Sekimej techtlajtlaniaj

¿Tlen kijtosneki tlajtoli “katlej mach [amo] tlaneltokak” tlen Pablo okijto itech 2 Corintios 6:14 Itlajtol totajtzin Dios [NHY]?

2 Corintios 6:14 Itlajtol totajtzin Dios [NHY] kijtoua: “Amo iwan ximosetilikan katlej mach [amo] tlaneltokak inawak Cristo”. Tlen kijtouaj okseki versículos kiteititiaj tlen Pablo okijto kijtosneki akinmej amo touan momachtiaj. Okseki versículos kanin Pablo okijkuilo “katlej mach [amo] tlaneltokak” noijki ijkon kiteititiaj.

Pablo okinmajuak tokniuan porque okinteluiayaj inmikniuan inmixpan tekiuajkej tlen amo otlaneltokayaj (1 Corintios 6:6). Porque ijkuak omoteluiayaj, oyayaj innauak jueces tlen otekipanouayaj Corinto. Itech okse carta tlen okijkuilo Pablo, kijtoua Satanás “kinmixtlapoyawaltia” akinmej amo tlaneltokaj “para amo makajsikamatikah, iwa para amo makitakah itlawilnextilis n kualitlájtoli”. Yejuan amo kinekij kitekichiuiliskej Jehová. Apóstol Pablo okijto: “Ijkuak aka kineltoka n Totajtsi Dios, moachiwa tlan okixtsaktoka itlalnamikilis” (2 Corintios 3:16; 4:4).

Miakej tlen amo tlaneltokaj kichiuaj tlen amo kuali noso kinueyichiuaj dioses (2 Corintios 6:15, 16). Pero amo nochtin kinmixnamikij akinmej kitekichiuiliaj Jehová porque sekimej kinpaktia tlen timomachtiaj. Oksekimej tlen amo tlaneltokaj kipiaj innamik noso insiua tlen kitekichiuilia Jehová uan kuali san sekan katej (1 Corintios 7:12-14; 10:27; 14:22-25; 1 Pedro 3:1, 2). Pablo miak uelta okitekitilti tlajtoli “katlej mach [amo] tlaneltokak” para kijtos akinmej amo touan momachtiaj. Yejuan amo pouij inmiuan akinmej kineltokaj toTeko (Hechos 2:41; 5:14; 8:12, 13).

Tlen kijtoua 2 Corintios 6:14 Itlajtol totajtzin Dios [NHY] techpaleuia miak. Non texto noijki kinpaleuia akinmej kinekij monamiktiskej (Mateo 19:4-6). Akin yomoapolakti moneki yetos ixtlamatki uan amo monamiktis iuan akin amo tlaneltoka. Porque amo san se tlamantli mokuayejyekouaj nion amo san se tlamantli tlaneltokaj.

Pero ¿ken moneki tikinmitaskej akinmej momachtiaj uan monechikouaj? ¿Ken moneki tikinmitaskej akinmej tetlapouiaj pero ayamo moapolaktiaj? ¿Kijtosneki yejuan amo tlaneltokaj? Amo. Amo moneki tikijtoskej amo tlaneltokaj akinmej kinpaktia tlen kijtoua Biblia uan kipatlaj innemilis para moapolaktiskej (Romanos 10:10; 2 Corintios 4:13). Biblia kijtoua maski Cornelio ayamo omoapolaktiaya ye “okimopantiayah iwa okiweyijkachiwayah Dios” (Hechos 10:2).

Xamo se tokni uelis mokuayejyekos amo kixnamiki tlen kijtoua 2 Corintios 6:14 Itlajtol totajtzin Dios [NHY] tla ye monamiktis iuan ikaj tlen tetlapouia pero ayamo moapolaktia. Pero ¿kuali tla ijkon mokuayejyekos? Amo, porque apóstol Pablo okinmilui ninmej tlajtolmej siuamej tlen yoixpoliuik innamik. Ye okijto: “N iknosiwatl weletis oksepa monamiktis iwa akin ye kinekis, pero mayeto se tlakatl non kineltoka Toteko Dios” (1 Corintios 7:39). Ijkon ken kijtoua nin texto moneki timonamiktiskej iuan akin kitekichiuilia toTajtsin Dios.

¿Tlen kijtosneki tlajtoli “non kineltoka Toteko Dios” uan tlajtoli “kineltoka Cristo”? Itech Romanos 16:8-10 uan Colosenses 4:7 Pablo okijto sekimej ‘okineltokayaj Toteko Dios’ noso ‘okineltokayaj Cristo’. Nonmej versículos kijtouaj sekimej ‘okitekitiliayaj n Toteko’, ‘milák okineltokayaj Cristo’, tokniuan ‘non satlauel okintlasojtlayaj’, ‘tekitkej yekmilajka’ uan ‘otlapaleuiayaj itech iteki n Toteko’

¿Keman peua ikaj ‘tlapaleuia itech iteki n Toteko’? Ijkuak kichiua tlen moneki kichiuas se tlakeuali uan kixtopeua tlen kineki kichiuas. Jesús okijto: “Tla ikaj kineki kichiuas ken ne, makixtopeua tlen kineki kichiuas uan makikitski ikuau tlen tetlajyouiltia uan nochipa makichiua ken ne” (Mateo 16:24). Akin ijkon kichiua motemaktia ixpan toTajtsin Dios para kichiuas tlen ye kineki. Satepan moapolaktia uan toTajtsin Dios kiselia para makitekichiuili. a Ijkuak ikaj monamiktia iuan “non kineltoka Toteko Dios”, kijtosneki monamiktia iuan akin melauak kitekichiuilia toTajtsin Dios uan ye “itlakewal n Totajtsi Dios iwa n Toteko Cristo Jesús” (Santiago 1:1).

Tiyolpakij ijkuak ikaj touan momachtia Biblia uan mochijchikaua okachi tlaneltokas. Pero ye ok moneki motemakas ixpan Jehová, okachi kitekichiuilis uan kikauas seki tlamantli. Noijki moneki kipatlas inemilis uan kichiuas okseki tlamantli tlen miak ipati para motemaktis ixpan Jehová uan moapolaktis. Ye moneki kichiuas nochi non tlamantli tla kineki monamiktis noso kineki kichiuas itlaj miak ipati.

Se tokni uelis kijtos peuas moixmatis iuan ikaj tlen momachtijtok Biblia uan kichias mamoapolakti para iuan monamiktis. Pero amo kuali tla ijkon mokuayejyekos. Porque akin momachtijtok amo kiteititis kox melauak kitlasojtla toTajtsin Dios para moapolaktis. Xamo ye kinekis moapolaktis porque tokni kineki iuan monamiktis.

Ijkuak ikaj peua momachtia uan tetlapouia, mochijchikaua para satepan moapolaktis. Ik non, akin kineki monamiktis moneki kichiuas iuan akin “kineltoka Toteko Dios”. ¿Tlen panos tla ikaj kineki monamiktis pero ayamo moapolaktia maski ifamilia momachtia desde ijkuak ye okatka tsikitsin uan miak xiuitl yimonechikoua? ¿Tleka amo motemaktia ixpan Jehová? ¿Tleka amo kineki? ¿Amo tlaneltoka? Kijtosneki ye amo kitekichiuilia toTeko maski tlaneltoka.

Techpaleuia miak ijkuak Pablo okijto ken moneki timonamiktiskej (Isaías 48:17). Ijkuak akinmej monamiktiaj kitekichiuiliaj Jehová, kinpaleuia kuali mayetokan uan kuali mamouikakan iuan Jehová. Yejuan san se tlamantli kichiuaj uan san se tlamantli mokuayejyekouaj. Non kinpaleuia mayolpakikan. Akin monamiktia iuan akin “kineltoka Toteko Dios” kiteititia kuali mouika iuan Jehová. Ijkon ye nochipa kiteochiuas porque Biblia kijtoua ye ‘yolmelajki iuan akin yolmelajki’ (Salmo 18:25).

[Nota]

[Foto]

‘Yolmelajki iuan akin yolmelajki’