Sekimej techtlajtlaniaj

¿Tleka iTlaixpantijkauan Jehová amo kichiuaj brindis?

Yiuejkika miakej okichiuayaj brindis ika copa tlen okipiaya vino noso okse tlamantli tlen okipiaya alcohol. Sekimej ijkuak kichiuaj brindis kinuitekij incopas uan akin kichiua brindis kijtoua oksekimej mayolpakikan, kuali mayetokan, miak xiuitl mayoltokan noso kijtoua okseki tlamantli. Akinmej ompa katej kijtouaj kuali tlen okijto noso kinmajkokuij incopas uan konij tepitsin vino. Sekimej kijtouaj amo tlajtlakoli kichiuaskej brindis pero iTlaixpantijkauan Jehová kimatij amo kuali kichiuaskej brindis.

Pero non amo kijtosneki iTlaixpantijkauan Jehová amo kinekij mayolpakikan oksekimej noso kuali mayetokan. Itech achto siglo akinmej opouiayaj itech Cuerpo Gobernante ijkuak otlanki okintlajkuililijkej tlanechikolmej, okijtojkej seki tlajtoli tlen kijtosneki “kuali xiyetokan” noso “nochipa kuali xiyetokan” (Hechos 15:29). Noijki sekimej tlen okitekichiuiliayaj toTajtsin Dios okinmiluijkej tekiuajkej: “¡Nochipa mayolto noteko tekiua David!” “¡Uejkika mayolto tekiua!” (1 Reyes 1:31; Nehemías 2:3).

¿Keman opejki kichiuaj brindis? Revista Akin Tetlapouijtok 1 de marzo 1968 kipia seki tlajtoli tlen kajki itech Encyclopædia Britannica (1910), tomo 13, página 121, ompa kijtoua: “Akinmej tlakonij uan kijtouaj kuali mayetokan kichiuaj ken yiuejkika sekimej okinchiuiliayaj brindis inteotsitsiuan uan akinmej yoixpolikej. Griegos uan romanos okinokiayaj vino noso licor ijkuak otlakuayaj para kiteititiskiaj okintlakaitayaj inteotsitsiuan. Noijki ijkuak oiluichiuayaj, okinchiuiliayaj brindis inteotsitsiuan uan akinmej yoixpolikej”. Non enciclopedia noijki kijtoua: “Akinmej otlakoniayaj yetoskia ken otlamanayaj uan okichiuayaj brindis para kuali mayetokan akinmej yoltokej”.

¿Ok ijkon kichiuaj axkan? Amochtli International Handbook on Alcohol and Culture tlen okichijchijkej itech xiuitl 1995 kijtoua: “Brindis xamo kiteititia tlamanali tlen yiuejkika okinmakayaj inteotsitsiuan. Okinmaniliayaj estli noso vino para makinmaka tlen okinekiayaj uan okijtouayaj ‘¡uejkika xiyolto!’ noso ‘¡kuali xiyeto!’”.

Akinmej melauak kiueyichiuaj toTajtsin Dios ualeua kichiuaj noso kiseliaj seki tlamantli tlen yiuejkika okichiuayaj akinmej amo okitekichiuiliayaj toTajtsin Dios. Biblia kijtoua yiuejkika okitekitiltiayaj tlakilotl tlen itoka granada. Se enciclopedia tlen tlajtoua itech Biblia kijtoua: “Seki religiones okitekitiltiayaj granada ken itlaj santo”. Pero toTajtsin Dios okijto ijkuak kichijchiuaskiaj intlaken teopixkej, itempa makitlalilikan granadas tlen ochijchitoka ika hilo. Noijki okintlaliliayaj granadas tlaketsalmej de cobre tlen okatkaj itech teokali tlen okichijchi Salomón (Éxodo 28:33; 2 Reyes 25:17). Anillos tlen kimotlaliliaj akinmej yomonamiktijkej yiuejkika itlaj okijtosnekiaya. Pero axkan miakej amo kimatij tlen okijtosnekiaya uan kimotlaliliaj para oksekimej makimatikan yomonamiktijkej.

¿Kox kuali akinmej tlakonij para kinueyichiuaskej teotsitsintin? Se tonal akinmej okipaleuiayaj Siquem uan okiueyichiuayaj Baal “okalakej kanin okiueyichiuayaj inteotsin uan otlakuajkej, otlakonikej uan okiuijuikaltijkej Abimélec”, ikone Gedeón (Jueces 9:22-28). ¿Uelis akin okitekichiuiliaya Jehová, tlakoniskia inmiuan akinmej okiueyichiuayaj se teotsin para makitlajyouilti Abimélec? Ijkuak israelitas amo okitlakamatkej Jehová, profeta Amós okijto: “Omotekakej inakastlan nochi altares, ipan tsotsoli tlen okitlanejkej uan kanin okinueyichiuayaj inteotsitsiuan, okonikej vino tlen okitemakakej akinmej okinchiualtijkej itlaj makitlaxtlauakan” (Amós 2:8). ¿Ijkon kichiuaskia akin kitekichiuilia toTajtsin Dios maski san konis noso kinokis vino? (Jeremías 7:18). ¿Tikneltoka se itekipanojka Jehová kajkokuiskia se copa vino para kitlajtlanilis se teotsin ikaj makipaleui noso makiteochiua?

Yiuejkika itekipanojkauan Jehová okajkokuijkej inmauan para mapano itlaj kuali. Pero okajkokuijkej inmauan ixpan Dios tlen melauak. Biblia kijtoua: “Salomón omoketski ixpan ialtar Jehová [...] uan okinmajkok imauan, okijto: Oh Jehová iDios Israel. Amo kajki okse ken te [...]. Xikinualkaki itech iluikak. Techkaki uan techtlapojpolui” (1 Reyes 8:22, 23, 30). Noijki, “Esdras okiueyichi Jehová [...] uan nochtin okijtojkej: “¡Amén! ¡Amén!” uan okajkokuikej inmauan. Satepan omotlankuaketskej uan omixtlapachojkej ixpan Jehová” (Nehemías 8:6; 1 Timoteo 2:8). Amo okichijkej para kitlajtlaniliskiaj se teotsin makinpaleui (Isaías 65:11).

Axkan miakej amo kichiuaj brindis para makinpaleui noso makinteochiua se teotsin pero noijki amo kimatij tleka kajkokuij incopa. Maski oksekimej amo kimatij tleka ijkon kichiuaj amo kijtosneki akinmej kichiuaj ken Cristo moneki ijkon kichiuaskej.

Miakej kimatij iTlaixpantijkauan Jehová amo kichiuaj seki tlamantli tlen oksekimej kichiuaj. Miakej kitlajpalouaj bandera noso okseki tlamantli tlen kineskayotia inmialtepe, yejuan mokuayejyekouaj ika non tlamantli amikaj kiueyichiuaj. Akinmej kichiuaj ken Cristo amo ijkon kichiuaj pero amo kinmiluiaj oksekimej ijkon makichiuakan uan kintlakaitaj ijkuak katej kanin sekimej kichiuaj non tlamantli. Akinmej kiueyichiuaj Jehová amo kitlajpalouaj bandera noso okseki tlamantli tlen kineskayotia se altepetl porque kinekij kitlakamatiskej toTajtsin Dios (Éxodo 20:4, 5; 1 Juan 5:21). Miakej ijkuak kichiuaj brindis amo mokuayejyekouaj kiueyichiuaj se teotsin. Pero akinmej kichiuaj ken Cristo kimatij nin tlamantli poui itech religión tlen amo melauak uan yetoskia ken kitlajtlaniliskiaj iluikak noso ikaj tlen okachi chikauak makinpaleui (Éxodo 23:2).