aviónes tlen kinpiaskej inaletas tojtolontikej ijkon ken ballena”.

Iajasuan gaviota

Akinmej kinchijchiuaj aviónes kinchiuaj inaletas ken totomej pero yikin okitakej ok itlaj uelis kichiuaskej. Revista New Scientist kijtoua: “Akinmej omomachtiayaj Universidad tlen kajki Florida okichijkej se tepostli ken yetoskia se avión amo ueyi uan yejuan kioliniaj maski uejka katej. Avión ueli mokaua ipan ejekatl uan amo molinia, temoua ika itempil ken se gaviota uan ueli san niman oksepa tlejko”.

Gaviotas ueli moliniaj ipan ejekatl porque ueli kinkuelpachouaj inajasuan. Revista noijki kijtoua: “Nin avión ueyak kanaj 60 centímetros, okitlalilijkej se motor tlen kiolinia seki varillas para kinkuelpachos ialetas”. Ijkon ken okichijkej ueli mokaua ipan ejekatl, amo molinia uan temoua ika itenpil kanin katej edificios. Fuerzas Aéreas tlen kajki Estados Unidos kinekij kipiaskej nin avión, para ika kintemoskej armas químicas uan para amo ma kinmiktikan.

Ikxiuan geco

Yolkamej tlen nemij ipan tlali noijki techmachtiaj miak tlamantli. Kajki se yolkatsintli mota ken se lagarto itoka geco ueli tlejko itech tepamitl, desde yiuejkika nin tlamantli tetlajtlachialti (Proverbios 30:28). ¿Ken kichiua para amo uetsi?

Ijkon kichiua pero amo porque kikixtia itlaj para ikaj mopepechos. Ye ueli ijkon kichiua porque itech ikxiuan kipia itsojmio tsikitsitsintin tlen amo mota uan ueli mokitskia kan petstik. Ijkuak itsojmio kimachilia itlaj itech mokitskia, panoua itlaj tlen itoka fuerza de Van der Waals, ik non, amo uetsi. Tejuan amo ueli titlejkoj uan timopepechouaj itech se tepamitl san ika tomauan. Nin yolkatsintli ijkuak mopepechoua itech tepamitl itsojmio okachi momiaktilia uan mokitskia itech tepamitl. Ye yimokitskia ika fuerza de Van der Waals, ik non, ijkuak ijkon kichiua itsojmio kipaleuia para okachi chikauak mokitskis uan ijkon amo uetsi.

¿Uelis techpaleuis tlen kichiua geco? Kema, kinekij kichijchiuaskej se tlamantli uan ma mota ken ikxiuan geco ken se tsotsoli tlen mopepechoua. * Se ixtlamatki okijto itech revista The Economist, se cinta tlen mopepechos “ken geco” nin sapanoua kinpaleuis akinmej “tlapajtiaj ijkuak amo ueli kintlaliliaj adhesivos químicos”.

¿Akin moneki tikueyichiuaskej?

NASA (Administración Nacional de Aeronáutica y del Espacio, de Estados Unidos) kichijchijtokej se robot tlen kipia chikueyi ikxiuan ken se escorpión, uan akinmej chantij Finlandia kichijchijtokej se ueyi tractor tlen kipia chikuase ikxiuan uan san kanin tlejko ken se yolkatl ueyi. Sekimej ixtlamatkej okichijchijkej seki laminas tlen motlapouaj uan motsakuaj ken yetoskiaj se piña tlen kipia okotl. Sekimej ixtlamatkej kichijchijtokej se carro tlen mota ken se michin itoka cofre, kintlajtlachialtia ken ajkui nin michin. Uan oksekimej ixtlamatkej noijki kitaj ken chijchitok iconcha oreja de mar ijkon uelis kichijchiuaskej chalecos antibalas tlen okachi kinpaleuis.

Ixtlamatkej yomomachtijkej miak tlamantli uan okijkuilojkej para ijkon uelis kichijchiuaskej okseki tlamantli. Ixtlamatkej kitlajtoltiaj tlen okijkuilojkej para “ijkon uelis kiyektlaliskej tlen kichijchiuaj”, ijkon kijtoua revista The Economist. Ijkuak sekimej itlaj kichijchiuaj, kitlaliliaj intoka porque yejuan okichijchijkej, revista The Economist kijtoua: “Ijkuak kichijchiuaj itlaj tlen chijchitok ken se yolkatsintli nin kitokayotiaj ‘patentes biológicas’ científicos kijtouaj tlen kichijchiuaj kisa itech nochi tlen onka”.

¿Tleka tlaltikpak chijchitok sapanoua kualtsin? Sekimej ixtlamatkej kijtouaj nochi kuali chijchitok porque opanok miak xiuitl uan nochi omoyektlalijtia. Pero oksekimej ixtlamatkej okse tlamantli mokuayejyekouaj. Itech 2005 microbiólogo Michael Behe okijkuilo itech diario The New York Times: “Onka miak tlamantli tlen kualtsin chijchitok, nin kiteititia ikaj okichijchi uan amo san iselti omonexti. Tla se yolkatl mota ken se pato, ajkui uan tsajtsi ken se pato amo uelis tikijtoskej okse yolkatl, ye se pato”. ¿Tleka ijkon kijtoua nin ixtlamatki? Porque ye kita ken kualtsin chijchitok nin tlaltikpak, ik non, mokuayejyekoua ikaj okichijchi uan amo san iselti omonexti.

Ijkuak ikaj okachi kuali kichijchiua ialetas se avión miakej kipatioitaj tlen kichiua, noijki ijkuak ikaj kichijchiua se tsotsoli tlen mopepechoua noso ikaj kichijchiua se carro tlen okachi tlaxikoua moneki kipatioitaskej tlen kichiua. Ik non, ijkuak okse kichijchiua tlen yikajki uan amo kijtoua akin achto okichijchi uelis kitsakuaskej.

Sekimej ixtlamatkej kitaj ken chijchitok seki tlamantli ipan tlaltikpak para kiyektlaliskej tlen kichijchijtokej, pero yejuan kijtouaj nochi tlen kajki tlaltikpak san iselti omonexti. ¿Melauak tlen kijtouaj? Ijkuak ikaj itlaj kichijchiua moneki yetos ixtlamatki, ik non, ¿akin achto otlachijchi? ¿Akin moneki kipatioitaskej? ¿Akin tlamachtia noso akin kimachtiaj?

Tlen moneki timokuayejyekoskej

Ijkuak mokuayejyekouaj ken chijchitok tlaltikpak miakej kijtouaj ijkon ken salmista akin okijkuilo: “¡Jehová melauak miak tlamantli yotikchijchi! Ika ixtlamatilistli nochi otikchijchi. Tlaltikpak tentok ika nochi tlen otikchijchi” (Salmo 104:24). Pablo, noijki ijkon okijto: “Maski se amo weleti kita n Totajtsi Dios, weleti tikitah itech nochi tlan ye okichijchi. Iwa desde ijkuak okichijchi n tlaltíkpaktli, nochi technextilia onka Dios iwa kipia weletílistli non ayik tlamis” (Romanos 1: 20).

Miakej kitlakaitaj tlen kijtoua Biblia pero mokuayejyekouaj toTajtsin Dios okichi san iselti ma monexti para kualtsin ma mochijchiua tlaltikpak. ¿Ijkon tlamachtia Biblia?

[Nota]

[Tlen moijtoua]

¿Tleka tlaltikpak chijchitok sapanoua kualtsin?

[Tlen moijtoua]

¿Akin okichijchi nochi tlen onka ipan tlaltikpak?

[Recuadro uan foto tlen katej]

Ijkuak ikaj itlaj kichijchiua moneki yetos ixtlamatki, ik non, ¿akin otlachijchi?

Nin avión kualtsin patlani porque ialetas chijchitokej ken iajasuan gaviota

Ixtlamatkej kinekij kichijchiuaskej seki tlamantli ijkon ken ikxiuan geco. Yejuan amo mosokiotiaj uan amo mota ik kanin nejnemij, mopepechouaj san itech tepamitl

Nin carro okichijchijkej ken michin tlen itoka cofre

[Foto]

Aeronave: Kristen Bartlett/ University of Florida; ikxi geco: Breck P. Kent; pez cofre uan carro: Mercedes-Benz USA

[Recuadro uan foto tlen katej]

MOYEKANAJ IKA TLEN KIMACHILIAJ

Tlen kichiuaj okuilintsitsintin kiteititia “sapanoua ixtlamatkej” (Proverbios 30:24, 25). Ma tikitakan tlen kichiuaj askamej uan totomej.

◼ Askamej amo motsatsakuiliaj ¿Ken ueli mokopaj askamej ijkuak yauij kitemotiuij tlen kikuaskej? Sekimej ixtlamatkej británicos kijtouaj sekimej askamej kijnekuij kanin yopanokej uan noijki kichijchijtiuij se ojtli para uelis mokopaskej inchan. Revista New Scientist kijtoua: “Askamej tlen intoka faraón, kichiuaj se ojtli uan nin ojtli moxexeloua kanaj 50 noso 60° grados”. ¿Tlen kijtosneki? Ijkuak askatl mokopa ichan, ajsiti itech ojtli tlen moxexeloua uan yaui kanin amo okachi uejka para san niman kinmajsiti oksekimej askamej. Nin revista noijki kijtoua: “Ojtli tlen moxexeloua kinpaleuiaj askamej para amo san ma motsatsakulikan ijkuak kitemotiuij tlen kikuaskej uan amo ma mopolokan”.

◼ ¿Tlen kinpaleuiaj totomej amo ma mopolokan? Miakej totomej patlanij miak kilómetros para ajsiskej kanin moneki yaskej maski sapanoua seua noso tona. ¿Ken kichiuaj? Ixtlamatkej kijtouaj moyekanaj ika campo magnético tlen kipia tlaltikpak. Pero, revista Science, kijtoua: “Campo magnético tlen kipia tlaltikpak mopatla, ik non, amo nochipa kajki ik norte”. ¿Tlen kinpaleuia totomej amo ma mopolokan ijkuak patlanij? Totomej nochipa kiyektlaliaj tlen kinpaleuia amo ma mopolokan ijkuak kitaj kanin kisa tonaltsin. Pero nin tlamantli mopatla, ik non, ixtlamatkej kijtouaj totomej moyekanaj ika se “reloj biológico tlen kinpaleuia ma kitakan tlen tonal katej”, ijkon kijtoua nin revista.

¿Akin okimachti askatl ma kichiua nochi nin tlamantli? ¿Akin okichi totomej amo ma mopolokan uan ma kipiakan se reloj biológico? ¿Tleka kimatij kitekitiltiskej nin tlamantli? ¿San iselti omonexti? ¿Noso ikaj okichijchi?

[Foto]

© E.J.H. Robinson 2004