Techtlapoui ken otimoskalti.

Onineski Italia itech 1943. Nokniuan uan ne otimoskaltijkej itech se altepetsintli. Notajtsin otlatokaya uan okatka kuajxinki. Notajtsin uan nonantsin otechmachtijkej religión católica.

¿Tleka otimochi teopixki?

Ijkuak onikatka nichokotsin onechpaktiaya nias misa para nikkakis teopixki. Onechtlajtlachialtiaya ken otlajtouaya uan tlen ompa okichiuaya. Ik non, oniknekiaya noijki nimochiuas teopixki. Ijkuak onikpiaya 13 xiuitl, nonantsin onechuikak kanin kinmachtia akinmej kinekij yetoskej teopixkej.

¿Omitsmachtijkej ika Biblia?

Amo. Ijkuak onikpiaya 15 xiuitl, akin onechmachtiaya san onechmakak se amochtli tlen okipiaya Evangelios, ompa techtlapouia tlen okichi Jesús uan miak uelta oniktlajtolti. Ijkuak onikpiaya 18 xiuitl onichantito Roma para ompa nimomachtiskia itech se universidad católica, ompa otlayekanaya teopixki tlen kixmati ken papa. Ompa onimomachti latín, griego, historia, filosofía, psicología uan teología. Amo otimomachtiayaj Biblia, ijkuak otikchiuaya misa tonal domingo san otiktlajtoltiayaj uan otikkakiayaj.

Ijkuak otikyekanaya seminario, ¿noijki otitlamachtiaya?

Ne onitlayekanaya, pero noijki onitlamachtiaya itlanauatiluan Concilio Vaticano II.

¿Tleka ayakmo otitlaneltokak itech moreligión?

Porque onikitak okichiuayaj eyi tlamantli, akinmej opouiayaj teopan omokajkalakiayaj itech política, okinkauiliayaj teopixkej uan akinmej ompa oyayaj ma tlajtlakolchiuakan uan onikitak seki tlamantli tlen otlamachtiayaj amo melauak. Ne onimotlajtlaniaya tla toTajtsin Dios techtlasojtla, ¿tleka kijtouaj ijkuak ika ixpoliui kitlajyouiltia itech tlitl? ¿Moneki tiktekitiltiskej se rosario para timotlatlaujtiskej? *

¿Tlen otikchi?

Ika nochi noyolo onikilui toTajtsin Dios ma nechpaleui, onikko Biblia de Jerusalén tlen okikixtijkej ika tlajtoli italiano uan opejki niktlajtoltia. Se domingo kualkan ijkuak otlanki misa, oajsitoj ome tlakamej. Onechiluijkej yejuan okatkaj iTlaixpantijkauan Jehová uan opejki timotlapouiaj. Otiuejkajkej kanaj se hora porque otimotlapouijkej tlen kijtoua Biblia uan itech religión tlen melauak.

¿Tlen otimokuayejyeko itech iTlaixpantijkauan Jehová?

Onechtlajtlachialti onikitak yejuan melauak okineltokayaj tlen onechiluiayaj, noijki amo oui okinmajsiayaj textos itech se Biblia católica. Satepan se iTlaixpantijka Jehová tlen itoka Mario opejki yaui seminario para nechmachtiti, nochi sabados a las 9 kualkan maski sapanoua okiauiaya ye oyaya.

¿Tlen okijtouayaj oksekimej teopixkej ijkuak omitsmachtiayaj?

Onikinmilui touan ma momachtikan, pero amo okipatioitakej momachtiskej Biblia. Ne sapanoua onechpaktiaya. Tlen onimomachtijtoka sapanoua kualtsin. Onikajsikamatki tleka toTajtsin Dios kitekauilia ma pano tlen amo kuali.

¿Akinmej omitsyekanayaj omitsiluijkej ayakmo ximomachti Biblia?

Itech xiuitl 1975 miak uelta onia Roma para nikinmiluis tlen onimomachtijtoka. Akinmej onechyekanayaj onechiluijkej non amo melauak, pero amikaj onechilui ika Biblia. Itech 9 de enero xiuitl 1976, onikijkuilo se carta kanin onikinmiluiaya ayakmo nipouiskia itech religión católica uan oniktitlanki Roma, ome tonal satepan onikiski itech seminario uan onia kanin monechikouaj iTlaixpantijkauan Jehová. Non tonal omochijtoka se ueyi nechikol uan miakej ompa okatkaj. ¡Sapanoua onimotlajtlachialti! Nochtin okipiayaj Biblia uan okintemouayaj textos tlen okijtouaya akin otlamachtijtoka.

¿Tlen omitsilui mofamilia?

Sekimej okualankej. Pero satepan onikmatki se nokni noijki omomachtijtoka iuan iTlaixpantijkauan Jehová ompa Lombardía, se altepetsintli tlen kajki norte ompa Italia. Se tonal oniktlajpaloto nokni uan iTlaixpantijkauan Jehová onechpaleuijkej ma nikajsi kanin nitekipanoskia uan kanin nichantiskia. Non xiuitl onimochi niiTlaixpantijka Jehová.

¿Timokuayejyekoua kuali tlen otikchi?

¡Kema! Axkan nikmachilia nimouika iuan toTajtsin Dios porque ika Biblia onikixmatki akin ye uan amo san tlen kijtoua tlakamej noso tlen tlamachtiaj itech teopan. Axkan nikinmachtia oksekimej uan kuali nikmati nikinmachtia tlen melauak.