¿San tlanauatilmej uelis techpaleuiskej?

XAMO ijkuak otikatkaj titelpochmej totatajuan otechnauatiayaj tlen tikchiuaskej. Satepan otikajsikamatkej ijkon okichiuayaj porque techtlasojtlaj. Ik non, maski axkan ayakmo technauatiaj, ualeua tikchiuaj tlen otechiluiayaj porque tikitaj techpaleuia.

Ika Biblia Jehová noijki technauatia tlen moneki tikchiuaskej. Ompa kijtoua amo moneki tikinueyichiuaskej teotsitsintin, tiauilnemiskej nion titlachtekiskej (Éxodo 20:1-17; Hechos 15:28, 29). Ijkuak okachi timouikaj iuan Jehová tikajsikamatij tlen technauatia melauak techpaleuia (Efesios 4:15; Isaías 48:17, 18; 54:13).

Pero ualeua, Biblia amo techiluia tlen moneki tikchiuaskej. Ik non, sekimej mokuayejyekouaj uelis kichiuaskej tlen yejuan kinekij maski amo kuali, porque Biblia amo kijtoua tlen kineki toTajtsin Dios.

Akinmej ijkon mokuayejyekouaj kipejpenaj tlen amo kuali uan satepan moyolkokouaj. Yejuan san kitaj tlanauatilmej tlen kipia iTlajtol toTajtsin Dios pero amo kajsikamatij ompa noijki kijtoua ken mokuayejyekoua. Tla timomachtiaj Biblia tikmatiskej ken mokuayejyekoua Jehová uan tikchiuaskej tlen ye kineki ijkuak itlaj tikpejpenaskej. Tla ijkon tikchiuaj tikyolpaktiskej uan tejuan noijki tiyolpakiskej (Efesios 5:1).

Tlen okichijkej itekipanojkauan Jehová

Ijkuak tiktlajtoltiaj tlen okinpanok yiuejkika itekipanojkauan Jehová, tikitaj okiyolpaktijkej maski amo okatka se tlanauatil porque yejuan okajsikamatiayaj ken mokuayejyekoua. Ijkon okichi José. Ijkuak isiua Potifar okilui iuan mamoteka, amo okatka se tlanauatil tlen okijtouaya amo omonekiaya auilnemiskej. Pero okimatiaya non amo kuali okatka uan noijki okimatiaya Jehová amo kipaktiskia tla ijkon kichiuaskia (Génesis 39:9). Xamo José okajsikamatiaya tlen okijto Jehová ijkuak okinnamikti achto tlakatl uan siuatl itech xochitlali Edén (Génesis 2:24).

Matikitakan tlen okipanok se itekipanojka Jehová, itech Hechos 16:3 kijtoua Pablo okichiuili circuncisión Timoteo achto yaskiaj kintlajpalotiuij tokniuan. Satepan itech versículo 4 kijtoua yejuan okintlajpalouayaj tokniuan uan okinmiluiayaj tlen tlayekankej uan apóstoles okijtojkej ompa Jerusalén, tlanauatilmej okijtouayaj akinmej okichiuayaj ken Cristo amo omonekiaya kimochiuiliskej circuncisión (Hechos 15:5, 6, 28, 29). Ik non, ¿tleka Pablo okichiuili circuncisión Timoteo? Porque okatkaj miakej tokniuan judíos uan okimatiayaj itajtsin Timoteo okatka griego. Pablo amo okinekiaya tokniuan makikauakan Jehová. Ye okinekiaya nochtin akinmej okichiuayaj ken Cristo ‘mamotemaktikah innawak oksikimeh, para yejwah makijtokah kox kuali tlan kichiwah ixpa n Dios’ (2 Corintios 4:2; 1 Corintios 9:19-23).

Pablo uan Timoteo nochipa okichiuayaj tlen kuali. Romanos 14:15, 20, 21 uan 1 Corintios 8:9-13; 10:23-33 kijtoua Pablo okinekiaya nochtin kuali mamouikakan iuan Jehová, ik non, amo okichi itlaj tlen oksekimej kitaskiaj amo kuali. Pablo noijki okijkuilo: “Porke sanwel Timoteo satlawel motlamia por nomejwah kemi ne. Nochteh n oksikimeh okachi kintekipachoa san tlan yejwah kinekih iwa amo tlan Cristo Jesús kimonekiltia. Nomejwah kuali nonkimatokeh kenijki yektekiti n Timoteo, iwa nonkimatokeh noiwa kenijki onechpalewi kemi se tekone non kipalewia ita, ijkuak otitetlapowijkeh n kualitlájtoli” (Filipenses 2:20-22). Tlen yejuan okichijkej miak ipati. Maski amo okatka se tlanauatil tlen okijtouaya tlen omonekiaya kichiuaskej, amo okichijkej tlen yejuan okinekiayaj, okichijkej ken Jehová uan Jesús uan okiteititijkej okintlasojtlayaj ikniuan uan okinekiayaj kuali mamouikakan iuan Jehová.

Axkan matikitakan tlen okichi Jesús. Ye okijto akin kajsikamati ken mokuayejyekoua Jehová amo san kichiua tlen kijtoua se tlanauatil (Mateo 5:21, 22, 27, 28). José, Pablo, Timoteo uan Jesús amo okichijkej tlen yejuan okinekiayaj maski amo okatka se tlanauatil, yejuan omoyekankej ika ome tlanauatilmej tlen okijto Jesús, omonekiaya kitlasojtlaskej Jehová uan oksekimej (Mateo 22:36-40).

Tlen moneki tikchiuaskej

Amo moneki tikitaskej Biblia ken se amochtli tlen techiluis nochi tlen moneki tikchiuaskej. Maski amo tikpiaj se tlanauatil tlen techiluis tlen moneki tikpejpenaskej, moneki tikitaskej ken mokuayejyekoua Jehová, ijkon uelis tikchiuaskej tlen ye kipaktia uan amo nochipa techiluijtoskej tlen moneki tikchiuaskej (Efesios 5:17; Romanos 12:2). ¿Tleka kipaktia Jehová ijkon matikchiuakan? Porque ijkon tikteititiaj tiknekij mayolpaki uan amo tikchiuaj san tlen tejuan tiknekij, noijki tikteititiaj timotlasojkamatij porque ye techtlasojtla. Tejuan noijki tiktlasojtlaj Jehová, ik non, tiknekij tikchiuaskej tlen ye kipaktia (Proverbios 23:15; 27:11). Matikilnamiktokan tla timoyekanaj ika tlen kijtoua Biblia kuali timouikaskej iuan Jehová uan tiyolpakiskej.

Matikitakan ken tikchiuaskej tlen yotimomachtijkej.

Kuali matikpejpenakan tlen ika timoyolpaktiaj

Matikijtokan se telpochtli kineki kikouas se disco tlen kipia tlakuikalmej uan miakej kijtouaj kualtsin mokaki pero satepan kita ikuitlapan disco uan kita tlakuikalmej kijtouaj tlen pitsotik. Noijki kimati akin tlakuika kijtoua tlajtolmej tlen amo kuali. Telpochtli kitlasojtla Jehová, ik non, amo kineki kiyolkokos ika tlen kipejpenas. Pero, ¿tlen kipaleuis makajsikamati tlen kineki Jehová makichiua?

Ijkuak Pablo okintlajkuilili tokniuan tlen ochantiayaj altepetl Galacia, okijto tlen kichiua akin san kineki moyolpaktis uan tlen kichiua akin kineki kiyolpaktis Jehová. Tla tiknekij tikyolpaktiskej Jehová moneki titetlasojtlaskej, tiyolpakiskej, timoyolseuijtoskej, titlaxikoskej, titeiknomatiskej, titlaneltokaskej, moneki tiyetoskej tiyolyamankej uan tikmatiskej timonauatiskej. Pero, ¿tlen kichiua akin san kineki moyolpaktis? Pablo okijto: “Amo owi motah akimeh kichiwah tlan kinyoltilana inkuerpo: momekatijtinemih, kichiwah tlan pitsotik, kichiwah tlan teixpolo, kinweyiliah diosmeh non san kinmachijchiwah, tetlajchiwiah, tekokoliah, kichiwah mamokuakualanikah oksikimeh, chawatih, kualankamikih, kichiwah itla san para makinmitakah, kinxexeloah n tokniwah, kinmachtiah tlan amo milák, xikojmikih, tlawankeh, fiero mopaktiah itech ilwimeh, iwa kinchiwah oksikimeh tlajtlákolteh kemi ninteh. Ne nomechilia, kemi achto yonomechili, akimeh ijkó kichiwah, mach kalakiskeh [...] kan Dios tlanawatijtok” (Gálatas 5:19-23).

Itech ninmej versículos, Pablo okijto san seki tlamantli tlen Jehová amo kipaktia, ik non, xamo timokuayejyekoskej: “Uelis nimoyolpaktis ika okseki tlamantli tlen ye amo okijto”. Pero moneki kuali timokuayejyekoskej ken timoyolpaktiskej porque onka “oksikimeh tlajtlákolteh kemi ninteh” maski Pablo amo okinmijkuilo. Akinmej nochipa tlajtlakolchiuaj ika okseki tlamantli tlen Biblia amo kijtoua, amo chantiskej itech xochitlali.

Tlen yotikitakej techmachtia moneki tikitaskej uan tikmatiskej tlen tlamantli amo kipaktia Jehová. ¿Oui ijkon tikchiuaskej? Matikijtokan tepajti techiluia amo moneki tikkuaskej itlaj tsopelik, non kijtosneki amo uelis tikkuaskej seki tlamantli ken pastel noso helado. Ijkon okipanok tokni tlen okinekiaya kikouas disco, nonmej tlakuikalmej amo okipaleuiaya makiyolpakti Jehová. Amo moneki se tlanauatil para tikmatiskej nonmej tlakuikalmej amo kipaktia Jehová. Principios bíblicos techpaleuiskej ijkuak tikpejpenaskej tlen tiktlajtoltiskej, tikitaskej, ken timoyolpaktiskej uan tlen tikitaj itech internet.

Kuali matimotlakentikan uan matimoyektlalikan

Itech Biblia noijki tikinmajsij principios bíblicos tlen techiluiaj ken moneki timotlakentiskej uan timoyektlaliskej. Tla ijkon tikchiuaj, timotaskej ken moneki. Tiktlasojtlaj Jehová, ik non, tikchiuaj tlen ye kipaktia uan amo san tlen tejuan tiknekij. Ijkon ken yotikitakej, maski amo onka se tlanauatil tlen nochipa techiluis tlen tikchiuaskej, Jehová kineki kuali matimoyekanakan. Tla tikatej itech okse altepetl xamo tlatlamantli motlakentiaj uan moyektlaliaj pero principios bíblicos techpaleuiaj para kuali matimoyekanakan maski san kanin tiyetoskej.

1 Timoteo 2:9, 10 kijtoua: “N siwameh makimotlalilikah intlakeh kemi Dios tlanawatia, iwa amo mamochijchiwakah ika tlakemitl patio, ika oro, ika perlas, amo satlawel makiyektlalikah intsonkal para moweyiliskeh. Okachi kuali, n tokniwah makinmitakah por tlan kuali kichiwah, kemi moneki makichiwakah n siwameh non ya kitlakitah n Totajtsi Dios”. Ik non, akinmej tikchiuaj ken Cristo moneki timokuayejyekoskej ken techitaj oksekimej ijkuak kitaj ken timotlakentiaj. Tla ijkon tikchiuaj xamo okachi kinekiskej techkakiskej ijkuak tikintlapouiaj (2 Corintios 6:3). Moneki kuali timotlakentiskej uan timoyektlaliskej, ijkon tikteititiskej tiknekij oksekimej kuali mamouikakan iuan Jehová (Mateo 18:6; Filipenses 1:10).

Moneki kuali timotlakentiskej uan timoyektlaliskej, ijkon nochtin akinmej techitaskej kuali mouikaskej iuan Jehová. Ik non, Amo matikchiuakan san tlen tejuan tiknekij, matikchiuakan ken apóstol Pablo. Ye okijto: “Xikchiwakah tlan ne nikchiwa, porke ne nikchiwa tlan Cristo okichi” (1 Corintios 11:1). Noijki okijkuilo: “Porke nion Cristo okichi san tlan ye inewia okipaktiaya”. Nin techmachtia: “Akimeh tichikawakeh itech totlaneltokalis, moneki matikimpalewikah akimeh amo chikawak intlaneltokalis, iwa amo san tejwah matimopaktikah. Tisejsemeh moneki matikpaktikah se tokni iwa ijkó okachi moskaltis itlaneltokalis itech Cristo” (Romanos 15:1-3).

Kuali matimokuayejyekokan

¿Tlen techpaleuis kuali matikpejpenakan tlen tikchiuaskej maski amo tikpiaskej se tlanauatil? Tla nochipa tiktlajtoltiaj Biblia, timomachtiaj uan timokuayejyekouaj, tikmatiskej tlen kineki Jehová pero moneki timochijchikauaskej. Ijkon ken se konetsintli amo san niman moskaltia uan moneki panos seki xiuitl, tejuan noijki amo san niman tikajsikamatij ken mokuayejyekoua Jehová pero amo tikualanij nion timosotlauaj. Ik non, moneki tiktlajtoltiskej Biblia uan timoyekanaskej ika tlen techmachtia (Hebreos 5:14).

Tla tikchiuaj tlen kijtouaj itlanauatiluan Jehová tikteititiskej titetlakamatij pero tla timoyekanaj ika principios bíblicos tikteititiskej kuali timouikaj iuan Jehová. Non techpaleuis matikchiuakan ken Ye uan iKone. Ik non, ijkuak itlaj tikpejpenaskej moneki timoyekanaskej ika tlen kijtoua Biblia. Tla tikyolpaktiaj toTajtsin Dios noijki tiyolpakiskej.

[Foto]

Maski itech oksekimej altepemej tlatlamantli motlakentiaj uan moyektlaliaj, moneki timoyekanaskej ika principios bíblicos